“Molonai 2–3: Mafai ʻo e Lakanga Fakataulaʻeikí,” Tohi ʻa Molomoná – Tohi Lēsoni ʻa e Faiakó (2024)
“Molonai 2–3,” Tohi ʻa Molomoná – Tohi Lēsoni ʻa e Faiakó
Molonai 2–3
Mafai ʻo e Lakanga Fakataulaʻeikí
ʻOku mahuʻinga ʻa e mafai ʻo e lakanga fakataulaʻeiki moʻoni mei he ʻOtuá ʻi he Siasi ʻo e Fakamoʻuí. ʻI he konga ʻo e ngaahi lea fakaʻosi ʻa Molonai ki he ngaahi toʻu tangata ʻi he kahaʻú, naʻá ne akonaki fekauʻaki mo e mafai ke fakahoko e ngaahi ouau ʻo e lakanga fakataulaʻeikí. ʻI heʻene fai iá, naʻá ne fakatolonga ai ha ngaahi moʻoni mahuʻinga fekauʻaki mo e founga ʻoku fakaʻaongaʻi ai ʻa e lakanga fakataulaʻeikí. ʻE lava ke tokoni ʻa e lēsoni ko ʻení ke mahino kiate koe ʻa e mafai ʻo e lakanga fakataulaʻeikí ʻi he Siasi ʻo e Fakamoʻuí.
Tokoni ki he kau akó ke nau tokanga taha kia Sīsū Kalaisi. Fakalaulauloto ki he founga ʻoku akoʻi ai ʻe he folofolá ha ngaahi tefitoʻi moʻoni ʻoku tokoni ke mahino lelei ange kiate kitautolu ʻa e Fakamoʻuí. Fakaafeʻi ʻa e kau akó ke kumi ha meʻa te nau lava ʻo ako fekauʻaki mo e mālohi, ʻaloʻofa, mo e ivi tākiekina ʻo Sīsū Kalaisí mei he ngaahi tefitoʻi moʻoni ʻo e ongoongoleleí ʻoku nau ʻilo ʻi he folofolá.
Teuteu ʻa e tokotaha akó: Fakakaukau ke fakaafeʻi ʻa e kau akó ke nau talanoa mo ha taha maʻu lakanga fakataulaʻeiki pe ko ha taha ʻoku ngāue ʻi ha uiuiʻi faka-Siasi. ʻE lava ke fehuʻi ʻe he kau akó ki he tokotaha fakafoʻituitui ko iá pe ko e hā ʻene ongo fekauʻaki mo ʻene maʻu ʻa e mafai ʻo e Fakamoʻuí ke fua hono ngaahi fatongiá.
Ngaahi ʻEkitivitī Ako ʻOku Ala Fakahokó
Kimuʻa pea kamata ʻa e kalasí, fūfuuʻi ha meʻa te ke fiemaʻu lolotonga ʻa e lēsoní, hangē ko e sioká, ʻū peni fakaʻilonga, pe ko hoʻo folofolá. Fakaafeʻi ʻa e kau akó ke kumi ʻa e meʻa ko iá, pea fehuʻi ange pe ko e hā ʻoku fiemaʻu ai ia ki he lēsoní.
Fakamanatu ki he kau akó naʻe mole ha ngaahi moʻoni mahinongofua mo mahuʻinga lolotonga ʻa e Hē Fakaʻaufuli mei he Moʻoní (vakai, 1 Nīfai 13:26–27, 32). ʻOku akoʻi ʻe he ngaahi tohi ʻa Molonaí ha ngaahi moʻoni mahuʻinga fekauʻaki mo hono fokotuʻu ʻo e Siasi ʻo e Fakamoʻuí ʻa ia naʻe mole lolotonga ʻa e Hē mei he Moʻoní.
“Naʻa ʻaonga”
Naʻe kau ʻa Molonai ʻi he kau maʻu lakanga fakataulaʻeiki fakamuimui taha ʻi hono kuonga fakakosipelí ʻi he konitinēniti ʻo ʻAmeliká. Naʻá ne ʻiloʻi ʻi he taimi te ne pekia aí, ʻe mole ha ngaahi ʻilo mahuʻinga fekauʻaki mo e Siasi ʻo e Fakamoʻuí pea mo Hono mafai lakanga fakataulaʻeikí. Naʻe tohi ʻe Molonai ʻi ha konga ʻo ʻene ngaahi lea fakaʻosí ha meʻa naʻá ne ongoʻi mahalo “naʻa ʻaonga” ki he ngaahi toʻu tangata ʻi he kahaʻú (Molonai 1:4). Naʻá ne tohi fekauʻaki mo e mafai mo e ngaahi ouau ʻo e lakanga fakataulaʻeikí ʻa ia ʻoku maʻu ʻi he Siasi pē ʻo e Fakamoʻuí.
ʻI he ʻaʻahi ʻa e Fakamoʻui kuo toetuʻú ki he kau Nīfaí, “naʻá ne ala ʻaki hono toʻukupú ki he kau ākonga kuó ne filí” pea “tuku kiate kinautolu ʻa e mālohi ke foaki ʻa e Laumālie Māʻoniʻoní” (3 Nīfai 18:36–37). Naʻe fakakau ʻe Molonai ʻi heʻene lekōtí ha konga ʻo e ngaahi fakahinohino ʻa e Fakamoʻuí ki he kau ʻAposetolo Nīfai ʻe toko hongofulu mā uá fekauʻaki mo e founga hono foaki ʻo e meʻafoaki ʻo e Laumālie Māʻoniʻoní.
Ke fakatupulaki ʻa e fealēleaʻaki ʻa e kau akó, fakakaukau ke fakaafeʻi ke nau ngāue mo ha kaungā-ako pe ʻi ha fanga kiʻi kulupu iiki ki he ʻekitivitī ko ʻení. ʻE lava ke ako ʻe he kau akó ʻa e Molonai 2 pe 3 pea vahevahe ʻa e meʻa naʻa nau akó mo ha taha naʻá ne ako ʻa e vahe ʻe tahá. ʻE lava ke ʻoange ʻa e fakamatala ko ʻení ke tataki ʻaki ʻa e kau akó ʻi heʻenau akó.
Mafai ke foaki ʻa e meʻafoaki ʻo e Laumālie Māʻoniʻoní
Lau ʻa e Molonai 2:1–3, ʻo kumi ʻa e meʻa naʻe akoʻi ʻe Molonai ʻoku mahuʻingá.
-
Ko e hā ha meʻa naʻá ke maʻu ʻi he ngaahi veesi ko ʻení ʻokú ke ongoʻi ʻoku mahuʻinga?
-
Mei he meʻa kuó ke ʻosi ʻiló, ko e hā ʻa e mafai lakanga fakataulaʻeiki ʻoku fiemaʻu ke foaki ʻa e meʻafoaki ʻo e Laumālie Māʻoniʻoní?
-
Ko e hā ha ngaahi moʻoni te tau lava ʻo ako mei he Molonai 2?
Ko ha foʻi moʻoni ʻe taha, ʻoku foaki ʻe he kau maʻu Lakanga Taulaʻeiki Faka-Melekisētekí ʻa e meʻafoaki ʻo e Laumālie Māʻoniʻoní ki he kau mēmipa ʻo e Siasí kuo papitaisó ʻi he hilifaki ʻo e ongo nimá.
-
ʻOkú ke pehē ko e hā ʻoku fuʻu mahuʻinga ai hono foaki ʻo e Laumālie Māʻoniʻoní? (Ki ha fakamatala ʻokú ne fakatātaaʻi ʻeni, te ke lava ʻo lau ʻa e Ngāue 8:14–24.)
-
ʻE tākiekina fēfē hoʻo ngaahi ongo fekauʻaki mo e meʻafoakí ni ʻe hoʻo ʻiloʻi ko e mafai ke foaki ʻa e meʻafoaki ʻo e Laumālie Māʻoniʻoní ʻoku mei he Fakamoʻuí ia?
-
Kuo tāpuekina fēfē hoʻo moʻuí ʻe he meʻafoaki ʻo e Laumālie Māʻoniʻoní?
Fakanofo ʻo e niʻihi kehé ki he ngaahi tuʻunga ʻo e lakanga fakataulaʻeikí
Naʻe hoko e fakamatala ʻa Molonaí ki he founga hono fakanofo ʻo e kau taulaʻeikí mo e kau akonakí.
Lau ʻa e Molonai 3:1–4, ʻo kumi ʻa e founga ʻoku fakanofo ai ʻa e niʻihi fakafoʻituituí ki he ngaahi tuʻunga ʻo e lakanga fakataulaʻeikí.
-
Ko e hā naʻá ke fakatokangaʻi fekauʻaki mo e founga ʻoku fakanofo ai ʻa e niʻihi fakafoʻituituí ki he ngaahi tuʻunga ʻo e lakanga fakataulaʻeikí?
ʻE lava ke lau mo fakafehokotaki ʻe he kau akó ʻa e Ngaahi Tefito ʻo e Tuí 1:5 ki he Molonai 3.
Neongo ʻoku hā tonu ʻi he Molonai 3 ʻa e fakanofo ki he ngaahi tuʻunga ʻo e lakanga fakataulaʻeiki ʻo e kau taulaʻeikí mo e kau akonakí, ka ʻoku toe ʻaonga foki ʻa e mafaí kiate kinautolu kotoa ʻoku nau maʻu ha ngaahi uiuiʻi ʻi he Siasi ʻo e Fakamoʻuí.
-
Ko e hā ʻoku fiemaʻu ai ke maʻu ʻe he niʻihi fakafoʻituitui ʻoku ngāue ʻi he Siasi ʻo e Fakamoʻuí ʻa Hono mafaí?
Kapau ʻe lava, ʻomi ha fakahokohoko ʻo e mafai ʻo e lakanga fakataulaʻeikí ki he kalasí.
ʻOku maʻu ʻa e mafai ʻo e lakanga fakataulaʻeikí meia Sīsū Kalaisi. Neongo ʻoku maʻu ʻe kinautolu kotoa ʻoku nau maʻu ha ngaahi uiuiʻi ʻi he Siasí ʻa e mafai ʻo e lakanga fakataulaʻeikí, ka ʻoku maʻu ʻe kinautolu ʻoku fakanofo ki he lakanga Taulaʻeiki Faka-ʻĒloné pe Faka-Melekisētekí ha fakahokohoko ʻo e laine maʻu mafai ʻo e lakanga fakataulaʻeikí. ʻOku fakahokohoko ʻe he laine ko ʻení ʻa e mafai ʻo ha taha maʻu lakanga fakataulaʻeiki kia Sīsū Kalaisi. ʻE lava ke kole ʻe he kau maʻu Lakanga Taulaʻeiki Faka-Melekisētekí ha lekooti ʻo honau laine maʻu mafaí ʻi he ChurchofJesusChrist.org. ʻOku ʻikai ʻoatu ʻe he Siasí ha lekooti ʻo e laine maʻu mafaí maʻá e kau maʻu Lakanga Taulaʻeiki Faka-ʻĒloné. Ka neongo ia, kapau naʻe fakanofo ha taha maʻu Lakanga Taulaʻeiki Faka-ʻĒlone ʻe ha taha maʻu Lakanga Taulaʻeiki Faka-Melekisēteki, te ne lava ʻo ako fekauʻaki mo e fakahokohoko ʻo e laine maʻu mafai ʻo e tangata naʻá ne fakanofo iá.
Naʻe fakamatala ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
ʻOku mahulu hake ʻi he aleapau pē ʻa e tangatá, ʻi he taimi ʻoku tau ngāue ʻaki ai ʻa e mafai fakalangí. He ʻikai ke fakalele ia ʻaki ha ako ki he meʻa fakalotú pe ko hano fakanofo kita ki ai ʻe he haʻofangá. ʻIkai, ʻi he ngāue kuo fakamafaiʻi ʻe he ʻOtuá, kuo pau ke ʻi ai ha mālohi ia ʻoku mahulu ange ʻi he mālohi kuo ʻosi maʻu ʻe he kakai ʻoku tangutu he sea ʻo e falelotú, veʻe halá pe ʻi he ngaahi faiʻanga lotú—ko ha foʻi moʻoni ne tokolahi ha kau fekumi fakalotu ne nau ʻiloʻi mo tala fakahāhā ʻi ha ngaahi toʻu tangata lahi, ʻo aʻu ki he taimi ʻo hono Fakafoki Mai ʻo e Ongoongoleleí. …
… ʻOku foki ʻa e [laine maʻu mafai lakanga fakataulaʻeiki ʻo e tokotaha maʻu lakanga fakataulaʻeiki takitaha ʻi he Siasí] ʻi ha foʻi sēini ʻoku ʻikai motumotu, ki he kau ʻāngelo talafekau naʻe omi mei he ʻAlo ʻo e ʻOtuá ke foaki mai ʻa e meʻafoaki taʻe-hano-tatau ko ʻení mei he langí. (Jeffrey R. Holland, “Our Most Distinguishing Feature,” Ensign pe Liahona, Mē 2005, 44)
Fakakaukau ke fakaʻaliʻali ha sēini ki he kau akó. Fakamatalaʻi ange ʻoku fakafofongaʻi ʻe he ʻuluaki fehokotakiʻanga ʻo e sēiní ʻa Sīsū Kalaisi pea mo e fehokotakiʻanga hono uá, ʻa kinautolu naʻá Ne fakanofo ki he lakanga fakataulaʻeikí. ʻOku fakafofongaʻi ʻe he fehokotakiʻanga hono tolú ʻa kinautolu ne nau fakanofó ʻo hokohoko pehē ai pē, ʻo fakafou mai ʻi he ngaahi toʻu tangatá ki he kau maʻu lakanga fakataulaʻeiki ʻi he ʻaho ní, ʻa ia ʻoku fakafofongaʻi ʻe he fehokotakiʻanga fakaʻosi ʻo e sēiní.
-
Ko e hā ʻoku mahuʻinga ai ke lava ʻo fakatotoloʻi fakafoki ʻa e mafai ʻo e lakanga fakataulaʻeikí kia Sīsū Kalaisí?
-
ʻE lava fēfē ʻe he ʻilo ki he fehokotaki ko ʻeni kia Sīsū Kalaisí ʻo tākiekina hoʻo ongo fekauʻaki mo e ngaahi ouaú, uiuiʻí, pe ngaahi tāpuaki ʻokú ke maʻu ʻo fakafou ʻi he lakanga fakataulaʻeikí?
ʻE lava ke lipooti ʻa e kau akó fekauʻaki mo e ʻekitivitī teuteu ki he kalasí.
ʻE lava foki ke toe vakaiʻi ʻe he kau akó ʻa e Molonai 2 mo e 3, ʻo kumi ha ngaahi faitatau ʻi he ongo vahé, pea lipooti ʻa e meʻa ʻoku nau ʻiló.
Vahevahe ʻa e meʻa kuó ke akó
Kapau ʻe tokoni ke fakatātaaʻi ʻe he kau akó ʻenau mahino ki he meʻa ne nau ako ʻi he Molonai 2–3, fakakaukau ke aleaʻi ʻa e tūkunga ko ʻení.
Fakakaukauloto ʻoku ʻi ai ha mēmipa ho fāmilí ʻoku ʻamanaki ke papitaiso mo hilifakinima, fakanofo ki he lakanga fakataulaʻeikí, pe vaheʻi ki ha uiuiʻi. Ko e hā te ke lava ʻo vahevahe mo ia mei he Molonai 2 pe 3 ke tokoni ke mahino kiate ia ʻa e mahuʻinga ʻo e meʻa ʻe hokó?