“Toe Vakaiʻi Hono 19 ʻo e Fakataukei Fakatokāteliné: Fakaʻaongaʻi ʻo e Ngaahi Potufolofola Fakataukei Fakatokāteliné,” Tohi ʻa Molomoná – Tohi Lēsoni ʻa e Faiakó (2024)
“Toe Vakaiʻi Hono 19 ʻo e Fakataukei Fakatokāteliné,” Tohi ʻa Molomoná – Tohi Lēsoni ʻa e Faiakó
Toe Vakaiʻi Hono 19 ʻo e Fakataukei Fakatokāteliné
Fakaʻaongaʻi ‘o e Ngaahi Potufolofola Fakataukei Fakatokāteliné
ʻE lava ke tāpuekina koe ʻi ha ngaahi founga lahi ʻi hoʻo ako ke fakaʻaongaʻi e ngaahi folofola ʻa e ʻEikí ʻi he folofola māʻoniʻoní. ʻE lava ke tokoni ʻa e lēsoni ko ʻení ke ke fakaʻaongaʻi ʻa e ngaahi moʻoni ʻi he ngaahi potufolofola fakataukei fakatokāteliné mei he konga hono ua ʻo e Tohi ʻa Molomoná.
Akoako ke fakaʻaongaʻi ‘a e ngaahi potufolofola fakataukei fakatokāteliné. ʻOange ha ngaahi faingamālie kehekehe maʻá e kau akó ke fakamatalaʻi mo fakaʻaongaʻi ʻa e meʻa kuo nau ako mei he ngaahi potufolofola fakataukei fakatokāteliné. Tokoni ki he kau akó ke nau ʻiloʻi ʻa e felāveʻi fakataautaha ʻa e ngaahi potufolofolá pea tokoniʻi ke nau moʻui ʻaki e ngaahi tefitoʻi moʻoni ʻoku akoʻí.
Teuteu ʻa e tokotaha akó: Fakakaukau ke fakaafeʻi e kau akó ke fili ha potufolofola fakataukei fakatokāteline ʻe taha pe ua pea feinga ke ako maʻuloto ʻa e potufolofolá mo e kupuʻi lea mahuʻinga ʻo e folofolá.
Ngaahi ʻEkitivitī Ako ʻOku Ala Fakahokó
ʻE ala fiemaʻu ke akoʻi ha lēsoni ki he potufolofola fakataukei fakatokāteliné ʻo fetongi ʻaki ʻa e lēsoni ko ʻení. Vakai ki he taimi-tēpile ki he vave hono akoʻí ʻa ia ʻoku ʻomi ʻe he talēkita fakavāhengá pe vahefonuá pe kouʻōtineitá ke fakapapauʻi ʻe akoʻi e lēsoni kotoa pē ʻo e fakataukei fakatokāteline ki he potufolofolá lolotonga e fakahoko ʻa e seminelí.
Ivi ngaʻunu ʻo ha meʻa
Ke kamata e kalasí, fakakaukau ke fakaafeʻi ha tokotaha ako ke ne tekaʻi ha foʻi pulu pe kā meʻa vaʻinga ʻi muʻa ʻi he kalasí. Fakakaukau ke faʻu ha foʻi tahifo ʻe lava ke teka hifo ai ʻa e foʻi pulú ke ne fakatātaaʻi ʻa e ʻalu ke vave ange ʻa ʻene teká .
Fakakaukauloto ʻokú ke tekaʻi pe ʻakahi ha foʻi pulu. Ko e hā te ne lava ʻo fakatupu ʻa e mamaʻo pe vave ʻo e vilo ʻa e foʻi pulú?
Ko e ivi ngaʻunu ʻo ha meʻá ko ha founga ia ʻe taha ke fakamatalaʻi ai ʻa e mālohi pe ivi ʻo ha meʻa ʻoku ngāue. Hangē ko ʻení, ʻoku ngāue ʻa e pasikalá ʻi he mavahe ʻa e vaʻe ʻo e taha heká mei he kelekelé, pea maʻu hono ivi ngaʻunú ʻi he fakapalanisi mo hokohoko atu e ʻaka ʻa e tokotaha heká. ʻOku fakaʻau ke toe mālohi ange ʻa e ivi ngaʻunu ʻo e pasikalá ʻi he fakalahi ange e ʻaka ʻa e tokotaha ʻaka pasikalá pe ko e tahifo ʻa e halá.
-
Ko e hā mo ha toe ngaahi sīpinga kehe ʻo e ivi ngaʻunu leleí?
Mahalo te ke loto ke fakaʻaliʻali ʻa e fakamatala ko ʻení. ʻE ala tokoni ke fakaʻilongaʻi ʻa e ngaahi foʻi lea mo e ngaahi kupuʻi lea mahuʻingá ʻi hono aleaʻi ʻe he kau akó ʻa e ngaahi fehuʻi ko ʻení.
Naʻe akonaki ʻa Palesiteni Lāsolo M. Nalesoni ʻo pehē:
Kuo teʻeki ai ke tau fiemaʻu lahi ange ʻa e ivi fakalaumālie leleí ʻo hangē ko e ʻaho ní, ke fakafepakiʻi ʻaki ʻa e vave ʻo e fakautuutu ʻo e koví mo e ngaahi fakaʻilonga ʻo e kuongá. ʻE hokohoko atu hono ʻunuakiʻi kitautolu ki muʻa ʻe he ivi fakalaumālie leleí neongo ʻa e tailiili mo e taʻepau ʻoku tupu mei he ngaahi mahaki fakaʻauhá, peaukulá, puna ʻo e moʻungaafí, mo e fetāʻaki fakakautaú. ʻOku lava ke tokoniʻi kitautolu ʻe he ivi fakalaumālié ke tau matuʻuaki ʻa e ngaahi ʻohofi fefeka, mo taʻetuku ʻa e filí mo matatali ʻene feinga ke fakaʻauha hotau fakavaʻe fakalaumālie fakatāutahá. (Russell M. Nelson, “Ko e Mālohi ʻo e Ivi Fakalaumālié,” Liahona, Mē 2022, 98)
-
Te ke fakamatalaʻi fēfē ʻa e ivi fakalaumālié mo hono ʻuhinga ʻoku tau fiemaʻu ai iá?
ʻE ala tokoni ki he kau akó hano lekooti ʻenau ngaahi fakakaukau fekauʻaki mo e ngaahi fehuʻi vakaiʻi fakataautaha ko ʻení. ʻI he ueʻi ʻa e Laumālié, fakakaukau ke fakaafeʻi ʻa e kau akó ke vahevahe ʻenau ngaahi fakakaukaú.
-
Ko e hā ha ngaahi tafaʻaki ʻi hoʻo moʻuí ʻokú ke pehē ʻokú ke fiemaʻu ai ha ivi fakalaumālie lahi ange? Ko e hā ha ngaahi lelei ʻokú ke ʻamanaki ke maʻu?
Tupulaki ʻa e ivi fakalaumālié
ʻOku akoʻi ʻe he ngaahi potufolofola fakataukei fakatokāteliné ʻa e tokāteline moʻoni ʻoku tokoni ke tau ako ai ʻo kau kia Sīsū Kalaisi mo ʻEne ongoongoleleí. ʻI heʻetau muimui kiate Ia ʻi he tuí, te tau lava ʻo foʻu mo fakatupulaki ʻa e mālohi fakalaumālié ʻi heʻetau moʻuí.
Tuku ha taimi feʻunga maʻá e kau akó ke fakakakato ʻa e ʻekitivitī ko ʻení. Mahalo te ke loto ke fakaʻatā ʻa e kau ako ʻoku fiemaʻu tokoni fakaeakó ke ngāue mo ha hoa. Fakakaukau ke ʻai ha ngaahi tatau ʻo e laʻipepa tufá ke fakaʻaongaʻi ʻe he kau akó lolotonga ʻa e ʻekitivitií.
Kapau te ke fili ke ʻoua ʻe fakaʻaongaʻi ʻa e laʻipepa tufá, mahalo te ke loto ke tā ʻa e fakatātā ko ʻení ʻi he palakipoé.
Ko Hono Maʻu ha Tupulaki Fakalaumālie ʻi he Fakataukei Fakatokāteliné
Tohi ʻa Molomoná – Tohi Lēsoni ʻa e Faiakó (2024)—“Toe Vakaiʻi Hono 19 ʻo e Folofola Fakataukei Fakatokāteliné: Fakaʻaongaʻi ʻo e Ngaahi Potufolofola Fakataukei Fakatokāteliné”
Fakakaukauloto ko koe ʻa e tokotaha heka pasikalá, pea ʻoku fakafofongaʻi ʻe he hala fonongá hoʻo moʻuí. Mahalo te ke fakatokangaʻi ʻa e hangatonu ʻa e konga ʻuluaki ʻo ho halá, peá ke toki fetaulaki mo ha ngaahi faingataʻa mo ha ngaahi fakafeʻātungia ʻoku fiemaʻu ki ai ha ngāue lahi ange ke ke ikunaʻi. Fakakaukau ki he mālohi fakalaumālie te ke fiemaʻu ke ke fononga lelei ʻi he moʻuí mo e ngaahi fakafeʻātungia mo e ngaahi faingataʻa te ke fouá.
Ako e ngaahi kupuʻi folofola mahuʻinga ʻo e fakataukei fakatokāteliné kuó ke akó, ʻo kumi e ngaahi potufolofola ʻoku fekauʻaki mo hoʻo fononga fakatāutahá. ʻI he tafaʻaki ʻo e ngaahi fika ʻoku fekauʻaki mo hoʻo fakatātaá, hiki e fakamoʻoni fakafolofola ki ha potufolofola fakataukei fakatokāteline kuó ne tokoniʻi pe ʻe lava ke tokoni atu kiate koe:
-
Tauhi maʻu ʻa e ivi fakalaumālié pea tupulaki fakaʻaho.
-
Fakaʻehiʻehi pe ikunaʻi ha fakafeʻātungia ʻi hoʻo tui mo ngāueʻi ʻa e moʻoni ʻoku akoʻi ʻe he potufolofolá.
-
Fakaʻaongaʻi ʻa e mālohi ʻo e Fakamoʻuí pea tuʻu hake ke aʻusia hoʻo ngaahi taumuʻa fakalaumālié.
ʻI he potufolofola fakataukei fakatokāteline takitaha naʻá ke fili mo fakakau ʻi hoʻo fakatātaá, lekooti hoʻo ngaahi fakakaukau fekauʻaki mo ha taha ʻo e ngaahi fakakaukau ko ʻení:
-
Ko ha aʻusia ʻi he taimi naʻá ke ongoʻi ai ʻa e moʻoni mo e mahuʻinga ʻo e potufolofola fakataukei fakatokāteliné.
-
Ko e founga te ke lava ai ʻo fakaʻaongaʻi lelei ange ʻa e tokāteline pe tefitoʻi moʻoni ʻo e potufolofolá ʻi hoʻo moʻuí.
-
Ko e hā ʻokú ke ongoʻi ai ʻe tāpuekina koe ʻe he potufolofolá ni ʻaki ʻa e mālohi ʻo e Fakamoʻuí mo fakatupulaki ho ivi fakalaumālié.
-
Ko e founga kuo fakatupulaki ai ʻe he tokāteliné hoʻo ʻofa ki he Tamai Hēvaní mo Sīsū Kalaisí.
© 2023 ʻe he Intellectual Reserve, Inc. All rights reserved.
Ke tokoni ki he kau akó ke maʻu ha loto-falala ke ngāue ʻiate kinautolu pē, fakakaukau ke ʻoange kiate kinautolu ha sīpinga ʻaki hano hiki ha potufolofola ʻi he tafaʻaki ʻo ha mataʻifika pea aleaʻi mo e kau akó ʻa e founga ʻe lava ke fakaʻaongaʻi ai ʻa e potufolofolá ʻi he tafaʻaki ko iá.
Fakakaukau ke fakaʻaliʻali pe ʻoange ki he kau akó ʻa e saati ko ʻení ko ha maʻuʻanga tokoni ʻi he hokohoko atu ʻenau ako ʻa e lēsoni ko ʻení.
Fakataukei Fakatokāteline ʻo e Tohi ʻa Molomoná: ʻAlamā–Molonai
Tohi ʻa Molomoná – Tohi Lēsoni ʻa e Faiakó (2024)
|
Potufolofolá |
Kupuʻi Lea Mahuʻinga ʻi he Folofolá |
|---|---|
Potufolofolá | Kupuʻi Lea Mahuʻinga ʻi he Folofolá “Pea te ne hāʻele atu, ʻo kātakiʻi ʻa e ngaahi mamahi mo e ngaahi faingataʻá pea mo e ngaahi ʻahiʻahi kehekehe kotoa pē.” |
Potufolofolá | Kupuʻi Lea Mahuʻinga ʻi he Folofolá “Kuo pau ke fai ha fakalelei, … ko ha feilaulau taʻe-fakangatangata mo taʻengata.” |
Potufolofolá | Kupuʻi Lea Mahuʻinga ʻi he Folofolá “ʻIkai toe muimui ʻi he ngaahi holi ʻa ho matá.” |
Potufolofolá | Kupuʻi Lea Mahuʻinga ʻi he Folofolá “Kuo teʻeki ai hoko ʻa e faiangahalá ko e fiefia.” |
Potufolofolá | Kupuʻi Lea Mahuʻinga ʻi he Folofolá “ʻOku makatuʻunga ʻi he maka ʻo hotau Huhuʻí … kuo pau ke mo langa ai homo makatuʻungá.” |
Potufolofolá | Kupuʻi Lea Mahuʻinga ʻi he Folofolá “Kuó u fai ai ʻa e meʻa kotoa pē kuo finangalo ʻa e Tamaí ke u fai talu mei he kamataʻangá.” |
Potufolofolá | Kupuʻi Lea Mahuʻinga ʻi he Folofolá “Ke mou haohaoa ʻo hangē pē ko aú, pe hangē ko e haohaoa hoʻomou Tamai ʻa ia ʻoku ʻi he langí.” |
Potufolofolá | Kupuʻi Lea Mahuʻinga ʻi he Folofolá “Haʻu kiate au ʻo papitaiso … koeʻuhi ke fakamāʻoniʻoniʻi ʻa kimoutolu ʻi he maʻu ʻo e Laumālie Māʻoniʻoní.” |
Potufolofolá | Kupuʻi Lea Mahuʻinga ʻi he Folofolá “ʻOku ʻikai te mou maʻu ha fakamoʻoni kae ʻoua kuo hili hono ʻahiʻahiʻi ʻo hoʻomou tuí.” |
Potufolofolá | Kupuʻi Lea Mahuʻinga ʻi he Folofolá “Kapau ʻe haʻu kiate au ʻa e tangatá … te u liliu ʻa e ngaahi meʻa vaivaí ko e mālohi kiate kinautolu.” |
Potufolofolá | Kupuʻi Lea Mahuʻinga ʻi he Folofolá “Ko e manavaʻofá ʻa e ʻofa haohaoa ʻa Kalaisí.” |
Potufolofolá | Kupuʻi Lea Mahuʻinga ʻi he Folofolá “Mou kole ʻi he loto-fakamātoato, mo e loto-moʻoni, ʻo maʻu ʻa e tui kia Kalaisi … [pea] ʻi he mālohi ʻo e Laumālie Māʻoniʻoní te mou lava ai ke ʻiloʻi hono moʻoni ʻo e ngaahi meʻa kotoa pē.” |
© 2023 ʻe he Intellectual Reserve, Inc. All rights reserved.
ʻI he ʻosi e ngāue ʻa e kau akó, fakakaukau ke fakaafeʻi ke nau vahevahe ʻa e ngaahi potufolofola naʻe ongo moʻoni kiate kinautolú. Fakafanongo fakalelei pea ʻeke ha ngaahi fehuʻi vakaiʻi ke tokoni ki he kau akó ke fakalahi ʻenau houngaʻia ʻi he founga ʻe lava ke tokoniʻi ai kinautolu ʻe he ʻEikí ke fakatupulaki ʻenau moʻui fakalaumālié. Poupouʻi ke vahevahe ʻenau fakamoʻoni kau ki he ʻEikí mo e founga ʻoku nau hoko ai ʻo hangē ange ko Iá.