Mataupu 12
O Le Tupu o Peniamina
O le Tupu o Peniamina o se tupu amiotonu lea o tagata Sa Nifae. Faatasi ai ma le fesoasoani a tagata amiotonu, na ia aumaia ai le filemu i le nuu.
Ua oo ina matua le Tupu o Peniamina ma ua manao o ia e talanoa atu i ona tagata. Na manao o ia e ta’u atu ia i latou, o lona atalii o Mosaea o le a avea ma tupu e sosoo ai.
Na o mai tagata mai vaega eseese o le nuu ma faapotopoto i tafatafa o le malumalu. Na latou faatutuina o latou faleie ma faitotoa e faasaga atu i le malumalu.
Na lauga atu le Tupu o Peniamina mai se olo ina ia lagona e tagata uma o Sa Nifae.
Na ia ta’u atu i ona tagata, sa ia taumafai malosi e auauna mo i latou. Na ia faapea atu o le auala e auauna atu ai i le Atua o le auauna lea o le tasi i le isi.
Na ta’u atu e le Tupu o Peniamina i tagata e usitai i poloaiga a le Atua. O i latou e tausia ma le faamaoni poloaiga, o le a fiafia ma mau faatasi ma le Atua i se aso.
Na tau atu e Peniamina ua toeitiiti ona fanau mai lea o Iesu Keriso i le lalolagi. O le igoa o lona tina o Maria.
O le a faia e Iesu ni vavega. O le a ia faamaloloina e mamai, ma faatutu mai e ua oti. O le a ia faapupulaina tauaso ma o le a faalogo foi ē tutuli.
O le a mafatia ma maliu Iesu mo agasala a tagata uma. O i latou e salamo ma faatuatua ia Iesu o le a faamagaloina a latou agasala.
Na ta’u atu e le Tupu o Peniamina i tagata Sa Nifae, o le a sasaina e tagata amioleaga Iesu. Ona latou faasatauroina lea o ia.
A mavae aso e tolu o le a toetu mai Iesu.
Ina ua maea ona lauga atu le Tupu o Peniamina, ona pauu lea o tagata Sa Nifae i le eleele. Na faanoanoa i latou ona o a latou agasala ma ua mananao e salamo.
Sa faatuatua tagata ia Iesu Keriso, ma sa latou tatalo mo se faamagaloga.
Na faatumulia o latou loto i le Agaga Paia. Na latou iloa ua faamagaloina i latou ma alofagia e le Atua. Na latou lagona le filemu ma le olioli.
Na ta’u atu e le Tupu o Peniamina i ona tagata ia talitonu i le Atua. Na manao o ia latou te iloa o le Atua na faia mea uma, ma o loo ia te ia le poto ma le malosi.
Na ta’u atu e le Tupu o Peniamina i tagata ia lotomaualalo ma tatalo i aso uma. Na manao o ia e manatua e ona tagata le Atua i taimi uma ma ia faamaoni.
Na ta’u atu e ia i matua e aua nei tuuina atu a latou fanau e tauaimisa pe feupua’i.
Na ia ta’u atu ia i latou e aoao a latou fanau ina ia usiusitai ma fealofani ma auauna atu le tasi i le isi.
Na ia lapataia tagata e faaeteete i mea latou te mafaufauina, tautatala i ai ma faia. Ia latou faatuatua ma tausi poloaiga i aso uma o totoe o o latou olaga.
Na fesili atu le Tupu o Peniamina i tagata pe latou te talitonu i ana aoaoga. Sa tali mai i latou uma latou te talitonuina. Ua suia i latou e le Agaga Paia ma ua latou le toe fia agasala.
Na osi feagaiga i latou uma ma folafola atu o le a latou tausia poloaiga a le Atua. Na fiafia le Tupu o Peniamina.
Na tuuina atu e le Tupu o Peniamina le aia tatau i lona atalii o Mosaea e avea ai ma tupu fou. O le tolu tausaga mulimuli ane, na maliu ai le Tupu o Peniamina.
O Mosaea o se tupu amiotonu. Na galue malosi o ia ma auauna atu i ona tagata, e pei ona faia e lona tama.