Alma 26

“Maghimaya Kita sa Ginoo”

malipayon nga pundok sa kabatan-onan

Nakasinati ka na ba sukad og usa ka kasinatian nga dili ka makahulat nga isulti sa usa ka tawo? Unsa ang gusto nimo nga mahibaloan sa mga tawo? Sa samang paagi, si Ammon ug ang iyang mga igsoon nga lalaki nagmaya mahitungod sa ilang 14 ka tuig nga misyon taliwala sa mga Lamanite, ug gusto sila nga mopakigbahin sa ilang mga kasinatian. Ilang nasaksihan ang gahom ug gugma sa Dios samtang liboan ka mga Lamanite ang nakahibalo sa kamatuoran diha sa ilang kaugalingon. Kini nga leksiyon makatabang kanimo nga mobati og lawom nga pagpasalamat ug paghigugma alang sa Ginoo ug sa mga panalangin nga Iyang gihatag sa imong kinabuhi.

Pagpangandam nga mahimong instrumento sa Espiritu Santo. Samtang maningkamot ka sa pagsunod sa ehemplo sa Manluluwas sa pagkamasulundon ug pagsunod sa ebanghelyo sa tibuok nimong kasingkasing, ang Espiritu maanaa kanimo. Dili ka kinahanglan nga mahimong perpekto—makugihon lang nga maningkamot. Tinguhaa ang kapasayloan pinaagi sa Pag-ula sa Manluluwas kon kamo mapandol.

Pagpangandam sa estudyante: Mahimong basahon sa mga estudyante ang Alma 26:11–16 ug pamalandongan kon unsa sa ilang hunahuna ang gipasabot sa “maghimaya kita sa Ginoo.”

Posible nga mga Kalihokan sa Pagkat-on

Unsa ang imong hilig?

Mahimong hisgotan sa mga estudyante ang mosunod nga magpares o diha sa gagmay nga mga grupo. Isip alternatibo, mahimo nimong dapiton ang usa o duha ka estudyante sa pagpakigbahin sa makadiyot diha sa klase.

Pamalandongi sa makadiyot ang usa ka butang nga ikaw madasigon o ganahan—usa ka butang nga sa higayon nga magsugod ka sa paghisgot, lisod na nga hunongon!

• Nganong makusganon kaayo ang imong gibati bahin niini?

• Unsa ang imong gilaoman nga mabati sa uban kon imo kining hisgotan? Ngano man?

Human ang mga anak nga lalaki ni Mosiah mibalik gikan sa ilang 14 ka tuig nga misyon ngadto sa mga Lamanite, si Ammon nakigsulti sa iyang mga kaigsoonan mahitungod sa ilang mga kasinatian. Basaha ang Alma 26:8, 16, mangita kon unsa ang gikadasigan ug giganahan ni Ammon.

Sa Alma 26:16, si Ammon migamit sa mga pulong nga maghimaya, maglipay, ug magdayeg samtang nagsulti bahin sa Ginoo. Ang himaya nagpasabot sa pagmaya o paghatag og “masimbahong pagdayeg, pagtahod, ug pagpasalamat” (Merriam-Webster.com, “Glory”; tan-awa usab ang Giya ngadto sa mga Kasulatan, “Himaya,” scriptures.ChurchofJesusChrist.org). Mahimo nimong markahan kini nga mga pulong diha sa bersikulo 16 ug sa ubang mga bersikulo nga imong gitun-an karon.

Ikonsiderar ang pagdapit sa mga estudyante sa pagsulat sa kahulogan sa himaya diha sa ilang mga journal o paghimo og mubo nga sulat duol sa Alma 26:16. Mahimong adunay dugang nga mga kahulogan ang mga estudyante o mga hunahuna nga ipakigbahin base sa ilang pagpangandam sa klase.

Paggahin og pipila ka gutlo sa pagpamalandong sa mosunod:

• Unsa ang imong gibati mahitungod sa imong relasyon ngadto sa Langitnong Amahan? Ngano man?

• Mosulti ka ba sa uban mahitungod Kaniya uban sa kahinam ug kalipay? Ngano o nganong dili?

Samtang magtuon ka sa Alma 26 karon, pamalandongi kon sa unsang paagi nga ang ehemplo ni Ammon sa pagpakigbahin kon unsay iyang gibati mahitungod sa Dios makadugang sa imong gugma ug pasalamat alang sa Langitnong Amahan ug ni Jesukristo.

“Ingon ka dako nga mga panalangin”

Tinoa kon ang mga estudyante makabenepisyo ba og maayo pinaagi sa pagbasa sa mosunod nga mga hugpong sa kasulatan [scripture block] (ug uban pang mga hugpong [block] sa ulahing bahin sa leksiyon) isip usa ka klase, sa gagmay nga mga grupo, o nga magpares. Gamita ang gihatag nga mga pangutana o uban pa nga imong mahunahunaan aron matabangan ang mga estudyante nga masabtan ug maanalisar ang unod [content] ug konteksto.

Basaha ang Alma 26:1–4, 8–16, mangita kon sa unsang paagi si Ammon nagsulti mahitungod sa Dios ug mahitungod sa unsay Iyang nabuhat alang sa iyang mga kaigsoonan ug sa mga Lamanite.

• Unsa ang mipatigbabaw kanimo kon giunsa pagsulti ni Ammon ang mahitungod sa Dios?

• Unsa nga mga kamatuoran ang imong nakit-an nga makapadasig sa usa ka tawo sa paghimaya sa Ginoo?

Ikonsiderar ang pagpasulat sa mga estudyante diha sa pisara sa mga kamatuoran nga ilang nadiskobrehan. O mahimong isulat sa mga estudyante kini nga mga kamatuoran sa gamay papel nga mopilit [sticky notes] ug basahon kini og kusog sa dili pa kini ipapilit diha sa pisara. Pananglitan, ang Dios naghatag og dako nga mga panalangin (mga bersikulo 1–3); ang Dios makabuhat pinaagi kanato aron matuman ang Iyang dako nga buhat ug makapanalangin sa uban (bersikulo 3); diha sa kusog sa Ginoo kita makahimo sa tanan nga mga butang (bersikulo 12); ug ang Dios gamhanan, maluloy-on, ug mapailobon sa Iyang mga anak (bersikulo 16).

Mahimo dayon nimong ipakita ang mosunod nga mga hulagway aron sa pagpahinumdom sa mga estudyante sa mga kasinatian ni Ammon isip usa ka misyonaryo nga migiya kaniya sa pagdayeg sa Dios. Mahimo nimong dapiton ang mga estudyante nga isaysay og balik sa daklit ang pipila ka mga panghitabo nga narekord diha sa Alma 17–21.

Ammon nakig-away sa mga Lamanite

Ammon nagtudlo kang Lamoni

ang rayna nagbangutan tungod kang Lamoni

Bisan tuod ang atong mga kasinatian lahi sa kang Ammon, kita mahimong adunay susama nga mga rason sa pagdayeg sa Dios.

Aron matabangan ang mga estudyante sa paghunahuna mahitungod sa mga rason nga tingali aduna sila sa pagdayeg sa Dios, mahimo nimong ipakita ang mosunod nga mga pangutana. Hatagi og panahon ang mga estudyante sa pagtubag sa usa sa mga pangutana diha sa ilang mga journal sa pagtuon, dayon dapita ang mga estudyante nga buot mopakigbahin sa ilang mga tubag ngadto sa klase.

• Hunahunaa kon sa unsang paagi ikaw nahimo o mahimo nga usa ka “[himan] diha sa mga kamot sa Dios” (Alma 26:3) aron sa pagpanalangin sa uban. Sa unsang paagi nga kini nga mga kasinatian modala kanimo sa pagdayeg sa Dios?

• Unsa ang ubang mga rason nga aduna ka aron sa pagdayeg sa Dios?

• Unsa nga mga kalainan ang mahimo niini sa kinabuhi sa usa ka tawo sa paghimaya sa unsay nahimo sa Dios alang kaniya?

“Dako kaayo nga katarongan sa paglipay”

Sa higayon nga si Ammon nakahinumdom sa iyang panahon isip usa ka misyonaryo ug sa iyang interaksiyon sa Dios, siya mihimaya ug naglipay kon kinsa ang Dios ug unsa ang gihimo sa Dios nga posible sa iyang kinabuhi.

Ikonsiderar ang paghatag og papel sa mga estudyante aron mokompleto sa mosunod nga kalihokan sa pagtuon. Aron malain-lain, ang unang bahin sa kalihokan mahimong makompleto isip usa ka klase. Mahimong tun-an sa mga estudyante ang nagkalain-laing mga grupo ug irekord diha sa pisara ang ilang nakit-an. Ikonsiderar ang paggamit sa gi-bullet nga mga pangutana o sa uban pang imong mahunahunaan aron matabangan ang mga estudyante nga maghimaya sa Ginoo.

Pil-a ang usa ka piraso sa papel og ikatulo o paghimo og tulo ka kolum sa usa ka panid sa imong journal sa pagtuon. Sulati ang ibabaw sa matag kolum sa usa sa mosunod nga mga grupo sa mga tawo:

• Ammon ug ang iyang mga kaigsoonan (Alma 26:17–22)

• Mga Lamanite (Alma 26:23–24, 31–34)

• Tanan nga mga anak sa Dios (Alma 26:35–37)

Basaha ang mga tudling sa kasulatan alang sa matag grupo ug irekord diha sa kolum kon unsay gibuhat sa Dios alang kanila.

• Unsa ang mipatigbabaw kanimo mahitungod sa unsay gibuhat sa Dios alang niini nga mga grupo sa mga tawo? Ngano nga kini makahimo sa mga tawo sa paghimaya diha Kaniya?

Hatagi ang mga estudyante og igong panahon sa pagkompleto sa mosunod nga magtinagsa nga bahin niini nga kalihokan. Dasiga ang mga estudyante nga magmahunahunaon ug magmainampoon samtang sila magtrabaho.

Paklia ang gipilo nga palid sa papel, o paghimo og tulo ka bag-ong mga kolum diha sa imong journal sa pagtuon. Hatagi ang matag kolum og usa sa mosunod nga mga ulohan:

• Giunsa ako pagpanalangin sa Dios

• Giunsa sa Dios pagpanalangin niadtong akong mga gihigugma

• Unsa ang akong nahibaloan ug gibati bahin sa Dios

Mahimo kang mag-ampo sa Langitnong Amahan, maghangyo Kaniya sa pagpahinumdom og mga hunahuna ug mga panumdoman diha sa imong hunahuna. Samtang imong hinumdoman kon sa unsang paagi ang Dios mipanalangin kanimo ug sa uban ug mamalandong sa imong mga pagbati alang Kaniya, ang Espiritu Santo makatabang kanimo nga mobati sa gugma sa Dios alang kanimo.

Irekord ang imong mga tubag sa matag kolum, ug ipasabot ngano nga kini nakapahimo kanimo sa paghimaya sa Dios.

Ikonsiderar ang paggamit sa mosunod nga mga pangutana aron matabangan ang mga estudyante nga makasabot sa kamatuoran ug sa kamahinungdanon sa mga pagbati nga ilang nasinati. Dasiga ang andam nga mga estudyante sa pagpakigbahin sa ilang gibati samtang sila namalandong sa ilang mga rason sa paghimaya sa Ginoo.

• Sa unsang paagi kini nga kalihokan nakatabang nimo nga mobati og mas dako nga kalipay sa Dios o midugang sa gugma ug pasalamat alang Kaniya?

• Sa imong hunahuna sa unsang paagi mausab ang imong relasyon sa Ginoo kon mogahin ka og panahon sa paghinumdom ug paghimaya Kaniya sa kanunay?

Dasiga ang mga estudyante sa pagbuhat sa mosunod nga pagdapit.

Samtang namalandong ka sa unsay imong nakat-onan ug gibati karon, tingale ganahan ka nga maghimo og tumong sa paggahin og panahon sa paghinumdom ug paghimaya sa Dios. Mahimo usab nga maaghat ka sa pagpakigbahin sa imong mga hunahuna sa laing tawo sama sa gibuhat ni Ammon. Pangita og kahigayonan sa pagpakigbahin, ug ikonsiderar kon unsaon nimo pagtabang ang laing tawo nga mobati sa unsay imong gibati alang sa Langitnong Amahan ug ni Jesukristo.

Komentaryo ug Background nga Impormasyon

Unsay akong makat-onan bahin sa Dios pinaagi sa pagpamalandong sa akong espirituhanong mga kasinatian?

Si Elder Neil L. Andersen sa Korum sa Napulog Duha ka Apostoles mitudlo:

Elder Neil L. Andersen

Hunahunaa ang kaugalingon nimong kinabuhi. Sulod sa mga katuigan, namati ako sa mahinuklugong espirituhanong mga kasinatian gikan sa liboan ka mga Santos sa Ulahing mga Adlaw sa tibuok kalibotan, nagmatuod kanako sa dili ikalimod nga ang Dios nakaila ug nahigugma sa matag usa kanato ug matinguhaon kaayo nga mopadayag sa Iyang kaugalingon ngari kanato. Kini nga mga kasinatian posibling moabot sa importanteng mga panahon sa atong kinabuhi, ug tingali sa sinugdanan daw dili kaayo importanteng mga hitabo, apan kanunay kining giubanan og linahi nga kompirmasyon sa espirituhanong gahom sa gugma sa Dios. (Neil L. Andersen, “Mga Espirituhanong Panumduman nga Angay Hinumduman,” Liahona, Mayo 2020, 19)

Unsaon nako paghimaya sa Dios kada adlaw?

Si Sister Joy D. Jones, kanhi Kinatibuk-ang Presidente sa Primary, mipahinumdom kanato:

Presidente Joy D. Jones

Ang Ginoo mitambag, “Paghunahuna ngari kanako sa matag hunahuna” [Doktrina ug mga Pakigsaad 6:36]. Ug matag semana nakigsaad kita nga mobuhat sa ingon––nga sa “kanunay mohinumdom kaniya” [Doktrina ug mga Pakigsaad 20:77, 79]. Ang samang diosnon nga paghatag og pagtagad magamit ba sa tanan natong buhaton? Ang pagbuhat ba bisan sa dili importanteng gimbuhaton mahimong kahigayonan sa pagpakita sa atong gugma ug debosyon ngadto Kaniya? Ako nagtuo nga kini makahimo ug mamahimo.

Makahimo kita sa matag aytem sa atong listahan sa buluhaton nga mahimong usa ka paagi sa paghimaya Kaniya. Makita nato ang matag gimbuhaton nga usa ka pribilehiyo ug kahigayonan sa pagserbisyo Kaniya, bisan kon kita anaa taliwala sa mga deadline, mga katungdanan, o hugaw nga mga diaper. (Joy D. Jones, “Alang Kaniya,” Liahona, Nob. 2018, 51)

Dugang nga mga Kalihokan sa Pagkat-on

Lain nga paagi sa pagsugod sa leksiyon

Hangyoa ang mga estudyante sa pagdayeg sa usa ka tawo nga ilang nailhan. Dasiga sila sa pagpahayag ngano nga kini nga tawo o unsa ang iyang nahimo nga dalaygon o impresibo. Dayon pangutan-a ang mga estudyante kon unsay ilang masulti sa pagdayeg mahitungod sa Dios. Sa unsang paagi nga ang paghisgot bahin Kaniya parehas sa o lahi sa paghisgot bahin sa laing tawo? Ngano man? Dayon dapita sila sa pagbasa sa Alma 26:8, 16, mangita kon kinsa ang gidayeg ni Ammon ug ngano.

Alma 26:11–12. “Diha sa iyang kusog ako makahimo sa tanan nga mga butang”

Mahimo nimong tabangan ang mga estudyante sa pagpamalandong sa mga pagtulun-an ni Ammon niini nga mga bersikulo. Aron mabuhat kini, mahimo nimong hatagan ang mga estudyante og senaryo mahitungod sa usa ka tin-edyer kinsa gihatagan og buluhaton nga iyang nakita nga lisod o makahadlok gikan sa usa ka lider sa Simbahan o gikan sa Dios pinaagi sa pagpadayag. Mahimong ikonsiderar sa mga estudyante kon sa unsang paagi ang deklarasyon ni Ammon makatabang sa tin-edyer sa senaryo sa pagtubag sa iyang kawalay kasiguroan.

Alma 26:22. Saad ni Ammon

Isulat diha sa pisara ang mosunod nga talaid [equation]: + = . Dapita ang mga estudyante sa pagsulat sa mga blangko bisan unsa ang ilang gusto, basta tukma lang ang talaid [equation]. Dayon dapita sila sa pagkompleto sa lain nga mas lisod: + + = . Pahibaloa ang mga estudyante nga si Ammon mihatag og saad diha sa Alma 26:22 nga mahimo usab nga isulat isip talaid [equation]. Dapita sila sa pagbasa sa bersikulo ug isulat ang talaid [equation] nga gitudlo ni Ammon. Mahimong makatabang ang pagkahibalo nga ang “mga misteryo sa Dios mao ang mga espirituhanon nga mga kamatuoran nga mahibaloan lamang pinaagi sa pagpadayag” (Giya ngadto sa mga Kasulatan, “Mga Misteryo sa Diosscriptures.ChurchofJesusChrist.org,” ). Ikonsiderar ang pagdapit sa mga estudyante sa pagpakigbahin unsa nga panalangin ang labing gusto nila gikan sa saad ni Ammon ug ngano. Dayon hisgoti kon unsay buot ipasabot sa pagbuhat sa matag mga lihok aron makadawat sa maong mga panalangin.