Alma 4

Ang Babag nga Garbo

Alma nga Batan-on nagsangyaw sa Gideon

Ang garbo mao ang pagkadili mapainubsanon ug naggiya sa mga katawhan sa pagbutang sa ilang kaugalingon nga labaw o pagbatok sa usag usa ug ngadto sa Dios (tan-awa sa Giya ngadto sa mga Kasulatan, “Garbo,” scriptures.ChurchofJesusChrist.org). Hunahunaa ang garbo nga imong nakita sa kalibotan karon ug ang negatibong mga epekto niini diha kanimo ug niadtong naglibot kanimo. Ang garbo ug panagbingkil nga gipakita sa pipila ka mga miyembro sa Simbahan sa Manluluwas sa panahon ni Alma nakapapakyas sa Simbahan sa pag-uswag niini. Isip resulta, nadasig si Alma sa pagkanaog [resign] isip labaw nga maghuhukom aron ihalad ang iyang kaugalingon sa pagsangyaw sa pulong sa Dios. Kini nga leksiyon makatabang kanimo sa paggamit sa pulong sa Dios sa pagbuntog sa garbo ug panagbingkil.

Tabangi ang mga estudyante nga makadiskobre sa doktrina ug mga baroganan sa ebanghelyo.Ang doktrina ug mga baroganan kinahanglang ipahayag nga klaro ug laktod nga paagi. Makatudlo kini sa mga estudyante sa kamahinungdanon sa mga kasulatan ug sa unsang paagi magamit ang mga istorya ug mga pagtulun-an sa kasulatan sa ilang inadlaw-adlaw nga mga kinabuhi. Ang pagsabot sa doktrina ug mga baroganan makadasig sa mga estudyante sa pagkat-on ug paggamit sa mga pagtulun-an sa ebanghelyo.

Pagpangandam sa estudyante: Dapita ang mga estudyante sa pagtambong nga andam sa pagpakigbahin og kasulatan o pamahayag gikan sa usa ka lider sa Simbahan mahitungod sa pagkamapainubsanon.

Mga Posibleng Kalihokan sa Pagkat-on

Usa ka babag

Diha sa salog sa pultahan sa klase, i-tape ang usa ka piraso sa papel nga adunay pulong nga “babag” nga gisulat niini. Pangutan-a kon pila ka mga estudyante ang wala tuyoa nga nakatunob niini sa wala pa sila makamatikod nga anaa kini didto sa dihang sila misulod sa klase. Kon gitinguha, mahimo usab nga mopakigbahin ang mga estudyante og mga kasinatian sa usa ka higayon nga sila nasapid o napandol.

Hinumdomi ang usa ka higayon nga ikaw nasapid o napandol. Nahinumdom ka ba unsa ang hinungdan sa imong pagkasapid? Sa kinabuhi, usahay masapid kita sa mga butang nga matawag nga “mga babag.” Kini tinuod usab sa espirituhanong paagi.

Ang mosunod nga gisugyot nga pagbansay sa pagdrowing mahimong himoon isip usa ka klase diha sa pisara. O mahimong kompletohon kini sa mga estudyante nga magtagsa-tagsa.

hulagway sa mga bloke

Pagdrowing og pipila ka mga bloke ug sulati kini og mga butang nga mahimong hinungdan nga ang kabatan-onan mapandol sa espirituhanong paagi. Pananglitan, ang uban tingali maglisod sa pagpatalinghog ngadto sa propeta o pagsunod sa Pulong sa Kaalam.

Hunahunaa ang mga sangpotanan sa pagkapandol niini nga mga butanga. Pamalandongi kon nganong nagkinahanglan ka sa tabang sa Dios aron makamatikod, makalikay, ug makabuntog niini nga mga babag.

Ang katawhan ni Alma bag-o lang nakasinati og dakong kapildihan sa gubat batok sa mga Lamanite. Tungod sa ilang mga kasakit, sila “nahigmata sa usa ka panumduman sa ilang katungdanan,” ug daghang mga katawhan ang gibunyagan (tan-awa sa Alma 4:1–5). Apan, ang ilang kalinaw wala magdugay tungod kay sila nagsugod sa pagkapandol sa espirituhanong paagi.

Basaha ang Alma 4:6–8, mangita kon nganong nabalaka ang mga lider sa Simbahan.

Dapita ang mga estudyante sa pagpakigbahin sa unsay ilang napalgan ug tabangi sila nga makakita nga ang garbo mahimong usa ka espirituhanong babag.

• Ngano sa imong hunahuna nga ang mga lider sa Simbahan “naguol kaayo” (Alma 4:7) tungod sa nagkadako nga garbo sa mga katawhan?

Si Presidente Ezra Taft Benson (1899–1994) mitudlo:

Presidente Ezra Taft Benson

Ang garbo mao ang dakong babag sa Zion. Akong balikon: ang garbo mao ang dakong babag sa Zion. (Ezra Taft Benson, “Beware of Pride,” Ensign, Mayo 1989, 7)

Pagdrowing og dako nga bloke nga nagrepresentar sa babag nga garbo. Diha sa bloke, ilista ang mga tubag sa mosunod nga mga pangutana:

• Sa imong hunahuna sa unsang paagi ang garbo maoy hinungdan sa usa ka tawo nga mapandol sa espirituhanong paagi?

• Sa unsang mga paagi nga ang garbo makapugong kanato nga mahimong mas mahisama sa Manluluwas?

Samtang magpadayon ka sa pagtuon sa Alma 4, hunahunaa kon sa unsang paagi ang garbo mahimong babag kanimo ug unsay imong mahimo aron mabuntog kini.

Basaha ang Alma 4:8–12, mangita sa mga epekto sa garbo diha sa Simbahan. Timan-i nga ang panagbangi nagpasabot og kasuko o mapait nga panagsumpaki o panagbingkil. Ang dautan og tuyo mao ang tinguha sa pagbuhat ug dautan, o dautang kabubut-on.

Dapita ang mga estudyante sa paglista diha sa pisara sa mga epekto sa garbo diha sa Simbahan. Ang lista ipakita ra unya sa leksiyon. Kon duna kay igong mga gamit sa pagsulat, tugoti ang pipila ka mga estudyante nga dungan nga moduol diha sa pisara. Dayon dapita ang mga estudyante sa pagtubag sa mosunod nga mga pangutana:

• Unsa ang mga epekto sa garbo diha sa Simbahan?

• Sa unsang mga paagi nga kini nga mga lihok dili angay sa mga miyembro sa Simbahan sa Manluluwas?

• Sa unsang paagi nga kadtong dili sakop sa Simbahan naapektohan?

Paglikay sa garbo ug panagbingkil

Si Presidente Ezra Taft Benson mitudlo:

Presidente Ezra Taft Benson

Ang panagang sa garbo mao ang pagkamapainubsanon”—pagkamaaghop, pagkamanunuton [tan-awa sa Alma 7:23]. (Ezra Taft Benson, “Beware of Pride,” Ensign, Mayo 1989, 6)

Basaha ang Alma 4:13–14, mangita sa unsay gibuhat sa pipila ka mga miyembro sa Simbahan aron malikayan ang garbo ug magpabiling matinud-anon.

Dapita ang mga estudyante sa pagsulat sa mapaubsanon nga mga lihok sa mga miyembro sa Simbahan diha sa pisara.

• Unsa nga mga lihok ug mga kinaiya diha sa mga bersikulo 13–14 ang nagpahinumdom kanimo ni Jesukristo?

• Sa unsang paagi nga ang pagpalambo niini nga mga kinaiya ug paghimo niini nga mga lihok makatabang kanato nga mahimong mas mahisama Kaniya?

• Sa unsang paagi nimo nakita ang uban nga nagpuyo niining Kristohanong mga kinaiya o mga lihok, ug sa unsang paagi kana nakaapekto kanimo?

Hatagi og panahon ang mga estudyante sa hilom nga pagpamalandong sa bisan unsang garbo o panagbingkil nga anaa sa ilang mga kinabuhi ug unsaon nila pagsunod ang ehemplo sa Manluluwas.

Determinado si Alma nga kinahanglan niyang igahin ang iyang panahon sa pagtabang sa mga katawhan sa espirituhanong paagi. Iyang gitugyan ang hukmanan ngadto kang Nephihah samtang pabiling naghupot sa katungdanan sa high priest sa iyang kaugalingon (tan-awa sa Alma 4:15–18).

Basaha ang Alma 4:19 ug pangitaa kon unsay nahibaloan ni Alma nga “makapakunhod” sa garbo ug panagbingkil taliwala sa mga katawhan. Mahimo usab nimong tan-awon ang “Si Alma Nagsangyaw sa Pulong sa Dios” gikan sa time code 0:36 hangtod sa 1:59, anaa sa https://www.churchofjesuschrist.org/study/video/alma-4-7/2020-03-0400-alma-preaches-the-word-of-god-alma-4-7-1080p?lang=ceb ChurchofJesusChrist.org.

• Sa unsang mga paagi si Alma milihok sama ni Jesukristo?

• Unsa ang atong makat-onan gikan sa ehemplo ni Alma?

Usa ka kamatuoran gikan sa Alma 4:19 mao ang pulong sa Dios ug ang pagpaminaw sa lunsay nga pagpamatuod makatabang kanato sa pagbuntog sa garbo ug panagbingkil.

Pangitaa kon unsay gitudlo ni Presidente Ezra Taft Benson mahitungod sa pulong sa Dios sa mosunod nga pamahayag.

Presidente Ezra Taft Benson

Ang pulong sa Dios, ingon nga makaplagan diha sa mga kasulatan, sa mga pulong sa buhing mga propeta, ug sa personal nga pagpadayag, adunay gahom sa paglig-on sa mga Santos ug pagsangkap kanila sa Espiritu aron sila makasagubang sa dautan, makagunit og hugot ngadto sa maayo, ug makakaplag og hingpit nga kalipay dinhi niini nga kinabuhi. (Ezra Taft Benson, “The Power of the Word,” Ensign, Mayo 1986, 80)

• Sa unsang mga paagi nga ang pulong sa Dios ug ang paghatag og lunsay nga pagpamatuod makatabang sa pagkunhod sa garbo ug panagbingkil?

Dapita ang mga estudyante sa pagpili og duha o tulo ka epekto sa garbo nga ilang gilista diha sa pisara sa sayo pa, ug hatagi sila og panahon sa pagtuon kon unsaon pagbuntog niadtong mga problema diha sa gagmay nga mga grupo.

Mahimong pangitaon sa mga estudyante ang mga hilisgotanan sama sa “Pagkamapainubsanon” diha sa Giya ngadto sa mga Kasulatan. Mahimo usab nga makatabang ang pagpakita kanila kon unsaon pagpangita diha sa Gospel Library app aron makakita og impormasyon.

Dapita ang mga grupo sa pagpakigbahin sa unsay ilang nakat-onan ngadto sa klase, lakip na ang mga paagi nga kita makatagad sa uban nga mas sama sa buhaton sa Manluluwas. Sa laing paagi, human sa pagtuon, mahimo silang magsulat og mubo nga pakigpulong nga nagtubag sa mga problema sa garbo ug panagbingkil.

Dasiga ang mga estudyante sa pagbuhat sa bisan unsa nga mga impresyon nga ilang nadawat kon unsaon nila paggamit sa unsay ilang nakat-onan niini nga leksiyon.

• Paglista og duha o tulo ka problema nga resulta sa garbo ug panagbingkil.

• Paglista og mga kasulatan ug mga pagtulun-an sa modernong mga propeta nga imong gibati nga makatabang niini nga mga problema.

• Ilha kon ngano o sa unsang paagi ang mga butang nga imong gilista makatabang kanimo sa pagtagad sa uban sama sa buhaton sa Manluluwas.

Tinguhaa nga makamatikod ug makaila sa mga pag-aghat gikan sa Espiritu Santo kon unsaon nimo paggamit ang imong nakat-onan niini nga leksiyon. Pangita og mga kahigayonan sa pagsunod niadtong mga impresyon.

Komentaryo ug Background nga Impormasyon

Alma 4:8. Sa unsang mga paagi kita usahay nagbiay-biay o nagtamay sa usag usa?

Si Presidente Dallin H. Oaks sa Unang Kapangulohan mipasabot:

Presidente Dallin H. Oaks

Daghang mga magtutudlo sa simbahan ug sa eskwelahan ang nasubo sa ubang mga tin-edyer, lakip na sa LDS nga kabatan-onan, kon giunsa nila pagtagad ang usag usa. Ang sugo sa paghigugmaay sa usag usa naglakip gayod sa paghigugma ug pagrespeto sa laing relihiyon ug sa kaliwat, kultura, o ekonomikanhong mga kahimtang. Mohagit kami sa tanang mga batan-on sa dili pagpamugal-bugal, panginsulto, o pagpamulong ug mga binuhatan nga makapasakit sa uban. Kining tanan supak sa sugo sa Manluluwas sa paghigugmaay sa usag usa. (Dallin H. Oaks, “Paghigugma sa Uban ug Pagpakabuhi nga may mga Panaglahi,” Liahona, Nob. 2014, 27)

Tan-awa ang “Mga Kasingkasing nga Nabugkos,” gikan sa time code 7:03 hangtod sa 8:15 aron makita si Elder Gary E. Stevenson sa Korum sa Napulog Duha ka Apostoles nga mipakigbahin og tambag mahitungod sa pagtagad sa uban nga adunay gugma ug pagtahod.

Alma 4:10. Sa unsang paagi nga ang Simbahan “misugod sa pagkapakyas sa iyang pag-uswag” isip resulta sa garbo?

Si Presidente Dallin H. Oaks sa Unang Kapangulohan mipasabot:

Presidente Dallin H. Oaks

Ang Basahon ni Mormon naghisgot sa usa ka panahon sa dihang ang Simbahan sa Dios “misugod sa pagkapakyas sa iyang pag-uswag” (Alma 4:10) tungod kay “ang mga katawhan sa simbahan misugod sa … pagpahimutang sa ilang mga kasingkasing diha sa mga katigayonan ug diha sa kawang nga mga butang sa kalibotan” (Alma 4:8). Bisan kinsa nga adunay kaabunda sa materyal nga mga butang anaa sa peligro nga espirituhanong “madani” sa mga bahandi ug ubang mga butang sa kalibotan. (Dallin H. Oaks, “Ang Sambingay sa Magpupugas,” Liahona, Mayo 2015, 34)

Si Elder Quentin L. Cook sa Napulog Duha ka Apostoles mitudlo:

Elder Quentin L. Cook

Tungod sa makapadasig nga doktrina sa Pagpahiuli, ang mga miyembro naglipay sa ebanghelyo ug nakakita sa hingpit nga kalipay ug katagbaw diha sa Simbahan. Kita pagatan-awon nga maayo kaayo kon kita mopuyo sa mga pagtulun-an sa gipahiuli nga ebanghelyo ni Jesukristo. Kon ang mga miyembro dili mopuyo sa mga pagtulun-an, kini mahimong usa ka babag niadto kinsa dili miyembro sa Simbahan (Alma 4:10). (Quentin L. Cook, “Ang Plano sa Atong Amahan—Paigo alang sa Iyang Tanang mga Anak,” Liahona, Mayo 2009, 35)

Nganong makadaot kaayo ang garbo?

Si Elder Gary E. Stevenson sa Korum sa Napulog Duha ka Apostoles mipakigbahin sa mosunod:

Elder Gary E. Stevenson

Kon mapagarbuhon, hilig nato ang pagpasidungog sa atong mga kaugalingon kay sa ihatag kini ngadto sa uban, lakip ang Ginoo. Ang garbo sa kasagaran makigkompetensya; kini may purohan sa pagpaningkamot aron makaangkon og mas daghan pa ug maghunahuna nga mas maayo pa kita kay sa uban. Ang garbo sa kasagaran moresulta sa mga pagbati nga kasuko ug kasilag; makahimo kini sa usa ka tawo sa pagbaton og kasuko o sa pagpugong sa pagpasaylo. (Gary E. Stevenson, “Espiritwal nga Eklipse,” Liahona, Nob. 2017, 47)

Dugang nga mga Kalihokan sa Pagkat-on

Maayo ug dili maayo nga mga ehemplo

Kon makaayo sa mga estudyante ang usa ka paghulagway sa positibo ug negatibo nga ehemplo sa impluwensiya sa mga miyembro sa Simbahan ngadto sa uban, ikonsiderar ang pagbasa sa pakigpulong ni Presidente Gordon B. Hinckley (1910–2008) nga “Ang Panginahanglan sa Mas Labaw nga Pagkamabination.”

Pagsusi unsaon pagbatok sa mga epekto sa garbo

Kon ang mga estudyante makabenepisyo sa pagtinabangay sa pagtiwas og usa ka senaryo diin ang garbo mahimong usa ka kabalaka, mahimo nimong ipakigbahin ang mosunod nga senaryo ug ipabuhat sa mga estudyante ang duha ka bersiyon sa nahabilin nga istorya. Mahimo kini isip usa ka klase. Ang usa ka bersiyon mahimo nga ang mga pagpili sa batan-ong lalaki mosangpot sa iyang pagkapandol tungod sa garbo. Ang laing usa mahimong kon giunsa paggamit sa batan-ong lalaki ang pulong sa Dios aron magpabiling mapainubsanon.

“Si Raul usa ka talagsaon nga batan-on nga lalaki. Samtang nagtungha pa sa hayskul, gikuha siya alang sa usa ka talagsaon nga trabaho nga nagsuhol kaniya og labing menos doble sa kasagaran nga suhol sa sama sa iyang edad.”

Ikomparar ug itandi

Dapita ang mga estudyante sa pagpakigbahin sa mga pagkaparehas ug mga kalainan tali sa grupo sa mga tawo nga gihulagway sa Alma 1:19–24 ug niadtong gihulagway sa Alma 1:25–31. Buhata ang sama ingon niadtong gihulagway diha sa Alma 4:1–5 ug niadtong sa Alma 4:6–10. Dapita ang mga estudyante sa pagpakigbahin sa Kristohanong mga hiyas nga mapalgan niini nga mga tudling ug unsaon nato pagsunod niini nga mga ehemplo aron mahimong mas mahisama sa Langitnong Amahan ug ni Jesukristo ug mahimong mas maayong mga disipulo.

Alma 4:19. Ang gahom sa lunsay nga pagpamatuod

Dapita ang mga estudyante sa pagpakigbahin og mga ehemplo kon sa unsang paagi ang ilang pagpamatuod ni Kristo naimpluwensiyahan sa mga pagpamatuod sa uban, ug awhaga sila sa pagpangita og mga kahigayonan sa pagpakigbahin sa ilang mga pagpamatuod ngadto sa uban aron sa pag-impluwensiya kanila alang sa kaayohan.