Isip mga miyembro sa Ang Simbahan ni Jesukristo sa mga Santos sa Ulahing mga Adlaw, gidapit kita sa pag-apil sa sagradong mga ordinansa ug paghimo og mga pakigsaad uban sa atong Langitnong Amahan. Kon kita maningkamot sa pagtuman sa atong mga pakigsaad, ang Langitnong Amahan mopanalangin kanato. Ang ordinansa nga kanunay natong giapilan mao ang sakramento. Kini nga leksiyon makatabang kanimo sa pagtuman sa pakigsaad nga imong gihimo kon moambit ka sa sakramento aron makabaton ka sa Espiritu sa Ginoo uban kanimo.
Sabta ang mga panginahanglan sa pagkat-on sa mga estudyante. Tinguhaa nga masabtan ang mga panginahanglan sa pagkat-on sa mga estudyante diha sa imong klase. Mahimong maglakip kini sa mga gusto sa tigkat-on ingon man sa bisan unsang mga hagit sa pagkat-on. Pangita og mga paagi sa paglakip sa nagkalainlaing mga pamaagi sa pagkat-on, sama sa mga visual aid, trabaho sa grupo, o indibidwal nga pagtuon, aron ang mga estudyante makapahimulos sa ilang kasinatian sa seminary.
Pagpangandam sa estudyante: Ikonsiderar ang pagdapit sa mga estudyante nga motambong sa klase nga andam sa pagsaysay sa mga pag-ampo sa sakramento gikan sa panumdoman kutob sa ilang mahimo.
Mga Posibleng Kalihokan sa Pagkat-on
Nganong mosimba man ka?
Aron maandam ang mga estudyante sa pagtuon sa sakramento, ikonsiderar ang pagpakigbahin sa mosunod nga asoy o personal nga kasinatian mahitungod sa kamahinungdanon sa sakramento.
Si Sister Cheryl A. Esplin, kanhi magtatambag sa Kinatibuk-ang Kapangulohan sa Primary, mipakigbahin og pangutana nga gipangutana sa usa ka anak nga lalaki sa iyang 96-anyos nga amahan: “Pa, nganong mosimba man ka? Dili ka makakita, dili makadungog, ug maglisod sa paglihok-lihok. Nganong mosimba man ka?” (“Ang Sakramento—Pagbag-o sa Kalag,” Liahona, Nob. 2014, 14).
Unsa kaha sa imong hunahuna ang tubag sa amahan niini nga pangutana?
“Ang amahan mitubag, ‘Tungod sa sakramento. Moadto ko aron moambit sa sakramento’” (Cheryl A. Esplin, “Ang Sakramento,” 14).
Unsa ang imong nahibaloan mahitungod sa sakramento nga mahimong hinungdan nga ang amahan mitubag niini nga paagi?
Ang mosunod nga mga pangutana gituyo alang sa kaugalingon nga pagpamalandong. Ikonsiderar ang pagdapit sa mga estudyante sa pagrekord sa ilang mga tubag diha sa ilang mga journal sa pagtuon. Mahimo usab nga makatabang ang pagdapit kanila sa pagpangutana mahitungod sa sakramento.
Unsa ka importante ang sakramento diha kanimo? Ngano man?
Unsa nga mga paningkamot ang imong gihimo aron makabaton og makahuloganon nga kasinatian sa sakramento?
Isip kabahin sa iyang rekord, gilakip ni Moroni ang mga pag-ampo nga gihatag ni Jesukristo kaniadto sa mga Nephite alang sa pagpangalagad sa sakramento (tan-awa sa Moroni 4:1–2). Samtang magtuon ka niini nga mga pag-ampo sa Moroni 4–5, paminaw sa mga pag-aghat aron makahibalo unsay imong mahimo sa pagtuman sa mga pakigsaad nga imong gihimo kon moambit sa sakramento.
Ang sakramento
Kon kita moambit sa sakramento, kita mohimo og pakigsaad uban sa Langitnong Amahan ug mobag-o sa mga pakigsaad nga atong gihimo atol sa bunyag (tan-awa sa Mosiah 18:8–10; Doktrina ug mga Pakigsaad 20:37). “Ang usa ka pakigsaad usa ka sagradong kauyonan tali sa Dios ug sa tawo o usa ka pundok sa katawhan. Ang Dios naghan-ay og piho nga mga kasabotan, ug Siya misaad sa pagpanalangin kanato kon atong tumanon kadtong mga kasabotan” (Gospel Topics, “Covenant,” ChurchofJesusChrist.org).
Ikonsiderar ang pagkopya sa mosunod nga tsart diha sa pisara ug dapita ang klase sa pagsulat sa wala nga kolum gamit ang Moroni 4:3. Mahimo usab kini kopyahon sa mga estudyante sa ilang mga journal sa pagtuon.
Ang Pakigsaad sa Sakramento
Ang akong gisaad nga buhaton
Mga paagi sa pagtuman sa akong mga saad
Unsaon nimo pagpamubo ang atong gisaad kon kita moambit sa pan?
Usa ka paagi sa pagpamubo sa atong bahin sa pakigsaad sa sakramento mao ang samtang kita moambit sa sakramento, kita mosaad nga andam sa pagdala sa atong kaugalingon sa ngalan sa Manluluwas, sa kanunay mohinumdom Kaniya, ug motuman sa Iyang mga sugo.
Mahimong i-organisar ang mga estudyante ngadto sa tulo ka mga grupo. I-assign ang matag grupo og usa sa mga saad nga atong gihimo isip kabahin sa pakigsaad sa sakramento. Dapita ang grupo sa paghisgot sa ilang gi-assign nga saad ug pagpakigbahin og mga ideya nga magamit sa pagpuno sa ikaduhang kolum diha sa tsart.
Human sa igong panahon, i-organisar ang klase ngadto sa bag-ong mga grupo sa tulo. Ang matag bag-ong grupo kinahanglan nga adunay mga estudyante kinsa nagtuon sa nagkalainlaing mga elemento sa pakigsaad sa sakramento. Dapita ang mga estudyante sa paghisgot kon unsay ilang nakat-onan sa ilang orihinal nga mga grupo ug tabangi ang usag usa sa pagpuno sa ikaduhang kolum sa tsart.
Kon ang mga estudyante makabenepisyo gikan sa pagtuon og dugang mahitungod sa unsay ipasabot sa pagdala sa ngalan sa Manluluwas nganha kanila, ikonsiderar ang paggamit sa mosunod nga pamahayag ug mga pangutana. Ikonsiderar ang pagdapit sa mga estudyante sa pagpamalandong kon unsa ka dako ang ilang tinguha sa unsay gusto sa Manluluwas batok sa unsay ilang gusto o unsay gusto sa kalibotan alang kanila.
Mahimo usab nimong gamiton ang Mosiah 18:8–10 ug Juan 14:15 aron matabangan ang mga estudyante nga mopalawom sa ilang pagsabot sa mga paagi sa pagtuman sa pakigsaad sa sakramento.
Unsa sa inyong hunahuna ang gipasabot sa pagkaandam sa pagdala nganha kanila sa ngalan sa Manluluwas ngari kanato?
Si Presidente Henry B. Eyring sa Unang Kapangulohan mipasabot:
Imahe
Presidente Henry B. Eyring
Misaad kita sa pagdala sa Iyang ngalan ngari kanato. Nagpasabot kana nga kita kinahanglan gayod nga makakita sa atong kaugalingon nga sama Kaniya. Himoon nato Siya nga labing importante sa atong mga kinabuhi. Kita gusto sa unsay Iyang gusto kay sa unsay atong gusto o unsay gitudlo sa kalibotan nga atong gustohon. (Henry B. Eyring, “That We May Be One,” Ensign, Mayo 1998, 67)
Sa unsang paagi mas maayo nimo nga dad-on ang ngalan sa Manluluwas diha kanimo?
Sa unsa nga mga paagi ang pagdala sa ngalan sa Manluluwas ngari kanato makatabang kanato nga mahimong mahisama Kaniya?
Kanunayng magbaton sa Iyang Espiritu uban kanato
Imahe
batan-ong babaye nga nag-ambit sa sakramento
Basaha ang Moroni 4:3 ug 5:2, mangita alang sa pagkaparehas ug kalainan tali sa pag-ampo sa pan ug sa pag-ampo sa bino (tubig).
Unsa nga mga pagkapareho ang imong nakaplagan?
Unsa ang buhaton sa Langitnong Amahan kon kita motuman sa pakigsaad nga atong gihimo atol sa sakramento?
Usa ka baroganan nga atong makat-onan mao nga samtang atong tumanon ang pakigsaad nga atong gihimo atol sa sakramento, kanunay natong maangkon ang Espiritu sa Ginoo nga mag-uban kanato.
Ikonsiderar kon sa unsang paagi ang imong kaandam sa pagtuman sa mosunod nga mga saad makatabang kanimo nga mahimong kanunay nga makabaton sa Espiritu sa Ginoo uban kanimo:
Dad-a ang ngalan sa Manluluwas diha kanimo.
Kanunay nga mohinumdom Kaniya.
Maghupot sa Iyang mga sugo.
Sa unsang paagi ka makabenepisyo sa kanunay nga pagbaton sa Espiritu Santo uban kanimo?
Si Presidente Dallin H. Oaks sa Unang Kapangulohan mitudlo kon sa unsang paagi kita makaduol sa sakramento ug mapanalanginan pinaagi sa pagtuman sa mga pakigsaad niini. Basaha ang mosunod nga pamahayag o tan-awa ang bidyo nga “The Aaronic Priesthood and the Sacrament” gikan sa time code 6:48 hangtod sa 7:22 sa ChurchofJesusChrist.org.
Imahe
Presidente Dallin H. Oaks
Gisugo kita sa paghinulsol sa atong mga sala ug sa pagduol ngadto sa Ginoo uban sa masulub-on nga kasingkasing ug mahinulsolon nga espiritu ug moambit sa sakramento agig pagtuman sa mga pakigsaad niini. Kon bag-ohon nato ang atong mga pakigsaad sa bunyag niining paagiha, ang Ginoo mobag-o sa epekto sa paglimpyo sa atong bunyag. Niining paagiha gihimo kitang limpyo ug makabaton kanunay sa Iyang Espiritu uban kanato. Ang kamahinungdanon niini klaro kaayo diha sa mga sugo sa Ginoo nga kita moambit sa sakramento matag semana (tan-awa sa Doktrina ug mga Pakigsaad 59:8–9). (Dallin H. Oaks, “The Aaronic Priesthood and the Sacrament,” Ensign, Nob. 1998, 38)
Pagtuman sa pakigsaad sa sakramento
Ikonsiderar ang pagpakigbahin sa imong pagpamatuod mahitungod sa sakramento ug pagdapit sa andam nga mga estudyante sa pagbuhat sa ingon.
Dapita ang mga estudyante sa pagpamalandong kon unsay ilang mahimo sa pagtuman sa ilang pakigsaad sa sakramento. Ikonsiderar ang pagpakita sa mosunod nga mga parapo ug pagdapit sa mga estudyante sa pagtubag diha sa ilang mga journal. Mahimo usab nimong isugyot nga ang pagtuman sa pakigsaad sa sakramento mahimong usa sa ilang mga tumong sa pagpalambo sa kabatan-onan.
Hunahunaa ang imong mga paningkamot sa pagtuman sa mga saad nga imong gihimo kon moambit ka sa sakramento. Unsa ang maayong gidangatan? Unsa pa ang mapalambo?
Pagpili og usa o daghang mga saad nga gusto nimong pagatutokan. Isulat ang usa ka piho nga imong mahimo. Mahimo nimong pamalandongon kini sa sunod higayon nga moambit ka sa sakramento.
Hatagi og pagtagad kon sa unsang paagi ang pagtuman sa imong mga pakigsaad makatabang kanimo nga makabaton sa Espiritu Santo uban kanimo ug sa kalainan nga imong nakita sa imong kinabuhi.
