“Taekan Ana Boki Moomon,” Karaki man Ana Boki Moomon (2023)
Taekan Ana Boki Moomon
Iesu Kristo ma Ana aomata n te Aono n Amerika
Bon te boki ae tabu Ana Boki Moomon. E reireiniiira taekan te Uea Iesu Kristo ngke E kawara te aono n Amerika n taai aika a bwakanako. Ti kona n reiakina taekan ana euangkerio Iesu, man Ana Boki Moomon. E reireiniira arora ni karekea te rau ngkai ao arora ni kona ni maeka ma te Atua ao Iesu n te tai teuana.
Iteraniba n atuun Ana Boki Moomon; kabwarabwaraan Ana Boki Moomon; 3 Nibwaai 11
E koreaki ana Boki Moomon irouia ana burabeti te Atua. A koroboki i aon baaba aika biti are aranaki bwa bwaatua. Aia rongorongo ma aia koaua a bon buokiira ni karekea ara onimaki iroun Iesu. A korei rongorongoia kurubu n aomata ake a maeka n aonon Amerika n taai ake ngkoa.
Iteraniba n atuun Ana Boki Mooomon; kabwarabwaraan Ana Boki Moomon
Te kurubu teuana are a roko mai Ierutarem nako aonon Amerika 600 te ririki i mwain bungiakin Iesu. A manga bwenaua nakon uoua te reeti bwa iai aika tenaan Reimwanaite ao iai aika tenaan Nibwaite.
Kabwarabwaraan Ana Boki Moomon; 1 Nibwaai 1:4
Mai imwaaina, teuana te kurubu ae roko man te Taua are Babera nakon te aono n Amerika. A aranaki naakai bwa tenaan Iaretaite.
Kabwarabwaraan ana Boki Moomon; Ita 1:33–43
E reireiniia aomata ana Burabeti te Atua. Ngkana a kakauongo raoi aomata ao ni kawakin ana tua te Atua, ao E na buokiia. E reirei te burabeti taekan Iesu ao n taekinna bwa E na bungiaki i Ierutarem. A reiakinna Nibwaite ma Reimwanaite bwa e na kawariia Iesu i mwiin Matena.
2 Nibwaai 1:20; 25:12–14; 26:1, 3, 9; Motiaea 3:5–11; Aramwa 7:9–13; Ereman 3
E roko Iesu n aron are e tataekinaki irouia burabeti. Imwiin maten ao manga utin Iesu, E kawariia Ana botanaomata. E kariaia aomata n tatabemaniia bwa a na namakina mwiin te neera i aon baina ma waena. A ataia bwa Iesu bon Natin te Atua. E reireia Ana Euangkerio, ao a koreaki mwiina irouia aomata. A taetaekina taekan rokon Iesu inanon ririki aika a bati.
3 Nibwaai 11:7–15, 31–41; 16:4; 4 Nibwaai 1:1–6, 13–22
Moomon bon te burabeti are maiu tebubua te ririki i mwiin rokon Iesu. N ana tai ni maiu Moomon, ao a toki aomata man iriirakin te Uea. Iai iroun Moomon mwiin aia koroboki burabeti ake a maiu mai i mwaina. E ikoti ni kabane aia koroboki inanon teuana te boki. E a riki koroboki akanne bwa Ana Boki Moomon.
Kabwarabwaraan ana Boki Moomon; Ana Taeka Moomon 1:2–9; Moomon 1:2–4, 13–17
I mwain maten Moomon, e anga bwaatua nakon natina ae Moronaai. N ana tai ni maiu Moronaai, ao e rikirake karaoan te buakaka irouia aomata. A tangiria ni kan kamateia aomata ni kabane ake a kakoaua Iesu. E tangiria Moronaai ni buokiia Aomata n taai aika a na roko, ai ngaia are e a waaki ni korei riki rongorongo i aon bwaatua ao n tauni ni kawakin.
Kabwarabwaraan ana Boki Moomon; Ana Taeka Moomon 1:1–2; Moomon 8:1–4, 14–16; Moronaai 1
Ririki aika bati i mwiina, n 1823, e roko Moronaai n rabwatana n anera nakon te Burabeti ae Iotebwa Timiti. E tuangaki Iotebwa iroun Moronaai te tabo are e na reke iai bwaatua aikai. N ana ibuobuoki te Atua, Iotebwa e rairii koroboki ake i aon taian bwaatua.
Kabwarabwaraan ana Boki Moomon; Rongorongon—Iotebwa Timiti 1
E anga te Tamnei ae Raoiroi te Atua bwa e na buokiko n atai koauan bwaai. Ngkana ko wareka ana Boki Moomon, tataro ao butiia te Atua bwa e koaua ke e aki. Ngkana ko karaoia, ao ko na ataia bwa Iesu bon am Tia Kamaiu ao E rangi n tangiriko.