Rebyo 10 sa Doktrinal nga Kahanas

Gamita ang mga Tudling sa Doktrinal nga Kahanas

mga batan-on nga nagtuon sa kompyuter

Usa sa mga katuyoan sa doktrinal nga kahanas mao ang pagtabang kanimo nga makakat-on kon unsaon paggamit sa doktrina nga gitudlo sa mga tudling sa doktrinal nga kahanas ngadto sa tinuod nga mga sitwasyon sa kinabuhi. Kini nga leksiyon maghatag kanimo og mga kahigayonan sa pagbansay sa paggamit sa pipila ka mga tudling sa doktrinal nga kahanas nga imong gitun-an karong tuiga diha sa imong kaugalingong kinabuhi.

Tabangi ang mga tigkat-on sa pagkonektar sa mga baroganan sa ebanghelyo ngadto sa inadlaw-adlaw nga kinabuhi.Imbes nga sultihan ang mga estudyante kon unsaon paggamit ang mga kamatuoran sa ebanghelyo, tabangi ang mga estudyante nga makat-on sa ilang kaugalingon kon unsaon paggamit ang ebanghelyo sa ilang personal nga mga kahimtang. Dapita ang mga estudyante sa pagpangutana sa Dios ug sa pagpaminaw sa mga pag-aghat gikan sa Espiritu aron makahibalo unsaon nila paggamit ang ebanghelyo sa ilang kaugalingong kinabuhi.

Pagpangandam sa estudyante: Dapita ang mga estudyante sa pagpili og usa sa unang 12 ka tudling sa doktrinal nga kahanas nga ilang nakita nga makahuluganon. Dasiga ang mga estudyante sa pagtambong nga andam sa pagpakigbahin kon nganong ang ilang gipili nga tudling makahuluganon ngadto kanila.

Mga Posibleng Kalihokan sa Pagkat-on

Ang usa ka leksiyon sa tudling sa doktrinal nga kahanas mahimong kinahanglan nga itudlo puli niini nga leksiyon sa pagrebyo. Tan-awa ang eskedyul sa pagtudlo nga gihatag sa direktor o koordinitor sa lugar o rehiyon aron maseguro nga matudlo ang matag leksiyon sa tudling sa doktrinal nga kahanas samtang anaa sa sesyon ang seminary.

Pagrebyo sa mga tudling sa doktrinal nga kahanas

Ipakita o hatagi ang mga estudyante og mga kopya sa mosunod nga tsart.

Gamit ang mosunod nga tsart, i-rebyo ang unang 12 ka pakisayran sa doktrinal nga kahanas ug ang mahinungdanon nga mga hugpong sa mga pulong gikan sa Basahon ni Mormon. Dayon, pagpili og usa nga imong nakita nga makahuluganon ug basaha ang tibuok tudling.

Unang 12 ka Tudling sa Doktrinal nga Kahanas ug Mahinungdanon nga mga Hugpong sa mga Pulong

Manwal sa Magtutudlo sa Basahon ni Mormon (2024)

Pakisayran sa Kasulatan	Mahinungdanon nga Hugpong sa mga Pulong sa Kasulatan
Pakisayran sa Kasulatan 1 Nephi 3:7	Mahinungdanon nga Hugpong sa mga Pulong sa Kasulatan “Ako moadto ug mobuhat sa mga butang nga ang Ginoo nagsugo.”
Pakisayran sa Kasulatan 2 Nephi 2:25	Mahinungdanon nga Hugpong sa mga Pulong sa Kasulatan “Si Adan napukan aron ang mga tawo mahimo; ug ang mga tawo naingon, nga unta sila makabaton og hingpit nga kalipay.”
Pakisayran sa Kasulatan 2 Nephi 2:27	Mahinungdanon nga Hugpong sa mga Pulong sa Kasulatan “Sila gawasnon sa pagpili sa kalingkawasan ug sa kinabuhi nga dayon … o … sa pagkabihag ug sa kamatayon.”
Pakisayran sa Kasulatan 2 Nephi 26:33	Mahinungdanon nga Hugpong sa mga Pulong sa Kasulatan “Ang tanan managsama ngadto sa Dios.”
Pakisayran sa Kasulatan 2 Nephi 28:30	Mahinungdanon nga Hugpong sa mga Pulong sa Kasulatan Ang Dios “mopadayag ngadto sa mga katawhan og pagtulun-an human sa usa ka pagtulun-an, lagda human sa usa ka lagda.”
Pakisayran sa Kasulatan 2 Nephi 32:3	Mahinungdanon nga Hugpong sa mga Pulong sa Kasulatan “Pagbusog sa mga pulong ni Kristo; kay tan-awa, ang mga pulong ni Kristo magtug-an kaninyo sa tanan nga mga butang nga inyong buhaton.”
Pakisayran sa Kasulatan 2 Nephi 32:8–9	Mahinungdanon nga Hugpong sa mga Pulong sa Kasulatan “Kamo kinahanglan gayod nga mag-ampo sa kanunay.”
Pakisayran sa Kasulatan Mosiah 2:17	Mahinungdanon nga Hugpong sa mga Pulong sa Kasulatan “Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios.”
Pakisayran sa Kasulatan Mosiah 2:41	Mahinungdanon nga Hugpong sa mga Pulong sa Kasulatan “[Kadto] nga naghupot sa mga sugo sa Dios … bulahan sa tanan nga mga butang.”
Pakisayran sa Kasulatan Mosiah 3:19	Mahinungdanon nga Hugpong sa mga Pulong sa Kasulatan “[Isalikway] ang … kinaiyanhon nga pagkatawo ug [mahimo] nga usa ka santos pinaagi sa pag-ula ni Kristo ang Ginoo.”
Pakisayran sa Kasulatan Mosiah 4:9	Mahinungdanon nga Hugpong sa mga Pulong sa Kasulatan “Tuo sa Dios; … tuo nga siya aduna sa tanan nga kaalam.”
Pakisayran sa Kasulatan Mosiah 18:8–10	Mahinungdanon nga Hugpong sa mga Pulong sa Kasulatan “Pagpabunyag diha sa ngalan sa Ginoo, ingon og usa ka saksi … nga kamo nakasulod ngadto sa usa ka pakigsaad uban kaniya.”

© 2024 by Intellectual Reserve, Inc. All rights reserved.

Ikonsiderar ang pagdapit sa mga estudyante sa paglibot sa lawak ug ipakigbahin ang tudling nga ilang gipili ngadto sa duha o tulo ka laing mga klasmeyt. Mahimo usab nimong ipakigbahin sa mga estudyante ang usa ka tudling sa doktrinal nga kahanas nga personal nga makahuluganon diha kanimo.

Pagkonektar sa mga kamatuoran sa ebanghelyo sa imong kinabuhi ug mga kahimtang

Samtang magtuon ka sa mga kasulatan, usa ka paagi sa pag-personalize ug paggamit sa imong nakat-onan mao ang pagsulay ug paghimo og mga koneksiyon ngadto sa imong kaugalingong kinabuhi ug mga kahimtang. Pananglitan, tingali naglisod ka sa usa ka piho nga pangutana o hagit. Ang pagpangita og mga tubag samtang nagbasa ka sa mga kasulatan usa ka epektibo nga paagi aron madugangan ang kamahinungdanon sa imong pagtuon.

Kalikohan A

Ikonsiderar ang pagdapit sa mga estudyante sa paglista diha sa pisara og nagkalain-laing mga hagit sa kalibotan. Ipares-pares ang mga estudyante ug i-assign ang matag parisan og usa sa mga hagit. Mahimong maghimo ang mga estudyante og senaryo ug dayon mag-drama-drama nga magkauban. Ang usa ka estudyante mahimong mohulagway sa hagit, ug ang lain mahimong mopili og tudling sa doktrinal nga kahanas gikan sa tsart ug mosulay sa pagsulbad sa hagit gamit ang mga kamatuoran gikan niana nga tudling. Mahimo dayon nga mag-ilis og mga papel [roles] ang mga estudyante , o mahimo nimo silang dapiton sa pag-drama-drama sa ilang senaryo atubangan sa klase.

Laing paagi mao ang pag-assign sa mga estudyante og tudling sa doktrinal nga kahanas ug dayon maghimo og mga senaryo base sa mga hagit nga matubag sa tudling.

• Aduna bay bisan unsang mga tudling sa doktrinal nga kahanas nga sa imong hunahuna makatubag sa problema? Unsa kaha ang kalainan sa kalibotan kon ang kadaghanan sa mga tawo mogamit sa mga kamatuoran gikan sa imong gipili nga tudling? Ipakigbahin ang usa o duha ka piho nga mga ehemplo.

• Gamit ang doktrina gikan sa imong gipili nga tudling, unsa kaha ang imong isulti sa usa ka tawo nga nag-atubang niini nga hagit?

Kalihokan B

Ikonsiderar ang pagdapit sa mga estudyante sa pagkompleto niini nga kalihokan sa hilom nga sila ra. Kon dili kaayo personal, mahimo nimong dapiton ang mga estudyante sa pagpakigbahin sa ilang mga hunahuna ug mga impresyon mahitungod sa ilang gipili nga tudling sa doktrinal nga kahanas ug sa unsang paagi kini makatabang kanila nga mahimong mas mahisama ni Jesukristo.

Hunahunaa ang imong mga kahimtang karon, lakip ang bisan unsang personal nga mga pangutana, mga hagit, o mga kinaiya nga tingale gipangitaan nimo og tabang. I-rebyo ang lista sa mga tudling sa doktrinal nga kahanas, mangita sa mga kamatuoran nga makatabang nimo niini nga mga pangutana, mga hagit, o mga kinaiya. Pagpili og bisan usa ka tudling nga mahimong makatabang kanimo sa imong giatubang karon.

• Sa unsang paagi nga ang paggamit sa doktrina gikan sa imong gipili nga tudling mahimong usa ka panalangin sa imong kinabuhi ug mga kahimtang?

• Sa unsang paagi nga ang paggamit sa mga kamatuoran gikan niana nga tudling makatabang nimo nga mobati nga mas duol kang Jesukristo ug mahimong mas mahisama Kaniya?

• Unsa ang usa o duha ka gagmay nga mga lakang nga imong mahimo aron sa pagsugod sa paggamit niini nga mga kamatuoran sa imong kinabuhi?