Lix matk’ laj Lehi—rik’in li b’arb’ookil ch’iich’, li aak’ab’il choql, li kab’l paapo xsa’, ut li che’ rik’in li ru “q’axal ki’”—a’an jun choxahil b’oqom re xk’ulb’aleb’ li osob’tesink re lix rahom li Kristo ut lix mayej aj tojol-ix. A’b’anan, choq’ re laj Lehi, li k’utb’esinb’il matk’ a’an ajwi’ choq’ re lix junkab’al: “Rik’in li k’a’ru xwil, wan rajb’al naq taasaho’q inch’ool rik’in li Qaawa’ xb’aan laj Nefi ut jo’kan ajwi’ xb’aan laj Sam. … A’b’an k’ehomaq reetal at Laman ut at Lemuel, ninxuwak chi numtajenaq eeb’aan laa’ex” (1 Nefi 8:3–4). Naq laj Lehi kixchoy xch’olob’ankil lix k’utb’esinb’il matk’, a’an kirelaji ru laj Laman jo’ ajwi’ laj Lemuel naq “te’rab’i li raatin, re naq maare li Qaawa’ taaruxtaanaheb’ ru” (1 Nefi 8:37). Us ta maare k’iila sut ak xatz’il rix lix k’utb’esinb’il matk’ laj Lehi, sa’ li jun sut a’in k’oxla jo’ chanru kixb’aanu laj Lehi—k’oxla jun kristiaan li nakara. Naq taab’anu chi jo’kan, k’a’jo’ wi’chik naq taataw ru li kole’k natawman sa’ li b’arb’ookil ch’iich’, lix rahilal li kab’l paapo xsa’, ut lix ki’il li ru li che’. Ut k’a’jo’ wi’chik naq taataw ru lix “anchalil xch’ool li chaab’il yuwa’b’ej” li kik’uluk re li chaq’al ru k’utb’esinb’il matk’ a’an.
Li na’leb’ re tzolok sa’ li ochoch ut sa’ li iglees
K’a’ru nawulak chawu chirix li kixb’aanu laj Nefi sa’ 1 Nefi 7:6–21? Chan ru noko’osob’tesiik naq “tikto” nokokuyuk maak chiqib’il qib’? Li video “El Señor libra a Nefi de Sus hermanos rebeldes” (Biblioteca del Evangelio) naru natenq’an sa’ li tzolok.
Xchapb’al chi kaw li raatin li Dios naxk’am inb’e rik’in li Kolonel ut nikinixtenq’a chireek’ankil lix rahom.
Lix k’utb’esinb’il matk’ laj Lehi naxk’e jun aab’oqb’al chixtz’ilb’al rix b’ar wankat sa’ laa b’eenik re wulak jo’ chanru li Kristo. Li Awa’b’ej Boyd K. Packer kixye: “Wankat aran; chiqajunilo wanko aran. Sa’ lix k’utb’esinb’il matk’ laj Lehi wan chixjunil … li naraj ru jun aj Santil Paab’anel sa’ Roso’jikeb’ li Kutan re xtawb’al ru li yale’k-ix re li yu’am” (“El sueño de Lehi nos incluye a nosotros,” Liahona, agosto 2010, 28).
Naq yooqat chi tzolok, k’oxla xnujob’resinkil jun kaaxukuut jo’ li jun wan arin.
Eb’ li eetalil sa’ lix k’utb’esinb’il matk’ laj Lehi
Lix ch’olob’ankil
Eb’ li patz’om re xk’oxlankil
Eb’ li eetalil sa’ lix k’utb’esinb’il matk’ laj Lehi
Eb’ li eetalil sa’ lix k’utb’esinb’il matk’ laj Lehi
Lix ch’olob’ankil
Eb’ li patz’om re xk’oxlankil
Naru nakatz’ileb’ rix li raqal a’in re tzolok chirix li kaahib’ paay chi kristiaan kiril laj Lehi: 1 Nefi 8:21–23, 24–28, 30, ut 31–33. K’a’ru xjalanileb’ li ch’uut chi kristiaan a’in li nakawil? K’a’ut naq ke’wan li kristiaan ke’el chirix naq ke’xtaw li che’ ut ke’xyal li ru (che’ilmanq li raqal 24–28)? K’a’ru nakatzol rik’in a’in?
Kanab’eb’ li neke’tzolok chixtawb’al xjuneseb’ xna’leb’. K’oxla xb’oqb’aleb’ li neke’tzolok aawik’in chixtz’ilb’aleb’ rix li loq’laj hu xjuneseb’ chirixeb’ li na’leb’ neke’xtaw. Qayehaq, naru nakapatz’ reheb’ naq te’rileb’ li raqal re li loq’laj hu sa’ li kaaxukuut li wan sa’ li tusleb’ aatin sa’ junesal malaj sa’ kok’ ch’uut. Te’jultiko’q reheb’ ut te’xk’uulaheb’ sa’ xch’ooleb’ li na’leb’ te’xtaw.
Jalam-uuch
li kristiaan neke’xchap li b’arb’ookil ch’iich li nak’amok rik’in li che’ re li yu’am
Li wotzb’il, xb’aan laj Kelsy ut li xJesse Barrett
Li Dios tixk’utb’esi chiwu li yaal rik’in lix wankil li Santil Musiq’ej.
K’a’ru nakab’aanu naq patz’b’il aawe naq taayu’ami jun na’leb’ re li evangelio li ink’a’ nakataw ru? Sa’eb’ li raqal a’in, k’e reetal xjalanil lix sumehom laj Nefi chirix lix k’ub’tesinb’il matk’ laj Lehi (chi’ilmanq 1 Nefi 10:17–19; 11:1) ut lix sumehom laj Laman ut laj Lemuel (chi’ilmanq 1 Nefi 15:1–10). K’a’ru kixtaw ru laj Nefi li kib’eresink re chi sumenk jo’ kixb’aanu?
Rik’in li kixb’aanu laj Nefi sa’ laa k’a’uxl, tz’iib’aheb’ li na’leb’ re li evangelio nakawaj xtzolb’al xkomon. K’a’ru naru nakab’aanu re xtawb’al xsumenkileb’ laa patz’om? (Chi’ilmanq ajwi’ “Li yaal tatrach’ab’” sa’ Choq’ re Xkawilaleb’ li Saaj: Jun tenq’ re xsik’b’al ru laa b’e, 30–33.)
Jo’ naq laj Nefi kixnaw xjunes rib’ naq yaal li raatin lix yuwa’, laa’o ajwi’ naru naqab’aanu a’an naq naqab’i li raatineb’ li profeet ut li apostol re li qakutankil. K’a’ru ke’xk’ut chiqu li profeet ut eb’ li apostol sa’ li jolomil ch’utub’aj-ib’ li toje’ xnume’? Chan ru naq xataw xnawom aach’ool chirix li ke’xk’ut?
Chi’ilmanq ajwi’ 1 Nefi 2:11–19; Tzol’leb’ ut Sumwank 8:1–3; “Tintzol, tink’oxla, tintijoq,” B’ichleb’aal choq’ reheb’ li Kok’al, 66; Temas del Evangelio, “Revelación,” Biblioteca del Evangelio.
Xchapb’al chi kaw li raatin li Dios naxk’am inb’e rik’in ut nikinixtenq’a chireek’ankil lix rahom.
Maare taawulaq chiruheb’ laa kok’al xyiib’ankil jun xjalam-uuch lix k’utb’esinb’il matk’ laj Lehi naq yooqex chirilb’al 1 Nefi 8. Kanab’eb’ chixwotzb’al lix jalam-uucheb’, ut tenq’aheb’ chixtawb’al ru k’a’ru naraj neke’xye li eetalil sa’ li matk’ (chi’ilmanq 1 Nefi 11:21–22; 12:16–18; 15:23–33, 36 ut li perel re kok’ k’anjel re li xamaan a’in). Patz’ reheb’ naq te’xwotz jo’ k’ihal xsumenkil li patz’om a’in li naru chiruheb’: K’a’ru naqatzol rik’in lix k’utb’esinb’il matk’ laj Lehi?
Ma wan aawik’in li k’a’aq re ru naru neke’reetali li b’arb’ookil ch’iich’ sa’ lix k’utb’esinb’il matk’ laj Lehi, jo’ jun li b’olb’ookil ch’iich’ malaj jun li che’? Kanab’eb’ laa kok’al chixchapb’al ut laa’at taak’ameb’ xb’e toj chiru jun xjalam-uuch li Kolonel. K’a’ut naq li b’arb’ookil ch’iich’ aajel ru sa’ lix k’utb’esinb’il matk’ laj Lehi? (Chi’ilmanq 1 Nefi 8:20, 24, 30). Chan ru naq li b’arb’ookil ch’iich’ chanchan li raatin li Dios?
Patz’ re junjunqeb’ laa kok’al naq te’ril 1 Nefi 8:10─12 ut te’xye li k’a’ru kiril laj Lehi. Patz’ reheb’ lix komoneb’ naq te’ril 1 Nefi 11:20─23 ut te’xye li k’a’ru kiril laj Nefi. K’a’ut naq li anjel kixk’ut chiru laj Nefi li k’uula’al Jesus re xk’eeb’al xna’leb’ chirix lix rahom li Dios? Tz’il rix rik’ineb’ laa kok’al chan ru naq reek’ahomeb’ lix rahom li Dios sa’ xyu’ameb’. Jun b’ich jo’ “Ninnaw naq raab’ilin” (B’ichleb’aal choq’ reheb’ li Kok’al, 42–43) naru naxtenq’aheb’ chi aatinak chirix a’an.
Li Dios tixk’utb’esi chiwu li yaal rik’in lix wankil li Santil Musiq’ej.
Chan ru naru nakatenq’aheb’ laa kok’al chixtawb’al ru li k’a’ru kixk’ut laj Nefi sa’ 1 Nefi 10:19? Naru nakak’e jun xjalam-uuch li Kolonel malaj jalan chik li k’a’aq re ru chi lanb’il sa’ jun li isb’, ut taapatz’ reheb’ laa kok’al naq te’xte. Naq yooqat chirilb’al 1 Nefi 10:19, naru neke’xtaqsiheb’ li ruq’ naq te’rab’i li aatin “taateeliiq” ut “Santil Musiq’ej.” Naru nakawotz jun laa numsihom b’ar wi’ naq li Santil Musiq’ej xatxtenq’a chixtawb’al li yaal.
Patz’ reheb’ laa kok’al naq te’xye k’a’ru neke’xb’aanu re xtawb’al xsumenkil jun li patz’om. K’a’ raj ru tixye laj Nefi wi ta taapatz’manq re chan ru xtawb’al xsumenkil jun li patz’om chirix li evangelio? Waklesi xch’ooleb’ laa kok’al chixnawb’al a’an rik’in rilb’al 1 Nefi 10:17–19; 11:1.
Ma reek’ahomeb’ laa kok’al naq xe’tenq’aak xb’aan li Santil Musiq’ej chixnawb’al naq yaal jun li na’leb’? Kanab’eb’ chixwotzb’al lix numsihomeb’. K’a’ raj ru taqaye re jun qamiiw li naxk’oxla naq ink’a’ naru naxk’ul xsumenkil xpatz’om rik’in li Santil Musiq’ej? K’a’ru naqataw sa’ 1 Nefi 10:17─19 ut 11:1 li naru naxtenq’a li amiiw a’an?
Re xtawb’al xkomon chik li na’leb’, chi’ilmanq li hu Amigos re li po a’in.