Xjalam-uuch jun li saaj ixq rik’in lix kandeel, ut li yoo chirilb’al li choxa.

Li yaal tatrach’ab’

Jwan 8:32

Laa Choxahil Yuwa’ a’an jun Dios re yaal. Naxnaw chixjunil. Chixjunil li yaal na’alan rik’in ut nab’eresin sa’ xjayal. Nakak’ut naq nakawoxloq’i li yaal naq nakasik’ tzolok, yu’amink chi tiik, ut xaqliik rik’in xkawil aach’ool choq’ re li k’a’ru yaal—us ta aajunes xaqxookat.

Jun saaj winq se’se ru.

Li junelikil yaal

Li qaChoxahil Yuwa’ naraj naq eb’ lix rab’in ut eb’ li ralal junelik yookeb’ chi tzolok. Wan xyaalal sa’ tib’elej jo’ ajwi’ sa’ musiq’ej naq taasik’ ut taara li tzolok. Li tzolok moko ka’aj ta wi’ nak’ehok tumin. A’an xcha’al laa junelikil ajom chi wulak jo’ chanru laa Choxahil Yuwa’.

Li yu’amink chi tiik naraj naxye naq nakara li yaal chi anchal aach’ool—nakara wi’chik chiru li sahil wank, li nawe’k, ut xmaak’a’il li ch’a’ajkilal. Naraj naxye xb’aanunkil li us yal xb’aan naq us a’an.

Wan li k’a’ru loq’ aawik’in li naru taawotz. Lix evangelio li Jesukristo naxsumeheb’ li patz’om re li yu’am. A’an xb’ehil li tuqtuukilal ut li sahil ch’oolejil. Maare ink’a’ nakanaw chixjunil, a’b’an tz’aqal aanawom re xtenq’ankileb’ laa was aawiitz’in chixtawb’al ru ut chiroxloq’inkileb’ li junelikil na’leb’ li yaaleb’.

Li b’oqok

Junelik yooqat chi tzolok. Sik’ aahoonal re xnimob’resinkil laa k’a’uxl ut laa seeb’al. Maare a’an li tzolok sa’eb’ li jar paay chi tzoleb’aal malaj li tzolok rik’in b’araq chik li chaab’il. Kanab’ naq li Qaawa’ tatrochb’eeni sa’ lix yalb’al aaq’e, ut a’an tatxb’eresi. Naq nakattzolok chirix li ruchich’och’, tzolon ajwi’ chirix li Kolonel, a’ li kiyo’ob’tesink re li ruchich’och’. Tzolon chirix lix yu’am ut lix k’utum. Tzol li evangelio sa’ seminario, instituto, ut sa’ junesal jo’ raqal laa tzolb’al chiru chixjunil laa yu’am.

Ra li yaal chi anchal aach’ool re naq maajun wa taawaj elq’ak, tik’ti’ik, malaj b’alaq’ink chi yalaq chan ru—sa’ eskweel, sa’ trab’aaj, sa’ internet, sa’ chixjunil na’ajej. K’e reetal naq paab’ajelaqat chixtaaqenkil li Jesukristo chi k’utk’u ut chi muqmu.

Wanqat jo’ saqen choq’ reheb’ laa was aawiitz’in. Kanab’ naq li nakaye ut nakab’aanu tixk’ut laa paab’aal chirix li Jesukristo. Kawresi aawib’ anajwan choq’ re li kutan chalel naq tatruuq chixwotzb’al li xnimal ru evangelio, jo’ misioneer ut chiru chixjunil laa yu’am. Ut yo’on wanqat chixyeeb’al re li ani napatz’ok li yo’onihom ut li sahil ch’oolejil nakaweek’a.

Li osob’tesink yeechi’inb’ileb’

Li tzolok naxnimob’resi laa seeb’al chi k’anjelak chiru li Qaawa’. Naxk’e aawankil chirosob’tesinkileb’ laa was aawiitz’in, ut laa junkab’al. Wi naab’al nakatzol, naab’al ajwi’ naru taab’aanu re xwaklesinkil li rawa’b’ejihom li Dios ut chixchaab’ilob’resinkil li ruchich’och’.

Xmaak’a’il li b’alaq’ naxk’e tuqtuukilal ut oxloq’ink-ib’. Naq wan xyaalalil li nakaye ut nakab’aanu, nakak’ut naq paab’ajelat—chiruheb’ li kristiaan ut chiru li Qaawa’.

Naq nakaxaqab’ aawib’ choq’ re lix k’utum li Jesukristo, a’an naxaqli chak’atq. Wankeb’ li ink’a’ te’xpaab’ li nakapaab’ laa’at, a’b’an te’xk’e reetal lix kawil ut lix anchalil laa ch’ool. Ma neke’xtaaqe laa na’leb’ malaj ink’a’, taak’iiq laa ch’olob’ahom, lix kawil aach’ool, ut laa paab’aal chirix li Kristo.

reetalil li patz’ok ut li sumenk

Li patz’ok ut li sumenk

Ma us naq wankeb’ lin patz’om chirix li Iglees? B’ar tintaw xsumenkileb’? Li patz’ok moko naraj ta naxye naq q’un aametz’ew malaj naq nalaj laa paab’aal. Li patz’ok naru b’an chixnimob’resinkil laa paab’aal. Li xk’ojob’ankil wi’chik li evangelio kitikla naq laj Jose Smith ki’ok chi patz’ok rik’in paab’aal naq kaalaju chihab’ wan chaq re. Sik’ xsumenkileb’ rik’in li loq’laj hu, li raatineb’ lix profeet li Dios, rik’ineb’ laj jolominel ut laa na’ aayuwa’, ut rik’in ajwi’ li Dios. Wi lix sumenkileb’ ink’a’ neke’chal sa’ junpaat, wanq aapaab’aal naq taataweb’ chi junjunqil li raqal. Yu’ami li ak nakanaw, ut maakanab’ xsik’b’al li yaal.

Xjalam-uuch laj Jose Smith chi wiq’wo chiru li Dios Yuwa’b’ej ut li Jesukristo sa’ li loq’laj k’iche’.

Chan ru tinkol rix li us chi ink’a’ tinrahob’tesiheb’ li ani jalaneb’ xpaab’aal? K’e reetal naq li nakaye ut nakab’aanu eek’asinb’il xb’aan laa rahom choq’ re li Dios ut eb’ li ralal xk’ajol. Ink’a’ us naq taqawotz li evangelio rik’in li musiq’ej re wech’ok-ib’, taqawotz b’an chi saqen ru, rik’in tuulanil, ut rik’in chaab’ilal. Naru taak’ut laa rahom chiruheb’ laa was aawiitz’in us ta ink’a’ nakapaab’ li neke’xpaab’ a’an.

Chi’ilmanq Mateo 5:14–16 (kanab’ chi lemtz’unk laa saqen); Jwan 14:6 (li Jesus a’an li yaal); 1 Pedro 3:15 (yo’on wanqat re xwotzb’al laa woyb’enihom sa’ li Kristo); Tzol’leb’ ut Sumwank 88:77–80 (k’a’aq re ru naraj li Qaawa’ naq taqatzol); 93:36 (lix loqʼal li Dios aʼan li wankilal chi kʼoxlak); 124:15 (li kawil ch’oolej naraj naxye xraab’al li k’a’ru us); 130:18 (li qawankilal chi k’oxlak taawakliiq qochbʼeen saʼ li wakliik chi yoʼyo).

reetalil li santil ochoch

Eb’ li patz’om re li recomendacion re li santil ochoch

Ma nakayal aaq’e re naq maak’a’aq li b’alaq’ sa’ chixjunil li nakab’aanu?