3 Nīfai 2–5

“Mateuteu … ʻi he Māfimafi ʻo e ʻEikí”

ko hono tānaki fakataha ʻe he kau Nīfaí ʻa honau kakaí kotoa, ʻa e koloá mo e ngaahi takanga monumanu īkí ʻi ha feituʻu pē ʻe taha ke teuteu ki he tau ʻe hokó

Minerva Teichert (1888-1976), The Answer of Lachoneus (Ko e Tali ʻa Leikoneosé), 1949-1951, ko e lolo ʻi he līneni ʻoku fakapipiki ki he masonite, ʻinisi ʻe 36 x 48. Brigham Young University Museum of Art.

Hangē pē ko ʻetau fehangahangai mo e ngaahi faingataʻa ʻoku hoko ʻo aʻu ki he liuaki mai ʻa e Fakamoʻuí, naʻe fehangahangai ʻa e kau Nīfaí mo ha ngaahi faingataʻa ʻi he ngaahi taʻu kimuʻa peá Ne hāʻele mai kiate kinautolú. Naʻe fakamanamana ʻa e kau kaihaʻa ʻa Katianetoní ke fakaʻauha ʻa e kau Nīfaí. Ka neongo ia, naʻe “mateuteu [ʻa e kau Nīfaí] ke fepaki mo kinautolu … ʻi he māfimafi ʻo e ʻEikí” (3 Nīfai 4:10). Te tau lava ʻo ikunaʻi ʻa e ngaahi faingataʻá ʻaki ʻetau mateuteu, ʻo hangē ko e kau Nīfaí. ʻE lava ke tokoni ʻa e lēsoni ko ʻení ke ke maʻu ʻa e mālohi ʻo e ʻEikí ʻaki hoʻo teuteu fakalaumālie mo fakatuʻasino.

Fakaafeʻi ʻa e kau akó ke nau fakahoko ha ngāue māʻoniʻoni mo ola lelei. ʻI hono ako ʻe he kau akó ʻa e folofolá, tokoni ke nau ʻiloʻi ʻa e ngaahi nunuʻa ʻo e ngaahi fili mo e ngaahi ngāue naʻe lekooti ʻi he ngaahi fakamatalá. Poupouʻi ʻa e kau akó ke fakafekauʻaki ʻa e ngaahi lēsoni ko ʻení ki heʻenau moʻuí pea fakakaukau ki he founga te nau lava ai ʻo muimui faivelenga ʻi he Fakamoʻuí.

Teuteu ʻa e tokotaha akó: Fakaafeʻi ʻa e kau akó ke aleaʻi mo e kau mēmipa ʻo e fāmilí pe kau taki ʻo e Siasí ʻa e ngaahi tāpuaki ʻoku maʻu mei he mateuteu fakatuʻasino pe fakalaumālié.

Ngaahi ʻEkitivitī Ako ʻOku Ala Fakahokó

Mateuteu

Ko e taumuʻa ʻo e ʻekitivitī ko ʻení ke tokoniʻi ʻa e kau akó ke nau sio ki hono mahuʻinga ʻo e mateuteú. Tokoni ki he kau akó ke nau fakakaukau ki ha ngaahi tūkunga ʻe fiemaʻu ke nau mateuteu ki ai. Fakakaukau ke vahevahe fekauʻaki mo ha taimi naʻe tāpuekina ai koe ʻi hoʻo mateuteú pe ko ha taimi naʻá ke faingataʻaʻia ai koeʻuhí ko hoʻo taʻemateuteú.

Fakakaukau ki ha taimi ʻi hoʻo moʻuí naʻá ke ongoʻi mateuteu pe taʻemateuteu ai.

• Ko e hā ʻa e tūkungá, pea ko e hā naʻá ke ongoʻi mateuteu pe taʻemateuteu aí?

• Kapau naʻá ke ongoʻi taʻemateuteu, ko e hā kuó ke fai ke mateuteu lelei ange ai ki he kahaʻú?

• Ko e hā kuó ke fai ke teuteu fakalaumālie ai ki he ngaahi faingataʻa ʻokú ke fehangahangai mo iá pe te ke fehangahangai mo ia ʻi he kahaʻú?

ʻI hoʻo ako ʻa e 3 Nīfai 2–5, fekumi ki he fakahinohino ʻa e Laumālié ke ke ʻiloʻi ʻa e meʻa te ke lava ʻo fai ke teuteuʻi fakatuʻasino mo fakalaumālie ai koe ki he kahaʻú.

Ngaahi Teuteu ʻa Leikoneosé

Naʻe kikiteʻi ʻe he palōfita ko Samuelá ʻe ʻi ai ha pō taʻe ʻi ai ha fakapoʻuli ʻa ia ko ha fakaʻilonga ki hono ʻaloʻi ʻo Sīsū Kalaisí. ʻI he taimi naʻe fakahoko ai ʻa e kikite ko ʻení (vakai, 3 Nīfai 1:15–19), “naʻe tui ʻa e konga tokolahi ʻo e kakaí, naʻa nau tui ʻo ului ki he ʻEikí” (3 Nīfai 1:22). Ka neongo ia, hili ha ngaahi taʻu siʻi, naʻe kamata ke taʻetui ha niʻihi.

Te ke lava ʻo vaeua pe ʻai ke tauhoa ʻa e kalasí, ʻi he ʻekitivitī ko ʻení. ʻE lava ke lau ʻe ha vaeua ʻo e kau akó ha taha ʻo e ngaahi potufolofola ko ʻení pea lipooti ʻa e meʻa naʻa nau maʻú ki he kalasí pe ko honau hoá.

Lau ʻa e 3 Nīfai 1:27–30 mo e 3 Nīfai 2:1–3, ʻo kumi ʻa e ngaahi ʻuhinga naʻe hē ai ha kakai ʻe niʻihi mei he ʻEikí.

• Ko e hā ha ngaahi lēsoni te tau lava ʻo ako mei he ngaahi veesi ko ʻení ʻe lava ʻo tokoni ke tau tuʻu maʻu ai ʻi he ʻEikí ʻi hotau kuongá ni?

Naʻe tupu tokolahi ʻa e kau kaihaʻa ʻa Katianetoní pea nau tauʻi ʻa e kau Nīfaí. ʻI hono talí, “ko e kau Leimana kotoa pē ʻa ia kuo nau ului ki he ʻEikí, naʻa nau kau fakataha mo honau kāinga, ko e kau Nīfaí” (3 Nīfai 2:12). Naʻe fai ʻe Kitianehai ko e taki ʻo e kau kaihaʻa ʻa Katianetoní ha tohi kia Leikoneose, ko e tuʻi fakamaau ʻo e kau Nīfaí. Naʻá ne fakamanamanaʻi ʻi he tohí ke fakaʻauha ʻa e kau Nīfaí ʻo kapau he ʻikai ke nau tukulolo (vakai, 3 Nīfai 3:1–10).

Lau ʻa e 3 Nīfai 3:11–12, ʻo kumi e tali ʻa Leikoneosé.

• Ko e hā ha fakamoʻoni ki he tui ʻa Leikoneose ki he ʻEikí ʻokú ke vakai ki ai?

Hiki ʻa e Teuteu ʻa e Kau Nīfaí ʻi he palakipoé. Fakakaukau ke vahe ʻa e ngaahi potufolofola ko ʻení ki ha kau mēmipa kehekehe ʻo e kalasí pe ngaahi kulupu. Fakaafeʻi ʻa e kau akó ke hiki ʻi he palakipoé ʻa e meʻa naʻe fai ʻe he kakaí ke nau teuteu fakatuʻasino mo fakalaumālie aí.

• 3 Nīfai 3:13–16

• 3 Nīfai 3:17–21

• 3 Nīfai 3:22–26

• 3 Nīfai 4:3–4

Ke tokoni ke ʻiloʻi ʻe he kau akó ʻa e ngaahi teuteu fakatuʻasinó, te ke lava ʻo fakamahinoʻi ʻa e founga naʻe langa ʻaki ʻe he kau Nīfaí ʻa e ngaahi kolotaú, fokotuʻu ha kau leʻo, pea tānaki ha ngaahi naunau mo ha meʻatokoni. Ki he ngaahi teuteu fakalaumālié, te ke lava ʻo fakamahinoʻi ange ʻa e founga naʻa nau fakatomala mo lotua ai ha fakahaofí.

• Ko e ngaahi teuteu fē ʻokú ke pehē naʻe tokoni lahi tahá? Ko e hā hono ʻuhingá?

• ʻOkú ke pehē naʻe tokoniʻi fēfē kinautolu ʻe he ngaahi teuteu ko ʻení ke nau falala ki he ʻEikí?

Lau ʻa e 3 Nīfai 4:7–12, ʻo kumi ʻa e founga naʻe tāpuekina ai ʻa e kau Nīfaí koeʻuhí ko ʻenau mateuteu fakalaumālie mo fakatuʻasinó.

• Ko e hā ha ngaahi tefitoʻi moʻoni te tau lava ʻo ako mei he fakamatalá ni? (Vakai, 3 Nīfai 4:10.)

Ko e taha ʻo e ngaahi tefitoʻi moʻoni ʻoku tau ako mei he fakamatala ko ʻení, ʻi heʻetau teuteu fakalaumālie mo fakatuʻasinó, ʻe fakaivia kitautolu ʻe he ʻEikí ke tau ikunaʻi pe kātekina ʻa e ngaahi faingataʻá.

Ngaahi teuteu ʻi hotau kuongá

Hiki ʻa e Ngaahi Meʻa Tatau Fakaeonopōní ʻi he palakipoé, pea tokoni ki he kau akó ke faʻu ha lisi ʻo e ngaahi teuteu te tau lava ʻo fai ʻi hotau kuongá ni. ʻE lava ke hoko ʻeni ko ha ngaahi teuteu ʻoku tatau mo ia ʻo e kau Nīfaí pe ngaahi teuteu kehe kuo akonekina mai ʻe he kau palōfitá ke tau fakahoko. Aleaʻi ha ngaahi faingataʻa pau ʻoku tau fehangahangai mo ia ʻi hotau kuongá ni mo e founga ʻe lava ke tokoniʻi ai kitautolu ʻe he ngaahi teuteu ko ʻení ke tau mateuteu ʻi he mālohi ʻo e ʻEikí. Ke tokoni ki he kau akó ke maʻu ha ngaahi fakakaukau, huluʻi ʻa e vitiō “Temporal Preparedness Resources” (3:09), ʻoku maʻu ʻi he ChurchofJesusChrist.org.

• Fili ha teuteu ʻe taha pe lahi ange mei hoʻo lisí. Te ne tokoniʻi fēfē kitautolu ke ikunaʻi ʻa e ngaahi faingataʻa pau ʻoku tau fehangahangai mo ia ʻi hotau kuongá ni?

• ʻOkú ke pehē ko e hā ha ngaahi founga ʻoku fakafaingamālieʻi ai ʻe heʻetau teuteú ʻa e ʻEikí ke fakamālohia kitautolú?

Naʻe ʻikai ke ola lelei e ʻākolo ʻa e kau kaihaʻa Katianetoní koeʻuhí he naʻe maʻu ʻe he kau Nīfaí ha tokoni fakalangi ʻi heʻenau teuteú. Naʻe faifai pea holomui ʻa e kau kaihaʻa ʻa Katianetoní. Naʻe fakafetaulakiʻi kinautolu ʻe he kau tau Nīfaí pea nau tukulolo ko ha kau pōpula pe ko hono tāmateʻi (vakai, 3 Nīfai 4:16–27).

Lau ʻa e 3 Nīfai 4:30–33; 5:1–4, ʻo kumi ʻa e founga naʻe tali ʻaki ʻe he kakaí hono fakamālohia kinautolu ʻe he ʻEikí.

• Naʻe fakahaaʻi fēfē ʻe heʻenau tōʻongá ʻa ʻenau tui ki he ʻOtuá?

Mahalo te ke fie fakaʻaliʻali ʻa e fakaafe ko ʻení ke fai ha fakakaukau ki ai pea pehē ki he fakamatala meia Palesiteni Nalesoní ke fakalaulauloto mo fakakaukau ki ai ʻa e kau akó.

Fakakaukau ki ha taimi naʻá ke ongoʻi ai ʻa e mālohi ʻo e ʻEikí ʻi hoʻo teuteu fakatuʻasino mo fakalaumālié.

Naʻe fakamoʻoni ʻa Palesiteni Lāsolo M. Nalesoni ki he ngaahi tāpuaki ʻo e mateuteú:

Palesiteni Russell M. Nelson

ʻOku ʻikai teitei tuku e ʻoho ʻa e filí. Ko ia ai, he ʻikai ke tau teitei lava ʻo taʻofi ʻetau teuteú! Ko e lahi ange ko ia ʻetau moʻui fakafalala pē kiate kitautolu—fakatuʻasino, fakaeloto, mo fakalaumālié—ko ʻetau mateuteu ange ia ke fepaki mo e ngaahi ʻoho taʻetuku ʻa Sētané. …

ʻOku ʻikai ke u pehē ʻe faingofua ʻa e ngaahi ʻaho ka hoko maí, ka ʻoku ou palōmesi atu ʻe nāunauʻia ʻa e kahaʻú maʻanautolu ʻoku mateuteu mo hokohoko atu ʻa e teuteu ke hoko ko ha ngaahi meʻangāue ʻi he toʻukupu ʻo e ʻEikí. (Russell M. Nelson, “Tali Lelei ʻa e Kahaʻú ʻi he Tui,” Ensign pe Liahona, Nōvema 2020, 75–76)

Kapau ʻe fiemaʻu, vahevahe ha ngaahi sīpinga ʻo e meʻa ʻe ala fiemaʻu ke teuteu ki ai e kau akó—hangē ko ʻení, ngāue fakafaifekaú, ngaahi faingamālie fakaakó, ngāue maʻuʻanga moʻuí, ngaahi fakatamaki fakanatulá, pe hāʻele mai ʻa e Fakamoʻuí.

Fakakaukau ki ha faingataʻa, tūkunga, pe meʻa kuo pau ke ke mateuteu ki ai. Fakakaukau ki he ongo ʻokú ke maʻu ki hoʻo mateuteu ʻi he ʻaho ní. Fekumi ki he fakahinohino ‘a e Laumālie Māʻoniʻoní ‘i hoʻo tali ʻa e ngaahi fehuʻi ko ‘ení.

• Ko e hā ha ngaahi ngāue pau te ke fakahoko ke ke mateuteu ai?

• Te ke lava fēfē ʻo fakakau ʻa e ʻEikí ʻi hoʻo ngaahi teuteú?

Fakamoʻoni ki he ngaahi tāpuaki ʻoku maʻu mei he mateuteú. Poupouʻi e kau akó ke talanoa mo honau fāmilí fekauʻaki mo e ngaahi faingataʻa te nau fehangahangai mo iá mo e founga ki he teuteu fakatuʻasino mo fakalaumālié.

Fakamatala Fakamahinó mo e Puipuituʻá

Te tau teuteu fēfē?

Naʻe akonaki ʻa Palesiteni Lāsolo M. Nalesoni ʻo pehē:

Palesiteni Russell M. Nelson

Kuo ʻosi talaʻofa mai “kapau te [tau] mateuteu, ʻe ʻikai te [tau] manavahē” [Tokāteline mo e Ngaahi Fuakava 38:30]. Ko e fakapapauʻi mai ko ʻení ʻoku ʻi ai hono lelei lahi he ʻahó ni. Kuo ʻosi folofola ʻa e ʻEikí neongo ʻa e ngaahi faingataʻa makehe ʻo e ʻaho ní, ka ko kinautolu ʻe langa honau fakavaʻé ʻia Sīsū Kalaisí, mo ʻosi ako ki he founga hono fakaʻaongaʻi Hono mālohí, ʻoku ʻikai fiemaʻu ke nau moʻulaloa ki he ʻū meʻa fakahohaʻa makehe ʻo e kuonga ko ʻení. (Russell M. Nelson, “Ko e Temipalé mo Ho Fakavaʻe Fakalaumālié,” Liahona, Nōvema 2021, 94)

Naʻe pehē ʻe Palesiteni Tāleni H. ʻOakesi ʻo e Kau Palesitenisī ʻUluakí:

Palesiteni Dallin H. Oaks

ʻOku fiemaʻu ke tau fakatou teuteu fakatuʻasino mo fakalaumālie ki he ngaahi meʻa naʻe kikiteʻi ʻe hoko ʻi he taimi ʻo e Haʻele ʻAnga Ua Maí. Pea ʻoku mahino ko e teuteu ʻe ngalingali fai hano liʻakí ʻa ē ʻoku ʻikai faʻa fakatokangaʻi mo faingataʻa angé—ko e fakalaumālié. (Dallin H. Oaks, “Preparation for the Second Coming,” Ensign pe Liahona, Mē 2004, 9)

Naʻe fakamatala ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā David A. Bednar

ʻOku totonu ke muimui ʻetau ngaahi tokateu ki hono siviʻi ʻo e ngaahi aʻusia ʻi he matelié ʻi he tā sīpinga ʻa e Fakamoʻuí ʻa ia naʻe fakaʻau ke “tupulaki ʻa e potó mo e lahí, pea naʻe ʻofeina ia ʻe he ʻOtuá mo e tangatá” [Luke 2:52]—ko ha potupotutatau ia ʻo hono fakatahaʻi ʻo e mateuteu fakaʻatamaí, fakatuʻasinó, fakalaumālié, mo e fakasōsialé. (David A. Bednar, “Te Tau Siviʻi ʻa Kinautolu,” Ensign pe Liahona, Nōvema 2020, 9)

Naʻe akoʻi ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā Quentin L. Cook

ʻOku faʻa taʻeʻamanekina ʻaupito e ngaahi matangi mo e ʻahiʻahi ia ʻo e moʻui ko ʻení. Ka ko e meʻa ʻeni ʻoku tau ʻiló: te nau hoko mai! ʻE fiemaʻu ha teuteu ia ʻi he angatonu pea mo fakaʻaongaʻi e ngaahi maluʻi fakalangi kuo tuku maí, kae lava ke tau ikunaʻi e ngaahi faingataʻa mo e ngaahi ʻahiʻahi ʻoku tau fekuki fakaʻaho mo iá. Kuo pau ke tau fakapapauʻi ke moʻui taau mo e temipalé neongo pe ko e hā ʻoku tau fepaki mo iá. “Ka ʻo kapau te [tau] mateuteu, ʻe ʻikai te [tau] manavahē.” (Quentin L. Cook, “Tuha mo Taau mo Pilisitolo: Moʻui Taau mo e Temipalé—ʻi he Faingamālié mo e Faingatāmakí,” Ensign pe Liahona, Nōvema 2015, 39)

3 Nīfai 2:15. ʻOku ʻuhinga ki he hā ʻa e “naʻe toʻo meiate kinautolu ʻa honau malaʻiá”?

Ko e malaʻia ʻo e kau Leimaná ʻi he kuonga ʻo Nīfaí, ko hono “motuhi atu ʻa [kinautolu] mei he ʻao [ʻo e ʻEikí] … koeʻuhí ko ʻenau angahalá” (2 Nīfai 5:20–21). ʻE toki ngata pē ʻa e fakamalaʻiá ʻi ha tuku e faiangahala ʻa e kakaí. ʻI he taimi naʻe tali ai ʻe he kau Leimaná kimui ange ʻa e ongoongolelei ʻo Sīsū Kalaisí, “naʻe ʻikai ke toe ʻiate kinautolu ʻa e fakamalaʻia ʻa e ʻOtuá” (ʻAlamā 23:18 ʻI he 3 Nīfai 2, naʻe toʻo ʻa e fakamalaʻiá mei he kau Leimana naʻe ului ki he ʻEikí (vakai, 3 Nīfai 2:12, 15).

Ngaahi ʻEkitivitī Fakalahi ki he Akó

Ko e sīpinga ʻo e teuteu ʻa e Fakamoʻuí

Mahalo naʻa ʻaonga ki he kau akó haʻanau sio ki he sīpinga ʻo e teuteu ʻa e Fakamoʻuí. ʻE lava ke nau lau ʻa e Luke 2:52 mo e lea ʻa ʻEletā Tēvita A Petinā ʻi he konga “Fakamatala Fakamahinó mo e Puipuituʻá.” Aleaʻi ʻa e ngaahi founga ʻe lava ke teuteu ai ʻa e kau akó ʻi he ngaahi tafaʻaki ko ʻení. Te ke lava foki ʻo fakaafeʻi ʻa e kau akó ke vakai ki he ngaahi taumuʻa fakalakalaka fakataautaha ʻa e Fānaú mo e Toʻu Tupú kuo nau fokotuʻú.

3 Nīfai 2:1–3. Manatuʻi ha ngaahi aʻusia fakalaumālie

Fakakaukau ke aleaʻi ʻa e mahuʻinga ʻo hono manatuʻi ʻetau ngaahi aʻusia fakalaumālié. Hili hono lau ʻo e 3 Nīfai 2:1–3, te mou lava ʻo talanoa ki he meʻa ʻe hokó kapau ʻe ngalo ʻiate kitautolu ʻa ʻetau ngaahi aʻusia fakalaumālié. Pea fakaafeʻi leva ʻa e kau akó ke vahevahe ʻa e ngaahi ngāue ʻoku nau fai ke manatuʻi mo fakafoʻou ai ʻenau fakamoʻoni ki he ngaahi moʻoni fakalaumālié. Te nau lava foki ʻo lekooti e ngaahi aʻusia fakalaumālie kimuʻá ʻi heʻenau tohinoa akó.

Ki ha fakamatala kehe ʻi he tefito ko ʻení, vakai ki he ngaahi meʻá ni:

• Henry B. Eyring, “O Remember, Remember,” Ensign pe Liahona, Nov 2007, 66–69

• Ronald A. Rasband, “Telia Naʻa Ngalo ʻIate Koe,” Ensign pe Liahona, Nōvema 2016, 113–115

• Neil L. Andersen, “Ngaahi Manatu Melie Fakalaumālie Fakangalongataʻá,” Ensign pe Liahona, Mē 2020, 18–22

3 Nīfai 3:2–12. Ko hono ʻahiʻahiʻi ʻe Kitianehai ʻa Leikoneosé

ʻE lava ke tokoni ʻa e ʻekitivitī ko ʻení ke ʻilo ai ʻe he kau akó ʻa e anga hono faʻa fakaʻaongaʻi ʻe Sētane mo ʻene kau muimuí ʻa e fakahekeheké, ngaahi palōmesi loí, mo e fakamanamaná ke fakaheeʻi ʻaki ʻa e kakaí. Lau ‘a e 3 Nīfai 3:2–10, ʻo kumi ʻa e ngaahi foʻi lea pe ngaahi kupuʻi lea ‘oku nau fakahaaʻi mai ‘a e ngaahi founga naʻe ngāue ʻaki ‘e Kitianehai ke holoki ʻaki e tui ʻa Leikoneosé. Aleaʻi ʻa e anga hono fakaʻaongaʻi ʻo e founga tatau ki he toʻu tupu ʻo e ʻaho ní. Hili iá pea lau ʻa e 3 Nīfai 3:11–12, ʻo sio ki he meʻa naʻe fai ʻe Leikoneosé. Aleaʻi ʻa e founga ʻoku ʻikai fiemaʻu ai ke manavahē ʻa e kakai tangata mo fafine angatonú ki he kau faiangahalá pe tukulolo ki heʻenau fakamanamaná.

3 Nīfai 5:23–26. Ko hono tānaki fakataha ʻo ʻIsilelí

ʻE lava ke fakatatau ʻe he kau akó ʻa hono tānaki ʻo e kau Nīfaí ʻi he 3 Nīfai 3–4 ki hono tānaki fakataha ʻo ʻIsilelí. Lau ʻa e 3 Nīfai 5:23–26 pea aleaʻi ʻa e tānaki fakataha ʻo ʻIsilelí. Tokoni ke ʻilo ʻe he kau akó ʻoku tānaki fakataha ʻa ʻIsileli ʻi he taimi ʻoku ʻilo ai ʻe he kakaí “honau Huhuʻí, ʻa ia ko Sīsū Kalaisi” (3 Nīfai 5:26).

Vakai foki, Russell M Nelson mo Wendy W. Nelson, “ʻAmanakiʻanga ʻo ʻIsilelí” (fakatahalotu fakamāmāni lahi ʻa e toʻu tupú, 3 ʻo Sune, 2018), fakalahi ki he New Era mo e Ensign, ChurchofJesusChrist.org. ʻE ala tokoni ke mamataʻi e vitiō ʻo e fakamafolá mei he taimi 29:50 ki he 33:36 mo e 38:18 ki he 45:09.