“Alma 2–3: Kinsa ang Atong Pilion nga Sundon,” Manwal sa Magtutudlo sa Basahon ni Mormon (2024)
“Alma 2–3,” Manwal sa Magtutudlo sa Basahon ni Mormon
Alma 2–3
Kinsa ang Atong Pilion nga Sundon
Sa tibuok kasulatan, ang mga propeta padayon nga nagpasidaan kanato nga atong atubangon ang mga sangpotanan sa atong mga binuhatan, base sa kang kinsa atong pilion nga sundon. Sama pananglit, human sa panagsumpaki tali sa mga Nephite ug mga Amlicite, ang propeta nga si Mormon mitudlo nga kadtong nangamatay “makaani sa kalipay nga walay kataposan o pagkauyamot nga walay kataposan, sumala sa espiritu diin sila mipili sa pagsunod, kon kini usa ka maayo nga espiritu o usa ka dautan” (Alma 3:26). Kini nga leksiyon makatabang nimo nga mas masabtan ang mga sangpotanan kon kinsa ang imong gipili nga sundon niining kinabuhia.
Pangandam nga adunay Tumong sa hunahuna.Paggahin og panahon sa pagkonsiderar kon unsay masinati sa mga estudyante sa klase nga makatabang nila nga “makasabot ug makasalig sa mga pagtulun-an ug Pag-ula ni Jesukristo.” Si Presidente Russell M. Nelson midasig sa mga magtutudlo sa “paghinumdom niana nga katuyoan kada adlaw sa dili pa nimo tudloan ang imong mga estudyante” (“Teaching Youth in the Day of the Wave” [Seminaries and Institutes of Religion satellite broadcast], Agosto 6, 2013).
Pagpangandam sa estudyante: Dapita ang mga estudyante sa pagbasa o pagpaminaw sa Alma 2–3 sa dili pa motambong sa klase. Ipahunahuna nila kon unsa ang ilang makat-onan gikan sa asoy niini nga mga kapitulo.
Mga Posibleng Kalihokan sa Pagkat-on
Unsa man ang mensahe sa istorya?
Ikonsiderar ang pagdapit sa mga estudyante sa paghunahuna og mga istorya o mga sugilanon nga kasagarang karakter mga hayop [fables] nga nagtudlo og mga leksiyon ug dapita sila sa pagpakigbahin niini sa klase. Kon gikinahanglan, mahimo nimong gamiton ang mosunod nga ehemplo. Kon pamilyar ang mga estudyante sa ehemplo, ikonsiderar ang pagdapit kanila sa pagsaysay sa istorya sa ilang kaugalingong mga pulong ug pag-ila sa mensahe o leksiyon. Makatabang kini sa mga estudyante sa pag-ila sa mga baroganan nga gusto ni Mormon nga atong makat-onan gikan sa iyang mga sinulat.
-
Makahunahuna ka ba og usa ka istorya o sugilanon nga kasagarang karakter mga hayop nga nagtudlo og leksiyon sa kinabuhi?
Usa ka klasiko nga sugilanon nga gitampo sa usa ka karaang Griyego nga magsusugid nga ginganlan og Aesop mao ang “The Boy Who Cried Wolf [Ang Bata nga Lalaki nga Misinggit og Lobo].” Ang istorya nag-asoy sa usa ka batang lalaki nga magbalantay sa karnero nga kaduha nanglimbong sa iyang mga silingan sa pagtuo nga usa ka lobo miatake sa panon sa mga karnero sa baryo. Sa hilabihang kalingaw sa batang lalaki, daghang mga tagabaryo ang nagdali sa pagtanyag og tabang, nga ila lamang nahibaloan nga wala diay lobo. Sa kataposan, usa ka tinuod nga lobo ang miatake sa panon. Apan sa dihang misinggit ang batang lalaki sa ikatulong higayon, walay usa nga miabot aron motabang kaniya.
-
Unsa ang mensahe o leksiyon nga atong makat-onan gikan niini nga istorya?
Pangita og mga kahigayonan sa tibuok nimong pagtuon sa Basahon ni Mormon aron sa pagtabang sa mga estudyante nga makahibalo ug makaila sa mga baroganan ug mga leksiyon nga gihatagan og gibug-aton [highlight] ni propeta Mormon.
Sama nga ang mga istorya o mga sugilanon sa kasagaran adunay mensahe, ang mga kasulatan usab nagtudlo og mga leksiyon ug naghulagway sa mga baroganan. Usa sa makatabang nga kahanas sa pagtuon sa kasulatan kon imong tun-an ang Basahon ni Mormon mao ang pagmatikod sa higayon nga si Mormon klarong mipahayag sa iyang katuyoan sa paglakip sa pipila ka mga asoy diha sa rekord. Kanunay siyang mogamit og mga hugpong sa mga pulong sama sa “Ug sa ingon kita sa yano makasabot,” “sa ingon kita makakita,” “sa pagkatinuod, sa pagkatinuod,” o “tan-awa,” aron sa pagpahibalo kanato nga siya nagpakigbahin og mga baroganan ug mga leksiyon kanato (tan-awa sa Alma 24:30; 30:60; 48:17; 62:41; Helaman 3:27–28). Ang pag-ila sa mga leksiyon ug kamatuoran nga gihatag og gibug-aton ni Mormon makatabang nimo sa pagpangita og personal nga kalambigitan. Makadugang usab kini sa pagkaepektibo sa imong pagtuon sa kasulatan.
Basaha ang Alma 3:26–27, mangita sa kamatuoran nga gusto ni Mormon nga atong makat-onan gikan sa asoy sa Alma 2–3. Ikonsiderar ang pagmarka sa imong makit-an.
-
Unsay imong nadiskobrehan?
Ikonsiderar ang pagpakigbahin sa mosunod nga impormasyon kon ang mga estudyante nagkinahanglan og tabang sa pagsabot sa mga kamatuoran nga gitudlo diha sa Alma 3:26–27.
Aron matabangan ka nga mas makasabot niini nga tudling, timan-i nga ang mga pulong nga “matag tawo modawat og suhol gikan kaniya kinsa siya mipili sa pagsunod” nagdapit kanato sa paghunahuna nga kita mga empleyado kansang mga pagpili motino kon ang atong amo mao ang Langitnong Amahan o si Satanas (tan-awa sa Alma 3:27). Busa, kadtong kinsa mopili ni Satanas sa dili madugay makakita sa ilang mga kaugalingon nga gigamit niya ug makadawat sa “pagkauyamot nga walay katapusan” (Alma 3:26). Sa kataposan ang atong mga pagpili sa kinabuhi mopadayag kon kinsa ang atong gipili isip atong walay kataposan nga amo.
Mahimong makatabang ang pagsulat sa mosunod nga kamatuoran diha sa pisara aron ang mga estudyante makakita niini sa tibuok leksiyon.
Usa ka posible nga kamatuoran gikan sa Alma 3:26–27 mao nga kinsa atong pilion nga sundon niini nga kinabuhi nagtino sa atong kalipay nga walay kataposan o pagkauyamot.
Hunahunaa ang imong kinabuhi ug kinsa ang imong gipili nga sundon. Naningkamot ka ba sa pagsunod ni Jesukristo? O nagsunod ka ba sa lain? Pamalandongi kini nga mga pangutana samtang magpadayon ka sa imong pagtuon karon.
Amlici nagtinguha nga mahimo nga hari
Atol sa unang mga tuig sa pagmando sa mga maghuhukom, si Alma ug ang iyang mga katawhan nag-atubang og lisod nga pagsulay sa ilang hugot nga pagtuo ug kalipay.
Basaha ang Alma 2:1–12, mangita sa pagsulay nga giatubang sa mga Nephite.
Ikonsiderar ang paglakip sa sugyot mahitungod sa kagawasan sa tinuohan diha sa seksiyon sa Dugang nga mga Kalihokan sa Pagkat-on niini nga bahin sa leksiyon.
-
Unsa ang tuyo ni Amlici nga buhaton kon siya mahimong hari? (Tan-awa sa bersikulo 4.)
-
Giunsa pagsanong sa mga Nephite?
-
Giunsa pagpakita sa mga Nephite ang ilang tinguha sa pagsunod sa Manluluwas?
Mga pagpili ug mga sangpotanan
Tabangi ang mga estudyante sa pagpangita ug pagpakigbahin og lain-laing mga sangpotanan sa pagsunod sa Dios o sa yawa. Usa ka paagi sa pagbuhat niini mao ang pagkopya sa mosunod nga tsart diha sa pisara ug ipatubag kini sa mga estudyante. Laing kapilian mao ang pag-andam og pipila ka gagmay nga mga piraso sa papel sa dili pa magklase aron magrepresentar sa kwarta o “suhol” (Alma 3:27). Dayon pagdala og duha ka bulsita nga ginama sa papel o mga kahon, ug sulati ang usa og “Pagsunod sa Dios” ug ang lain “Pagsunod sa yawa o sa iyang mga sulugoon.” Hatagi ang matag estudyante og labing menos usa ka piraso sa papel ug ipabasa sa katunga sa klase ang matag usa sa mga bloke nga kasulatan nga gilista sa ubos. Samtang makadiskobre ang mga estudyante sa nagkalain-laing mga suhol gikan sa matag asoy, dapita sila sa pagsulat niini sa ilang mga piraso sa papel ug ibutang ang ilang suhol sa angay nga sudlanan. Kon mahuman na ang mga estudyante, basaha og kusog ang pipila sa mga suhol. Ikonsiderar ang pagdapit sa mga estudyante sa pagpakigbahin og dugang nga mga suhol gikan sa pagsunod sa Dios nga ilang namatikdan sa ilang kaugalingong mga kinabuhi o sa mga kinabuhi sa uban.
Kopyaha ang mosunod nga tsart diha sa imong journal sa pagtuon. Basaha ang mosunod nga mga bersikulo, ug ilista kon unsa nga “suhol” ang moabot gikan sa pagsunod sa Dios o sa yawa diha sa tukma nga kolum.
“Ang suhol gikan kaniya kinsa siya mipili sa pagsunod” (Alma 3:27)
|
Pagsunod sa Dios |
Pagsunod sa yawa o sa iyang mga sulugoon |
|---|---|
Alma 2:16–18, 26–31 (Alma ug ang mga Nephite)
Alma 3:4, 13–14, 18–19 (ang mga Amlicite)
-
Unsay imong namatikdan niining duha ka asoy?
Timan-i: Ang tunglo nga parehong nasinati sa mga Amlicite ug Lamanite mao ang pagkahimulag gikan sa Dios tungod sa ilang pagsukol ug pagkamasinupakon (tan-awa sa 2 Nephi 5:20–21). Ang timaan, nga niana nga panahon nailhan ang mga Lamanite gikan sa mga Nephite, mao nga “ang mga panit sa mga Lamanite mga itom” (Alma 3:6). Importante nga hinumdoman nga ang matang ug dagway niini nga timaan wala pa hingpit nga masabti. Ang mga propeta sa Basahon ni Mormon ug ang mga propeta sa modernong panahon mitudlo nga sayop ang pagbiay-biay o pagtamay sa mga tawo tungod sa kolor sa ilang panit (tan-awa sa Jacob 3:9).
Depende sa mga abilidad sa imong mga estudyante, imbes nga ihatag ang sunod nga tulo ka grupo sa mga bersikulo, mahimo nimong dapiton ang mga estudyante sa pagpangita og laing mga kasulatan nga naghulagway sa “suhol” sa pagsunod sa Dios o sa laing tawo. Mahimo nimong dasigon sila sa paggamit sa mga tudling sa doktrinal nga kahanas.
Basaha ang mosunod nga mga tudling sa kasulatan ug idugang ang unsay imong napalgan diha sa imong tsart.
Kon makompleto na sa mga estudyante ang pagsulat sa ilang mga tsart, dapita sila sa pagpakigbahin sa unsay ilang napalgan. Pangutan-a ang mga estudyante og follow-up nga mga pangutana sama sa mosunod nga ehemplo samtang sila mopakigbahin sa nakatabang kanila nga makonektar [relate] ang unsay ilang napalgan diha sa mga kasulatan ngadto sa ilang personal nga kinabuhi.
Personal nga paggamit
-
Unsa ang imong nabantayan o nasinati sa kinabuhi nga nagpakita kanimo sa katinuod sa baroganan nga gihulagway sa Alma 3:26–27?
Hunahunaa ang mga pagpili nga imong gihimo karon nga makatabang nimo sa pagsunod sa Langitnong Amahan ug ni Jesukristo. Sa unsang paagi kini modala ngadto sa kalipay nga walay kataposan? Naghimo ka ba og bisan unsa nga mga pagpili nga makapahilayo kanimo gikan sa Manluluwas? Paghukom kon unsa ang gikinahanglan nimong buhaton aron mag-usab. Ikonsiderar kon sa unsang paagi ang Langitnong Amahan ug si Jesukristo makapanalangin ug makalig-on kanimo samtang maningkamot ka sa paghimo og husto nga mga pagpili nga modala kanimo balik ngadto Kanila.