Jacob 4

“Ang Among Hugot nga Pagtuo Nahimong Dili Matarog”

bulawang mga palid

Ang pagkulit og mga pulong ngadto sa metal nga mga palid dili sayon nga buluhaton (tan-awa sa Jacob 4:1). Busa nganong naningkamot man si Jacob sa pagbuhat niini? Nasinati niya ang kalipay sa pagkaila sa Manluluwas ug mitinguha sa pagtabang kanato nga moduol usab sa Manluluwas. Kini nga leksiyon makatabang kanimo sa paglig-on sa imong hugot nga pagtuo diha ni Jesukristo pinaagi sa pag-ila, pagrekord, ug pagpamalandong sa mga baroganan ug mga kamatuoran nga gitudlo ni Jacob.

Pag-ila sa doktrina ug mga baroganan diha sa mga kasulatan.Tabangi ang mga estudyante nga makat-on sa pag-ila sa doktrina ug mga baroganan diha sa mga kasulatan pinaagi sa mahunahunaon nga paningkamot ug pagpraktis. Usahay kini klaro nga gipahayag, samtang sa ubang mga higayon kini gibase sa usa ka istorya sa kasulatan. Samtang palamboon sa mga estudyante kini nga kahanas, mas lagmit silang modangop sa mga kasulatan alang sa giya ug mga tubag sa mga pangutana.

Pagpangandam sa estudyante: Ikonsiderar ang pagdapit sa mga estudyante sa pagbasa sa Jacob 4:7–14 ug sa pagpangandam sa pagpaambit og usa ka baroganan o kamatuoran nga ilang nakita nga ilang gibati nga gikinahanglan kaayo sa kalibotan karon.

Mga Posibleng Kalihokan sa Pagkat-on

Unsay imong ipaambit?

Alang sa mosunod nga kalihokan sa pagsulat, ikonsiderar ang pagdapit sa mga estudyante sa pagbasa sa paghulagway ni Jacob sa kalisod sa pagsulat diha sa mga palid sa Jacob 4:1–3. Dayon dapita ang mga estudyante sa paggamit og bisan unsang gahi nga butang gawas sa bolpen o lapis sa pagmarka o “pagkulit” og mubo nga parapo diha sa usa ka piraso sa aluminum foil o papel. Mahimong makatabang kini nila nga mas makadayeg sa buluhaton nga naagian ni Jacob sa pagrekord sa iyang mga pulong alang kanato.

Gituman ni Jacob ang usa ka sugo sa pagsulat diha sa gagmay nga mga palid “sa pipila ka mga butang nga [siya] naghunahuna nga mao ang labi nga bililhon” (Jacob 1:2) para mabasa sa umaabot nga mga kaliwatan (tan-awa sa Jacob 4:1–3). Handurawa nga gihangyo ka sa sama nga magsulat og usa ka mubo nga mensahe alang sa mga tawo sa umaabot.

Pagsulat og usa ka parapo nga naglangkob sa labing mahinungdanon nga mga butang nga imong nahibaloan o nasinati aron mabasa sa imong mga anak ug mga apo sa umaabot.

Dapita ang mga estudyante kinsa komportable nga ipaambit sa klase ang bahin sa ilang nasulat.

Ang mensahe ni Jacob kanato

Samtang magtuon ka sa mensahe nga nadasig si Jacob sa pagkulit diha sa Jacob 4 aron mabasa sa mga tawo sa atong panahon, makabaton ka og kahigayonan sa pagpraktis gamit ang makatabang nga mga kahanas sa pagtuon sa kasulatan. Kini nga mga kahanas naglakip sa:

1. Pag-ila ug pagrekord sa mga baroganan ug mga kamatuoran

2. Pagpamalandong ug pagpangutana nga makatabang kanimo nga mas masabtan ang mga kamatuoran ug mga baroganan

Ang paggamit niini nga mga kahanas makatabang kanimo nga mas makat-on ug mas mobati sa Espiritu Santo samtang magtuon ka sa mga kasulatan.

Ang mosunod nga seksiyon sa leksiyon gituyo aron paghatag sa mga estudyante og ehemplo kon unsaon paggamit niini nga mga kahanas sa pagtuon.

1. Pag-ila ug pagrekord sa mga baroganan ug mga kamatuoran

Makatabang ang paghunong kon magbasa ka sa mga kasulatan ug irekord ang imong nakat-onan isip yano nga mga pamahayag sa kamatuoran. Mahimo nimong gamiton ang imong kaugalingon nga mga pulong o mogamit og mga pulong ug hugpong sa mga pulong direkta gikan sa mga kasulatan.

Pagpraktis sa pag-ila sa mga baroganan ug mga kamatuoran pinaagi sa:

• Pagbasa sa Jacob 4:1, 4–6, nga mangita kon unsay nakadasig ni Jacob nga irekord mahitungod sa Manluluwas.

• Pagmarka sa mga pulong ug hugpong sa mga pulong nga importante kanimo.

• Pagrekord sa imong journal sa pagtuon o sa imong mga kasulatan kon unsay imong gibati nga labing importante nga mga mensahe niini nga mga bersikulo.

Dapita ang mga estudyante sa pagpaambit sa mga pamahayag sa mga baroganan o mga kamatuoran nga ilang nadiskobrehan. Kon ang mga estudyante nagkinahanglan og usa ka ehemplo, ikonsiderar ang pagpaambit sa gipabaga [bolded] nga baroganan sa mosunod nga parapo.

Usa ka ehemplo sa usa ka baroganan nga mahimo nimong mailhan gikan sa bersikulo 6 mao ang sinsero nga pagsiksik sa mga pulong sa mga propeta makapalig-on sa akong hugot nga pagtuo diha ni Jesukristo. Ikonsiderar ang pagrekord niini nga baroganan diha sa imong journal sa pagtuon o sa imong mga kasulatan duol sa bersikulo 6.

2. Pagpamalandong ug pagpangutana og mga pangutana

Ang pagpamalandong makatabang kanimo sa pagsabot ug paggamit sa mga baroganan ug mga kamatuoran nga imong nailhan. Mahimo nimong pamalandongan ang mga pangutana sama sa mosunod:

Ikonsiderar ang pagpakita o paghatag og kopya sa mosunod nga mga pangutana. Kini mahimong makatabang sa mga estudyante nga mas masabtan kon unsaon paggamit kini nga kahanas sa pagtuon. Kini magtugot usab kanila sa pagbalik niini samtang magpraktis sila sa paggamit niini nga kahanas sa ilang kaugalingon unya sa leksiyon.

• Ngano sa akong hunahuna ang mga tawo sa atong panahon kinahanglan nga makahibalo niini nga kamatuoran?

• Sa unsang paagi kini magamit sa akong kinabuhi?

• Unsa kaha ang ipabuhat sa Ginoo kanako tungod sa akong nakat-onan?

Human sa panahon sa pagpamalandong, dapita ang mga estudyante sa pagpaambit sa unsay ilang nakat-onan samtang namalandong sila sa baroganan o kamatuoran nga ilang nadiskobrehan niini nga tudling. Ikonsiderar ang pagpaambit og personal nga kasinatian kon sa unsang paagi ang kamatuoran nga nakita niini nga tudling nakapanalangin sa imong kinabuhi.

Ang mosunod nga seksiyon gituyo aron sa pagtabang sa mga estudyante nga makapraktis sa mga kahanas sa pag-ila, pagrekord, ug pagpamalandong sa unsay ilang nakat-onan gikan sa mga kasulatan. Ikonsiderar ang pagdapit sa mga estudyante sa pagpili kon gusto ba nila ang magbuhat kauban ang usa ka pares o mag-inusara sa pagkompleto niini nga kalihokan.

Pagpraktis gamit ang mga kahanas sa pagtuon sa kasulatan

Pagpraktis sa mga kahanas sa pag-ila, pagrekord, ug pagpamalandong sa mga baroganan ug mga kamatuoran pinaagi sa:

1. Pagtuon sa Jacob 4:7–14, mangita sa importante nga mga pagtulun-an nga gipili ni Jacob nga irekord mahitungod sa Manluluwas.

2. Pagrekord sa imong journal sa pagtuon o sa imong mga kasulatan og usa ka baroganan o kamatuoran nga imong gibati nga importante nga masabtan sa mga tawo sa kalibotan karon.

   Ikonsiderar ang paghunong sa dili pa ipaambit ang sunod nga lakang aron sa pagdapit og mga boluntaryo nga mosulat diha sa pisara og baroganan o kamatuoran nga ilang nailhan. Kini magpakita og mga ehemplo sa mga baroganan ug mga kamatuoran ngadto sa mga estudyante nga dili kaayo hanas sa pag-ila niini.

3. Pagpamalandong sa kamahinungdanon sa imong napalgan. Pangutana og mga pangutana nga makatabang kanimo nga mas masabtan ug magamit kini sa imong kinabuhi. (Ang mga ehemplo sa mga pangutana nga mahimo nimong pamalandongan makita diha sa seksiyon sa “Pagpamalandong ug pagpangutana” sa sayo pa sa leksiyon.)

   Pahibaloa ang mga estudyante nga aduna silay pipila ka minuto sa pagpangandam sa pagpaambit sa baroganan o kamatuoran nga ilang gipili, kon hain kini nila napalgan nga mga bersikulo, ug kon nganong sa ilang hunahuna importante kini. Mahimo silang mangandam sa yanong pagsulti sa unsay ilang nakat-onan ngadto sa ubang mga estudyante. O mahimo silang mangandam sa pagpaambit sa ubang mga paagi, sama sa paghimo og meme, pagdrowing og hulagway, o pag-andam og post nga mahimong ipaambit sa social media. Ang mosunod nga mga bullet point mahimong ipakita aron sa pagtabang sa mga estudyante samtang sila nangandam.

   Pangita og mga estudyante nga nagkinahanglan og tabang, ug tabangi kini. Ikonsiderar ang pagpaambit sa may kalabotan nga impormasyon gikan sa mga seksiyon sa “Komentaryo ug Background nga Impormasyon” ug sa “Dugang nga mga Kalihokan sa Pagkat-on.”

• Sa unsang paagi ang baroganan o kamatuoran makatabang sa usa ka tin-edyer sa paglig-on sa iyang hugot nga pagtuo diha ni Jesukristo

• Ubang mga tudling sa kasulatan o mga pamahayag gikan sa mga lider sa Simbahan nga makatabang nimo nga mas masabtan kini nga baroganan o kamatuoran

• Mga butang nga mahimo nimong pamalandongan ug mga pangutana nga mahimo nimong ipangutana aron matabangan ka nga mas masabtan kini nga baroganan o kamatuoran

• Mga paagi nga imong magamit ang imong nakat-onan sa paglig-on sa imong hugot nga pagtuo diha ni Jesukristo

• Mga kasinatian sa dihang ikaw o kadtong imong nailhan napanalanginan pinaagi sa paggamit sa unsay gitudlo ni Jacob

Dapita ang mga estudyante sa paglibot sa lawak klasehanan, mangita og laing estudyante, ug magpuli-puli sa pagpaambit sa unsay ilang giandam sulod sa mga duha ka minuto matag usa. Kon itugot sa oras, ang mga estudyante mahimo dayon nga mag-ilis og mga pares ug magpuli-puli sa pagpaambit pag-usab sa ilang giandam.

Human sila nakapaambit, dapita ang mga estudyante sa pagrekord diha sa ilang journal sa pagtuon sa bisan unsa nga ilang nakat-onan nga gusto nilang magamit sa ilang kinabuhi. Dapita sila sa paggamit sa mga kahanas nga ilang gipraktis sa klase karon sa ilang personal nga pagtuon sa kasulatan.

Komentaryo ug Background nga Impormasyon

Jacob 4:10. Sa unsang paagi mahulog ang maayong mga tawo sa lit-ag sa dili pagdawat sa tambag gikan sa Dios?

Si Presidente Marion G. Romney (1897–1988) sa Unang Kapangulohan mipasabot:

Presidente Marion G. Romney

Wala ko magtuo nga daghan nga mga miyembro sa Simbahan ang tuyo nga [nagsunod] sa mga pagdani sa mga tawo o sa ilang kaugalingon nga tambag imbis nga mosunod sa tambag sa Ginoo. Hinoon, kon dili kita kanunay mangita sa tambag sa Ginoo, lagmit atong mapuli ang kaugalingon natong tambag sa Iyang tambag. Sa pagkatinuod, wala kitay laing mahimo apan mosunod na lamang sa atong kaugalingong tambag kon wala kita masayod sa mga instruksiyon sa Ginoo. (Marion G. Romney, “Seek Not to Counsel the Lord,” Ensign, Ago. 1985, 5)

Jacob 4:14. Unsa ang pipila ka paagi nga ang mga tawo motan-aw “lapas sa tumong” karon?

Si Elder Quentin L. Cook sa Korum sa Napulog Duha ka Apostoles mitudlo:

Elder Quentin L. Cook

Ang pipila sa miyembro mopasaka sa mga hinungdan, kadaghanan niini maayo, ngadto sa kahimtang nga pinakalabaw sa sukaranang doktrina sa ebanghelyo. Ilang pulihan ang ilang pagtuo ngadto sa kawsa isip ilang pasalig ug paubsan ang ilang pasalig ngadto sa Manluluwas ug sa Iyang mga pagtulun-an ngadto sa ikaduha nga posisyon. Kon kita mopasaka sa bisan unsang butang nga lapas sa atong debosyon sa Manluluwas, kon ang atong binuhatan mag-ila Kaniya nga sama lang sa laing magtutudlo ug dili balaan nga Anak sa Dios, nan kita mitan-aw lapas sa tumong. Si Jesukristo mao ang tumong! (Quentin L. Cook, “Maisog diha sa Pagpamatuod ni Jesus,” Liahona, Nob. 2016, 43)

Dugang nga mga Kalihokan sa Pagkat-on

Jacob 4:6–7. “Bisan pa niana, ang Ginoong Dios mipakita kanamo sa among kahuyang”

Dapita ang mga estudyante sa pagmarka sa pulong nga “bisan pa niana” sa Jacob 4:7. Dayon dapita sila sa pagtan-aw sa mga ideya nga gitudlo sa nag-una diha sa bersikulo 6 ug human sa pulong diha sa bersikulo 7. Mahimo nimong gamiton ang Ether 12:27 aron sa paghisgot nganong ang Ginoo naghatag kanato og kahuyang ug sa tahas sa Iyang grasya sa atong kinabuhi.

Jacob 4:11. Pakig-uli ngadto sa Dios

Dapita ang mga estudyante sa pagrekord og usa ka kahulugan sa pulong nga pakig-uli sunod sa Jacob 4:11. (Ang pakig-uli mahimong nagpasabot sa pagdala ngadto sa panag-uyon.)

Ikonsiderar ang pagpatukar og mga nota nga nahiuyon sa usa ka instrumento sa musika o pagpatukar og usa ka rekording sa usa ka kanta nga maayo ang pagpahiuyon. Dayon ipatukar ang mga nota o kanta nga wala magkauyon. Gamit ang pasabot sa ibabaw sa pulong pakig-uli, dapita ang mga estudyante sa pagtandi kon sa unsang paagi kini makatabang kanato nga makasabot sa kahulugan sa Jacob 4:11. Unsay mahimong hinungdan nga ang usa ka kinabuhi dili na mahiuyon sa Dios? Sa unsa nga paagi nga ang Pag-ula ni Jesukristo makahimo nga posible alang sa ingon nga kinabuhi sa pakig-uli o pagbalik ngadto sa panag-uyon diha sa Dios?

Jacob 4:10. Pagpangayo og tambag gikan sa Ginoo

Mahimong hisgotan sa mga estudyante kon kinsa ang ilang duolan alang sa tambag ug ngano. Basaha ang Jacob 4:10 ug pangitaa nganong makasalig kita sa tambag sa Dios. Mahimo usab basahon sa mga estudyante ang Mosiah 4:9 ug Isaias 55:8–9 aron sa pagdiskobre sa mga rason nga kita kinahanglan nga motinguha ug mosunod sa tambag sa Dios. Hisgoti ang nagkalain-laing mga rason nganong ang mga tawo mahimo o dili magtinguha ug mosunod sa tambag gikan sa Ginoo. Ang pamahayag ni Presidente Romney sa “Komentaryo ug Background nga Impormasyon” mahimong makatabang sa diskusyon.

Jacob 4:13. “Ang Espiritu namulong sa kamatuoran”

Ikonsiderar ang pagbasa sa Doktrina ug mga Pakigsaad 93:24–25 inubanan sa Jacob 4:13, mangita kon giunsa pagpasabot sa Dios ang kamatuoran. Hisgoti kon unsaon nato pagpangita ang kamatuoran.

Jacob 4:14. “Pagtan-aw lapas sa tumong”

Dapita ang mga estudyante sa pagbasa sa Jacob 4:14, mangita sa hugpong sa mga pulong nga “lapas sa tumong.” Ipakita ang pamahayag ni Elder Cook sa seksiyon sa “Komentaryo ug Background nga Impormasyon” ug dapita ang mga estudyante sa pagrekord diha sa ilang mga kasulatan sunod niini nga bersikulo nga “Si Jesukristo mao ang tumong.”

Dapita ang mga estudyante sa paghisgot kon unsay mahimong hinungdan nga bisan ang usa ka miyembro sa gipahiuli nga Simbahan ni Jesukristo motan-aw nga “lapas sa tumong” sa ilang kinabuhi.