« នីហ្វៃទី ៣ ១៧–១៩ ៖ ទិដ្ឋភាពទូទៅ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« នីហ្វៃទី ៣ ១៧–១៩ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
នីហ្វៃទី ៣ ១៧–១៩
ទិដ្ឋភាពទូទៅ
បន្ទាប់ពីទ្រង់បង្រៀនទៅដល់ហ្វូងមនុស្សរួចហើយ នោះព្រះអង្គសង្គ្រោះបានប្រកាសថា វាដល់ពេលសម្រាប់ទ្រង់យាងទៅហើយ ។ ប៉ុន្តែទឹកភ្នែក និងការចង់បានរបស់ពួកគេឲ្យទ្រង់គង់នៅយូរបន្តិចទៀតបានធ្វើឲ្យទ្រង់មានព្រះទ័យក្ដុកក្ដួល ។ ដោយការបង្ហាញព្រះទ័យអាណិតអាសូរដ៏អស្ចារ្យ ទ្រង់បានព្យាបាលពួកគេ អធិស្ឋានជាមួយនឹងពួកគេ ហើយបានប្រទានពរជ័យដល់កូនៗរបស់ពួកគេម្តងម្នាក់ៗ ។ ទ្រង់បានណែនាំដល់ពួកគេអំពីពិធីបរិសុទ្ធនៃសាក្រាម៉ង់ ហើយទ្រង់បានបង្ហាញពួកគេអំពីរបៀបអធិស្ឋាន ។ បន្ទាប់មក ទ្រង់ក៏បានចាកចេញទៅ ហើយនៅថ្ងៃបន្ទាប់ ហ្វូងមនុស្សក៏មកជុំគ្នាម្ដងទៀត ។ ពួកគេបានទទួលពិធីបុណ្យជ្រមុជទឹក ហើយបានពោរពេញដោយព្រះវិញ្ញាណបរិសុទ្ធ ហើយពួកទេវតាបានយាងមកបម្រើដល់ពួកគេ ។ ព្រះយេស៊ូវបានបង្ហាញព្រះកាយម្ដងទៀត ហើយបានបន្តបង្រៀនពួកគេ ។
រៀបចំខ្លួនដើម្បីបង្រៀន
ព័ត៌មានខាងក្រោមនេះផ្តល់ជាគំនិតយោបល់ដល់គ្រូបង្រៀនអំពីអ្វីដែលអាចត្រូវរៀបចំទុកជាមុនសម្រាប់មេរៀននីមួយៗ ។
នីហ្វៃទី ៣ ១៧
គោលបំណងមេរៀន ៖ មេរៀននេះអាចជួយសិស្សឲ្យយល់ពីព្រះទ័យអាណិតអាសូរដែលព្រះយេស៊ូវគ្រីស្ទមានចំពោះពួកគេ ។
-
ការរៀបចំសិស្ស ៖ សូមអញ្ជើញសិស្សឲ្យគិតអំពីគ្រាដែលពួកគេទទួលបាននូវសេចក្ដីមេត្តាករុណា សេចក្ដីអាណិតអាសូរ ឬសេចក្ដីស្រឡាញ់មកពីព្រះ ។ សិស្សអាចរៀបចំខ្លួនដើម្បីចែកចាយអំពីរបៀបដែលបទពិសោធន៍ទាំងនេះបានជះឥទ្ធិពលដល់ទំនាក់ទំនងរបស់ពួកគេជាមួយនឹងទ្រង់ ។
-
វីដេអូ ៖ « Jesus Christ and Angels Minister with Compassion » ( ១១:៥៩; សូមមើលចាប់ពីនាទីទី ០:១២ ទៅដល់នាទីទី ១:៣០ និងនាទីទី ១:៣០ ដល់នាទីទី ១១:៤៥ )
-
មាតិកាដែលត្រូវបង្ហាញ ៖ បង្ហាញបណ្តុំបទគម្ពីរសម្រាប់ឲ្យសិស្សអនុវត្តការនឹកគិតក្នុងចិត្ត
-
យោបល់សម្រាប់បង្រៀនតាមសន្និសីទវីដេអូ ៖ ដើម្បីជួយឲ្យសិស្សអនុវត្តការនឹកគិតក្នុងចិត្តអំពីកិច្ចការអ្វីដែលព្រះអង្គសង្គ្រោះបានធ្វើនៅក្នុង នីហ្វៃទី ៣ ១៧:៧–២៥ នោះអ្នកអាចចុះផ្សាយតំណភ្ជាប់ទៅកាន់វីដេអូនេះដោយមានដាក់នាទី ។ ប្រសិនបើសិស្សចង់បិទមីក្រូហ្វូន និងកាមេរ៉ារបស់ពួកគេ នៅពេលមើលវីដេអូនេះ នោះពួកគេអាចធ្វើបាន ។ បន្ទាប់ពីមានពេលគ្រប់គ្រាន់ សូមអញ្ជើញសិស្សឲ្យចែកចាយអំពីគ្រាត្រង់ណា ដែលមានអត្ថន័យបំផុតសម្រាប់ពួកគេ ។
នីហ្វៃទី ៣ ១៨:១–១៤
គោលបំណងមេរៀន ៖ មេរៀននេះអាចជួយឲ្យសិស្សទទួលបានបទពិសោធន៍ដ៏មានអត្ថន័យ ដោយចងចាំព្រះអង្គសង្គ្រោះ នៅពេលដែលពួកគេទទួលទានសាក្រាម៉ង់ ។
-
ការរៀបចំសិស្ស ៖ សូមអញ្ជើញសិស្សឲ្យសញ្ជឹងគិតថាតើបទពិសោធន៍នៃការទទួលទានសាក្រាម៉ង់របស់ពួកគេមានន័យយ៉ាងណា ។ សូមលើកទឹកចិត្តសិស្សឲ្យសញ្ជឹងគិតអំពីអ្វីដែលពួកគេអាចធ្វើ ដើម្បីកែលម្អសាក្រាម៉ង់ឲ្យបានល្អប្រសើរឡើង ។
-
វីដេអូ ៖ « Jesus Christ Introduces the Sacrament to the People » ( ១០:៤៩ សូមមើលពីនាទីទី ០:១២ ដល់នាទីទី ៦:១២ )
-
មាតិកាដែលត្រូវបង្ហាញ ៖ ស្វ័យវាយតម្លៃ អំពីសាក្រាម៉ង់
-
យោបល់សម្រាប់បង្រៀនតាមសន្និសីទវីដេអូ ៖ សូមពិចារណាប្រើមុខងារក្តារខៀន ដើម្បីបង្កើតតារាងអំពីការទទួលបានបទពិសោធន៍កាន់តែមានអត្ថន័យពីសាក្រាម៉ង់ ។ សូមសរសេរចម្លើយរបស់សិស្សនៅលើតារាងនេះទាំងសងខាង ។
នីហ្វៃទី ៣ ១៨:១៥-៣៩; ១៩:១៩–២៩
គោលបំណងមេរៀន ៖ មេរៀននេះអាចជួយដល់សិស្សឲ្យធ្វើតាមការបង្រៀន និងគំរូរបស់ព្រះយេស៊ូវគ្រីស្ទ ដើម្បីអធិស្ឋានជានិច្ច និងដើម្បីឲ្យមានការអធិស្ឋានដ៏មានអត្ថន័យបន្ថែមទៀត ។
-
ការរៀបចំសិស្ស ៖ សូមអញ្ជើញសិស្សឲ្យអាន ឬមើលសុន្ទរកថារបស់ប្រធាន អិម រ័សុល បាឡឺដ « Watch Ye Therefore, and Pray Always » ( Ensign ឬ Liahona ខែ វិច្ឆិកា ឆ្នាំ ២០២០ ទំព័រ ៧៧–៧៩ ) ដោយស្វែងរកសេចក្តីពិតដែលអាចជួយដល់ពួកគេជាមួយនឹងការអធិស្ឋានផ្ទាល់ខ្លួនរបស់ពួកគេ ។
-
មាតិកាដែលត្រូវបង្ហាញ ៖ ប្រយោគខាងក្រោមដែលបានសរសេរនៅលើក្ដារខៀន ៖ ប្រសិនបើខ្ញុំចង់សិក្សាអំពី នោះខ្ញុំនឹងធ្វើតាមគំរូរបស់ ពីព្រោះ ។
-
វីដេអូ ៖ « The Disciples Minister and Jesus Christ Prays for the People » ( ៧:៣០ សូមមើលចាប់ពីនាទីទី ៣:០៥ ទៅដល់នាទីទី ៧:១៨ )
-
យោបល់សម្រាប់ការបង្រៀនតាមសន្និសីទវីដេអូ ៖ សូមអញ្ជើញសិស្សឲ្យប្រើមុខងារឈែតដើម្បីបំពេញប្រយោគនេះ « ខ្ញុំអាចធ្វើតាមការបង្រៀនរបស់ព្រះអង្គសង្គ្រោះអំពីការអធិស្ឋានដោយ … » និង « ខ្ញុំអាចធ្វើតាមគំរូរបស់ព្រះអង្គសង្គ្រោះក្នុងការអធិស្ឋានដោយ … »
នីហ្វៃទី ៣ ១៩
គោលបំណងមេរៀន ៖ គោលបំណងនៃមេរៀននេះ គឺដើម្បីជួយដល់សិស្សឲ្យយល់កាន់តែច្បាស់អំពីរបៀបទទួលពរជ័យមកពីព្រះវិញ្ញាណបរិសុទ្ធ ។
-
ការរៀបចុះសិស្ស ៖ សូមគិតពិចារណាអំពីការអញ្ជើញសិស្សឲ្យសិក្សា « ពួកសិស្សរបស់ព្រះយេស៊ូវគ្រីស្ទស្វែងរកអំណោយទាននៃព្រះវិញ្ញាណបរិសុទ្ធ » នៅក្នុងគម្រោងសិក្សា នីហ្វៃទី ៣ ១៧–១៩ នៅក្នុងសៀវភៅ ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរមរមន ឆ្នាំ ២០២៤ និងមករៀនដោយបានរៀបចំខ្លួន ដើម្បីចែកចាយអំពីចំណេះដឹងដែលពួកគេបានសិក្សា និងអារម្មណ៍ដែលពួកគេទទួលបាននៅក្នុងអំឡុងពេលសិក្សា ។
-
វីដេអូ ៖ « Having the Holy Ghost » ( ២:៥៦ )
-
យោបល់សម្រាប់ការបង្រៀនតាមសន្និសីទវីដេអូ ៖ សូមពិចារណាចាត់ឲ្យសិស្សរបស់អ្នកពាក់កណ្តាលឲ្យធ្វើសកម្មភាព « ក » និងពាក់កណ្តាលទៀតធ្វើសកម្មភាព « ខ » ។ សុំឲ្យសិស្សត្រៀមខ្លួនដើម្បីចែកចាយនូវអ្វីដែលពួកគេរៀនជាមួយមិត្តរួមថ្នាក់ ។ បន្ទាប់មក ប្រសិនបើមានពេលវេលាសិក្សាគ្រប់គ្រាន់ សូមដាក់សិស្សនៅក្នុងមុខងារបំបែកក្រុម ដើម្បីឲ្យពួកគេអាចបង្រៀនគ្នាទៅវិញទៅមកបាន ។ ប្រសិនបើអាចធ្វើទៅបាន សូមចាប់គូសិស្សដែលបានសិក្សាពីសកម្មភាពផ្សេងៗគ្នា ។
ការរំឭកចំណេះចំណានខាងគោលលទ្ធិ ទី ២០
គោលបំណងមេរៀន ៖ មេរៀននេះនឹងផ្តល់ឱកាសដល់សិស្សឲ្យទន្ទេញសេចក្ដីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះរបស់ពួកគេ ហើយថែមទាំងទន្ទេញវគ្គបទគម្ពីរទាំងមូលផងដែរ ។
-
ការរៀបចំសិស្ស ៖ សូមអញ្ជើញសិស្សឲ្យរំឭកឡើងវិញនូវវគ្គបទគម្ពីរចំណេះចំណានខាងគោលលទ្ធិនៃព្រះគម្ពីរមរមនទាំង ១២ ចុងក្រោយ ហើយជ្រើសរើសយកមួយ ( ឬឃ្លាបទគម្ពីរគន្លឹះមួយចំនួន ) ដែលពួកគេគិតថា នឹងមានប្រយោជន៍សម្រាប់ពួកគេនៅក្នុងការទន្ទេញ°។ សុំឲ្យពួកគេរៀបចំខ្លួនដើម្បីចែកចាយអំពីកាលៈទេសៈដែលការទន្ទេញវគ្គបទគម្ពីរនេះ ( ឬឃ្លាបទគម្ពីរទាំងនេះ ) អាចនឹងជួយដល់ពួកគេ និងមូលហេតុ ។
-
មាតិកាដែលត្រូវបង្ហាញ ៖ តារាងនៃសេចក្ដីយោងចំណេះចំណានខាងគោលលទ្ធិចាប់តាំងពីអាលម៉ាដល់មរ៉ូណៃ
-
យោបល់សម្រាប់ការបង្រៀនតាមសន្និសីទវីដេអូ ៖ សូមពិចារណាដាក់សិស្សទៅក្នុងមុខងារបំបែកក្រុម ដើម្បីអនុវត្តការទន្ទេញបទគម្ពីរចំណេះចំណានខាងគោលលទ្ធិ ។ របៀបមួយដែលពួកគេអាចអនុវត្តបាន គឺត្រូវនិយាយឡើងវិញនូវឃ្លាបទគម្ពីរគន្លឹះ ឬវគ្គបទគម្ពីរទាំងមូលដោយដាក់ពាក្យឆ្លាស់គ្នា ។