Mataupu 41
O Faailoga O le Soifua Mai O Keriso
Na vaaia e tagata Sa Nifae faailoga uiga ese ma vavega na valoia e perofeta o le a oo mai ao le i soifua mai Iesu Keriso.
A o isi tagata Sa Nifae na latou faapea mai ua tea le taimi e soifua mai ai Iesu. Na latou faatauemu ia i latou o loo talitonu pea i valoaga a Samuelu le Sa Lamana.
Na faanoanoa i latou na talitonu ia Iesu Keriso ma perofeta ina ne’i i ai se mea e tula’i mai e taofia ai valoaga mai le faataunuuina.
Sa maitauina ma le faatuatua e tagata se po e lē oo i ai se pogisa, o le faailoga lea o le a soifua mai Iesu Keriso.
Na filifili e i latou e le i talitonu ia Iesu Keriso, se aso e fasioti ai i latou e talitonu pe a lē taunuu lea faailoga.
Na faanoanoa Nifae ona o le amioleaga o i latou e lē talitonu i le Faola.
Na tatalo Nifae i le aso atoa mo tagata o le a fasiotia.
Na faamafanafanaina e le Alii Nifae ma ta’u atu ia te ia o le a le oo se pogisa i lena po. Ma o le a fanau mai Iesu i le aso e sosoo ai i Peteleema.
O lena po na goto ai le la, ae le i i ai se pogisa. Ua taunuu le faailoga o le fanau mai o Iesu Keriso. Na matuai maofa tagata.
O i latou na fuafua e fasioti i latou na talitonu, na pauu i le eleele e peiseai ua feoti.
Na fefefe i latou aua sa amioleaga. O lea ua latou iloa o le a fanau mai le Faaola ma e moni lava perofeta.
Na malamalama le po atoa. Ina ua oso ae le la i le aso na sosoo ai, na iloa e tagata o le a fanau mai Iesu Keriso i le aso e sosoo ai. Ua taunuu valoaga.
Na vaaia le fetu fou i le vanimonimo, e pei ona ta’ua e perofeta.
Na taumafai pea Satani ina ia aua nei talitonu tagata i faailoga na latou vaaia, ae peitai e toatele na talitonu.
Na papatiso e Nifae ma isi taitai o le Ekalesia i latou uma na talitonu ma salamo.
Ua oo mai le tala lelei i le nuu ona ua taunuu upu a perofeta. Ua soifua mai Iesu Keriso.