Mataupu 6
O le Miti a Liae
Na ta’u atu e Liae i lona aiga se faaaliga taua na ia maua e ala i se miti. Na fiafia Liae ia Nifae ma Sama i lana miti, ae na faanoanoa ia Lamana ma Lemuelu.
I le miti a Liae, na ia iloa ai se tagata o loo ofu i se ofu sinasina, ma sa fai atu ia Liae e mulimuli atu ia te ia. Na mulimuli atu Liae i lea tagata i se mea pouliuli gaogao ma le pogisa.
Ina ua mavae le tele o itula o malaga Liae i le pogisa, na ia tatalo atu i le Alii mo se fesoasoani.
Ona ia vaaia lea o se laau ma ni ona fua papa’e. O ia fua suamalie e faafiafiaina ai i latou e aai ai.
Na ai e Liae le fua, ma ua faatumulia ai o ia i le olioli. Na manao o ia e tofo e lona aiga nei fua aua ua ia iloa o le a faafiafiaina ai foi i latou.
Na vaaia e Liae se vaitafe o tafe i tafatafa ane o le laau. O le mata o le vaitafe na ia iloa atu ai Sarai, Sama, ma Nifae.
Na valaau atu Liae i lona toalua ma lana fanau e o mai e tofo i fua o le laau. Na o atu Sarai, Sama, ma Nifae ma tofo i le laau, ae le i o Lamana ma Lemuelu.
Na vaaia foi e Liae se ai uamea ma se auala sao ma le vaapiapi e tau atu i le laau.
Na ia vaaia le toatele o tagata o loo savavali po o agai atu i lenei auala. Ona o le pogisa tele o le auala, o lea na pauu ese ai le toatele ma leiloloa.
O isi na latou pipiimau i le ai uamea i le pouliuli ma latou tau atu ai i le laau. Sa latou tofo i fua.
O tagata foi o loo i se fale tele i le isi itu o le vaitafe o loo faatauemu atu ia i latou o loo aai i fua o le laau. O nisi o i latou na aai i fua o le laau ua matamumuli, ma ua o ese mai le laau.
Na vaai Liae i ni tagata se toatele i lana miti. O isi sa latou pipiimau i le ai uamea ma o atu i le ala pogisa e tau atu i le laau. Na latou tofo i fua o le laau. O isi sa o atu i le fale tele pe ua malelemo foi i le vaitafe ma leiloloa ai. E le i aai Lamana ma Lemuelu i fua o le laau. Na popole Liae ia i laua ma ua ia taumafai e fesoasoani ina ia laua usiusitai i poloaiga a le Atua.