Alma 23–29

Kinatibuk-ang Pagpasabot

Pinaagi sa mga pagtulun-an ni Ammon ug sa iyang mga igsoon nga lalaki, liboan ka mga Lamanite ang “nakabig ngadto sa Ginoo” ug “wala gayod mobiya” (Alma 23:6). Kini nga mga kinabig misagop sa ngalan nga mga Anti-Nephi-Lehi. Sa wala pa ang ilang pagkakabig, daghan sa mga Anti-Nephi-Lehi ang nakahimo og makasasala nga mga binuhatan. Sa dihang nasinati nila ang pagpasaylo sa Manluluwas, nadasig sila sa paglikay sa pagbalik niadto nga mga sala. Si Ammon ug ang iyang mga igsoong lalaki nalipay mahitungod sa ilang 14 ka tuig nga misyon, ug gusto nilang ipakigbahin ang ilang mga kasinatian.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

Alma 23

Katuyoan sa leksiyon: Ang katuyoan niini nga leksiyon mao ang pagtabang sa mga estudyante nga magtinguha nga mas hingpit nga makabig ngadto sa Ginoo ug makaila sa bisan unsang mga babag niana nga pagkakabig.

• Pagpangandam sa estudyante: Dapita ang mga estudyante sa pagtambong nga andam sa pagpakigbahin unsa sa ilang hunahuna ang gipasabot sa “makabig ngadto sa Ginoo” (Alma 23:6) ug nganong ang pagkakabig ngadto Kaniya mahinungdanon kaayo. Mahimo nilang tan-awon ang Giya ngadto sa mga Kasulatan ubos sa “Pagkakabig, Kinabig” kon nagkinahanglan sila og tabang.

• Hulagway: Usa ka hulagway sa Manluluwas

• Content nga ipakita: Ang mga pamahayag ni Elder David A. Bednar ug Elder DaleG. Renlund sa Korum sa Napulog Duha ka Apostoles mahitungod sa unsa ang mga hinagiban sa pagsukol

• Sugyot sa pagtudlo pinaagi sa videoconference: Ikonsiderar ang pagdapit og bag-ong kinabig sa pag-apil ngadto sa klase ug paghisgot mahitungod sa pipila ka “mga hinagiban sa pagsukol” nga kinahanglan nilang ibutang aron makasunod sa Manluluwas ug magpasakop sa Iyang Simbahan. Siguroa nga makadawat og pagtugot gikan sa imong koordinitor o administrador sa programa ug lokal nga mga lider sa pagkapari sa dili pa ipaabot ang pagdapit.

Alma 24

Katuyoan sa leksiyon: Kini nga leksiyon makatabang sa mga estudyante sa pagbuntog sa sala ug sa dili maayo nga mga batasan uban sa tabang sa Manluluwas.

• Pagpangandam sa estudyante: Dapita ang mga estudyante sa pagbasa sa Alma 24:7–16 ug motambong nga andam sa pagpakigbahin sa unsay ilang nakat-onan gikan sa mga Anti-Nephi-Lehi mahitungod sa Manluluwas, paghinulsol, ug pagpasaylo.

• Mga Bidyo: “Ang Gahom sa Basahon ni Mormon sa Pagkakabig” (9:01; tan-awa gikan sa time code 6:11 hangtod sa 8:12); “Walay Pagkapaling nga Pasalig ngadto kang Jesukristo” (13:52; tan-awa gikan sa time code 0:00 hangtod sa 1:39 ug gikan sa time code 12:45 hangtod sa 13:31)

• Sugyot sa pagtudlo pinaagi sa videoconference: Ikonsiderar ang pagbutang sa mga estudyante diha sa mga breakout room sa mga grupo nga tagtulo o tag-upat aron sa pagpangita sa mahinungdanon nga mga pulong ug mga hugpong sa mga pulong sa Alma 24:7–16. Dapita ang matag grupo sa pagpili og lider nga mopakigbahin sa klase sa mga pulong ug mga hugpong sa mga pulong nga napili sa grupo.

Alma 26

Katuyoan sa leksiyon: Kini nga leksiyon makatabang sa mga estudyante nga mobati og lawom nga pagpasalamat ug paghigugma alang sa Ginoo ug sa mga panalangin nga Iyang gihatag sa ilang mga kinabuhi.

• Pagpangandam sa estudyante: Mahimong basahon sa mga estudyante ang Alma 26:11–16 ug pamalandongan kon unsa sa ilang hunahuna ang gipasabot sa “maghimaya kita sa Ginoo.”

• Mga Hulagway: Pipila ka mga hulagway sa misyonaryo nga mga paningkamot ni Ammon

• Mga materyal alang sa mga estudyante: Usa ka blangko nga papel alang sa matag estudyante

• Sugyot sa pagtudlo pinaagi sa videoconference: Imbes nga hangyoon ang mga estudyante sa paghimo sa ilang tulo ka kolum sa usa ka panid sa papel, mahimo nimo silang hangyoon sa pagbuhat niini isip usa ka klase gamit ang whiteboard feature. Sa laing paagi, mahimo nimo silang tapukon sa mga breakout room ug hangyoa ang matag grupo sa paghimo sa tulo ka kolum sa usa ka digital nga dokumento. Kon ang mga estudyante magkauban og balik, ang matag grupo mahimong mopakigbahin sa ilang dokumento ngadto sa klase.

Alma 29

Katuyoan sa leksiyon: Kini nga leksiyon makatabang sa mga estudyante sa pagtimbang-timbang sa ilang mga tinguha ug ipahiuyon kini sa Ginoo.

• Pagpangandam sa estudyante: Ikonsiderar ang pagdapit sa mga estudyante sa pagbasa sa Alma 29:1–6 ug sa pagpamalandong unsay ilang nakat-onan mahitungod sa mga tinguha.

• Hulagway: Pagkakabig ni Alma nga Batan-on

• Content nga ipakita: Ang mga pangutana ug mga instruksiyon ubos sa “Ang kamahinungdanon sa mga tinguha,” gipakita diha sa pisara o sa nagkalain-laing mga dapit sa palibot sa lawak [room]

• Sugyot sa pagtudlo pinaagi sa videoconference: Sa sinugdanan sa leksiyon, kon dapiton ang mga estudyante sa paghunahuna kon unsay ilang pangandoyon, ikonsiderar ang pagdapit kanila sa paggahin og pipila ka minuto ug pagpangita og hulagway nga naghulagway kon unsay ilang pangandoyon. Mahimong magpuli-puli ang mga estudyante sa pagpakita ug pagpasabot bahin sa mga hulagway nga ilang gipili.

Rebyo 13 sa Doktrinal nga Kahanas

Katuyoan sa leksiyon: Kini nga leksiyon gituyo aron matabangan ang mga estudyante nga makit-an ang 12 ka tudling sa doktrinal nga kahanas sa kasulatan diha sa ikaduhang bahin sa Basahon ni Mormon.

• Pagpangandam sa estudyante: Dapita ang mga estudyante sa paghangyo sa mga higala o mga sakop sa pamilya sa pagpakita kanila og nagkalain-laing mga paagi sa pagmarka sa mga tudling sa kasulatan ug ngano.

• Handout: “Doktrinal nga Kahanas sa Basahon ni Mormon: Alma–Moroni”

• Sugyot sa pagtudlo pinaagi sa videoconference: Aron tugotan ang mga estudyante sa pagtrabaho uban sa mas daghan nilang mga klasmeyt samtang mangita sila sa 12 ka tudling sa doktrinal nga kahanas, ikonsiderar ang pagbutang sa mga estudyante sa nagkalain-laing mga breakout room alang sa matag tudling sa kasulatan. Sa sinugdanan sa matag hugna, mahimo kang mosugyot og nagkalain-laing mga pangutana nga mahimo nilang ipangutana sa ilang pares o grupo aron matabangan sila nga mas makaila sa usag usa.