1–7 enero: Jun chik ch’olob’anb’il esil chirix li Jesukristo. Eb’ li perel sa’ xtiklajik lix Hu laj Mormon
“1–7 enero: Jun chik ch’olob’anb’il esil chirix li Jesukristo. Eb’ li perel sa’ xtiklajik lix Hu laj Mormon,” Kim, Taaqehin—Choq’ re li ochoch ut li iglees: Lix Hu laj Mormon 2024 (2023)
“1–7 enero. Eb’ li perel sa’ xtiklajik lix Hu laj Mormon,” Kim, Taaqehin—Choq’ re li ochoch ut li iglees: 2024 (2023)
Jalam-uuch
laj Mormon natz’iib’ak chiruheb’ li perel ch’iich’ oor
1–7 enero: Jun chik ch’olob’anb’il esil chirix li Jesukristo
Eb’ li perel sa’ xtiklajik lix Hu laj Mormon
Rub’elaj naq nakatwulak sa’ li xb’een ch’ol re li hu 1 Nefi, taak’e reetal naq q’axal jalan lix Hu laj Mormon. Eb’ li perel sa’ xtiklajik neke’xch’olob’ jun esilal maak’a’ xjuntaq’eetankil—jo’ li rula’anihomeb’ li anjel, jun najteril tz’iib’anb’il esil li muqb’il sa’ jun li tzuul chiru k’iila cient chihab’, ut jun saaj winq li kixjaltesi ru li esil rik’in lix wankil li Dios. Lix Hu laj Mormon maawa’ ka’ajwi’ resilal jun li najter tenamit sa’ li ch’och’ America. Naxyal xq’unb’esinkil xch’ool chixjunileb’ “naq li Jesus a’an li Kristo” (perel re xjolomil li aatin saʼ lix Hu laj Mormon), ut li Dios ajwi’ kixb’eresi chan ru kitz’iib’aman, kik’uulaman, ut kik’eeman qe. Sa’ li chihab’ a’in, naq nakawil lix Hu laj Mormon, naq nakattijok chirix, ut naq nakayu’ami lix tzol’leb’, taab’oq lix wankil li Kolonel sa’ laa yu’am. Maare tat-eek’asiiq chixyeeb’al, jo’ ke’xye li oxib’ chi aj yehol nawom sa’ lix ch’olob’ahomeb’, “A’an sachol ch’oolej sa’ wilob’aal.”
Li na’leb’ re tzolok sa’ li ochoch ut sa’ li iglees
Xtzolb’al lix Hu laj Mormon naru tixkawob’resi inpaab’aal chirix li Jesukristo.
Sa’ li perel re xjolomil li aatin saʼ lix Hu laj Mormon ink’a’ ka’ajwi’ natawman lix k’ab’a’ li hu. Sa’ xyanq junjunq chik li na’leb’, a’an naxk’ut chi tzoltzo junjunqeb’ li rajom li santil esil a’in. Sik’eb’ li ajom a’in sa’ li perel re xjolomil li aatin. Eb’ li patz’om a’in naru nakate’xtenq’a naq yooqat chi k’oxlak: K’a’ut naq wan qik’in lix Hu laj Mormon? Chan ru naq jalan lix Hu laj Mormon rik’in xkomoneb’ chik li hu?
Maare a’in jun chaab’il hoonal re xyiib’ankil jun k’uub’anb’il na’leb’ sa’ junesal malaj jo’ junkab’al re rilb’al lix Hu laj Mormon chiru li chihab’ a’in. Jo’q’e ut b’ar taawil? Chan ru taab’oq li Musiq’ej naq yookat chi tzolok? Ma wankeb’ li na’leb’ taawaj xtz’ilb’al rix naq yooqat chi tzolok? Qayehaq, naru nakasik’eb’ li raqal li neke’xtz’aqob’resi ruheb’ li ajom xataw sa’ li perel re xjolomil li aatin. Naru nakak’uulaheb’ chi tz’iib’anb’il li raqal li neke’xnimob’resi laa paab’aal chirix li Jesukristo.
Jun profeetil yeechi’ihom. Li Awa’b’ej Russell M. Nelson kixye, “Ninyeechi’i naq wi teek’oxla sa’ eech’ool li k’a’ru neketzol [sa’ lix Hu laj Mormon], te’tehe’q li rilob’aal li choxa, ut teek’ul xsumehomeb’ lee patz’om ut xb’eresinkil lee yu’am” (“Lix Hu laj Mormon: K’a’ru raj xjalanil laa yu’am chi maak’a’ li hu a’an?,” Jolomil ch’utub’aj-ib’ re octubre 2017).
Naru ninwan jo’ aj yehol nawom chirix lix Hu laj Mormon.
Li Santil Musiq’ej naru naxch’olob’ xyaalal chawu naq tz’aqal yaal lix Hu laj Mormon, us ta ink’a’ aawilomeb’ li perel ch’iich’ oor jo’ ke’xb’aanu li oxib’ chi aj yehol nawom ut li waqxaqib’ chi aj yehol nawom. Naq yooqat chirilb’al li raatineb’, k’oxla chan ru naq lix ch’olob’ahomeb’ neke’xkawob’resi lix nawom aach’ool.
K’a’ru nawulak chawu chirix lix ch’olob’ahomeb’ laj yehol nawom chirix lix Hu laj Mormon? K’oxla chan raj ru naru nakawotz lix nawom aach’ool chirix lix Hu laj Mormon—ut naq naxch’olob’ xyaalal li Jesukristo. Qayehaq, k’oxla naq yookat chi aatinak rik’in jun laa wamiiw li maajun wa rab’ihom resil lix Hu laj Mormon. K’a’ raj ru taaye re chirix? Chan raj ru taawaklesi xch’ool laa wamiiw chirilb’al? K’oxla xtz’ilb’al rix li perel Xtikib’ankil lix Hu laj Mormon. Naru nakataw chaab’il na’leb’ aran re taawotz rik’in laa wamiiw. Eb’ li video a’in naru ajwi’ neke’xk’e aana’leb’:
Naru nakatz’iib’aheb’ li na’leb’ nakawaj xwotzb’al rik’in jun laa wamiiw chirix lix Hu laj Mormon. Yal xwotzb’al lix Hu laj Mormon rik’in li aplicacion re lix Hu laj Mormon.
Chi’ilmanq ajwi’ Ronald A. Rasband, “Sa’ li kutan aʼin,” Jolomil ch’utub’aj-ib’ re octubre 2022; Temas del Evangelio, “El Libro de Mormon,” Biblioteca del Evangelio; “Jun anjel taqlanb’il,” Eb’ li B’ich, 8.
Jalam-uuch
laj Jose Smith ut li oxib’ chi aj yehol nawom, neke’tijok sa’ komonil
Li oxib’ chi aj yehol nawom ke’xch’olob’ xyaalal lix Hu laj Mormon.
Lix k’utunik lix Hu laj Mormon, a’an chaq jun sachb’a-ch’oolej.
Wi anihaq raj tixpatz’ aawe b’ar kichal lix Hu laj Mormon, k’a’ raj ru taaye re? Chan ru taach’olob’ raj lix k’anjel li Qaawa’ sa’ xk’eeb’al qe lix Hu laj Mormon? Naq nakawil lix ch’olob’ahom laj Jose Smith, k’e reetal chan ru naq kixch’olob’. A’ yaal li xawil, k’a’ru nareek’a li Dios chirix lix aajelil ru lix Hu laj Mormon?
Chi’ilmanq ajwi’ Ulisses Soares, “Lix k’utunik lix Hu laj Mormon,” Jolomil ch’utub’aj-ib’ re abril 2020; Santos, tomo 1, El Estandarte de la Verdad, 21–30; Ensayos sobre Temas del Evangelio, “La traducción del Libro de Mormón,” Biblioteca del Evangelio.
Rilb’al lix Hu laj Mormon nikinixtenq’a chixpaab’ankil li Jesukristo.
K’anab’eb’ laa kok’al chixchapb’al sa’ ruq’eb’ jun lix Hu laj Mormon. Tenq’aheb’ chixk’utb’al chi ru’uj ruq’ li aatin Jun chik ch’olob’anb’il esil chirix li Jesukristo. Naru ajwi’ nakatenq’aheb’ chixtawb’al, sa’ li perel re xjolomil li aatin, li aatin “Jesus aʼan li Kristo, li Junelik Dios, li naxkʼutbʼesi ribʼ chiruhebʼ chixjunil li tenamit.” Tenq’aheb’ chixtawb’al ru naq a’in naraj naxye naq lix Hu laj Mormon naxk’e qana’leb’ chirix li Jesukristo. Seraq’i reheb’ chan ru naq lix Hu laj Mormon ak xkawob’resi laa paab’aal chirix li Jesukristo. Naru ajwi’ nakapatz’ reheb’ naq te’aatinaq chirixeb’ li seraq’ mas neke’wulak chiruheb’ sa’ lix Hu laj Mormon. Xb’ichankil “Lix Hu laj Mormon naxk’ut” (B’ichleb’aal choq’ reheb’ li Kok’al, 62–63) naru naxjultika reheb’ junjunq reheb’ li seraq’ a’in.
Lix Hu laj Mormon a’an li taqenaqil pek li xaqab’anb’il wi’ li qapaab’aal.
Li perel re kok’ k’anjel re li xamaan a’in ut li jalam-uuch wan rub’el a’in naru naxtenq’aheb’ laa kok’al chixtawb’al ru li raatin laj Jose Smith wan sa’ li Xtikib’ankil lix Hu laj Mormon: “Lix Hu laj Mormon a’an li taqenaqil pek li xaqab’anb’il wi’ li qapaab’aal.” Maare taawulaq cheru xk’uub’ankil malaj xyiib’ankil xjalam-uuch jun q’otq’o rik’in jun taqenaqil pek li naxaqab’ank re. K’a’ru nak’ulman wi na’isiman li taqenaqil pek? K’a’ raj ru taak’ulmanq wi ta maak’a’ qik’in lix Hu laj Mormon? Naru nekeril lix raqik li raqal sa’ li xtikib’ankil re xnawb’al k’a’ chik ru naqatzol naq naqak’ulub’a naq tz’aqal yaal lix Hu laj Mormon. Chan ru naru naqak’e lix Hu laj Mormon choq’ taqenaqil pek re li qapaab’aal chirix li Jesukristo?
Jalam-uuch
jun q’otq’o re pek rik’in jun taqenaqil pek li naxaqab’ank re
Lix Hu laj Mormon a’an li taqenaqil pek li xaqab’anb’il wi’ li qapaab’aal.