“ʻAlamā 39–42: Vakai Fakalūkufuá,” Tohi ʻa Molomoná – Tohi Lēsoni ʻa e Faiakó (2024)
“ʻAlamā 39–42,” Tohi ʻa Molomoná – Tohi Lēsoni ʻa e Faiakó
ʻAlamā 39–42
Vakai Fakalūkufuá
Hili hono fakaafeʻi ʻe ʻAlamā ʻa Kolianitoni ke fakatomalá, naʻá ne maʻu ha ngaahi fehuʻi fekauʻaki mo e palani ʻa e ʻOtuá, ʻo kau ai ʻa e meʻa ʻoku hoko kiate kitautolu hili ʻetau maté. Naʻe akoʻi ʻe ʻAlamā ha ngaahi moʻoni mahuʻinga kia Kolianitoni ke tokoni ke mahino kiate ia ʻa e palani ʻa e Tamai Hēvaní ki hono fakafoki mai ʻo e ongoongoleleí. Naʻe fāifeinga foki ʻa Kolianitoni ke mahino kiate ia ʻa hono moʻoni ʻo e fakamaau totonu mo e ʻaloʻofa ʻa e ʻOtuá. Naʻe tokoniʻi ia ʻe ʻAlamā ke fakalahi ʻa e mahino ʻokú ne maʻú ki heʻetau Tamai Hēvani ʻofá mo ʻEne palani maʻatautolú.
Teuteu ke Akoʻí
ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.
ʻAlamā 40
Taumuʻa ʻo e lēsoní: ʻE lava ke tokoni e lēsoni ko ʻení ke fakaloloto e houngaʻia ʻa e kau akó ʻi he meʻa kuo fai ʻe he Fakamoʻuí maʻanautolú pea te ne ʻoange ha faingamālie ke nau fakamatalaʻi ʻa e meʻa ʻoku hoko hili ʻetau maté.
-
Teuteu ʻa e tokotaha akó: Fakaafeʻi e kau akó ke nau fakalaulauloto ki ha ngaahi fehuʻi ʻoku nau ala maʻu fekauʻaki mo e meʻa ʻoku hoko hili ʻetau maté pea omi mateuteu ke vahevahe.
-
Ongo Vitiō: “ʻOku ʻIkai ha Mālohi ʻo e Faʻitoká” (9:18; mamata mei he taimi 4:21 ki he 5:13); “Ko e Hā ʻOku Hoko ki Hotau Ngaahi Sinó mo e Laumālié hili ʻEtau Maté?” (4:19)
-
Laʻipepa Tufá: “Ko e Maama Tataliʻanga ʻo e Ngaahi Laumālié”; “Toetuʻú”
-
Fokotuʻu ki hono akoʻi ʻi he konifelenisi vitioó: Hili hono vahevahe ʻo e kau akó ki ha ngaahi hoa pea tuku ha taimi ke teuteu ai e meʻa te nau akoʻi ʻi ha taha ʻo e ongo tefitó, tuku ʻa e hoa takitaha ki ha kiʻi loki fakataha mo ha ongo hoa naʻá na ako ʻa e tefito ʻe tahá. Fakaafeʻi e ngaahi hoá ke nau taufetongi ʻi hono akoʻi ʻenau tefitó. ʻI he toe fakataha mai ʻa e kau akó, fakaafeʻi kinautolu ke vahevahe ʻa e meʻa ne nau saiʻia ai fekauʻaki mo e founga naʻe akoʻi ai kinautolu ʻe he hoa ʻe tahá.
ʻAlamā 41
Taumuʻa ʻo e lēsoní: ʻE tokoni ʻa e lēsoni ko ʻení ke sio e kau akó ki he founga he ʻikai lava ke iku ai ʻa e faiangahalá ki he fiefiá.
-
Teuteu ʻa e tokotaha akó: Fakaafeʻi e kau akó ke nau fakakaukau ki he founga kuo ʻomi ai ʻe he talangofua ki he ngaahi fekaú ha fiefia kiate kinautolu mo tokoniʻi ke nau ongoʻi mateuteu ke feʻiloaki mo e ʻOtuá hili ʻa e moʻui ko ʻení.
-
Vitiō: “Ko e Palani Lahi ʻo e Fiefiá” (9:18; mamata mei he taimi 3:07 ki he 3:46)
-
Fokotuʻu ki hono akoʻi ʻi he konifelenisi vitioó: Fakakaukau ke fakaʻaongaʻi ʻa e polokalama “palakipoé” ke faʻu ha lisi ʻe ua ʻoku ui ko e “Fiefiá” mo e “Mamahí” pea fakaʻatā e kau akó ke tānaki atu ki he lisi takitaha ha ngaahi ʻulungaanga ʻoku fakatau ki he fiefiá pe mamahí.
Fakataukei Fakatokāteliné: ʻAlamā 41:10
Taumuʻa ʻo e lēsoní: ʻE lava ke tokoni e lēsoni ko ʻení ke ako maʻuloto ʻe he kau akó ʻa e potufolofola fakataukei fakatokāteline mo e kupuʻi lea fakafolofola mahuʻinga ki he ʻAlamā 41:10, fakamatalaʻi ʻa e tokāteliné, pea akoako hono fakaʻaongaʻi ʻo e ngaahi tefitoʻi moʻoni ki hono maʻu ʻo e ʻilo fakalaumālié ki ha ngaahi tūkunga moʻoni ʻo e moʻuí.
-
Teuteu ʻa e tokotaha akó: Fakaafeʻi e kau akó ke nau ako maʻuloto ʻa e ʻAlamā 41:10.
-
Meʻa ke fakaʻaliʻalí: Ko e tūkunga ʻi he konga akoako fakaʻaongaʻí
-
Fokotuʻu ki hono akoʻi ʻi he konifelenisi vitioó: Fakakaukau ke fakaʻaliʻali mo fakaʻaongaʻi ʻa e konga “ako maʻuloto” ʻo e polokalama Fakataukei Fakatokāteliné ke tokoni ki he kau akó ke ako maʻuloto ʻa e potufolofola fakataukei fakatokāteliné kakato. ʻI he taimi kotoa pē ʻoku lau maʻuloto ai ʻe he kau akó ʻa e potufolofolá, te ke lava ʻo fakaʻaongaʻi ʻa e slide function ʻi lalo ʻi he screen ke toʻo ha foʻi lea kae ʻoua kuo toe pē ʻa e mataʻitohi ʻuluaki ʻo e foʻi lea takitaha.
ʻAlamā 42, Konga 1
Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ke mahino lelei ange ki he kau akó ʻa e natula ʻo e Tamai Hēvaní ʻi heʻene hoko ko ha tokotaha fakamaau totonu mo ʻaloʻofá.
-
Teuteu ʻa e tokotaha akó: Fakakaukau ke fakaafeʻi e kau akó ke nau fetalanoaʻaki mo ha mēmipa ʻo e fāmilí pe kaungāmeʻa fekauʻaki mo ha niʻihi ʻo e ngaahi fakakaukau kehekehe ʻoku maʻu ʻe he kakaí fekauʻaki mo e ʻulungaanga ʻo e ʻOtuá.
-
Vitiō: “Tauʻatāina ʻo Taʻengata, ke Fili Maʻanautolu” (14:51; mamata mei he taimi 5:40 ki he 6:50)
ʻAlamā 42, Konga 2
Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino ki he kau akó ʻa e founga ʻoku fakaʻatā ai kinautolu ʻe he Fakalelei ʻa Sīsū Kalaisí ke maʻu ʻa e ʻaloʻofa kuo talaʻofa mai ʻi he palani ʻa e Tamai Hēvaní.
-
Teuteu ʻa e tokotaha akó: Fakaafeʻi e kau akó ke kumi ha sīpinga ʻi he folofolá ʻo ha taha pe falukunga kakai naʻa nau fakahaaʻi ha fakatomala fakamātoato.
-
Meʻa ke fakaʻaliʻalí: Ko ha fakatātā ʻo ha ngaahi meʻafua
-
Fokotuʻu ki hono akoʻi ʻi he konifelenisi vitioó:Fakakaukau ke fakaʻaliʻali ʻa e fakatātā ʻo e ngaahi meʻafuá pea fakahingoa ia lolotonga ʻa e fakaʻaliʻali akó. ʻE lava ke ke fakaʻaongaʻi e polokalama “palakipoé” pe faʻu ha fakaʻaliʻali ako ʻokú ne fakaʻaliʻali e ngaahi meʻafuá pea tānaki taha taha atu ʻa e ngaahi hingoá.