eb’ li kristiaan neke’xyal li ru li che’ re li yu’am

Lix rahom li Dios, xb’aan li xSabrina Squires

22–28 enero: “Kawresinb’il rik’in tiikilal, ut rik’in lix wankil li Dios”

1 Nefi 11–15

Naq wan jun xnimal ru k’anjel tixk’e li Dios re lix profeet, chi kok’ aj xsa’ a’an naxk’e jun xnimal ru k’utb’esinb’il matk’ re li profeet a’an. Laj Moises, laj Jwan, laj Lehi, ut laj Jose Smith ke’wan xk’utb’esinb’il matk’ jo’ a’an—k’utb’esinb’il matk’ li ke’xnimob’resi xk’a’uxleb’ ut ke’xtenq’aheb’ chixk’eeb’al reetal tz’aqal xnimal lix k’anjel li Dios.

Laj Nefit kixk’ul ajwi’ jun xk’utb’esinb’il matk’ li kixjal xyu’am. A’an kiril lix k’anjel li Qaawa’, li k’a’ru te’xk’ul li ralal xk’ajol laj Lehi sa’ li yeechi’inb’il ch’och’, ut li k’a’ru taak’ulmanq rik’in lix k’anjel li Dios sa’ roso’jikeb’ li kutan. Chirix naq kitzʼapeʼ li kʼutbʼesink aʼin, kawresinb’il chik laj Nefi choq’ re li k’anjel tixb’aanu. Ut rilb’al li k’utb’esinb’il matk’ a’in naru tatxkawresi ajwi’ laa’at—xb’aan naq wan ajwi’ jun xk’anjel li Dios taab’aanu sa’ lix awa’b’ejihom. Laa’at wankat sa’ xyanqeb’ “laj santil paab’anel sa’ lix iglees li Karneer” li ke’ile’ xb’aan laj Nefi, “li jek’inb’ileb’ chaq chiru chixjunil lix b’een li ruchich’och’; ut eb’ a’an ke’wan chi kawresinb’il rik’in tiikilal, ut rik’in lix wankil li Dios sa’ nimla loq’alil” (1 Nefi 14:14).

Chi’ilmanq ajwi’ “Nefi tiene una visión de acontecimientos futuros” (video), Biblioteca del Evangelio.

Li na’leb’ re tzolok sa’ li ochoch ut sa’ li iglees

1 Nefi 11

Li Dios kixtaqla li Jesukristo jo’ jun xk’utb’al lix rahom.

Naq laj Nefi kixpatz’ re li anjel k’a’ru xyaalalil li che’ sa’ lix k’utb’esinb’il matk’ laj Lehi, li anjel kiru raj chixyeeb’al, “A’an reetalil lix rahom li Dios.” Sa’ xna’aj a’an, kixk’ut b’an chiru laj Nefi naab’aleb’ li eetalil ut na’leb’ chirix lix yu’am li Kolonel. Sik’eb’ li eetalil ut na’leb’ a’an naq yooqat chirilb’al ut chixk’oxlankil 1 Nefi 11. K’a’ru nakataw li nakatxtenq’a chixtawb’al ru k’a’ut naq li Jesukristo a’an li tz’aqal xk’utb’esihom lix rahom li Dios?

Naru ajwi’ nakawileb’ li video chirix li Santil Hu sa’ li Biblioteca del Evangelio li neke’xk’am rib’ rik’in li kiril laj Nefi. Chan ru xatxtenq’a li Qaawa’ chireek’ankil lix rahom laa Choxahil Yuwa’?

Chi’ilmanq ajwi’ Susan H. Porter, “Lix rahom li Dios: Li q’axal nasahob’resink ch’oolej,” Jolomil ch’utub’aj-ib’ re octubre 2021.

1 Nefi 12–14

Naru ninwan chi “kawresinbʼil rikʼin tiikilal” ut wankil.

Laj Nefi ak kamenaqaq rub’elaj naq taak’ulmanq lix k’ihal li k’a’ru kiril sa’ lix k’utb’esinb’il matk’. K’a’ut naq nim xloq’al choq’ re laj Nefi xnawb’aleb’ li k’a’aq re ru a’in? K’a’ut naq nim xloq’al naq laa’at taanaweb’?” Patz’ a’in rajlal sut naq nakawil k’a’ruhaq li kiril laj Nefi sa’ lix k’utb’esinb’il matk’ (chi’ilmanq 1 Nefi 12–14). K’a’ru li na’leb’ nakak’ul chirix laa k’anjel sa’ lix “nim ut sachbʼa-chʼoolejil kʼanjel” li Qaawa’? (1 Nefi 14:7). B’arwan junjunq reheb’ li ninq ut sachb’a-ch’oolejil k’anjel li xb’aanuhom choq’ aawe?

K’oxla chi us li k’a’ru yeechi’inb’il sa’ 1 Nefi 14:14. Chan ru naq li Kolonel ak xtz’aqob’resi ru li yeechi’ihom a’an sa’ laa yu’am? (Jo’ eetalil, chi’ilmanq David A. Bednar, “Rik’in lix wankil li Dios sa’ nimla loq’alil,” Jolomil ch’utub’aj-ib’ re octubre 2021, tz’aqal sa’eb’ li wiib’ raqal sa’ xraqik.)

1 Nefi 13:1–9; 14:9–11

K’a’ru li “nimla tz’eqb’eetal iglees” li kiril laj Nefi?

Li Awa’b’ej Dallin H. Oaks kixch’olob’ naq li “nimla tz’eqb’eetal iglees” yeeb’il resil xb’aan laj Nefi nareetali “yalaq na’leb’ malaj ch’uut li naxka’pak’ali li paab’ank chirix li Dios. Ut li “preexil” li naxsik’ li “iglees” a’in chixk’eeb’al sa’ xb’eeneb’ laj santil paab’anel maawa’ jun preexil re tz’ejwalej, a’an b’an jun preexil re li b’alaq’il na’leb’” (“Ser Testigos de Dios,” Liahona, marzo 2015, 32). Chan ru nakatxtenq’a li Kolonel chixtz’eqtaanankil—ut chi eelelik chiru—li preexil re li b’alaq’il na’leb’?

1 Nefi 15:1–11

Li Dios tixkʼe insumenkil wi ninpatzʼok rikʼin paabʼaal.

Ma aaweek’ahom jun sutaq naq ink’a’ yookat chixk’ulb’al li k’utb’esinb’il na’leb’ choq’ aawe aajunes—naq li Dios ink’a’ yoo chi aatinak aawik’in? K’a’ru li na’leb’ kixk’e laj Nefi reheb’ li ras naq ke’reek’a chi jo’kan? (Chi’ilmanq 1 Nefi 15:1–11.) Chan ru naru nakawoksi lix na’leb’ laj Nefi sa’ laa yu’am?

1 Nefi 15:23–25

reetalil li seminario

Xchapb’al chi kaw li raatin li Dios nikinixtenq’a chixq’axb’al ru lix wankil laj Satanas.

Laj Nefi rajlal kixye li aajel ruhil na’leb’ reheb’ li ras. A’b’an k’a’jo’ xnimal lix kawilal li raatin choq’ reheb’ sa’ 1 Nefi 15:23–25. K’a’ru kixye laj Nefi, ut k’a’ut naq jwal nim xwankil choq’ re?

Li Elder David A. Bednar kixye naq “li raatin li Dios” naraj naxye eb’ li loq’laj hu, li raatineb’ li yo’yookil profeet, malaj li Jesukristo. K’a’ru naraj naxye “xchapb’aleb’ chi kaw” li loq’laj hu ut li raatineb’ li yo’yookil profeet? K’a’ru naraj naxye li “wank chi chapcho chi kaw” chiru li Jesukristo? Naru nakasik’ xsumenkileb’ li patz’om a’in sa’ li raatin li Elder Bednar, “Aʼbʼanan inkʼaʼ kiqakʼehebʼ reetal” (Jolomil ch’utub’aj-ib’ re abril 2022).

Chan ru naq xchapb’al chi kaw li raatin li Dios nakatxtenq’a chixtz’eqtaanankil laj tza? Xnujob’resinkil jun kaaxukuut jo’ li wan arin naru nakatxtenq’a chixtusb’aleb’ laa k’oxlahom:

	… nikinixtenq’a chi numtaak sa’ xb’een li raak’ab’il li aaleek? (chi’ilmanq 1 Nefi 12:17)	… nikinixtenq’a re naq “ink’a’ tink’e reetal” lix joʼmaajoʼil naʼlebʼ ut lix q’etq’etil li ruchich’och’? (1 Nefi 12:18)
Chan ru naq xchapb’aleb’ chi kaw li loq’laj hu ut li raatineb’ li yo’yookil profeet …
Chan ru naq li wank chi chapcho chi kaw chiru li Kolonel …

Chi’ilmanq ajwi’ “Li b’arb’ookil ch’iich’,” Eb’ li B’ich, 176; Jorge F. Zeballos, “Xkab’lankil jun yu’am kaw rib’ chiru li ch’a’ajkilal,” Jolomil ch’utub’aj-ib’ re octubre 2022.

junkab’al li narileb’ li loq’laj hu

Li loq’laj hu a’an chanchan jun b’arb’ookil ch’iich’ li nokoxb’eresi wan wi’ li che’ re li yu’am.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

1 Nefi 11:16–33

Lin Choxahil Yuwa’ kixtaqla chaq li Jesukristo xb’aan naq nikinixra.

• Re xtzolb’al laj Nefi chirix lix rahom li Dios, jun li anjel kixk’ut chiru laj Nefi li k’a’ru taak’ulmanq sa’ xyu’am li Kolonel. Naru ajwi’ nakab’aanu a’an choq’ reheb’ laa kok’al—k’e reheb’ xjalam-uuch li k’a’ru kiril laj Nefi sa’ 1 Nefi 11:20, 24, 27, 31, ut 33 (chi’ilmanq Hu reheb’ li Jalam-uuch re li Evangelio, 30, 35, 39, 42, 57). Naq nakawileb’ li raqal a’in, tenq’aheb’ laa kok’al chixtawb’aleb’ li jalam-uuch neke’xk’uli rib’ rik’ineb’. K’a’ru naqatzol chirix li Jesukristo sa’eb’ li raqal ut jalam-uuch a’in?

• Xb’ichankil jun li b’ich jo’ “Kixtaqla li Ralal” (B’ichleb’aal choq’ reheb’ li Kok’al, 20–21) naru naxtenq’aheb’ laa kok’al chireek’ankil lix rahom li Dios. Chirix a’an, patz’ reheb’ laa kok’al k’a’ru xe’xtzol sa’ li b’ich. K’a’ chik ru naqatzol chirix lix rahom li Dios sa’ 1 Nefi 11:22–23?

Oksiheb’ li jalam-uuch re xtenq’ankileb’ li kok’al chi tzolok. Naq nakak’ut chiruheb’ li kok’al jun seraq’ sa’eb’ li loq’laj hu, tenq’aheb’ chirilb’al sa’ xk’a’uxleb’. Naru nakawoksiheb’ li jalam-uuch, video, kok’ muñeek, disfraz, ut wankeb’ chik xkomon.

1 Nefi 13:26–29, 35–36, 40

Lix Hu laj Mormon naxk’uteb’ xchaq’al ruhil yaal.

• Re xtenq’ankileb’ laa kok’al chirilb’al xloq’aleb’ li na’leb’ “saqen ru ut loqʼ” sa’ lix Hu laj Mormon, naru nakayiib’ jun jalam-uuch ut nakapatz’ reheb’ laa kok’al naq te’xjal malaj te’xsach xcha’alil li jalam-uuch re naq jalan taak’utunq. Naru nakawoksi a’in re xk’utb’al naq ke’jalman ut ke’isiman junjunqeb’ li na’leb’ sa’ li Santil Hu rik’in xnumik li hoonal. Ilomaq 1 Nefi 13:40 ut tz’ilomaq rix chan ru naq lix Hu laj Mormon (“li [roso’jikil] tz’iib’anb’il esil”) nokoxtenq’a chixtawb’aleb’ ru “li saqen ru ut loq’il na’leb’” ke’sachman chaq sa’ li Santil Hu (li “xb’eenil” tz’iib’anb’il esil). K’a’ruheb’ li na’leb’ “saqen ru ut loq’eb’” li xatzol sa’ lix Hu laj Mormon?

• Li video “El Libro de Mormón: un libro proveniente de Dios” (Biblioteca del Evangelio) naru naxtenq’aheb’ laa kok’al chixk’eeb’al reetal k’a’ut naq aajel ru sa’ wiib’al li Santil Hu ut lix Hu laj Mormon. Maare taawulaq chiruheb’ li kok’al xk’utb’esinkil li k’utb’il sa’ li video.

eb’ lix Hu laj Mormon sa’ jalan jalanq li aatinob’aal

Lix Hu laj Mormon naxk’uteb’ li na’leb’ re li evangelio li ke’sachman sa’ xq’ehil li Nimla Q’etok Paab’ank.

1 Nefi 15:23–24

Xchapb’al chi kaw li raatin li Dios nikinixtenq’a chixtz’eqtaanankil ru li aaleek.

• K’e xhoonaleb’ laa kok’al re naq te’xye k’a’ru najultiko’ reheb’ chirix lix k’utb’esinb’il matk’ laj Lehi. Naru nakawoksi jun jalam-uuch, jo’ li jalam-uuch wan sa’ li tusleb’ aatin re li xamaan xnume’. K’a’ru kiramok reheb’ li kristiaan re naq ink’a’ ke’wulak wan wi’ li che’? K’a’ru kitenq’ank reheb’ chi wulak wan wi’ li che’? Naru nakapatz’ reheb’ naq te’xtaw li b’arb’ookil ch’iich’ sa’ li jalam-uuch. Ilomaq 1 Nefi 15:23–24 re xnawb’al k’a’ru nareetali li b’arb’ookil ch’iich’ ut chan ru naru nokoxtenq’a.

Re xtawb’al xkomon chik li na’leb’, chi’ilmanq li hu Amigos re li po a’in.

lix k’utb’esinb’il matk’ laj Nefi chirix li xMaria ut li k’uula’al Jesus

Lix k’utb’esinb’il matk’ laj Nefi chirix li xMaria, xb’aan laj James Johnson

perel re kok’ k’anjel: Li raatin li Dios nikinixtenq’a chixq’axb’al ru li aaleek