1 K’ehomaq reetal, ex was wiitz’in, ma ink’a’ jultik eere rilb’al chi tz’iib’anb’il li raatin li profeet aj ^aTzenos, li kixye a’an re lix Junkab’al laj Israel, li naxye:

2 Ab’ihomaq, ex xjunkab’al laj Israel, ut cherab’i li waatin laa’in, jun xprofeet li Qaawa’.

3 Xb’aan naq k’ehomaq reetal, jo’ka’in naxye li Qaawa’, Laa’in tatinjuntaq’eeta, at xjunkab’al laj ^aIsrael, rik’in jun ^bxtoonal li che’ olivo li awb’il, li kixk’ul jun li winq ut kixch’olani sa’ li ^crawimq, ut kiniman, ut kiq’elo’, ut ki’ok chi ^dq’aak.

4 Ut kik’ulman naq laj eechal re li awimq xko’o, ut kiril naq x’ok chi q’aak lix toonal lix che’ olivo; ut kixye: laa’in tinset li ruq’, ut tink’aleq chirix, ut tinch’olani, re naq maare te’tuxmeq li ruq’ li ak’eb’ ut q’uneb’ ru, ut moko taa’oso’q ta.

5 Ut kik’ulman naq kixset li ruq’, ut kik’alek chirix, ut kixch’olani jo’ chanru li raatin.

6 Ut kik’ulman naq chirix k’iila kutan ki’ok ka’ch’inak chi alab’te’ink, li ruq’ ak’ ut q’un ru; a’b’anan k’ehomaq reetal, lix nimal lix b’een ki’ok chi oso’k.

7 Ut kik’ulman naq laj eechal re li awimq kiril, ut kixye re lix moos: Naraho’ inch’ool rik’in naq taasachq chiwu lix toonal li che’ a’in; jo’kan ut, ayu, mich’eb’ li ruq’ junaq xtoonal li ^ache’ olivo re k’iche’, ut k’am chaq wik’in; ut taqamich’ li xb’eenileb’ li ruq’ che’ li xe’ok chi chaqik, ut te’qakut sa’ li xam re naq te’k’ate’q.

8 Ut k’e reetal, chan li Qaawa’ re li awimq, laa’in tinchapeb’ naab’al li ruq’ che’ a’in li ak’eb’ ut q’uneb’ ru, ut teb’injutz’ub’ a’ yaal b’ar nawaj; ut maak’a’ naxye naq wi taa’uxq naq taa’oso’q lix xe’il li che’ a’in, tinruuq chixk’uulankil li ruuchinihom choq’ we; jo’kan naq tinchap li ruq’ che’ a’in li ak’eb’ ut q’uneb’ ru, ut tinjutz’ub’eb’ a’ yaal b’ar nawaj.

9 Ut chap laa’at li ruq’eb’ lix toonal li che’ olivo re k’iche’, ut jutz’ub’eb’ sa’ ^axna’ajeb’ a’an; ut a’in li xinmich’ teb’inkut sa’ li xam ut teb’ink’at, re naq ink’a’ te’xlaatz’ob’resi ru lix ch’och’il li wawimq.

10 Ut kik’ulman naq lix moos li Qaawa’ re li awimq kixb’aanu jo’ chanru li raatin li Qaawa’ re li awimq, ut kixjutz’ub’eb’ li ruq’ lix toonal li ^ache’ olivo re k’iche’.

11 Ut li Qaawa’ re li awimq kixtaqla k’alek chirix, ut xsetb’al li ruq’, ut xch’olaninkil, ut kixye re lix moos: Naraho’ inch’ool naq taasachq chiwu lix toonal li che’ a’in; jo’kan ut, re naq maare taaruuq tinkol rix lix xe’il re naq ink’a’ taa’oso’q, re b’an tinkol rix choq’ we, kinb’aanu li na’leb’ a’in.

12 Jo’kan ut, k’am laa b’e; chawil lix toonal li che’, ut chach’olani, jo’ chanru li waatin.

13 Ut eb’ a’in ^atink’e sa’ li jun raqal re li wawimq q’axal najt, a’ yaal b’ar nawaj, maak’a’ na’ok wi’ aawe; ut ninb’aanu re naq taaruuq tinkol rix choq’ we lix tz’aqal uq’ li che’; ut jo’kan ajwi’, re naq tink’uula li ruuchinihom chiru li q’ehil choq’ we; xb’aan naq naraho’ inch’ool naq taasachq chiwu lix toonal li che’ a’in ut li ruuchinihom.

14 Ut kik’ulman naq li Qaawa’ re li awimq kixchap xb’e, ut kixmuqeb’ li ruq’ lix toonal li che’ olivo li awb’il, sa’eb’ li jar raqal re li awimq li q’axal najteb’, li jun sa’ li jun raqal ut li jun sa’ li jun chik, jo’ chanru li naraj ut li nasaho’ wi’ xch’ool.

15 Ut kik’ulman naq kinume’ k’iila kutan, ut li Qaawa’ re li awimq kixye re lix moos: Kim, chookub’eeq sa’ li awimq, re taaruuq took’anjelaq sa’ li awimq.

16 Ut kik’ulman naq li Qaawa’ re li awimq, ut jo’kan ajwi’ li moos, ke’kub’e sa’ li awimq chi k’anjelak. Ut kik’ulman naq li moos kixye re laj eechal re: K’e reetal, il arin, k’e reetal lix toonal li che’.

17 Ut kik’ulman naq li Qaawa’ re li awimq ki’ilok, ut kixk’e reetal lix toonal li che’ li ke’jutz’ub’aak wi’ li ruq’ lix toonal li che’ olivo re k’iche’, ut ak xtuxmek chaq ut x’ok chi ^auuchink. Ut kixk’e reetal naq chaab’il, ut li ruuchinihom chanchan tz’aqal li ru.

18 Ut a’an kixye re li moos: K’e reetal, eb’ li ruq’ li xtoonal li che’ re k’iche’ ke’xchap xha’il lix xe’il, jo’kan naq lix xe’il xk’ehok nimla metz’ew; ut sa’ xk’ab’a’ lix nimal xmetz’ew lix xe’il, eb’ li ruq’ che’ re k’iche’, chaab’il ru che’ ke’uuchin wi’. Anajwan, wi ta ink’a’ xqajutz’ub’ chaq li ruq’ che’ a’in, x’oso’ raj lix toonal. Anajwan ut k’e reetal, laa’in tink’uula naab’al li ru che’, li x’uuchin wi’ lix toonal li che’, ut li ruuchinihom tink’uula chiru li q’ehil, choq’ we laa’in.

19 Ut kik’ulman naq li Qaawa’ re li awimq kixye re li moos: Kim, yo’o sa’ li jun raqal q’axal najt re li awimq, ut qak’ehaq reetal ma ink’a’ ajwi’ ke’uuchin chi naab’al li tz’aqal ruq’ li che’, re naq tink’uula li ruuchinihom chiru li q’ehil, choq’ we laa’in.

20 Ut kik’ulman naq xkoheb’ b’ar wi’ laj eechal k’anjel kixmuq chaq li tz’aqal ruq’ li che’, ut a’an kixye re li moos: K’e reetaleb’ a’in; ut kixk’e reetal li ^axb’een, naq naab’al li ru che’ li ki’uuchin wi’ chaq; ut kixk’e ajwi’ reetal naq chaab’il. Ut kixye re li moos: chap xkomon li ruuchinihom, ut k’uula choq’ re li q’ehil, re naq tink’uula choq’ we; xb’aan naq k’e reetal, chan, chiru li k’iila kutan a’in kinch’olani, ut naab’al li ru che’ ki’uuchin wi’.

21 Ut kik’ulman naq li moos kixye re laj eechal re: K’a’ naq xatchal arin chirawb’al li che’ a’in, malaj li ruq’ a’in lix toonal li che’? Xb’aan naq k’e reetal, a’an li jun chi na’ajej q’axal yib’ ru sa’ chixjunil lix ch’och’il laa wawimq.

22 Ut li Qaawa’ re li awimq kixye re: Maak’e inna’leb’; kinnaw naq a’an jun siir chi ch’och’ yib’ ru; jo’kan naq kinye aawe, chiru li k’iila kutan a’in kinch’olani, ut nakak’e reetal naq naab’al li ru che’ x’uuchin wi’.

23 Ut kik’ulman naq li Qaawa’ re li awimq kixye re lix moos: Il arin, k’e reetal naq kiwaw ajwi’ jun chik ruq’ lix toonal li che’; ut nakanaw naq li jun siir chi ch’och’ a’in q’axal yib’ wi’chik ru chiru li xb’een. A’ut k’e reetal li che’. Kinch’olani chiru li k’iila kutan a’in, ut naab’al li ru che’ x’uuchin wi’; jo’kan ut, mol chaq, ut k’uula choq’ re li q’ehil, re tink’uula choq’ we.

24 Ut kik’ulman naq li Qaawa’ re li awimq kixye wi’chik re lix moos: Il arin, ut k’e ajwi’ reetal jun chik li ^aruq’ che’, li kiwaw; k’e reetal naq kinch’olani ajwi’ a’an, ut ki’uuchin.

25 Ut kixye re li moos: Il arin, ut k’e reetal li jun chik. K’e reetal, a’in kiwaw sa’ jun ^achaab’il siir chi ch’och’; ut chiru li k’iila kutan a’in kinch’olani, ut yal jun raqal li che’ chaab’il x’uuchin, ut li ^bjun raqal chik chi che’, k’iche’ aj ru che’ li xruuchini; k’e reetal, kinch’olani lix toonal li che’ a’in jo’eb’ li jun ch’ol chik.

26 Ut kik’ulman naq li Qaawa’ re li awimq kixye re li moos: Mich’eb’ li ruq’ che’ li ink’a’ chaab’il ^axe’uuchin, ut kuteb’ sa’ li xam.

27 A’b’an k’ehomaq reetal, li moos kixye re: Chiqaset b’an li ruq’, ut chook’aleq chirix, ut chiqach’olani jun k’amok chik, re naq maare taaruuchini li chaab’il ru che’ choq’ aawe, re tatruuq chixk’uulankil choq’ re li q’ehil.

28 Ut kik’ulman naq li Qaawa’ re li awimq ut lix moos li Qaawa’ re li awimq ke’xch’olani chixjunil li ru li awimq.

29 Ut kik’ulman naq kinume’ k’iila kutan, ut li Qaawa’ re li awimq kixye re lix ^amoos: Kim, yo’o sa’ li awimq, re took’anjelaq wi’chik sa’ li awimq. Xb’aan naq k’e reetal, taanach’oq chaq li ^bkutan, ut chi seeb’ taachalq li ^croso’jik; jo’kan ut, tento tink’uula li ru che’ chiru li q’ehil, choq’ we laa’in.

30 Ut kik’ulman naq li Qaawa’ re li awimq ut li moos ke’kub’e sa’ li awimq; ut ke’wulak rik’in lix toonal li che’ li toqb’il chaq tz’aqal li ruq’ ut ke’jutz’ub’aak chaq li ruq’ che’ re k’iche’; ut k’ehomaq reetal, numtajenaq li che’ rik’in ^ak’iila paay chi ru che’.

31 Ut kik’ulman naq li Qaawa’ re li awimq kixyalatq li ru che’, li junjunq paay a’ yaal jo’ chanru rajlankil. Ut li Qaawa’ re li awimq kixye: K’e reetal, chiru li k’iila kutan a’in kiqach’olani lix toonal li che’ a’in, ut xink’uula naab’al li ru che’ choq’ we chiru li q’ehil.

32 A’ut k’e reetal, sa’ li kutan a’in naab’al li x’uuchin wi’, ut ^amaajun wan li chaab’il. Ut k’e reetal, chixjunil paay chi ru che’ ink’a’ us wan, ut maak’a’ na’ok wi’ we, us ta k’a’jo’ xook’anjelak; ut anajwan naraho’ inch’ool rik’in naq taasachq chiwu lix toonal li che’ a’in.

33 Ut li Qaawa’ re li awimq kixye re li moos: K’a’ru taqab’aanu re lix toonal li che’, re naq tink’uula wi’chik lix chaab’il uuchinihom choq’ we laa’in?

34 Ut li moos kixye re laj eechal re: K’e reetal, rik’in naq xajutz’ub’ li ruq’ li che’ olivo re k’iche’, ke’xch’olaniheb’ lix xe’il, jo’kan naq toj yo’yookeb’ ut ink’a’ xe’oso’; jo’kan naq nakawil naq toj chaab’ileb’.

35 Ut kik’ulman naq li Qaawa’ re li awimq kixye re lix moos: Li che’ maak’a’ na’ok wi’ we, ut lix xe’il maak’a’ na’ok wi’ we naq toj ink’a’ us li taa’uuchinq wi’.

36 A’b’anan laa’in ninnaw naq chaab’il lix xe’il, ut choq’ re tz’aqal li wajom naq xinkol rix; ut sa’ xk’ab’a’ lix nimal xmetz’ew, toj anajwan xruuchini chiru li ruq’ che’ re k’iche’ li chaab’il ru che’.

37 A’ut k’e reetal, xe’niman li ruq’ che’ re k’iche’, ut ^ake’xq’ax ru lix xe’il; ut rik’in naq li ruq’ che’ re k’iche’ xe’numta sa’ xb’een lix xe’il, naab’al li ru che’ ink’a’ us x’uuchin wi’; ut sa’ xk’ab’a’ naq xnaab’alo’ li ru che’ ink’a’ us li x’uuchin wi’, nakak’e reetal naq na’ok chi oso’k; ut sa’ junpaat chik q’ano’jenaqaq, re naq taaruuq taakutmanq sa’ li xam, wi ink’a’ naqab’aanu k’a’ruhaq re xkolb’al rix.

38 Ut kik’ulman naq li Qaawa’ re li awimq kixye re lix moos: Chookub’eeq sa’eb’ li raqal re li awimq li q’axal najteb’, ut qak’ehaq reetal ma x’uuchin ajwi’ li ru che’ ink’a’ us chiruheb’ li tz’aqal ruq’ che’.

39 Ut kik’ulman naq ke’kub’e sa’eb’ li raqal re li awimq li q’axal najteb’. Ut kik’ulman naq li ruuchinihom li tz’aqal ruq’ che’ po’jenaq ajwi’; relik chi yaal, li ^axb’een ut li xkab’ ut jo’kan ajwi’ laj ch’otonel; ut chixjunileb’ ak po’jenaqeb’.

40 Ut li ^aru che’ re k’iche’ sa’ laj ch’otonel kinumta chaq sa’ xb’een li jun raqal li che’ li chaab’il x’uuchin wi’ chaq, toj reetal naq li ruq’ che’ ak xchaqik ut xkam.

41 Ut kik’ulman naq li Qaawa’ re li awimq kiyaab’ak, ut kixye re li moos: ^aK’a’ chik ru kiru raj kinb’aanu choq’ re li wawimq?

42 K’e reetal, kinnaw naq chixjunil li ru li awimq ak po’jenaq, ka’aj chik a’in ink’a’. Ut anajwan eb’ a’in li chaab’il ke’uuchin chaq junxil ak xe’po’e’ ajwi’; ut anajwan chixjunileb’ lix toonaleb’ li che’ re li wawimq maak’a’ chik neke’ok wi’, ka’aj chik re yok’e’k chaq ut kute’k sa’ xam.

43 Ut k’e reetal, a’in li wan sa’ roso’jik, li xchaqik wi’ li ruq’, xwaw sa’ jun ^achaab’il siir chi ch’och’; relik chi yaal, a’ li sik’b’il ru inb’aan sa’ xb’een chixjunil chik raqal lix ch’och’il li wawimq.

44 Ut nakak’e reetal naq kinyok’ ajwi’ chaq li k’a’ru ^alaatz’ob’resinb’il wi’ chaq li jun siir chi ch’och’ a’in, re naq tinwaw lix toonal li che’ a’in sa’ xna’aj.

45 Ut nakak’e reetal naq jun raqal a’an chaab’il li x’uuchin wi’, ut jun raqal re k’iche’ li x’uuchin wi’; ut rik’in naq ink’a’ kinmich’eb’ li ruq’ li che’ ut keb’inkut sa’ xam, k’e reetal, ke’numta sa’ xb’een li chaab’il ruq’ che’, jo’kan naq xchaqik chaq.

46 Ut anajwan, k’e reetal, us ta mak’a’jo’ naq kiqil li wawimq, xe’po’je’ xtoonal lix che’il, jo’kan naq maajun chaab’il ru che’ neke’uuchin wi’; ut eb’ a’in kinyo’oni xkolb’al rix, re naq kink’uula raj li ruuchinihom chiru li q’ehil, choq’ we laa’in. A’b’an k’e reetal, ak xe’ok chanchan li che’ olivo re k’iche’, ut maak’a’ neke’ok wi’, ka’aj chik re ^ayok’e’k chaq ut kute’k sa’ xam, ut naraho’ inch’ool naq te’sachq chiwu.

47 A’b’anan k’a’ chik ru kiru raj kinb’aanu sa’ li wawimq? Ma kinkotz tab’i’ li wuq’, re ink’a’ kinch’olani? Ink’a’ b’an, kinch’olani, ut kink’alek chirix, ut kinset li ruq’, ut kink’e xq’eemul, ut ^akinye’ li wuq’ ka’ch’in chik ma chiru chixjunil li kutan, ut taanach’oq chaq li ^broso’jik. Ut naraho’ inch’ool naq taa’aje’q naq teb’inyok’ chaq chixjunil lix toonal li che’ re li wawimq, ut teb’inkut sa’ li xam re naq te’k’ate’q. Ani li xpo’ok re li wawimq?

48 Ut kik’ulman naq li moos kixye re laj eechal re: Ma maawa’ sa’ xk’ab’a’ lix taqenaqil laa wawimq—ma ink’a’ xe’numta li ruq’ sa’ xb’eeneb’ chaq lix xe’il, li chaab’il? Ut sa’ xk’ab’a’ naq eb’ li ruq’ ke’numta sa’ xb’eeneb’ lix xe’il, k’e reetal naq q’axal sa’ junpaat wi’chik ke’niman chiru lix metz’ew li xe’, ut xjuneseb’ rib’ naq ke’xchap xmetz’ew. K’e reetal, ninye, ma maawa’ a’in aj-e naq ke’po’e’ li jar toonal chi che’ re laa wawimq?

49 Ut kik’ulman naq li Qaawa’ re li awimq kixye re li moos: Yo’o, ut choxqayok’eb’ chaq lix toonaleb’ li che’ re li awimq ut chiqakuteb’ sa’ li xam, re naq ink’a’ te’xlaatz’ob’resi lix ch’och’il li wawimq, xb’aan naq ak inb’aanuhom chixjunil. K’a’ chik ru kiru raj kinb’aanu choq’ re li wawimq?

50 A’ut, k’ehomaq reetal, li moos kixye re li Qaawa’ re li awimq: chakanab’ chik ^ajunpaataq.

51 Ut li Qaawa’ kixye: Yaal, tinkanab’ chik junpaataq, xb’aan naq naraho’ inch’ool naq te’sachq chiwu lix toonaleb’ li che’ re li wawimq.

52 Jo’kan ut, chiqachap xkomoneb’ li ^aruq’eb’ a’in li ke’waw sa’eb’ li jar raqal re li wawimq li q’axal najteb’, ut chiqajutz’ub’eb’ sa’ lix toonal li che’ ke’chal wi’ chaq; ut chiqamich’ chaq sa’ lix toonal li che’, li ruq’ che’ li q’axal k’a li neke’uuchin wi’, ut chiqajutz’ub’ lix tz’aqal uq’ lix toonal li che’ sa’ xna’ajeb’ a’an.

53 Ut a’in tinb’aanu re naq ink’a’ taa’oso’q lix toonal li che’, re naq maare tinkol rix choq’ we lix xe’il, choq’ re li wajom laa’in.

54 Ut k’e reetal, lix xe’ileb’ li tz’aqal ruq’ li che’ li ke’waw a’ yaal b’ar kiwaj toj yo’yookeb’; jo’kan ut, re naq tinkoleb’ rix choq’ re li wajom laa’in, tinchap xkomoneb’ li ruq’ lix toonal li che’ a’in, ut ^atoxinjutz’ub’ sa’eb’ a’an. Relik chi yaal, teb’injutz’ub’ sa’eb’ a’an li ruq’ lix na’il che’, re naq maare tinkoleb’ rix li xe’ choq’ we laa’in, re naq jo’q’e tz’aqalaq xkawilal maare chaab’il ru che’ te’uuchinq wi’ choq’ we, re naq toj tintaw inloq’al rik’in li ru li wawimq.

55 Ut kik’ulman naq ke’chapok chaq rik’in li tz’aqal toon chi che’ li kik’iche’o’ chaq, ut ke’jutz’ub’an sa’eb’ li tz’aqal tooneb’ chi che’, li ke’k’iche’o’ ajwi’.

56 Ut ke’chapok chaq rik’ineb’ li tz’aqal tooneb’ chi che’ li ke’k’iche’o’ chaq, ut ke’jutz’ub’an sa’ lix na’il toonal chi che’.

57 Ut li Qaawa’ re li awimq kixye re li moos: Maamich’eb’ chaq li ruq’ che’ re k’iche’ sa’eb’ lix toonaleb’ li che’, ka’ajeb’ wi’ li q’axal k’aheb’; ut sa’eb’ a’an texjutz’ub’anq jo’ chanru li k’a’ru xinye.

58 Ut taqach’olani wi’chik lix toonaleb’ li che’ re li awimq, ut taqak’oseb’ li ruq’; ut taqamich’ chaq sa’ lix toonaleb’ li che’ eb’ li ruq’ che’ li ak q’ano’jenaqeb’, li tento te’oso’q, ut te’qakut sa’ li xam.

59 Ut ninb’aanu a’in re naq maare lix xe’ileb’ te’xtaw xmetz’ew sa’ xk’ab’a’ lix chaab’ilaleb’ a’an; ut sa’ xk’ab’a’ lix jalb’aleb’ li ruq’, re naq li us taanumtaaq sa’ xb’een li ink’a’ us.

60 Ut sa’ xk’ab’a’ naq kinkoleb’ rix li tz’aqal ruq’ che’ ut lix xe’ileb’ a’an, ut naq kinjutz’ub’eb’ wi’chik li tz’aqal ruq’ che’ sa’ lix na’il xtoonal li che’, ut kink’uula lix xe’il lix na’ileb’ xtoonal, re naq maare eb’ lix toonal li che’ re li wawimq te’uuchinq wi’chik rik’in chaab’il ^aru che’; ut re naq taasaho’q wi’chik inch’ool rik’in li ru li wawimq, ut re naq maare q’axal taasaho’q inch’ool naq kink’uula lix xe’il ut li ruq’ li ru che’ kiwan sa’ xtiklajik—

61 Jo’kan ut, ayu, ut b’oqeb’ chaq li ^amoos, re naq taaruuq ^btook’anjelaq chi yalb’il qaq’e rik’in xnimal li qametz’ew sa’ li awimq, re naq taaruuq taqakawresi li b’e, re naq tink’e chi uuchink wi’chik li tz’aqal ru che’, a’ li tz’aqal ru che’ li chaab’il ut li q’axal loq’ wi’chik sa’ xb’een chixjunil chik li ru che’.

62 Jo’kan ut, yo’qeb’, ut chook’anjelak rik’in xnimal li qametz’ew li jun sut chik a’in, xb’aan naq k’e reetal, taanach’oq chaq li roso’jik, ut a’in choq’ re li jun sutaq chik naq tinset li ruq’ li wawimq.

63 Jutz’ub’omaqeb’ li ruq’ che’; tikib’omaq rik’in laj ^ach’otonel re te’wanq sa’ xb’eenil, ut re naq li xb’eenil taawanq choq’ aj ch’otonel, ut k’alenqex chirixeb’ lix toonaleb’ li che’, li ak xe’q’eelo’ jo’ ajwi’ li saaj, li xb’eenil ut laj ch’otonel; ut laj ch’otonel ut li xb’eenil, re naq chixjunileb’ te’ch’olaniiq wi’chik li jun sutaq chik.

64 Jo’kan ut, k’alenqex chirixeb’, ut setomaqeb’ li ruq’, ut k’ehomaq xq’eemuleb’, li jun sutaq chik, xb’aan naq taanach’oq chaq li roso’jik. Ut wi taa’uxmanq naq te’ninqanq a’in li xe’jutz’ub’aak, ut taa’uuchinq chiruheb’ li tz’aqal ru che’, rik’in a’an teekawresi li b’e chiruheb’, re te’ninqanq.

65 Ut naq te’ok chi ninqank teerisiheb’ li ruq’ che’ li k’a ru, jo’ chanru xmetz’ew li chaab’il, ut jo’ chanru xnimal, ut ink’a’ ^ateerisi lix yib’al ru chi jun waakaj, maare anchal lix xe’il q’axal kawaq choq’ re li jutz’ub’anb’il, ut taa’oso’q li jutz’ub’anb’il, ut te’sachq chiwu lix toonal li che’ re li wawimq.

66 Xb’aan naq naraho’ inch’ool rik’in naq te’sachq chiwu lix toonaleb’ li che’ re li wawimq; jo’kan naq teerisi li ink’a’ us a’ yaal jo’ chanru taanimanq li us, re naq li xe’ ut lix b’een juntaq’eetaqeb’ xmetz’ew, toj reetal naq li us taanumtaaq sa’ xb’een li ink’a’ us, ut li ink’a’ us taayok’e’q chaq ut taakute’q sa’ li xam, re naq ink’a’ te’xlaatz’ob’resi lix ch’och’il li wawimq; ut chi jo’kan tinmesu chaq li ink’a’ us sa’ li wawimq.

67 Ut eb’ li ruq’ li tz’aqal che’ teb’injutz’ub’ wi’chik sa’ li tz’aqal toon chi che’;

68 Ut eb’ li ruq’ li tz’aqal toon chi che’ teb’injutz’ub’ sa’eb’ li tz’aqal ruq’ lix toonal li che’; ut chi jo’kan teb’inch’utub’ wi’chik, re naq te’ruuchini li tz’aqal ru che’, ut junajaqeb’.

69 Ut li ink’a’ us ^ataatz’eqe’q chaq, relik chi yaal, sa’ chixjunil chaq lix ch’och’il li wawimq; xb’aan naq k’ehomaq reetal, ka’aj chik li jun sutaq a’in tinset li ruq’ li wawimq.

70 Ut kik’ulman naq li Qaawa’ re li awimq kixtaqla lix ^amoos; ut li moos xko’o ut kixb’aanu li kitaqlaak wi’ chaq xb’aan li Qaawa’, ut kixk’ameb’ chaq xkomoneb’ li moos, ut ^bmoko k’iheb’ ta.

71 Ut li Qaawa’ re li awimq kixye reheb: Ayuqex, ut ^achexk’anjelaq sa’ li awimq, rik’in xnimal eemetz’ew. Xb’aan naq k’ehomaq reetal, li ^bjun sutaq chik a’in tinch’olani li wawimq; xb’aan naq ak haye’k chaq re li roso’jik, ut chi seeb’ taachalq li q’ehil; ut wi nekexk’anjelak rik’in xnimal eemetz’ew wochb’een, taawanq ^cxsahil eech’ool rik’in li ru che’ li tink’uula choq’ we chiru li q’ehil li taachalq sa’ junpaat.

72 Ut kik’ulman naq eb’ li moos xkoheb’ ut ke’k’anjelak rik’in xnimaleb’ lix metz’ew; ut li Qaawa’ re li awimq kik’anjelak ajwi’ rochb’eeneb’; ut ke’ab’in chiruheb’ lix taqlahom li Qaawa’ re li awimq sa’ chixjunil li k’a’aq re ru.

73 Ut ki’ok chi wank wi’chik li tz’aqal ru che’ sa’ li awimq; ut eb’ li tz’aqal ruq’ che’ ke’ok chi nimank ut chi tamk chi numtajenaq; ut li ruq’ che’ re k’iche’ ke’ok chi mich’e’k ut chi tz’eqe’k; ut ke’ril naq lix xe’ juntaq’eetaq rik’in lix b’een, jo’ chanru lix metz’ew.

74 Ut chi jo’kan ke’k’anjelak, chi yalb’ileb’ anchal xq’e, jo’ chanru lix taqlahom li Qaawa’ re li awimq, toj reetal naq tz’eqb’il chaq li ink’a’ us sa’ li awimq, ut li Qaawa’ ak kik’uulank choq’ re, re naq li jar toon chi che’ ke’ok wi’chik choq’ tz’aqal ru che’; ut ke’wan jo’ chanchan ^ajunaj chi toonalej; ut juntaq’eeteb’ li ru che’; ut li Qaawa’ re li awimq kixk’uula choq’ re li tz’aqal ru che’, li q’axal loq’ choq’ re chalen chaq sa’ xtiklajik.

75 Ut naq li Qaawa’ re li awimq kiril naq chaab’il li ru che’ xk’ul, ut naq li rawimq moko po’jenaq ta chik, kik’ulman naq kixb’oqeb’ lix moos, ut kixye reheb’: K’ehomaq reetal, li jun sutaq chik a’in kiqach’olani li wawimq; ut nakak’e reetal naq xinb’aanu jo’ chanru li rajom inch’ool; ut kink’uula li tz’aqal ru che’, jo’kan naq chaab’il, jo’ chanru ajwi’ kiwan chaq sa’ xtiklajik. Ut ^aosob’tesinb’ilat laa’at; xb’aan naq rik’in naq yalb’il eeq’e chi k’anjelak wochb’een sa’ li wawimq, ut kepaab’ lin taqlahom, ut kek’am wi’chik wik’in li ^btz’aqal ru che’, jo’kan naq moko po’jenaq ta chik li wawimq, ut tz’eqb’il chaq li ink’a’ us, k’ehomaq reetal, taawanq xsahil eech’ool wik’in sa’ xk’ab’a’ li ru li wawimq.

76 Xb’aan naq k’ehomaq reetal, chiru ^ak’iila kutan tink’uula li ru li wawimq choq’ we laa’in chiru li q’ehil, li taachalq chi seeb’; ut li jun sutaq chik a’in kinch’olani li wawimq, ut kinset li ruq’, ut kink’alek chirix, ut kink’e xq’eemul; jo’kan naq tink’uula choq’ we xkomon li ru che’, chiru naab’al kutan, jo’ chanru li k’a’ru inyehom.

77 Ut naq taachalq xq’ehil naq li ru che’ ink’a’ us taachalq wi’chik sa’ li wawimq, aran tintaqla xch’utub’ankil li chaab’il ut li moko us ta; ut li chaab’il tink’uula choq’ we, ut li ink’a’ us tintz’eq sa’ tz’aqal lix na’aj. Toja’ naq taachalq li ^aq’ehil ut li roso’jik, ut li wawimq tintaqla ^bxk’atb’al rik’in xam.