« អាលម៉ា ៣២–៣៥ ៖ ទិដ្ឋភាពទូទៅ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« អាលម៉ា ៣២–៣៥ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
អាលម៉ា ៣២–៣៥
ទិដ្ឋភាពទូទៅ
នៅពេលអាលម៉ា បានបង្រៀនពួកសាសន៍សូរាំ លោកបានប្រៀបធៀបព្រះបន្ទូលនៃព្រះទៅនឹងគ្រាប់ពូជមួយប្រភេទដែលយើងអាចដាំក្នុងចិត្តយើងបាន ដែលនៅទីបំផុតអាចក្លាយទៅជា « ដើមមួយ ពន្លកឡើងជាជីវិតដ៏អស់កល្បជានិច្ច » ( អាលម៉ា ៣២:៤១ ) ។ ជនក្រីក្រក្នុងចំណោមពួកសាសន៍សូរាំបានសួរលោកពីរបៀបដែល « គេត្រូវចាប់ផ្ដើមអនុវត្តសេចក្ដីជំនឿរបស់គេ » ( អាលម៉ា ៣៣:១ ) ហើយលោកបានបង្រៀនពួកគេថា ពួកគេអាចអធិស្ឋាន និងថ្វាយបង្គំនៅគ្រប់ទីកន្លែងទាំងអស់ ។ លោក និង អាមូលេកបានថ្លែងទីបន្ទាល់អំពីព្រះយេស៊ូវគ្រីស្ទ ហើយអាមូលេកបានបង្រៀនថា មនុស្សទាំងអស់មានចិត្តរឹងរូស រងឥទ្ធិពលនៃការធ្លាក់ ហើយនិងវង្វេង បើគ្មានពលិកម្មដ៏គ្មានទីបញ្ចប់ និងអស់កល្បជានិច្ចរបស់ព្រះគ្រីស្ទទេនោះ ។ អាមូលេក បានទទូចអង្វរដល់ពួកសាសន៍សូរាំកុំឲ្យអូសបន្លាយពេលវេលានៃការប្រែចិត្តពួកគេឡើយ ។
រៀបចំខ្លួនបង្រៀន
ព័ត៌មានខាងក្រោមនេះផ្តល់ជាគំនិតដល់គ្រូបង្រៀនអំពីអ្វីដែលអាចត្រូវរៀបចំទុកជាមុនសម្រាប់មេរៀននីមួយៗ ។
អាលម៉ា ៣២
គោលបំណងមេរៀន ៖ មេរៀននេះមានគោលបំណងជួយឲ្យសិស្សដាំព្រះបន្ទូលនៃព្រះក្នុងដួងចិត្តពួកគេ និងរក្សាទីបន្ទាល់របស់ពួកគេអំពីព្រះបន្ទូលនោះ ។
-
ការរៀបចំសិស្ស ៖ សូមអញ្ជើញសិស្សឲ្យសួរមនុស្សជាទីស្រឡាញ់ម្នាក់ដែលមានទីបន្ទាល់អំពីដំណឹងល្អនៃព្រះយេស៊ូវគ្រីស្ទនូវអ្វីដែលបានជួយគាត់ ឬនាងឲ្យទទួល ឬពង្រឹងទីបន្ទាល់នោះបាន ។
-
មាតិកាដែលត្រូវបង្ហាញ ៖ ឃ្លាចំនួនបីដែលនៅចំហ នៅពេលចាប់ផ្ដើមមេរៀន
-
សំណៅចែក ៖ « ការដាំ និងបីបាច់ព្រះបន្ទូលនៃព្រះក្នុងចិត្តយើង »
-
រូបភាព ៖ ដំណាក់កាលដើមឈើលូតលាស់
-
យោបល់សម្រាប់ការបង្រៀនតាមសន្និសីទវីដេអូ ៖ បន្ទាប់ពីសិស្សបានអាន អាលម៉ា ៣២:២៨ ហើយ សូមឲ្យពួកគេសង្កេតមើលការដាំគ្រាប់ពូជជាច្រើនប្រភេទនៅក្នុងផើងដែលមានដីស្ងួត ។ បន្ទាប់មក នៅពេលសិស្សអានខទី ៣៧–៤៣ សូមអញ្ជើញពួកគេឲ្យសរសេរជាបញ្ជីរឿងដែលនឹងជួយឲ្យគ្រាប់ពូជទាំងនោះលូតលាស់បាន ។ ដើម្បីចាប់ផ្តើមបង្រៀនមេរៀនតាមសន្និសីទវីដេអូនីមួយៗក្នុងរយៈពេលពីរបីសប្តាហ៍ខាងមុខ សូមអញ្ជើញសិស្សពីរ ឬបីនាក់ឲ្យចែកចាយដោយសង្ខេបៗនូវអ្វីមួយដែលពួកគេទើបបានធ្វើថ្មីៗនេះ ដើម្បីបីបាច់ទីបន្ទាល់របស់ពួកគេអំពីព្រះបន្ទូលនៃព្រះ ។ នៅពេលសិស្សម្នាក់ៗបានចែកចាយហើយ សូមធ្វើអ្វីមួយដែលនឹងជួយថែទាំបីបាច់គ្រាប់ពូជដែលអ្នកបានដាំ ដូចជាការចាក់ទឹកបន្ថែមបន្តិចបន្តួច ឬផ្លាស់ទីផើងទៅកន្លែងដែលមានពន្លឺច្រើនជាង ។
អាលម៉ា ៣៣
គោលបំណងមេរៀន ៖ មេរៀននេះអាចផ្ដោតខ្លាំងលើការយល់ដឹងរបស់សិស្សអំពីជំហានដែលពួកគេអាចធ្វើបាន ដើម្បីអនុវត្តសេចក្ដីជំនឿកាន់តែច្រើនលើព្រះយេស៊ូវគ្រីស្ទ ។
-
ការរៀបចំសិស្ស ៖ សូមអញ្ជើញសិស្សឲ្យអាន អាលម៉ា ៣៣ នៅផ្ទះ ហើយជ្រើសរើសខគម្ពីរ ឬក្រុមខគម្ពីរដែលពួកគេចង់យល់ឲ្យបានកាន់តែច្បាស់ ។
-
មាតិកាដែលត្រូវបង្ហាញ ៖ ជម្រើសបីសម្រាប់ការរៀបចំមេរៀន ដាក់បង្ហាញក៏បាន ឬចម្លងដាក់លើក្តារខៀនក៏បាន
-
សំណៅចែក ៖ « យោបល់សម្រាប់ការរៀបចំមេរៀន »
-
យោបល់សម្រាប់ការបង្រៀនតាមសន្និសីទវីដេអូ ៖ សូមអញ្ជើញសិស្សឲ្យបិទសំឡេង និងកាមេរ៉ាពួកគេនៅពេលកំពុងត្រៀមរៀបចំមេរៀនពួកគេ ។ នៅក្រោយរយៈពេលដែលបានកំណត់ សូមឲ្យពួកគេបើកកាមេរ៉ា និងសំឡេងពួកគេឡើងវិញ ហើយដាក់វានៅក្នុងមុខងារបំបែកក្រុម ។ សូមអញ្ជើញសិស្សស្ម័គ្រចិត្តម្នាក់ ឬពីរនាក់នៅក្នុងមុខងារបំបែកក្រុមនីមួយៗឲ្យបង្រៀនមេរៀនរបស់ពួកគេ ។
អាលម៉ា ១៣:១–១៧
គោលបំណងមេរៀន ៖ មេរៀននេះអាចជួយសិស្សឲ្យយល់ពីរបៀបដែលព្រះយេស៊ូវគ្រីស្ទអាចប្រទានពរជ័យដល់ពួកគេ តាមរយៈពលិកម្មដ៏និរន្តរ៍ និងដ៏អស់កល្បជានិច្ចរបស់ទ្រង់ ។
-
ការរៀបចំសិស្ស ៖ សូមអញ្ជើញសិស្សឲ្យរកមើល និងសិក្សាបទគម្ពីរដែលជួយឲ្យពួកគេយល់កាន់តែច្បាស់អំពីដង្វាយធួនរបស់ព្រះយេស៊ូវគ្រីស្ទ ។ Topical Guide និងសេចក្តីណែនាំដល់បទគម្ពីរទាំងឡាយអាចជាប្រភពដ៏មានអត្ថប្រយោជន៍ ។
-
រូបភាព ៖ ព្រះយេស៊ូវគ្រីស្ទនៅសួនច្បារគែតសេម៉ានី
-
មាតិកាដែលត្រូវបង្ហាញ ៖ ដ្យាក្រាមអំពីដង្វាយធួននៃព្រះយេស៊ូវគ្រីស្ទ
-
វីដេអូ ៖ « The Atonement of Jesus Christ Is Infinite and Eternal » ( ១:០៩ ); « The Atonement of Jesus Christ » ( ១១:៤៦ សូមមើលពីនាទីទី ៣:៥៩ ដល់នាទីទី ៤:២៧ )
-
យោបល់សម្រាប់ការបង្រៀនតាមសន្និសីទវីដេអូ ៖ សូមពិចារណាកែតម្រូវសកម្មភាពសិក្សានៅចុងបញ្ចប់នៃមេរៀននេះ ដើម្បីរួមបញ្ចូលបទគម្ពីរផ្សេងៗ ឬឃ្លាថ្មីៗច្រើនទៀតពីថ្នាក់ដឹកនាំសាសនាចក្រ ។
ចំណេះចំណានខាងគោលលទ្ធិ ៖ អាលម៉ា ៣៤:៩–១០
គោលបំណងមេរៀន ៖ មេរៀននេះអាចជួយសិស្សឲ្យទន្ទេញសេចក្ដីយោង និងឃ្លាបទគម្ពីរគន្លឹះសម្រាប់ អាលម៉ា ៣៤:៩–១០ ពន្យល់អំពីគោលលទ្ធិដែលបានបង្រៀននៅក្នុងខគម្ពីរទាំងនោះ និងអនុវត្តគោលការណ៍នៃការទទួលបានចំណេះដឹងខាងវិញ្ញាណនៅក្នុងស្ថានភាពជីវិតជាក់ស្តែងដោយប្រើវគ្គបទគម្ពីរនេះ ។
-
ការរៀបចំសិស្ស ៖ សូមពិចារណាអញ្ជើញសិស្សឲ្យគិតអំពីរបៀបដែលសេចក្ដីពិតដែលបានបង្រៀននៅក្នុង អាលម៉ា ៣៤:៩–១០ និងគោលការណ៍នៃការទទួលបានចំណេះដឹងខាងវិញ្ញាណ អាចនឹងជួយដល់បុគ្គលជាច្រើនដែលមានអារម្មណ៍ថា ពួកគេមិនអាចទទួលបានការអភ័យទោសចំពោះអំពើបាបរបស់ពួកគេបានទេ ។
-
យោបល់សម្រាប់ការបង្រៀនតាមសន្និសីទវីដេអូ ៖ ក្នុងអំឡុងពេលប្រើសកម្មភាពអនុវត្តជាក់ស្ដែង សូមពិចារណាប្រើមុខងារបំបែកក្រុមដើម្បីបំបែកសិស្សទៅជាបីក្រុម ហើយចាត់ឲ្យក្រុមនីមួយៗផ្តោតការយកចិត្តទុកដាក់លើគោលការណ៍មួយនៃគោលការណ៍នៃការទទួលបានចំណេះដឹងខាងវិញ្ញាណ ។ សិស្សមកពីក្រុមនីមួយៗអាចសរសេររាល់របៀបដែលពួកគេគិតថាគោលការណ៍នេះអាចជួយដល់ អូលីវ នៅក្នុងស្ថានភាពរបស់នាងបាន ។ បន្ទាប់មក សូមអញ្ជើញសមាជិកនៃក្រុមនីមួយៗឲ្យឡើងរាយការណ៍ពីអ្វីដែលពួកគេបានពិភាក្សាជាមួយមិត្តរួមថ្នាក់ ។
អាលម៉ា ៣៤:១៧–៤១
គោលបំណងមេរៀន ៖ មេរៀននេះមានគោលបំណងជួយសិស្សឲ្យខិតខំរៀបចំខ្លួនដើម្បីទៅជួបនឹងព្រះ ។
-
ការរៀបចំសិស្ស ៖ សូមអញ្ជើញសិស្សឲ្យអាន អាលម៉ា ៣៤:៣២ ហើយគិតអំពីរបៀបដែលពួកគេអាចធ្វើតាមការប្រឹក្សានៅក្នុងខគម្ពីរនេះបាន ។ ពួកគេអាចសរសេរនូវរបៀបខ្លះៗដែលពួកគេកំពុងរៀបចំខ្លួនដើម្បីត្រឡប់ទៅទីវត្តមានរបស់ព្រះវិញ និងការផ្លាស់ប្ដូរដែលពួកគេអាចធ្វើបាន ដែលនឹងជួយពួកគេឲ្យរៀបចំខ្លួនបានកាន់តែល្អប្រសើរ ។
-
យោបល់សម្រាប់ការបង្រៀនតាមសន្និសីទវីដេអូ ៖ នៅពេលសិស្សស្វែងយល់ពីគោលការណ៍ចេញពី អាលម៉ា ៣៤:១៧–៤១ សូមពិចារណាប្រើមុខងារក្ដារខៀនដើម្បីអនុញ្ញាតឲ្យពួកគេសរសេរគោលការណ៍នានាដែលពួកគេបានរកឃើញ ។