Seminelí
Molonai 1: ʻE ʻIkai Te U Fakaʻikaiʻi ʻa e Kalaisí

“Molonai 1: ʻE ʻIkai Te U Fakaʻikaiʻi ʻa e Kalaisí,” Tohi ʻa Molomoná – Tohi Lēsoni ʻa e Faiakó (2024)

“Molonai 1,” Tohi ʻa Molomoná – Tohi Lēsoni ʻa e Faiakó

Molonai 1

ʻE ʻIkai Te U Fakaʻikaiʻi ʻa e Kalaisí

ʻĪmisi
Molonai

Kuo teʻeki faingofua ʻa e hoko ko ha tokotaha muimui ʻo Sīsū Kalaisí. ʻI he ofi ki he fakaʻosinga ʻo e Tohi ʻa Molomoná, naʻe fakahā ʻe he palōfita ko Molonaí naʻe fakapoongi ʻa e kau muimui ʻo Kalaisí tukukehe kapau ne nau fakaʻikaiʻi ʻa e Fakamoʻuí (vakai, Molonai 1:2). Koeʻuhí ko e ʻikai loto ʻa Molonai ke fakaʻikaiʻi ʻa Sīsū Kalaisí, naʻe pau ai ke ne ʻalu fano pē ʻo kumi ha feituʻu ʻe malu aí pea toitoi mei he kau Leimaná. Mahalo kuó ke ongoʻi tuenoa ʻi hoʻo feinga ke moʻui ʻaki hoʻo tuí mo tauhi totonu ki he Fakamoʻuí mo Hono Siasí. ʻE lava ke tokoni ʻa e lēsoni ko ʻení ke fakaʻaiʻai koe ke ke muimui maʻu pē kia Sīsū Kalaisi pea ʻoua ʻe fakaʻikaiʻi Ia.

ʻEke ha ngaahi fehuʻi ʻokú ne fakaafeʻi ʻa e vakavakaiʻi fakatāutahá. ʻE lava ke hanga ʻe he ngaahi fehuʻi ʻokú ne fakaafeʻi ʻa e kau akó ke fakalaulauloto ki he folofolá, ko honau tūkunga lolotongá, ngaahi ongo ʻoku nau maʻu ki he Fakamoʻuí, pe ko hono fakaʻaongaʻi ʻo e ngaahi tefitoʻi moʻoní, ʻo fakaafeʻi ʻa e Laumālié ke Ne akoʻi kinautolu.

Teuteu ʻa e tokotaha akó: Fakaafeʻi ʻa e kau akó ke fakakaukau ki ha aʻusia ʻi haʻanau muimui pe ko ha taha ʻoku nau ʻilo, kia Sīsū Kalaisi neongo naʻa nau ongoʻi tuenoa pe naʻe fakafepakiʻi kinautolu.

Ngaahi ʻEkitivitī Ako ʻOku Ala Fakahokó

Fehangahangai mo e fakafepakí

Fakaʻaongaʻi ha kiʻi taimi ke ke fakakaukau ki he founga ʻokú ke faʻa fakafeangai ai ʻi he taimi ʻoku ʻākilotoa ai koe ʻe he niʻihi ʻoku ʻikai ke tatau hoʻomou tuʻunga moʻuí pe tui ki he ʻOtuá.

Fakakaukau ke fakaʻaliʻali ʻa e fakatātā ko ʻení ʻi he palakipoé. Ko e founga ʻe taha ko hono ʻai ha laʻipepa lanu kehekehe ʻe fā ke pukepuke hake ʻe he kau akó lolotonga ʻa e ʻekitivitií. ʻE ala tokoni hono fai iá ke fakakau mai e kau akó ʻi he lēsoní.

ʻĪmisi
ʻū tapafā lanu mata, engeenga, moli, mo e kulokula

ʻE lava ke tokoni ʻa e ngaahi lanu ʻi he fakatātā ko ʻení ke ke fakakaukauloto ki ha ngaahi tuʻunga kehekehe ʻo e fakafepakí ʻe ala fehangahangai mo ha ākonga ʻa Sīsū Kalaisi. ʻE lava ke fakafofongaʻi ʻe he lanu matá ʻa e ʻikai ha fakafepakí. ʻE lava ke fakahaaʻi ʻe he lanu engeengá mo e molí ʻa e fakautuutu ange ʻa e fakafepakí, pea fakataipe ʻe he lanu kulokulá ʻa e fakafepaki faingataʻa tahá.

Hili hono fakafeʻiloaki ʻa e meʻa ʻoku fakafofongaʻi ʻe he ngaahi lanu ʻi he fakatātaá, fakakaukau ke vahevahe ha ngaahi aʻusia fakataautaha pe aʻusia naʻe vahevahe ʻi he konifelenisi lahí ʻa ia naʻe fehangahangai ai ha taha mo ha fakafepaki ʻi heʻene hoko ko ha ākonga ʻo Kalaisí. Fakaafeʻi ʻa e kau akó ke fili ʻa e lanu ʻoku nau ongoʻi te ne fakamatalaʻi lelei taha ʻa e mālohi ʻo e tūkunga takitaha. ʻE lava ʻeni ke tokoni ke kamataʻi ha fepōtalanoaʻaki fekauʻaki mo e tauhi totonu kia Sīsū Kalaisí.

Naʻe ngāue fakakautau ʻa Palesiteni Tōmasi S. Monisoni (1927–2018) ʻi heʻene kei talavoú pea naʻá ne mātā tonu ha ngaahi ngāue lahi ʻo e loto-toʻá. Naʻá ne vahevahe ʻa e sīpinga ko ʻení.

Fakakaukau ki he lanu te ke fili ke fakafofongaʻi ʻa e tuʻunga ʻo e fakafepaki naʻe aʻusia ʻe he talavoú ni. ʻOkú ke pehē te ke fakafōtunga fēfē ʻi ha tūkunga tatau?

ʻĪmisi
Palesiteni Thomas S. Monson

Ko e taha he ʻikai toe ngalo ʻiate aú ko e lototoʻa fakalongolongo ʻa ha kauvaka kei taʻu 18—naʻe ʻikai ke tau siasi—naʻe ʻikai fuʻu fiefia ke lotu. ʻI he kau tangata ʻe toko 250 ʻi he konga kaú, ko ia tokotaha pē naʻe tūʻulutui ʻi hono veʻe mohengá he pō kotoa pē, ko e ngaahi taimi ʻe niʻihi naʻe fai ia ʻi he fakamatalili ʻa e kau fakamamahí mo e kau taʻetuí. Naʻe punou hono ʻulú ʻo lotu ki he ʻOtuá. Naʻe ʻikai teitei tuka. Naʻe ʻikai teitei momou. Naʻe lototoʻa. (Thomas S. Monson, “Ke ke Mālohi Peá ke Lototoʻa,” Ensign pe Liahona, Mē 2014, 67)

  • Ko e hā ha meʻa ʻoku makehe kiate koe ʻi he sīpinga ko ʻení?

  • ʻOkú ke pehē ko e hā ha meʻa ʻoku faingataʻa fekauʻaki mo e muimui maʻu pē kia Sīsū Kalaisí? Ko e hā e meʻa ʻokú ne tokoniʻi koé?

Hiki ha ngaahi tūkunga kehe ʻe ala faingataʻa ai ʻa e muimui kia Sīsū Kalaisí. Feinga ke ke fakakaukauloto ki ha ngaahi fakaikiiki pau pea fakakaukau pe ko e lanu hā ʻi he fakatātaá ʻe feʻunga taha mo e tūkunga takitaha.

Ko e moʻoni, ʻoku faingofua ange ke talanoa fekauʻaki mo ʻetau tukupā kia Sīsū Kalaisí ʻi haʻatau fakahoko pau ia ʻi he momeniti ʻoku ʻahiʻahiʻi ai kitautolú. ʻI hoʻo akó, feinga ke ke ʻiloʻi ʻa e fakaʻaiʻai ʻokú ke fiemaʻu ke ke tuʻu maʻu ai ʻi hoʻo tui kia Sīsū Kalaisí pea mo e ngaahi tuʻunga moʻui ʻo Hono Siasi kuo fakafoki maí.

ʻOku kumi ʻe he kau Leimaná ʻa Molonai

ʻI he taimi naʻe ʻoange ai kia Molonai ʻa e fatongia ke ne tauhi mo maluʻi ʻa e ʻū lekooti ʻo e kakai Nīfaí, naʻá ne fehangahangai foki mo e fakafepakí.

Lau ʻa e Molonai 1:1–4, ʻo fakakaukau pe te ke fakafuofuaʻi fēfē ʻa e fakafepaki naʻá ne fehangahangai mo iá.

Ke tokoni ke ke maʻu ha fakafuofua lelei ange ki he tuʻunga ʻo e moʻuí kia Molonaí, te ke lava foki ʻo mamata ʻi he “ʻOku Fakaafeʻi ʻe Molonai ʻa e Tokotaha Kotoa ke Haʻu kia Kalaisi” mei he taimi 0:00 ki he 3:59, ʻoku maʻu ʻi he ChurchofJesusChrist.org.

  • ʻE lahi fēfē ʻa hono fakafepakiʻi ʻo Molonaí ʻi hoʻo fakafuofuá?

  • Ko e hā te tau lava ʻo ako mei he sīpinga ʻa Molonaí?

Ko e moʻoni ʻe taha te tau lava ʻo akó, te tau lava ʻo tauhi moʻoni kia Sīsū Kalaisi ʻi ha faʻahinga tūkunga pē pea ʻikai fakaʻikaiʻi Ia.

Fakakaukau ke hiki ʻa e moʻoni ko ení ʻi he palakipoé. ʻE lava heni ke vakai ki ai ʻa e kau akó ʻi heʻenau lau ha ngaahi sīpinga kehekehe ʻo e kakai ʻoku nau moʻui ʻaki ʻa e moʻoni ko ʻení.

  • Ko e hā ʻoku mahuʻinga ai ke tau tauhi moʻoni, pe līʻoa kia Sīsū Kalaisí?

  • ʻOkú ke pehē ko e hā ha ngaahi aʻusia naʻe maʻu ʻe Molonai naʻe tokoni kiate ia ke ne līʻoa kia Sīsū Kalaisi?

  • Ko e hā ʻokú ke ʻilo fekauʻaki mo Sīsū Kalaisi te ne fakalotolahiʻi koe ke ʻoua naʻá ke fakafīsingaʻi Iá?

Fakakaukau ke fakaʻilongaʻi ʻa e ngaahi lea ʻa Molonai ʻi he veesi 3. Te ke lava foki ʻo lekooti ho hingoá ʻi he tafaʻaki ʻo e hingoa ʻo Molonaí ke tokoni ke fakaʻaiʻai koe ke ke muimui maʻu pē kia Sīsū Kalaisi.

Fakaafeʻi ʻa e kau akó ke vahevahe ha ngaahi sīpinga ʻo ha niʻihi fakafoʻituitui ʻi he folofolá naʻa nau tuʻu maʻu ʻia Sīsū Kalaisi ʻi he ngaahi tūkunga faingataʻá. Fakakaukau ke fakaʻaongaʻi ha niʻihi ʻo e ngaahi sīpinga ʻi laló. Fakamatalaʻi ʻa e puipuituʻá ʻo ka fiemaʻu. Tokoni foki ki he kau akó ke nau fakatokangaʻi ʻoku līʻoa mo moʻoni maʻu pē ʻa Sīsū Kalaisi. Naʻá Ne finangalo lelei ke pekia maʻatautolu takitaha.

Ko hono fakahaaʻi ʻo ʻetau tukupaá

ʻE lava ke hoko ʻeni ko ha taimi lelei ki he kau akó ke lipooti ʻenau ngaahi teuteu ki he kalasí. Te ke lava ʻo tokoni ke fai ʻeni ʻe he kau akó ʻaki hano fai ha fehuʻi hangē ko ʻení.

  • Ko e fē ha taimi kuó ke fakahaaʻi ai pe ko ha taha ʻokú ke ʻiloʻi ha tukupā kia Kalaisi ʻi ha ngaahi tūkunga faingataʻa?

    Fakakaukau ke fakaafeʻi ha kau ako ke tali ʻa e ongo fehuʻi ko ʻení ʻi heʻenau tohinoa akó.

  • ʻOku ʻi ai nai ha ngaahi tūkunga ʻokú ke fehangahangai ai mo ha fakafepaki ʻi hoʻo muimui kia Sīsū Kalaisí?

  • Ko e hā te ke lava ʻo fai ke ke tauhi moʻoni ai kia Sīsū Kalaisi ʻi he ngaahi tūkunga ko iá?

Ke tokoni ke fakakaukau ʻa e kau akó ki he meʻa kuo nau ako ʻi he lēsoni ko ʻení, fakakaukau ke fakaafeʻi kinautolu ke faʻu ha pousitā pe tohi ʻi he mītia fakasōsialé te ne lava ʻo fakaʻaiʻai kinautolu mo e niʻihi kehé ke nau tauhi moʻoni kia Kalaisi ʻi ha faʻahinga tūkunga pē. Te nau lava ʻo fokotuʻu ia ʻi ha feituʻu ko ha fakalotolahi fakataautaha pe vahevahe ia mo e niʻihi kehé. ʻOange ki he kau akó ʻa e naunau ʻe fiemaʻú pea mo e fakahinohino ki he ʻekitivitī ko ʻení. Kapau ʻe lava, fakaʻaliʻali ha sīpinga kimuí ni mai mei he makasini Ki Hono Fakamālohia ʻo e Toʻu Tupú. ʻOku ʻi lalo ha sīpinga.

ʻĪmisi
pousitā fekauʻaki mo e Fakalelei ʻa Sīsū Kalaisí

ʻE lava ke kamata ʻaki ʻe he kau akó hano kumi ha fakatātā ke fakaʻaongaʻi mei he konga “Tānakiʻanga ʻo e Ngaahi ʻĪmisí” ʻi he www.ChurchofJesusChrist.org/media. Tokoniʻi leva ʻa e kau akó ke nau kumi ha ngaahi potufolofola fekauʻaki mo e tauhi moʻoni kia Sīsū Kalaisí ke fakakau ʻi heʻenau pōpoakí. Te nau lava ʻo fakaʻaongaʻi ha veesi mei he Molonai 1, ko ha potufolofola ʻanautolu pē, pe ko ha veesi mei ha lisi te ke ʻoange hangē ko ʻení.

ʻOange ha taimi feʻunga ki he kau akó ke faʻu ʻenau tohí pe pousitaá, pea tuku ke nau vahevahe ʻa e meʻa ne nau faʻú mo honau kaungā-akó. Manatuʻi ke kumi ha ngaahi founga ke fokotuʻu ha ʻātakai malu ʻe ʻilo ai ʻe he kau akó ʻoku fakamahuʻingaʻi mo mahuʻingamālie ʻa e meʻa naʻa nau faʻú.