Ang tinuod nga awtoridad sa pagkapari gikan sa Dios importante sa Simbahan sa Manluluwas. Sa pipila sa kataposang mga pulong ni Moroni ngadto sa umaabot nga mga henerasyon, mitudlo siya mahitungod sa awtoridad sa pagpahigayon sa mga ordinansa sa pagkapari. Sa pagbuhat niini iyang gipreserbar ang importante nga mga kamatuoran kon sa unsang paagi gigamit ang pagkapari. Kini nga leksiyon makatabang kanimo nga makasabot sa awtoridad sa pagkapari sa Simbahan sa Manluluwas.
Tabangi ang mga estudyante nga makatutok kang Jesukristo. Pamalandongi kon giunsa pagtudlo sa mga kasulatan ang mga baroganan nga makatabang kanato nga mas makasabot sa Manluluwas. Dapita ang mga estudyante sa pagpangita kon unsay ilang makat-onan mahitungod sa gahom, kalooy, ug impluwensya ni Jesukristo gikan sa mga baroganan sa ebanghelyo nga ilang nadiskobrehan diha sa mga kasulatan.
Pagpangandam sa estudyante: Ikonsiderar ang pagdapit sa mga estudyante sa pagpakigsulti sa usa ka naghupot sa pagkapari o sa usa ka tawo nga nag-alagad sa usa ka calling sa Simbahan. Mahimong pangutan-on sa mga estudyante kana nga indibidwal kon unsay iyang gibati mahitungod sa pagdawat sa awtoridad sa Manluluwas sa pagbuhat sa iyang mga responsibilidad.
Mga Posibleng Kalihokan sa Pagkat-on
Sa dili pa ang klase, pagtago og usa ka butang nga imong kinahanglanon sa panahon sa leksiyon, sama sa chalk, mga marker, o ang imong mga kasulatan. Dapita ang mga estudyante sa pagpangita sa aytem, ug pangutan-a nganong gikinahanglan kini alang sa leksiyon.
Pahinumdomi ang mga estudyante nga daghang yano ug bililhong mga kamatuoran ang nawala atol sa Dakong Apostasiya (tan-awa sa 1 Nephi 13:26–27, 32). Ang mga sinulat ni Moroni nagtudlo og importante nga mga kamatuoran mahitungod sa organisasyon sa Simbahan sa Manluluwas nga nawala atol sa Apostasiya.
“Bililhon”
Si Moroni mao ang usa sa kataposang mga naghupot sa pagkapari sa iyang dispensasyon sa kontinente sa Amerika. Nasayod siya nga kon siya mamatay, ang importante nga kahibalo mahitungod sa Simbahan sa Manluluwas ug sa Iyang awtoridad sa pagkapari mawala. Sa pipila sa iyang kataposang mga pulong, si Moroni misulat unsa ang iyang gibati nga mahimo “nga bililhon” sa umaabot nga mga henerasyon (Moroni 1:4). Misulat siya mahitungod sa awtoridad sa pagkapari ug mga ordinansa nga anaa lamang sa Simbahan sa Manluluwas.
Sa dihang ang nabanhaw nga Manluluwas mibisita sa mga Nephite, “siya mihikap pinaagi sa iyang kamot sa mga tinun-an kinsa siya mipili” ug “mihatag kanila og gahom sa pagtugyan sa Espiritu Santo” (3 Nephi 18:36–37). Gilakip ni Moroni sa iyang rekord ang pipila sa mga instruksiyon sa Manluluwas ngadto sa napulog duha ka mga tinun-ang Nephite kon unsaon paghatag sa gasa sa Espiritu Santo.
Aron madugangan ang kolaborasyon sa estudyante, ikonsiderar ang pagdapit sa mga estudyante sa pagtrabaho uban sa usa ka klasmeyt o sa gagmay nga mga grupo alang sa mosunod nga kalihokan. Mahimong tun-an sa mga estudyante ang Moroni 2 o 3 ug dayon ipakigbahin ang ilang nakat-onan sa usa ka tawo nga nagtuon sa laing kapitulo. Ang mosunod nga impormasyon mahimong ihatag aron sa paggiya sa mga estudyante sa ilang pagtuon.
Awtoridad sa pagtugyan sa gasa sa Espiritu Santo
Basaha ang Moroni 2:1–3, mangita sa unsay gitudlo ni Moroni nga bililhon.
Unsa ang imong nakaplagan niini nga mga bersikulo nga imong gibati nga bililhon?
Gikan sa unsay imong nahibaloan na, unsa nga awtoridad sa pagkapari ang gikinahanglan sa pagtugyan sa gasa sa Espiritu Santo?
Unsa nga mga kamatuoran ang atong makat-unan sa Moroni 2?
Usa ka kamatuoran mao nga ang mga naghupot sa Melchizedek nga Pagkapari mitugyan sa gasa sa Espiritu Santo ngadto sa nabunyagan nga mga miyembro sa Simbahan pinaagi sa pagpandong sa mga kamot.
Ngano sa imong hunahuna nga ang pagtugyan sa Espiritu Santo importante kaayo? (Alang sa usa ka asoy nga nagpamatuod niini, mahimo nimong basahon ang Mga Buhat 8:14–24.)
Sa unsang paagi nga ang pagkahibalo nga ang awtoridad sa pagtugyan sa gasa sa Espiritu Santo nagagikan sa Manluluwas makaimpluwensya sa imong mga pagbati mahitungod niini nga gasa?
Sa unsang paagi nga ang gasa sa Espiritu Santo mipanalangin sa imong kinabuhi?
Pag-orden sa uban ngadto sa mga katungdanan sa pagkapari
Sunod nga gipasabot ni Moroni kon unsaon pag-orden ang mga pari ug mga magtutudlo.
Basaha ang Moroni 3:1–4, mangita kon sa unsang paagi ang mga indibidwal gi-orden ngadto sa mga katungdanan sa pagkapari.
Unsa ang inyong namatikdan kon sa unsang paagi ang mga indibidwal gi-orden ngadto sa mga katungdanan sa pagkapari?
Bisan og ang Moroni 3 piho nga naghisgot sa pag-orden sa mga katungdanan sa pagkapari sa mga pari ug sa mga magtutudlo, ang awtoridad magamit usab sa tanan nga naghupot og mga calling sa Simbahan sa Manluluwas.
Ngano nga gikinahanglan alang sa mga indibidwal nga nag-alagad sa Simbahan sa Manluluwas nga makabaton sa Iyang awtoridad?
Kon mahimo, pagdala og linya sa awtoridad sa pagkapari ngadto sa klase.
Ang awtoridad sa pagkapari nagagikan ni Jesukristo. Samtang ang tanan nga naghupot og mga calling sa Simbahan adunay awtoridad sa pagkapari, kadtong gi-orden sa Aaronic o Melchizedek nga Pagkapari nga mga katungdanan adunay linya sa awtoridad sa pagkapari. Kini nga linya nagsubay sa awtoridad sa naghupot sa pagkapari ngadto kang Jesukristo. Ang mga naghupot sa Melchizedek nga Pagkapari mahimong mohangyo og rekord sa ilang linya sa awtoridad sa ChurchofJesusChrist.org. Ang Simbahan dili maghatag og mga rekord sa mga linya sa awtoridad alang sa mga naghupot sa Aaronic nga Pagkapari. Apan, kon ang tighupot sa Aaronic nga Pagkapari gi-orden sa usa ka naghupot sa Melchizedek nga Pagkapari, makakat-on siya mahitungod sa linya sa awtoridad sa tawo nga mi-orden kaniya.
Si Elder Jeffrey R. Holland sa Korum sa Napulog Duha ka Apostoles mipasabot:
Imahe
Elder Jeffrey R. Holland
Ang pagbuhat nga may balaanong awtoridad nagkinahanglan og labaw pa kay sa pagsabotsabot sa mga tawo. Kini dili mahimo pinaagi sa teolohikal nga pagbansay o pagkatinugyanan gikan sa kongregasyon. Dili, diha sa hinatagan og awtoridad nga buhat sa Dios kinahanglan nga adunay gahom nga mas dako kay sa niana nga gipanag-iya na sa mga tawo diha sa mga lingkuranan sa simbahan o diha sa mga kadalanan o diha sa mga seminary—usa ka kamatuoran nga nahibaloan sa daghang matinuoron nga relihiyosong mga tigpangita ug bukas nga gidawat sulod sa mga henerasyon nga midangat ngadto sa Pagpahiuli. …
… [Ang linya sa awtoridad sa pagkapari sa matag naghupot sa pagkapari sa Simbahan] mibalik sa walay putol nga kadena ngadto sa mga anghel nga mga ministro kinsa gikan sa Anak sa Dios Mismo, nagdala niining dili hitupngan nga gasa gikan sa langit. (Jeffrey R. Holland, “Our Most Distinguishing Feature,” Liahona, Mayo 2005, 44)
Ikonsiderar ang pagpakita sa mga estudyante og kadena. Ipasabot nga ang unang sumpay sa kadena nagrepresentar ni Jesukristo ug ang ikaduhang sumpay, kadtong Iyang gi-orden ngadto sa pagkapari. Ang ikatulo nga sumpay nagrepresentar niadtong ilang gi-orden ug uban pa, hangtod sa mga henerasyon ngadto sa mga naghupot sa pagkapari karon, nga girepresentar sa kataposang sumpay sa kadena.
Ngano nga mahinungdanon nga ang awtoridad sa pagkapari masubay balik ngadto kang Jesukristo?
Sa unsang paagi nga ang pagkahibalo niini nga koneksyon ni Jesukristo makaimpluwensya sa imong gibati mahitungod sa mga ordinansa, mga calling, o mga panalangin nga imong nadawat pinaagi sa pagkapari?
Mahimong moreport ang mga estudyante sa kalihokan sa pagpangandam alang sa klase.
Mahimo usab nga irebyo sa mga estudyante ang Moroni 2 ug 3, mangita sa mga pagkaparehas tali sa mga kapitulo, ug ireport ang ilang nakaplagan.
Ipakigbahin unsa ang imong nakat-onan
Kon makatabang alang sa mga estudyante sa pagpakita sa ilang pagsabot sa unsay ilang gitun-an sa Moroni 2–3, ikonsiderar ang paghisgot sa mosunod nga senaryo.
Handurawa nga ikaw adunay usa ka sakop sa pamilya kinsa magpabunyag ug magpakompira, ordinahan ngadto sa pagkapari, o i-set apart alang sa usa ka calling. Unsa ang imong ipakigbahin ngadto kanila gikan sa Moroni 2 o 3 aron matabangan sila nga makasabot sa kamahinungdanon sa panghitabo?