“Alma 29: Ang mga Tinguha sa Atong mga Kasingkasing,” Manwal sa Magtutudlo sa Basahon ni Mormon (2024)
“Alma 29,” Manwal sa Magtutudlo sa Basahon ni Mormon
Alma 29
Ang mga Tinguha sa Atong mga Kasingkasing
Unsaon nimo pagkahibalo kon ang imong mga tinguha alang sa imong kinabuhi nahiuyon sa unsay gusto sa Ginoo alang kanimo? Ang Alma 29 nagrekord sa tinguha sa kasingkasing ni Alma ug sa iyang pagpamalandong kon ang iyang mga tinguha nahiuyon ba sa unsay gusto sa Dios alang kaniya. Kini nga leksiyon makatabang nimo sa pagtimbang-timbang sa imong kaugalingong mga tinguha ug sa pagpahiangay niini ngadto sa mga tinguha sa Ginoo.
Pagpalig-on sa hugot nga pagtuo diha ni Jesukristo. Kon mangandam sa pagtudlo, pangutan-a ang imong kaugalingon, “Sa tanang kamatuoran nga mahatagan og gibug-aton niini nga hugpong sa kasulatan [scripture block], hain ang mas makatabang sa akong mga estudyante nga mas maduol ngadto sa Langitnong Amahan ug sa Manluluwas?” Tinguhaa ang inspirasyon sa Espiritu Santo aron mas masabtan kon hain nga mga kamatuoran sa ebanghelyo ang labing makatuman niana nga katuyoan.
Pagpangandam sa estudyante: Ikonsiderar ang pagdapit sa mga estudyante sa pagbasa sa Alma 29:1–6 ug sa pagpamalandong unsay ilang nakat-onan mahitungod sa mga tinguha.
Posible nga mga Kalihokan sa Pagkat-on
Mga pangandoy alang sa akong kinabuhi
Ikonsiderar ang pagpakita og hulagway sa imong kaugalingon niadtong bata pa ka ug ipakigbahin ang imong mga tubag sa mosunod nga mga pangutana. Mahimo usab nimong dapiton ang pipila ka mga estudyante sa pagdala og mga hulagway sa ilang pagkabata ug sa pagtubag sa mga pangutana.
Sa laing bahin, sa daghang mga kultura adunay mga sugilanon o mga istorya diin ang usa ka tawo gipangutana kon unsa ang iyang pangandoy o gitinguha pag-ayo. Ang pipila ka mga pananglitan naglakip sa pag-wish ngadto sa usa ka bituon, paghangyo og mga wish gikan sa usa ka genie o engkantada [fairy], o paghimo og wish samtang naghuyop sa mga kandila sa adlawng natawhan. Mahimo nimong ipasabot ang usa niining pamilyar nga mga istorya ug mangutana, “Kon makahimo kamo sa pagtinguha [wish] sa usa sa inyong labing dako nga mga tinguha, unsa man kini?”
-
Sa bata ka pa, unsa ang pipila sa imong labing dako nga mga tinguha?
-
Karon nga dako na ka, sa unsang paagi nausab ang imong mga tinguha? Sa unsang paagi kaha mausab ang imong mga tinguha sa umaabot?
Sa usa ka bahin sa usa ka pahina diha sa imong journal sa pagtuon, isulat ang pipila sa imong mga tinguha alang sa imong kinabuhi. (Gamiton nimo ang pikas nga bahin unya sa leksiyon.)
-
Sa unsang paagi ang atong mga tinguha makaimpluwensiya sa atong mga kinabuhi?
Samtang kita motubo ug mohamtong diha sa ebanghelyo ug mas moduol ngadto sa Dios, pipila sa atong mga tinguha mahimong mausab ug mas mopahiangay sa unsay Iyang gusto alang kanato.
-
Unsaon nato pagkahibalo kon ang atong mga tinguha nahiuyon sa unsay gusto sa Ginoo alang kanato?
Samtang magtuon ka niini nga leksiyon, pamalandongi ang imong mga tinguha. Tan-awa aron ilhon ang mga tinguha nga nahiuyon sa Dios ug kadtong kinahanglan pa nga mohamtong o mabag-o.
Pagpahiuyon sa atong mga tinguha ngadto sa kabubut-on sa Ginoo
Sa Alma 29, girekord ni Alma ang usa sa iyang mga tinguha. Basaha ang Alma 29:1–2, mangita sa unsa ang iyang gihulagway.
-
Ngano nga si Alma nagtinguha nga mahimong anghel? Unsa ang masulti niana kanimo mahitungod kaniya?
-
Unsa ang imong nahibaloan mahitungod sa kagahapon ni Alma nga tingale nakapadasig sa iyang tinguha nga mahimong anghel? (tan-awa sa Mosiah 27:11–17).
Kon gikinahanglan, tabangi ang mga estudyante nga makasabot sa kasinatian ni Alma sa usa ka anghel nga narekord sa Mosiah 27. Usa ka paagi nga mahimo nimo kini mao ang pagpakita sa mosunod nga hulagway ug hangyoa ang mga estudyante sa pagpakigbahin sa unsay ilang nahinumdoman mahitungod sa asoy nga gipakita niini.
Ang pagsabot sa konteksto sa mga bersikulo makahatag kanato og dugang nga panabot. Sa mga kapitulo sa wala pa ang Alma 29, ang Ginoo misugo kang Ammon sa pagdala sa mga Anti-Nephi-Lehi aron mopuyo uban sa mga Nephite alang sa ilang proteksiyon (tan-awa sa Alma 27:4–12). Ang mga Nephite mihatag sa mga Anti-Nephi-Lehi sa yuta sa Jershon aron puy-an ug misaad sa pagpanalipod kanila. Ang daotan nga mga Lamanite misunod sa mga Anti-Nephi-Lehi ug misugod sa usa ka gubat. Ang mga Nephite nanalipod sa ilang mga kaugalingon ug sa ilang mga pamilya batok sa mga Lamanite. Isip resulta, “napulo ka kaliboan sa mga Lamanite ang gipamatay ug nagkatibulaag … ug dihay usa ka makalilisang nga pagpatay tali sa mga katawhan ni Nephi” (Alma 28:2–3).
-
Sa unsang paagi nga kini nga konteksto makatabang nimo nga makasabot nganong si Alma tingali gustong magmaisogon nga motawag sa mga tawo sa paghinulsol ug pugngan ang kasubo?
Basaha ang Alma 29:3–6, mangita sa unsay nasabtan ni Alma mahitungod sa mga tinguha.
Ikonsiderar ang pagpangutana sa mga estudyante kon unsay ilang nakat-onan. Mahimong mopakigbahin ang mga estudyante og nagkalain-laing mga leksiyon o mga baroganan. Kon dili kini hisgotan sa mga estudyante, hangyoa sila sa pagpamubo kon unsay gitudlo ni Alma sa bersikulo 4.
Usa ka baroganan nga tingali imong naila mao nga Ang Dios nagtugot kanato sa paghimo og mga pagpili base sa atong mga tinguha.
Ikonsiderar ang pagdapit sa mga estudyante sa pagmarka diha sa ilang mga kasulatan sa mahinungdanon nga mga pulong o mga hugpong sa mga pulong diha sa bersikulo 4 nga nagpaila niini nga kamatuoran.
-
Ngano nga kini nga baroganan mahinungdanon nga atong masabtan?
Aron matabangan ka nga itandi ang imong mga tinguha ngadto sa mga tinguha sa Ginoo, ilista sa pikas nga bahin sa pahina diha sa imong journal sa pagtuon kon unsay gitinguha sa Ginoo alang sa Iyang mga anak. Mahimo nimong basahon ang pipila sa mosunod nga mga tudling aron mahimo kini nga lista:
Dapita ang mga estudyante sa pagpakigbahin sa unsay ilang gisulat. Pipila ka mga ehemplo mao nga aron kita maminaw ug makaila sa Manluluwas (tan-awa sa Mateo 17:5; Juan 17:3; 3 Nephi 11:3–7), mapakita ang atong pagkamasulundon (tan-awa sa Abraham 3:25), mobuhat sa Iyang buhat (tan-awa sa Doktrina ug mga Pakigsaad 6:6), mohigugma sa uban (tan-awa sa Leviticus 19:18; Mateo 22:37–40), magminyo ug magbaton og mga pamilya (tan-awa sa Doktrina ug mga Pakigsaad 131:1–4; Genesis 1:22), mobati og kalipay (tan-awa sa 2 Nephi 2:25), ug makapanunod sa kinabuhing dayon uban Kaniya (tan-awa sa Moises 1:39).
Tan-awa ang duha ka kilid sa imong panid. Matikdi nga ang Ginoo gusto nga atong isentro ang atong mga tinguha sa paghigugma ug pag-alagad Kaniya ug sa atong isigkatawo. Pamalandongi kon unsa ka maayo nga napahiuyon ang imong mga tinguha ngadto sa tinguha sa Dios alang kanimo.
Bisan og ang iyang tinguha sa pagpaambit sa ebanghelyo maayo, si Alma nakaamgo nga ang pagtinguha sa pagpaambit sa ebanghelyo sama sa usa ka anghel ngadto sa tibuok kalibotan dili hingpit nga mopahiangay kon asa ug giunsa siya sa pagtawag sa Dios sa pag-alagad. Ikonsiderar ang paglinya [underlining] sa bisan unsa nga mga hugpong sa mga pulong diha sa Alma 29:3–6 nga nagpakita nga gusto ni Alma nga ipahiuyon ang iyang mga tinguha sa kabubut-on sa Dios.
-
Unsa sa imong hunahuna ang gipasabot sa pagkakontento sa unsay gigahin sa Ginoo kanato?
-
Ngano, sama ni Alma, sa imong hunahuna kinahanglan natong tinguhaon nga ipahiuyon ang atong mga tinguha ngadto sa Ginoo?
-
Unsaon nato pagpahiuyon ang atong mga tinguha sa kabubut-on sa Dios kon makadawat kita og calling sa pag-alagad sa paagi nga dili sa atong kaugalingong gusto?
Sa kaulahian sa kapitulo, si Alma mipasabot nga siya dili kinahanglan nga mahimong anghel aron mamulong sa tibuok yuta tungod kay ang Dios motudlo sa tanang kanasoran sa Iyang kaalam ug panahon (tan-awa sa Alma 29:7–8). Basaha ang Alma 29:9, 13, mangita sa unsay gihimaya ni Alma ug unsay iyang gibati samtang iyang gipahiuyon ang iyang mga tinguha ngadto sa Dios.
Ang kamahinungdanon sa mga tinguha
Hatagi og kahigayonan ang mga estudyante sa pagpalawom sa ilang pagsabot mahitungod sa mga tinguha. Mahimo nimong ipakita ang mosunod nga mga pangutana ug instruksiyon sa palibot sa lawak-tunghaan. Mahimong magpundok ang mga estudyante duol sa pangutana nga interesado sila nga makat-onan, sundon ang mga instruksiyon, ug hisgotan ang mga tubag nga ilang napalgan sa pangutana diha sa gagmay nga mga grupo. Mahimo kining sublion aron ang mga estudyante makatuon og labaw pa sa usa ka pangutana.
Unsaon nako pagpalambo sa akong tinguha sa pagsunod sa Ginoo?
Samtang namalandong ka niini nga pangutana, mahimong makatabang ang paghunahuna og mga ehemplo sa mga tawo nga nakabig ngadto sa Ginoo. Ang pipila ka mga tawo nga mahimo nimong tun-an mao sila si Enos (tan-awa sa Enos 1:1–7), ang katawhan ni Hari Benjamin (tan-awa sa Mosiah 5:1–5), ug Hari Lamoni (tan-awa sa Alma 22:15–16).
Unsa ang kinahanglan nakong tinguhaon sa akong kinabuhi?
Samtang magtinguha ka og pagpadayag niini nga pangutana, tun-i ang mga ehemplo sa unsay gitinguha sa uban o unsay gilaoman sa Ginoo nga ilang tinguhaon (tan-awa sa Mga Taga-Roma [Romans] 10:1; 3 Nephi 19:7–9; Doktrina ug mga Pakigsaad 6:6–8).
Unsa pa ang gitudlo sa mga kasulatan mahitungod sa atong mga tinguha?
Mahimong mapuslanon ang pagtuon sa “Tinguha” diha sa Gospel Library app. O basaha ang pipila sa mosunod nga mga bersikulo: Salmo 37:4; Mga Panultihon [Proverb] 10:24; Enos 1:12; Alma 41:5; Doktrina ug mga Pakigsaad 18:38; 137:9.
Dapita ang mga estudyante sa pagpakigbahin kon unsay ilang nakat-onan. Ikonsiderar ang pagpangutana kon aduna bay mga estudyante nga adunay pangutana nga gusto nilang tabangan sa klase. Sa magkauban, pangita og mga kasulatan ug ipakigbahin ang mga kasinatian ug mga pagpamatuod nga makatabang sa pagtubag sa bisan unsang mga pangutana nga ipangutana.
Paggahin og mubo kaayong panahon sa pagpamalandong kon sa unsang paagi kini nga leksiyon magamit nimo. Isulat diha sa imong journal sa pagtuon kon unsay imong mahimo sa paglig-on sa imong matarong nga mga tinguha ug pagtinguha sa tabang sa Ginoo nga mapahiuyon ang bisan unsa pang mga tinguha ngadto sa Iyang kabubut-on.