Mataupu 30
Ua Fautuaina e Alema Ona Atalii
Ua ta’u atu e Alema i lona atalii matua o Helamana, e faatuatua i le Atua. Na ia ta’u atu ia te ia le agelu a le Atua lea na faaali mai ia Alema e taofi le faaleagaina o le Ekalesia.
E tolu aso na mafatia ai Alema ona o lona tausalaina. Ona ia manatuaina lea o aoaoga a lona tama e uiga ia Iesu, ma na ia iloa o le a faamagaloina ana agasala.
Na tatalo atu Alema mo se faamagaloga, ma na suitulaga le olioli i tiga sa i lona agaga. Na faamagaloina o ia ona o lona faatuatua ia Iesu Keriso ma lona salamo.
Talu mai lena taimi, na taumafai Alema e aoao atu le talalelei i isi ina ia latou lagonaina le olioli na oo ia te ia. Na faamanuiaina e le Atua Alema ona o lona faatuatua i le Atua.
Na auina atu e Alema ia Helamana faamaumauga paia ma fai atu ia te ia e faaauau pea le tusia o talafaasolopito o ona tagata.
Na tau atu e Alema ia te ia afai na te tausia poloaiga, o le a faamanuiaina o ia e le Atua ma fesoasoani e puipuia papatusi.
Na tau atu foi e Alema ia Helamana e tatalo i taeao ma po uma ma talanoa atu i le Atua i mea uma o loo ia faia, ina ia fesoasoani le Atua e taitai ia te ia.
Sa fiafia Alema i lona atalii o Sepulona, lea na avea ma faifeautalai toa i tagata Sa Sorama. Sa tumau pea le faatuatua o Sepulona e ui lava ina latou fetogi ia te ia i maa.
Na faamanatu atu e Alema ia Sepulona e na o le pau lava le auala e faasaoina ai o le ui atu lea ia Iesu Keriso. Na uunaia e Alema ona atalii e faaauau pea ona aoao atu le talalelei.
E le i tausia e Korianetona le atalii o Alema ia poloaiga. E le i avea o ia ma se faifeautalai faatuatua a o ia aoaoina tagata Sa Sorama.
Ona o mea na faia e Korianetona, ua le talitonu ai tagata Sa Sorama i aoaoga a Alema.
Na tau atu e Alema ia Korianetona e le mafai e tagata ona natia a latou agasala mai le Atua ma ua tatau ia Korianetona ona salamo.
Na aoao atu e Alema i ona atalii o le a toetutu tagata uma, ae na o i latou e amiotonu e ola faatasi ma le Atua.
O lenei olaga ua tuuina mai i le tagata e salamo ai ma auauna i le Atua, o le tala lea a Alema.
I le toe faamanatuina atu ia Korianetona o lona valaauga o se faifeautalai, na faatonuina ai o ia e Alema e toe foi atu i tagata Sa Sorama, ma aoao atu ia salamo.
Na faaauau pea ona talai atu e Alema ma ona atalii le talalelei. Na latou talai atu e ala i le mana o le perisitua.