Unsa ang gisaad sa Ginoo kanato kon mobayad kita sa ikapulo? Ang Manluluwas migamit sa mga pulong ni Malaquias sa pagtudlo sa mga Nephite mahitungod sa balaod sa ikapulo ug sa mga panalangin sa pagsunod niini nga sugo. Kini nga leksiyon gituyo aron sa pagtabang kanimo nga mobati og tinguha sa pagbayad sa ikapulo.
Pagtudlo sa mga kasulatan nga adunay kombiksyon ug katuyoan. Ang ubang mga kamatuoran sa ebanghelyo ingon og lisod sabton ug buhaton sa mga estudyante sa ilang mga kinabuhi. Tabangi ang mga estudyante nga makakita sa kamahinungdanon niini nga mga pagtulun-an. Ipakigbahin ang imong pagsaksi sa kamatuoran niini nga mga baroganan ug sa mga panalangin nga gihatag sa Ginoo ngadto kanila nga naglihok nga adunay hugot nga pagtuo.
Pagpangandam sa estudyante: Dapita ang mga estudyante sa pagbasa sa 3 Nephi 24:8–10 ug sa paghunahuna sa mga kasinatian nga sila o ang uban aduna bahin sa balaod sa Ginoo sa ikapulo.
Mga Posibleng Kalihokan sa Pagkat-on
Ang imong mga kasinatian
Ang mosunod nga mga senaryo gituyo aron sa pagtabang sa mga estudyante sa paghunahuna sa ilang mga kasinatian bahin sa balaod sa Ginoo sa ikapulo. Batia ang pagkagawasnon sa pagpahiangay niini kon ang uban mas may kalabotan ngadto sa imong mga estudyante.
Sa laing paagi, mahimo nimong ipakita ang usa ka slip sa ikapulo o mga sensilyo ug mangutana sa mga estudyante mahitungod sa ilang pagsabot, mga kasinatian, ug mga pangutana mahitungod sa ikapulo.
Basaha ang mosunod nga mga senaryo, mangita niadtong paminaw nimo labing may kalabotan kanimo o sa mga kabatan-onan sa imong dapit:
Si Carlos nagtigom og kwarta alang sa usa ka telepono. Wala na niya hunahunaa ang pagbayad sa ikapulo.
Si Sita kanunay nga nagbayad sa ikapulo sa dihang bata pa siya, apan karon nga aduna na siyay trabaho ug nagsweldo og dakong kwarta, nahimo kining mas lisod nga buhaton.
Si Oneka naghatag sa tanang kwarta nga iyang kinitaan aron sa pagtabang sa iyang pamilya. Naghunahuna siya kon kinahanglan ba niyang bayaran ang ikapulo nga gikinahanglan man sa iyang pamilya ang kwarta.
Si Anjum walay kwarta nga kinitaan, mao nga naghunahuna siya kon sa unsang paagi o kon ang balaod sa ikapulo magamit ba ngadto kaniya.
Hain nga mga sitwasyon ang imong gibati nga labing may kalabotan? Ngano man?
Ikonsiderar ang pagsulat diha sa pisara sa mga tubag sa mga estudyante ngadto sa sunod nga pangutana.
Unsa nga mga pangutana o kabalaka ang mahimong aduna ang mga batan-on mahitungod sa ikapulo?
Ang mga estudyante mahimong mamalandong sa mosunod nga mga pangutana o motubag niini diha sa ilang mga journal sa pagtuon. Tungod sa pagka-personal niini nga mga pangutana, ayaw hangyoa ang mga estudyante sa pagpakigbahin sa ilang mga tubag.
Hunahunaa ang imong kaugalingong mga kasinatian ug pagsabot sa ikapulo. Nagbayad ka ba og ikapulo, o andam ka ba nga mobayad og ikapulo? Ngano man o nganong wala? Unsa ang imong nakat-onan gikan sa imong mga kasinatian sa ikapulo? Sa imong pagtuon niini nga leksiyon, tinguhaa ang giya sa Espiritu Santo aron matabangan ka sa pagtuman niini nga balaod.
Ang balaod sa Ginoo sa ikapulo
Samtang nagtudlo sa mga Nephite, si Jesus misugo kanila sa pagsulat sa mga pulong nga gitala ni Malaquias mga 400 ka tuig na ang milabay. Si Malaquias nanagna sa Ikaduhang Pag-anhi ni Jesukristo ug sa tahas sa Manluluwas sa paghukom sa mga daotan (tan-awa sa 3 Nephi 24:1–6).
Basaha ang 3 Nephi 24:7, mangita sa problema sa mga tawo nga giatubang sa panahon ni Malaquias.
Sa unsang paagi ang mga Nephite nahimong sama sa mga tawo sa panahon ni Malaquias?
Unsa ang gisaad sa Ginoo sa mga tawo kon mobalik sila Kaniya?
Aron sa pagdasig sa mga katawhan sa pagbalik ngadto sa Ginoo ug sa pagpangandam alang sa Iyang pag-anhi, ang Ginoo, pinaagi ni Malaquias, nagtudlo mahitungod sa ikapulo.
Basaha ang 3 Nephi 24:8–12 ug ikonsiderar ang pagmarka sa unsay gitudlo sa Ginoo mahitungod sa balaod sa ikapulo. Timan-i nga ang “mga manunubad” (bersikulo 11) mahimong nagpasabot sa mga peste, hulaw o baha, ug bisan ni Satanas.
Unsay mipatigbabaw kanimo gikan niini nga mga bersikulo?
Pasalamati ang mga estudyante sa unsay ilang gipakigbahin. Ikonsiderar ang paghangyo kanila sa pagpasabot kon ngano nga ang mga butang nga ilang gipakigbahin mipatigbabaw ngadto kanila.
Sa unsang paagi nga ang pagdumili sa pagbayad og ikapulo sama sa pagpangawat sa Dios?
Ikonsiderar ang pagpakita sa mosunod nga dili kompleto nga kapahayag.
Unsaon nimo sa pagkompleto sa mosunod nga kapahayag: “Kon kita motuman sa balaod sa Ginoo sa ikapulo …”?
Ania ang usa ka paagi nga mahimo nimong matiwas ang kapahayag: Kon kita motuman sa balaod sa Ginoo sa ikapulo, Siya mubu-bo og mga panalangin ngari kanato.
Sa panahon ni Malaquias ug sa mga Nephite, ang mga Santos tingali mibayad sa ikapulo pinaagi sa paghatag sa ikapulo sa ilang mga pagkaon o mga kabtangan. Karon ang mga miyembro sa Simbahan mohatag og ikapulo sa ilang kinitaan ngadto sa Ginoo pinaagi sa Iyang Simbahan. Kini nga mga pundo gigamit sa pagtukod sa Simbahan ug sa pagpadayon sa buhat sa Ginoo sa tibuok kalibotan” (Gospel Topics, “Tithing,” topics.ChurchofJesusChrist.org). Kon ang usa ka tawo walay kinitaan, dili siya kinahanglan nga mobayad sa ikapulo, bisan pa man kinahanglan nga aduna siyay kabubut-on nga mobayad sa umaabot.
Ang Ginoo migamit og gamhanan ug klaro nga mga pulong sa paghisgot bahin sa ikapulo: “Sulayi [testingi] Ako karon, kon Ako dili ba moabli kaninyo sa mga bintana sa langit, ug mobu-bu kaninyo og usa ka panalangin nga walay lawak nga igo sa pagdawat niini” (3 Nephi 24:10).
Unsa sa imong hunahuna ang gipasabot pag-ayo sa Ginoo pinaagi sa paggamit sa mga pulong ug hugpong sa mga pulong nga Iyang gigamit? Unsa ang imong nakat-onan mahitungod Kaniya?
Ikonsiderar ang pagdrowing og dako nga bintana diha sa pisara ug dapita ang mga estudyante sa pagsulat diha niini sa mga panalangin sa pagsunod sa balaod sa ikapulo. Mahimong kopyahon sa mga estudyante ang bintana ug ang gilista nga mga panalangin ngadto sa ilang mga journal. Ang mosunod makatabang sa mga estudyante sa paghunahuna o pagkaplag og mga ideya:
Pagdapit og pipila ka mga estudyante sa paglingin diha sa pisara og usa ka panalangin nga makahuloganon ngadto nila o nga ilang gitinguha sa ilang kinabuhi. Dapita sila sa pagpakigbahin kon ngano.
Sa unsang paagi kini nga mga panalangin makaapekto sa imong tinguha sa pagbayad sa ikapulo?
Ngano sa imong hunahuna ang Ginoo nagsugo sa Iyang mga katawhan sa pagbayad sa ikapulo?
Sa unsa nga paagi nga ang pagsunod sa balaod sa ikapulo makatabang nato nga “mobalik” (3 Nephi 24:7) o mas maduol sa Ginoo?
Personal nga paggamit
Hunahunaa kon unsay imong nakat-onan ug gibati karon samtang imong basahon ang mosunod nga pamahayag ni Elder David A. Bednar sa Korum sa Napulog Duha ka Apostoles:
Imahe
Elder David A. Bednar
Ang matinuorong pagbayad sa ikapulo labaw pa kay sa katungdanan; kini importante nga lakang sa proseso sa personal nga pagkabalaan. Kadtong nagbayad sa inyong ikapulo, gidayeg ko kamo.
Kadtong sa karon nga wala magsunod sa balaod sa ikapulo, gidapit ko kamo sa pagkonsiderar sa inyong mga paagi ug paghinulsol. Mopamatuod ko nga pinaagi sa inyong pagkamasulundon niining balaod sa Ginoo, ang mga tamboanan sa langit maabli para kaninyo. (David A. Bednar,Ang mga Tamboanan sa Langit,” Liahona ,Nob. 2013, 20)
Pahinumdomi ang mga estudyante sa sinugdanan sa leksiyon ug sa mga pangutana nga tingale aduna ang mga batan-on mahitungod sa ikapulo. Pangutan-a ang mga estudyante kon aduna ba sa ilang natun-an ang nakatabang sa mga pangutana nga ilang gihisgotan. O mahimo nimong dapiton ang mga estudyante sa pagrekord kon unsay ilang gibati mahitungod sa ikapulo.
Irekord diha sa imong journal sa pagtuon kon unsay imong gibati mahitungod sa ikapulo ug ngano. Kon imong gibati nga ang pagbayad sa ikapulo lisod karon o mahimong malisod alang kanimo, ilakip kon unsa ang imong mahimo sa pagdapit sa Ginoo sa pagtubag sa imong mga pangutana ug sa pagtubag sa imong mga kabalaka.