“Molonai 4–5: Ko e Sākalamēnití,” Tohi ʻa Molomoná – Tohi Lēsoni ʻa e Faiakó (2024)
“Molonai 4–5,” Tohi ʻa Molomoná – Tohi Lēsoni ʻa e Faiakó
Molonai 4–5
Ko e Sākalamēnití
ʻI heʻetau hoko ko e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku fakaafeʻi kitautolu ke tau kau ʻi he ngaahi ouau toputapú mo fai ha ngaahi fuakava mo ʻetau Tamai Hēvaní. ʻI heʻetau fāifeinga ke tauhi ʻetau ngaahi fuakavá, ʻoku tāpuekina kitautolu ʻe he Tamai Hēvaní. Ko e ouau ʻoku tau faʻa kau lahi taha ki aí ko e sākalamēnití. ʻE lava ke tokoni ʻa e lēsoni ko ʻení ke ke tauhi ʻa e fuakava ʻokú ke fai ʻi he taimi ʻokú ke maʻu ai ʻa e sākalamēnití kae lava ke ke maʻu ʻa e Laumālie ʻo e ʻEikí.
Maʻu ha mahino ki he ngaahi fiemaʻu fakaako ʻa e kau akó. Feinga ke mahino kiate koe ʻa e ngaahi fiemaʻu fakaako ʻa e kau ako ʻi hoʻo kalasí. ʻE lava ke kau heni ʻa e ngaahi meʻa ʻoku saiʻia ai ʻa e tokotaha akó pea pehē ki ha ngaahi faingataʻaʻia fakaako. Fekumi ki ha ngaahi founga ke fakakau ai ha ngaahi founga ako kehekehe, hangē ko e ʻū naunau tokoni ki he sió, ngāue fakakulupú, pe ako fakafoʻituituí, koeʻuhí ke lava ʻa e kau akó ʻo maʻu ʻa e lelei tahá mei heʻenau aʻusia ʻi he seminelí.
Teuteu ʻa e tokotaha akó: Fakakaukau ke fakaafeʻi ʻa e kau akó ke omi mateuteu ki he kalasí ke lau maʻuloto ki he lahi taha te nau lavá ʻa e ongo lotu tāpuaki ʻo e sākalamēnití.
Ngaahi ʻEkitivitī Ako ʻOku Ala Fakahokó
Ko e hā e ʻuhinga ʻokú ke ʻalu ai ki he lotú?
Ke teuteuʻi ʻa e kau akó ke nau ako ki he sākalamēnití, fakakaukau ke vahevahe ʻa e fakamatala ko ʻení pe ko ha aʻusia fakataautaha fekauʻaki mo e mahuʻinga ʻo e sākalamēnití.
Naʻe vahevahe ʻe Sisitā Seli A. ʻEsipilini, ko ha tokoni mālōlō ʻo e Kau Palesitenisī Lahi ʻo e Palaimelí, ha fehuʻi naʻe fai ʻe ha foha ki heʻene tamai taʻu 96: “ʻE tangataʻeiki, ko e hā e ʻuhinga ʻokú ke ʻalu ai ki he lotú? ʻOku poʻuli ho fofongá, ʻikai lava ʻo fanongo, pea ʻoku faingataʻa ke ke ʻalu holo. Ko e hā e ʻuhinga ʻokú ke ʻalu ai ki he lotú?” (“Sākalamēnití—ko ha Fakafoʻou maʻá e Laumālié,” Ensign pe Liahona, Nōvema 2014, 14).
-
ʻOkú ke pehē naʻe tali fēfē ʻe he tamaí ʻa e fehuʻi ko ʻení?
“Naʻe tali ange ʻe he tamaí, ‘Ko e sākalamēnití. ʻOku ou ʻalu ke maʻu ʻa e sākalamēnití’” (Cheryl A. Esplin, “Sākalamēnití,” 14).
-
Ko e hā ha meʻa ʻokú ke ʻilo fekauʻaki mo e sākalamēnití naʻá ne fakatupu ʻa e tamaí ke tali pehení?
ʻOku fakataumuʻa ʻa e ngaahi fehuʻi ko ʻení ke fakakaukauloto fakataautaha ki ai. Fakakaukau ke fakaafeʻi ʻa e kau akó ke lekooti ʻenau ngaahi talí ʻi heʻenau tohinoa akó. ʻE ala tokoni foki ke fakaafeʻi kinautolu ke ʻeke ha ngaahi fehuʻi fekauʻaki mo e sākalamēnití.
-
ʻOku mahuʻinga fēfē ʻa e sākalamēnití kiate koé? Ko e hā hono ʻuhingá?
-
Ko e hā ha ngaahi ngāue ʻokú ke fai ke maʻu ai ha aʻusia mahuʻingamālie ʻi he sākalamēnití?
Naʻe fakakau ʻe Molonai ʻi he konga ʻo ʻene lekōtí ʻa e ongo lotu naʻe ʻoange ʻe Sīsū Kalaisi ki he kau Nīfaí kimuʻa ki hono tāpuakiʻi mo tufaki ʻo e sākalamēnití (vakai, Molonai 4:1–2). ʻI hoʻo ako ʻa e ongo lotu ko ʻení ʻi he Molonai 4–5, fakafanongo ki ha ngaahi ueʻi ke ke ʻiloʻi ʻa e meʻa te ke lava ʻo fai ke tauhi ʻa e ngaahi fuakava ʻokú ke fai ʻi he taimi ʻokú ke maʻu ai ʻa e sākalamēnití.
Ko e sākalamēnití
ʻI heʻetau maʻu ʻa e sākalamēnití, ʻoku tau fakahoko ai ha fuakava mo e Tamai Hēvaní pea fakafoʻou ʻa e ngaahi fuakava naʻa tau fakahoko ʻi he papitaisó (vakai, Mōsaia 18:8–10; Tokāteline mo e Ngaahi Fuakava 20:37). “Ko e fuakavá ko ha felotoi toputapu ʻi he vā ʻo e ʻOtuá mo ha taha pe falukunga kakai. ʻOku fokotuʻu ʻe he ʻOtuá ha ngaahi meʻa pau, peá Ne palōmesi ke tāpuakiʻi kitautolu ʻi he taimi te tau talangofua ai ki he ngaahi meʻa ko iá” (Ngaahi Tefito ʻo e Ongoongoleleí, “Fuakavá,” ChurchofJesusChrist.org).
Fakakaukau ke hiki ʻa e saati ko ʻení ʻi he palakipoé pea fakaafeʻi ʻa e kalasí ke nau fakafonu ʻa e kōlomu toʻohemá ʻo fakaʻaongaʻi ʻa e Molonai 4:3. ʻE lava foki ke hiki tatau ia ʻe he kau akó ʻi heʻenau tohinoa akó.
Ko e Fuakava ʻo e Sākalamēnití
|
Ko e meʻa ʻoku ou palōmesi ke faí |
Ngaahi founga ke tauhi ai ʻeku ngaahi palōmesí |
|---|---|
-
Te ke fakamatalaʻi fakanounou fēfē ʻa e meʻa ʻoku tau palōmesí ʻi he taimi ʻoku tau maʻu ai ʻa e maá?
Ko e founga ʻe taha ke fakamatalaʻi fakanounou ai ʻetau konga ʻo e fuakava ʻo e sākalamēnití ko e taimi ʻoku tau maʻu ai ʻa e sākalamēnití, ʻoku tau palōmesi ke loto-fiemālie ke toʻo kiate kitautolu ʻa e huafa ʻo e Fakamoʻuí, manatu maʻu ai pē kiate Ia, mo tauhi ʻEne ngaahi fekaú.
ʻE lava ke vahevahe ʻa e kau akó ki ha ngaahi kulupu tautau toko tolu. Vahe ki he kulupu takitaha ha taha ʻo e ngaahi palōmesi ʻoku tau fai ko e konga ʻo e fuakava ʻo e sākalamēnití. Fakaafeʻi ʻa e kulupú ke aleaʻi ʻa e palōmesi naʻe vahe angé pea vahevahe ha ngaahi fakakaukau ʻe lava ke fakaʻaongaʻi ke fakafonu ʻaki ʻa e kōlomu hono ua ʻi he sātí.
Hili ha taimi feʻunga, fokotuʻutuʻu ʻa e kalasí ki ha ngaahi kulupu foʻou tautau toko tolu. ʻOku totonu ke maʻu ʻe he kulupu foʻou takitaha ha kau ako naʻa nau ako ha ngaahi konga kehe ʻo e fuakava ʻo e sākalamēnití. Fakaafeʻi ʻa e kau akó ke aleaʻi ʻa e meʻa naʻa nau ako ʻi heʻenau ngaahi kulupu totonú pea fetokoniʻaki ke fakafonu ʻa e ʻotu hono ua ʻi he sātí.
Kapau ʻe ʻaonga ki he kau akó ʻenau ako lahi ange fekauʻaki mo e ʻuhinga ke toʻo kiate kinautolu ʻa e huafa ʻo e Fakamoʻuí, fakakaukau ke fakaʻaongaʻi ʻa e fakamatala mo e ngaahi fehuʻi ko ʻení. Fakakaukau ke fakaafeʻi ʻa e kau akó ke nau fakakaukau ki he lahi ʻo ʻenau fiemaʻu ʻa e meʻa ʻoku finangalo ki ai ʻa e Fakamoʻuí ʻo fakafehoanaki ki he meʻa ʻoku nau fiemaʻú pe fiemaʻu ʻe he māmaní maʻanautolú.
Te ke lava foki ʻo fakaʻaongaʻi ʻa e Mōsaia 18:8–10 mo e Sione 14:15 ke tokoni ke fakaloloto e mahino ʻa e kau akó ki he ngaahi founga ke tauhi ai ʻa e fuakava ʻo e sākalamēnití.
-
ʻOkú ke pehē ʻoku ʻuhinga ki he hā ʻa e loto-fiemālie ke toʻo kiate kitautolu ʻa e huafa ʻo e Fakamoʻuí?
Naʻe fakamatala ʻa Palesiteni Henelī B. ʻAealingi ʻo e Kau Palesitenisī ʻUluakí:
ʻOku tau palōmesi ke toʻo kiate kitautolu ʻa Hono huafá. ʻOku ʻuhinga iá kuo pau ke tau vakai kiate kitautolu ʻo hangē pē ko Iá. Te tau fakamuʻomuʻa Ia ʻi heʻetau moʻuí. Te tau fiemaʻu ʻa e meʻa ʻokú Ne finangalo ki aí, ka ʻoku ʻikai ko e meʻa ʻoku tau fiemaʻú pe ko e meʻa ʻoku akoʻi mai ʻe he māmaní ke tau fiemaʻú. (Henry B. Eyring, “That We May Be One,” Ensign, May 1998, 67)
-
ʻE founga fēfē haʻo toʻo kiate koe ʻa e huafa ʻo e Fakamoʻuí ʻo lelei angé?
-
Ko e hā ha ngaahi founga ʻe lava ke tokoni ai hono toʻo kiate kitautolu ʻa e huafa ʻo e Fakamoʻuí ke tau hoko ʻo hangē ko Iá?
Ke ʻiate kitautolu maʻu ai pē ʻa Hono Laumālié
Lau ʻa e Molonai 4:3 mo e 5:2, ʻo kumi ʻa e ngaahi faitatau mo e ngaahi faikehekehe ʻi he lotu ʻo e maá mo e lotu ʻo e uainé (vaí).
-
Ko e hā ʻa e ngaahi faitatau naʻá ke maʻú?
-
Ko e hā ha meʻa ʻe fai ʻe he Tamai Hēvaní kapau te tau tauhi ʻa e fuakava ʻoku tau fai lolotonga ʻa e sākalamēnití?
Ko e tefitoʻi moʻoni ʻe taha ʻoku tau akó ʻi heʻetau tauhi ʻa e fuakava ʻoku tau fai lolotonga ʻa e sākalamēnití, ʻe lava ke ʻiate kitautolu maʻu pē ʻa e Laumālie ʻo e ʻEikí.
-
Fakakaukau ki he founga ʻoku tokoniʻi ai koe ʻe hoʻo loto-fiemālie ke tauhi ʻa e ngaahi talaʻofa ko ʻení ke ke taau ke maʻu maʻu pē ʻa e Laumālie ʻo e ʻEikí:
-
Toʻo kiate koe ʻa e huafa ʻo e Fakamoʻuí.
-
Manatu maʻu ai pē kiate Ia.
-
Tauhi ʻEne ngaahi fekaú.
-
-
ʻE ʻaonga fēfē nai kiate koe hoʻo maʻu maʻu pē ʻa e Laumālie Māʻoniʻoní?
Naʻe akoʻi ʻe Palesiteni Tāleni H. ʻOakesi ʻa e founga te tau lava ai ʻo maʻu ʻa e sākalamēnití pea tāpuekina kitautolu ʻi heʻetau tauhi hono ngaahi fuakavá. Lau ʻa e fakamatala ko ʻení pe mamata ʻi he foʻi vitiō “The Aaronic Priesthood and the Sacrament” mei he taimi 6:48 ki he 7:22 ʻi he ChurchofJesusChrist.org.
ʻOku fekauʻi kitautolu ke tau fakatomalaʻi ʻetau ngaahi angahalá pea haʻu ki he ʻEikí mo ha loto-mafesifesi mo e loto fakatomala ʻo maʻu ʻa e sākalamēnití ʻo fakatatau mo hono ngaahi fuakavá. Ko e taimi ʻoku tau fakafoʻou ai ʻetau ngaahi fuakava ʻo e papitaisó ʻi he founga ko ʻení, ʻoku fakafoʻou leva ʻe he ʻEikí ʻa e mālohi fakamaʻa ʻo hotau papitaisó. ʻOku ngaohi kitautolu ʻi he foungá ni ke tau maʻa pea mo lava maʻu pē ke tau maʻu ʻa Hono Laumālié. ʻOku hā mahino ʻa e mahuʻinga ʻo e meʻá ni ʻi he fekau ʻa e ʻEikí ke tau maʻu ʻa e sākalamēnití ʻi he uike kotoa peé (vakai, Tokāteline mo e Ngaahi Fuakava 59:8–9). (Dallin H. Oaks, “The Aaronic Priesthood and the Sacrament,” Ensign, Nov. 1998, 38)
Ko hono tauhi ʻo e fuakava ʻi he sākalamēnití
Fakakaukau ke vahevahe hoʻo fakamoʻoni fekauʻaki mo e sākalamēnití pea fakaafeʻi ʻa e kau ako ʻe loto-fiemālié ke fakahoko ʻa e meʻa tatau.
Fakaafeʻi ʻa e kau akó ke nau fakakaukau ki he meʻa te nau lava ʻo fai ke tauhi ai ʻenau fuakava ʻi he sākalamēnití. Fakakaukau ke fakaʻaliʻali ʻa e ʻū palakalafi ko ʻení pea fakaafeʻi ʻa e kau akó ke tali ia ʻi heʻenau tohinoa akó. Te ke lava foki ʻo fokotuʻu ange ʻe lava ke hoko hono tauhi ʻo e fuakava ʻi he sākalamēnití ko ha taha ʻo ʻenau ngaahi taumuʻa fakalakalaka ʻi he toʻu tupú.
Fakakaukau ki hoʻo ngaahi feinga ke tauhi ʻa e ngaahi palōmesi ʻokú ke fai ʻi he taimi ʻokú ke maʻu ai ʻa e sākalamēnití. Ko e hā ʻa e meʻa ʻoku ngāue leleí? Ko e hā ʻa e meʻa ʻe lava ke fakaleleiʻí?
Fili ha palōmesi ʻe taha pe lahi ange te ke loto ke ke tokanga taha ki ai. Hiki hifo ha meʻa pau te ke lava ʻo fai. Mahalo te ke fie fakalaulauloto ki heni ʻi he taimi hoko te ke maʻu ai ʻa e sākalamēnití.
Tokanga ki he founga ʻoku tokoniʻi ai koe ʻe hoʻo tauhi hoʻo ngaahi fuakavá ke ke maʻu ʻa e Laumālie Māʻoniʻoní pea mo e liliu ʻokú ke vakai ki ai ʻi hoʻo moʻuí.