Wankeb’ li kawil tijom sa’ xtz’iib’ahom laj Isaias, a’ut wan ajwi’ li yo’onink ut li sahil ch’oolejil. Xbʼaan aʼin naq laj Nefi kiroksihebʼ saʼ li esil kixtzʼiibʼa: “Ut anajwan nintzʼiibʼa junjunq li raatin laj Isaias,” chan, “re naq ani … taaʼiloq re li aatin aʼin, teʼxwaklesi li raam ut teʼsahoʼq saʼ xchʼool” (2 Nefi 11:8). Jo’kan naq li b’oqok re rilb’al ru li raatin laj Isaias, a’an ajwi’ jun b’oqok re saho’k sa’ ch’oolej. Naru taasaho’q aach’ool, jo’ laj Nefi, rik’in lix profeetil aatin laj Isaias chirix lix ch’utub’ankil li tenamit Israel, lix k’ulunik li Mesias, ut li tuqtuukilal li yeechi’inb’il reheb’ li tiikeb’ xch’ool. Naru taasaho’q aach’ool naq yo’yookat sa’ li kutan naq li Qaawa’ ak “xxaqabʼ jun li eetalil choqʼ rehebʼ li tenamit, ut tixchʼutubʼebʼ li isinbʼilebʼ chaq re Israel” (2 Nefi 21:12). Naq nakattz’okaak ut nachaqik aawe chirix li tiikilal, nakatru “rikʼin sahil chʼoolejil chirisinkil chaq li haʼ saʼebʼ li yoʼlebʼaal haʼ re li kolbʼa-ibʼ” (2 Nefi 22:3). Sa’ jalan chik aatin, naru “nasaho’ sa’ aach’ool rik’in li Kristo” (2 Nefi 25:26).
Li na’leb’ re tzolok sa’ li ochoch ut sa’ li iglees
Ke’ch’a’ajko’ xyu’ameb’ li ralal xk’ajol laj Lehi rik’in li wech’ij-ib’. Kitam li ch’a’ajkilal sa’ xyanqeb’ li ralal xk’ajol chirix k’iila chihab’, li kixk’am li jachok-ib’, li preexil, li rahil ch’oolejil, ut li sach’ek. Ut li wech’ij-ib’ a’an jun nimla ch’a’ajkilal toj sa’ li kutankil a’in.
Rik’in chixjunil a’an sa’ laa k’a’uxl, k’oxlaheb’ li profeetil aatin sa’ 2 Nefi 21–22. K’oxla chan ru naq li Kolonel yoo chixtz’aqob’resinkileb’ ru li profeetil aatin a’in. K’a’ru naraj naxye choq’ aawe li profeetil aatin naq li xojb’ “taawanq rochbʼeen li karneer”? (2 Nefi 21:6). Kʼoxla saʼ aachʼool kʼaʼru naru taabʼaanu re xkʼojobʼankil li tuqtuukilal.
Laj Nefi ut lix junkab’al ke’ril lix jek’inkil laj Israel (chi’ilmanq 2 Nefi 25:10). Anajwan naru nakattz’aqon sa’ lix ch’utub’ankil Israel (chi’ilmanq 2 Nefi 21:12). Naq nakawil 2 Nefi 21:9–12, k’oxla chan ru naru nakattenq’an chixtz’aqob’resinkileb’ ru li profeetil aatin sa’eb’ li raqal a’in.
Qayehaq, naq yookat chirilb’al resil li “eetalil” li taataqsimanq re xch’utub’ankileb’ lix tenamit li Dios, k’oxla chan ru aawilom li Dios chixch’utub’ankil lix tenamit, sa’ tib’elej ut sa’ musiq’ej. K’a’ru nab’oqok reheb’ li kristiaan rik’in li Qaawa’ ut rik’in lix Iglees?
K’a’ru musiq’anb’ilat chixb’aanunkil re tenq’ank sa’ xch’utub’ankil lix tenamit li Dios?
Li ruchich’och’il na’leb’ re Babilonia taat’ane’q.
Li awa’b’ejihom re Babilonia a’an jun tenamit jwal nim ut xuwajel choq’ re li najteril Israel. A’b’an choq’ re lix tenamit laj Nefi—ut choq’ qe laa’o—li k’a’ru jwal nim wi’chik xxuwajelil a’an li na’leb’ eetalinb’il xb’aan li tenamit Babilonia: li ruchich’och’il na’leb’ ut li maak. K’oxla chan ru naq eb’ li tijom sa’ 2 Nefi 23–24 maare ke’xtoch’eb’ li kristiaan li ke’xxuwa malaj ke’roxloq’i lix b’ihomal ut lix wankil Babilonia (chi’ilmanq, jo’ eetalil, 23:6–9, 11, 19–22; 24:10–19). K’a’ru wan anajwan chanchan a’an li maare naqaxuwa malaj naqoxloq’i malaj naqapaab’ sa’ li kutan a’in? K’a’ru nakaweek’a naq yoo chixyeeb’al li Qaawa’ aawe sa’eb’ li ch’ol a’in? K’oxla chan ru naq naru nakak’ut naq laa’at “nasahoʼ saʼ aachʼool rikʼin xtaqenaqil” li Qaawaʼ (2 Nefi 23:3).
“Nokoʼaatinak chirix li Kristo … nasaho’ sa’ qach’ool rik’in li Kristo.”
Laj Nefi ki’aatinak chi k’utk’u chirix li naxpaab’—jo’ ajwi’ lix nawom xch’ool chirix li Jesukristo. Naq yooqat chirilb’al 2 Nefi 25, k’oxla li rajom laj Nefi re “xq’unb’esinkileb’ xch’ool li ralal xk’ajol … naq te’xpaab’ li Kristo, ut te’xk’am wi’chik rib’ sa’ usilal rik’in li Dios” (raqal 23). K’a’ru kiraj laj Nefi naq li kristiaan te’xnaw chirix li Kolonel? (che’ilmanq li raqal 12–13, 16). Chan ru naq laj Nefi kixyal xq’unb’esinkileb’ xch’ool li tenamit chixpaab’ankil li Kolonel? (che’ilmanq li raqal 19–29). K’e reetaleb’ li raqal sa’ li ch’ol a’in li neke’xq’unb’esi aach’ool chixpaab’ankil ut chixtaaqenkil li Jesukristo.
Maare ink’a’ tz’aqal kaw qach’ool jo’ laj Nefi re aatinak chirix li Kristo. A’b’an maare naru nakataw jun na’leb’ sa’ xk’utum laj Nefi sa’ 2 Nefi 25:23–26 li nakatxmusiq’a chi aatinak chirix a’an chi k’utk’u. Qayehaq, lix yehom laj Nefi “Nasaho’ qach’ool rik’in li Kristo” naru tatreek’asi chixk’oxlankil chan ru naq li Kolonel naxk’e xsahil aach’ool—ut chan ru naq naru nakawotz li sahil ch’oolej a’an rik’ineb’ laa was aawiitz’in.
Sa’ li raatin, “Noko’aatink chirix li Kristo” (Jolomil ch’utub’aj-ib’ re octubre 2020), li Elder Neil L. Andersen naxye chan ru naru noko’aatinak chi k’utk’u chirix li Kristo sa’ jalan jalanq na’ajej. B’arwan reheb’ lix na’leb’ nawulak chawu? Chan ru naru nakat-aatinak chirix li Kristo rik’ineb’ laa was aawiitz’in?
K’a’ru eek’asinb’ilat chixyeeb’al reheb’ laa was aawiitz’in chirix li Jesukristo? Wi nakawaj xtawb’al aana’leb’, naru nakawil “Li Yo’yookil Kristo: Lix Ch’olob’ahomeb’ li Apostol” (Biblioteca del Evangelio). Jun b’ich jo’ “Ninpaabʼ li Kristo” (Ebʼ li Bʼich, 75) naru naxk’e xkomon chik aana’leb’.
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Re xtenq’ankileb’ laa kok’al chixtawb’aleb’ ru li raqal a’in, naru nakataw jun xtoonal li che’ li t’anenaq malaj jun ruq’ li che’ (malaj oksi li jalam-uuch wan rub’el a’in). Wi li “uq’ej” sa’ 2 Nefi 21:1 nareetali li Jesukristo, k’a’ru neke’xk’ut chiqu li raqal 2–5 chirix a’an?
Li Jesukristo naxk’e tuqtuukilal ut sahil ch’oolejil.
K’a’ru naxk’ut 2 Nefi 21:6–9 chirix li naru taak’ulmanq naq chixjunileb’ neke’taaqenk re li Kolonel? (chi’ilmanq ajwi’ 4 Nefi 1:15–18). K’a’ru naru naqab’aanu re naq li qochoch chanchanaq chik a’in? Maare taawulaq chiruheb’ laa kok’al rilb’al xjalam-uucheb’ li xul wankeb’ sa’eb’ li raqal 6–7—eb’ li xul li xik’ neke’ril rib’ anajwan a’b’an li ink’a’ te’xket rib’ naq taak’ulunq wi’chik li Jesus (chi’ilmanq li perel re kok’ k’anjel re li xamaan a’in). Laa kok’al naru neke’xyiib’ xjalam-uucheb’ a’an rochb’eeneb’ li xul a’in sa’ tuqtuukilal rik’in li Jesus.
Laj Isaias kixye naq li Qaawa’ tixxaqab’ jun li “eetalil choqʼ rehebʼ li tenamit” re xtenq’ankileb’ li kristiaan chi chalk rik’in (chi’ilmanq 2 Nefi 21:11–12). Tenq’aheb’ laa kok’al chixtawb’aleb’ ru naq li eetalil a’an chanchan jun bandera. Maare taawulaq chiruheb’ xyiib’ankil xjalam-uuch lix bandera a’an. Naru neke’roksi li jalam-uuch malaj li aatin li neke’reetali k’a’ut naq neke’chal rik’in li Jesukristo ut lix Iglees. Kanab’eb’ chi aatinak chirixeb’ lix bandera, ut tenq’aheb’ chixk’oxlankil chan ru naru neke’xtenq’aheb’ li ras riitz’in “chixch’utub’ankil” li Jesukristo.
Chirix rilb’al 2 Nefi 22:4–5 sa’ komonil, naru nakat-aatinak rik’ineb’ laa kok’al chirix junjunq reheb’ li k’a’aq re ru “q’axal chaab’il” xb’aanuhom li Qaawa’. B’arwan junjunq rehebʼ “lix bʼaanuhom [li Qaawaʼ] saʼ qayanq” li naru naqayaabʼasi? Re xtenq’ankileb’ laa kok’al chixtz’ilb’al rix li patz’om a’in, naru nekeb’icha jun b’ich chirix li Kolonel, maare “Ninpaabʼ li Kristo” (Eb’ li B’ich, 75). Naru nekek’e eehoonal cherib’il eerib’ re xtz’aqob’resinkil ru jun ch’ol aatin jo’ li jun a’in: “Ninpaab’ li Kristo; A’an .” Chan ru naru naqakʼe chixnaw li qas qiitzʼin li xbʼaanuhom li Kolonel choq’ qe?
Chan ru naru nakatenqʼahebʼ laa kokʼal “chi saho’k sa’ xch’oolebʼ rik’in li Kristo”? Naru nakawotz jun seraqʼ naq li Jesukristo kixk’e xsahileb’ xch’ool li ras riitz’in, malaj naru nakakʼut jun video jo’ “Jesús sana a un hombre ciego de nacimiento” malaj “Dejad a los niños venir a mí” (Biblioteca del Evangelio). Laa kok’al naru neke’xk’uteb’ li hoonal re sahil ch’oolejil sa’ li seraq’ malaj sa’ li video. Chirix a’an, naq yooqex chirilb’al 2 Nefi 25:26, naru neke’xye k’a’ut naq “neke’saho’ sa’ xch’ooleb’ rik’in li Kristo.”
Ye xnawom aach’ol chirix li Kristo. Maak’oxla naq laa junkab’al yal neke’xnaw li nakaweek’a laa’at chirix li Kolonel. Ye reheb’, ut k’eheb’ laa week’ahom chirix li Kolonel chixb’eresi laa wanjik rik’ineb’ a’an.
Re xtawb’al xkomon chik li na’leb’, chi’ilmanq li hu Amigos re li po a’in.