jun junkab’al narileb’ li loq’laj hu

Chan ru roksinkil Kim, Taaqehin—Choq’ re li ochoch ut li iglees

Ani aj-e li hu a’in?

Li hu a’in wan choq’ reheb’ chixjunileb’ li neke’raj tzolok sa’ lix Hu laj Mormon—sa’ junesal, jo’ junkab’al, ut sa’eb li tzoleb’aal re li Iglees. Wi ink’a’ ak nakatzoleb’ li loq’laj hu chi kok’ aj xsa’, li hu a’in tatxtenq’a chixtikib’ankil. Wi ak yookat chixtzolb’aleb’ li loq’laj hu, li hu a’in tatxtenq’a chixtawb’al xkomon chik aana’leb’ sa’ xb’aanunkil.

Eb’ li komon ut li junkab’al sa’ li ochoch

Li tz’aqal na’ajej re xtzolb’al li evangelio a’an sa’ li ochoch. Eb’ laj k’utunel sa’ li iglees naru tate’xtenq’a, ut eb’ li komon sa’ li teep naru te’xwaklesi aach’ool. A’ut re xkolb’al lee musiq’ejil wanjik, laa’at ut laa junkab’al tento texch’oolaniiq wulaj wulaj rik’in “lix chaabʼil aatin li Dios” (Moroni 6:4; chi’ilmanq ajwi’ Russell M. Nelson, “Aatin sa’ xtiklajik,” Jolomil ch’utub’aj-ib’ re octubre 2018).

Taawoksi li hu a’in yalaq chan ru nakak’oxla naq tatxtenq’a. Eb’ li tusleb’ aatin neke’xk’ut junjunq li junelikil na’leb’ neke’tawman sa’ lix Hu laj Mormon, ut neke’xye resileb’ li kok’ na’leb’ ut k’anjel li tate’xtenq’a chixtzolb’aleb’ li loq’laj hu sa’ junesal, jo’ junkab’al, malaj rik’ineb’ laa wamiiw. Naq yooqat chi tzolok, taaqe xb’eresihom li Musiq’ej re xtawb’aleb’ li junelikil na’leb’ li loq’eb’ choq’ aawe. Sik’ li naxye li Dios aawe, ut taaqe li na’leb’ nakak’ul.

Eb’ laj k’utunel ut laj tzolonel sa’ li Iglees

Wi nakatk’utuk sa’ li Tzoleb’aal reheb’ li Kok’al, jun tzoleb’aal reheb’ li saaj sa’ li Dominkil Tzoleb’aal, jun molam sa’ li Tijonelil re Aaron, malaj jun tzoleb’aal reheb’ li Saaj Ixq, waklesinb’il aach’ool chiroksinkileb’ li tusleb’ aatin sa’ li hu a’in naq nakakawresi aawib’ re k’utuk. Kim, Taaqehin—Choq’ re li ochoch ut li iglees a’an li taatzolmanq sa’ laa tzoleb’aal sa’ domingo. Eb’ li na’leb’ re tzolok sa’ li hu a’in xe’kawresiman choq’ re li tzolok sa’ li ochoch ut sa’ li iglees. Naq nakakawresi aawib’ re k’utuk, taatikib’ rik’in li k’a’ru nakak’ul laa’at rik’ineb’ li loq’laj hu. Li kawresink-ib’ li q’axal aajel ru taak’ulmanq naq taasik’ aamusiq’ankil xb’aan li Santil Musiq’ej. Sik’eb’ li junelikil na’leb’ li nakate’xtenq’a chi wulak jo’ chanru laa Choxahil Yuwa’ ut li Jesukristo. Li hu Kim, Taaqehin naru tatxtenq’a chixk’eeb’al reetal junjunq reheb’ li na’leb’ a’an ut chixtawb’al ru k’a’ru yoo chi k’ulmank sa’eb’ li loq’laj hu.

Chijultiko’q aawe naq li xtzolb’al li evangelio, li tz’aqal chaab’il, a’an nab’aanuman sa’ li ochoch chi tenq’anb’il xb’aan li Iglees. Sa’ jalan chik aatin, xb’een wa teneb’anb’il sa’ aab’een xtenq’ankileb’ li kristiaan sa’ laa tzoleb’aal sa’ xyalb’aleb’ xq’e chixtzolb’al ut chixyu’aminkil li evangelio sa’ li ochoch. K’eheb’ xhoonal chixwotzb’al xnumsihomeb’, xk’oxlahomeb’, ut xpatz’omeb’ chirixeb’ li raqal sa’eb’ li loq’laj hu. Patz’ reheb’ naq te’xwotz li junelikil na’leb’ neke’xtaw. Jwal aajel ru a’in chiru xk’utb’al chixjunil li na’leb’ xakawresi.

Tzoleb’aal reheb’ li Kok’al

Lix kawresinkil aawib’ re k’utuk sa’ li Tzoleb’aal reheb’ li Kok’al natikla naq nakatzol lix Hu laj Mormon sa’ junesal ut rik’in laa junkab’al. Naq yookat chixtzolb’al, chak’uleb’ li musiq’ejil na’leb’ naxk’e li Santil Musiq’ej chirixeb’ li kok’al sa’ laa tzoleb’aal. Chattijoq rajlal, ut li Musiq’ej naru tatxmusiq’a rik’ineb’ li na’leb’ li te’tenq’anq reheb’ chixtzolb’al lix evangelio li Jesukristo.

Naq nakakawresi aawib’ re k’utuk, naru taataw xkomon chik aana’leb’ rik’ineb’ li aatin chirix li k’utuk sa’ li hu a’in. Sa’ li junjunq chi tusleb’ aatin sa’ Kim, Taaqehin—Choq’ re li ochoch ut li iglees wan jun tasal li k’ab’a’inb’il “Li na’leb’ re xtzolb’aleb’ li kok’al.” K’oxlaheb’ li na’leb’ a’an jo’ tenq’anel na’leb’ li tate’xtenq’a chixk’ulb’al laa musiq’ankil. Laa’at nakanaweb’ ru li kok’al sa’ laa tzoleb’aal—ut naru taanaweb’ ru chi us naq nakat-aatinak rik’ineb’ sa’ li tzoleb’aal. Li Dios naxnaweb’ ajwi’ ru, ut a’an tatxmusiq’a rik’in tz’aqal li chaab’il na’leb’ re xtzolb’aleb’ ut rosob’tesinkileb’.

Naru naq eb’ li kok’al sa’ laa tzoleb’aal ak xe’xb’aanu junjunq reheb’ li kok’ k’anjel sa’ Kim, Taaqehin rik’ineb’ lix junkab’al. Us ajwi’ a’an. Li ka’sutink a’an chaab’il. Naru nakapatz’ reheb’ li kok’al naq te’xwotz chirib’ileb’ rib’ k’a’ru xe’xtzol sa’ rochocheb’—a’ut taakawresi ajwi’ chan ru naq te’tz’aqonq li kok’al us ta ink’a’ yookeb’ chi tzolok sa’ rochocheb’. Eb’ li kok’al neke’xtzol xyaalalil li evangelio chi chaab’il naq li yaal a’an k’utb’il chi naab’al sut rik’in k’iila kok’ k’anjel. Wi nakak’e reetal naq junaq li ch’ina k’anjel chaab’il choq’ reheb’ li kok’al, naru taaka’suti, mas wi’chik naq nakatzoleb’ li kok’al toj ka’ch’ineb’ xyu’am. Maare taanumsi wi’chik junaq li ch’ina k’anjel re li tzolok xnume’.

Chiruheb’ li po b’ar wi’ wan oob’ li domingo, us naq eb’ laj k’utunel sa’ xtzoleb’aaleb’ li kok’al te’xjal li tusleb’ aatin re Kim, Taaqehin re li ro’ domingo rik’in junaq reheb’ li k’anjel re tzolok li neke’tawman sa’ “Xtiqb’al li aatin B: Choq’ re li Tzoleb’aal reheb’ li Kok’al—Xkawresinkileb’ li kok’al re te’kanaaq chiru chixjunil li yu’am sa lix b’ehileb’ li sumwank re li Dios.”

Eb’ li tzoleb’aal reheb’ li saaj ut li ninq sa’ li Dominkil Tzoleb’aal

Naqach’utub’ qib’ sa’ li Dominkil Tzoleb’aal re xtenq’ankil qib’ ut xwaklesinkil qib’ chiqib’il qib’ sa’ xyalb’al qaq’e chixtaaqenkil li Jesukristo. Naru xb’aanunkil a’in chi moko ch’a’aj ta rik’in jun patz’om jo’ “K’a’ru xk’ut li Santil Musiq’ej chawu chiru li xamaan a’in naq xattzolok sa’ lix Hu laj Mormon rik’in Kim, Taaqehin?” Rik’ineb’ lix sumenkil naru nekex’aatinak chirixeb’ li na’leb’ li neke’xnimob’resi li paab’aal chirix li Jesukristo ut lix evangelio.

Chirix a’an naru nakatenq’aheb’ chi aatinak chirixeb’ li na’leb’ re tzolok sa’ Kim, Taaqehin. Qayehaq, jun na’leb’ re tzolok maare tixye naq teeril Alma 36 ut teetz’iib’a chixjunileb’ li aatin li neke’k’utuk chirix li naxb’aanu li Kolonel sa’ li jalb’a-k’a’uxlej. Naru nakapatz’ reheb’ li komon naq te’xwotz li aatin xe’xtaw ut te’aatinaq chirixeb’. Malaj naru neketaweb’ li aatin a’an sa’ komonil sa’ li tzoleb’aal.

Eb’ li molam sa’ li Tijonelil re Aaron ut lix tzoleb’aaleb’ li Saaj Ixq

Naq neke’ch’utla li molam sa’ li Tijonelil re Aaron ut lix tzoleb’aaleb’ li Saaj Ixq sa’ domingo, jalan b’ayaq li rajom a’an chiru li tzolok sa’ li Dominkil Tzoleb’aal. Rochb’een xtenq’ankileb’ rib’ chirib’ileb’ rib’ chixtzolb’al lix evangelio li Jesukristo, eb’ li ch’uut a’in neke’xk’uub’ ajwi’ xna’leb’ chirix xb’aanunkil li k’anjel re li kolb’a-ib’ ut li taqenaqil loq’al (chi’ilmanq Jolomil K’anjenel Hu: Li k’anjelak sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, 1.2). Neke’xb’aanu a’in chi b’eresinb’ileb’ xb’aaneb’ li awa’b’ejil re tzoleb’aal ut molam.

Chi jo’kan naq jun komon re li awa’b’ejil re tzoleb’aal malaj molam tixtikib’ li ch’uut rik’in jun aatinak, qayehaq, chirix lix k’anjeleb’ re xyu’aminkil li evangelio, rilb’aleb’ li kristiaan sa’ rajb’al ru, xwotzb’al li evangelio, malaj tz’aqonk sa’ li k’anjel re li santil ochoch ut li resilal li junkab’al.

Chirix li hoonal a’in re k’uub’ank na’leb’, jun aj k’utunel naxb’eresi li tzoleb’aal malaj molam sa’ xtzolb’al li evangelio sa’ komonil. Naru nak’utuk jun laj k’utunel li ak nim malaj jun komon sa’ li tzoleb’aal malaj molam wi xk’eeman xtaqlankil Li awa’b’ejil re tzoleb’aal malaj molam, chi tenq’anb’il xb’aaneb’ laj b’eresinel ninq, neke’xk’e li taqlank.

Eb’ li te’k’utuq tento te’xkawresi rib’ rik’in roksinkileb’ li na’leb’ re tzolok sa’ li tusleb’ aatin re li junjunq xamaan sa’ Kim, Taaqehin. Sa’ li junjunq chi tusleb’ aatin, li eetalil a’in nareetali jun k’anjel li naru tixtenq’aheb’ chi us li saaj. A’b’anan, chixjunileb’ li na’leb’ sa’ li tusleb’ aatin naru neke’oksiman re xtzolb’aleb’ li saaj.

Re rilb’al jun tusleb’ aatin re k’utuk li naru na’oksiman sa’eb’ li ch’uut reheb’ li molam malaj tzoleb’aal, chi’ilmanq xtiqb’al li aatin D.