Sa miaging leksiyon, “2 Nephi 32:8–9,” imong nakat-onan nga kon kita mag-ampo sa kanunay, ang Langitnong Amahan mopahinungod sa atong binuhatan alang sa kaayohan sa atong mga kalag. Kini nga leksiyon makatabang nimo sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan alang sa 2 Nephi 32:8–9, makapasabot sa doktrina, ug makagamit sa mga baroganan sa pag-angkon og espirituhanong kahibalo ngadto sa tinud-anay nga mga senaryo.
Pagdasig sa mga estudyante sa pag-ampo. Dasiga ang mga estudyante sa pag-ampo kada adlaw sa pagpahayag sa kinasingkasing nga pasalamat ug sa pagtinguha og tabang sa mga panahon sa panginahanglan (tan-awa sa 3 Nephi 18:19). Ang mga estudyante mas makaila sa Langitnong Amahan ug ni Jesukristo samtang sila makasabot ug mogamit sa mga baroganan sa pag-ampo.
Pagpangandam sa estudyante: Ikonsiderar ang pagdapit sa mga estudyante sa pag-ila sa usa ka higayon sa ilang kinabuhi o sa kinabuhi sa usa ka tawo nga ilang nailhan sa dihang ang sinsero nga pag-ampo nakatabang kanila nga mas mapaduol sa Langitnong Amahan ug ni Jesukristo.
Mga Posibleng Kalihokan sa Pagkat-on
Gidisenyo kini nga leksiyon sa tudling sa doktrinal nga kahanas aron itudlo human sa leksiyon sa “2 Nephi 32:8–9,” nga mao ang pangkonteksto nga leksiyon para sa tudling sa doktrinal nga kahanas sa 2 Nephi 32:8–9. Kon gikinahanglang ibalhin kini nga leksiyon sa tudling sa doktrinal nga kahanas sa laing semana, seguroha nga itudlo usab ang tukma nga pangkonteksto nga leksiyon nianang semanaha.
Ipasabot ug Isag-ulo
Tabangi ang mga estudyante sa pagsag-ulo sa pakisayran ug sa mahinungdanon nga hugpong sa mga pulong sa kasulatan alang sa 2 Nephi 32:8–9. Dasiga ang imong mga estudyante sa pagkonsiderar sa pagsag-ulo kutob sa ilang mahimo sa daghang tudling sa doktrinal nga kahanas apan ayaw kini kinahanglana. Ang app sa doktrinal nga kahanas makatabang kanila sa pagsag-ulo.
Rebyoha ang pakisayran sa kasulatan sa doktrinal nga kahanas sa “2 Nephi 32:8–9” ug ang mahinungdanon nga hugpong sa mga pulong sa kasulatan nga “Kamo kinahanglan gayod nga mag-ampo sa kanunay.” Paghimo og mubo nga istorya aron masumpay ang matag numero diha sa pakisayran sa kasulatan ngadto sa mahinungdanon nga hugpong sa mga pulong—sama pananglitan, “Si Addi nag-ampo 32 ka oras kada adlaw.” OK ra kon ang imong gihimo dili lohikal. Ang punto mao ang pagtabang kanimo sa pagkonektar sa pakisayran ngadto sa mahinungdanon nga hugpong sa mga pulong sa kasulatan.
Tabangi ang mga estudyante sa pagpasabot sa doktrina nga gitudlo sa 2 Nephi 32:8–9. Seguroha nga mahatagan ang matag estudyante og kahigayonan sa pagpraktis sa pagpasabot sa doktrina. Kon ang mga estudyante maghimo nga magtinagurha, ang matag estudyante makahimo sa pagpraktis nga ang kalihokan dili makakuha og dako kaayong oras sa klase. Mahimo nimong gamiton ang mosunod nga senaryo ug mga instruksiyon o gamit og senaryo nga imong gipaangay o gibuhat.
Handurawa nga ikaw nakig-istorya sa usa ka higala kinsa mibati nga dili angayan nga mag-ampo. Gamita ang mga hugpong sa mga pulong gikan sa 2 Nephi 32:8–9 aron matabangan siya nga makasabot nganong kinahanglan kita nga mag-ampo sa kanunay. Ilakip sa imong pagpasabot unsa sa imong hunahuna ang gipasabot sa pag-ampo sa kanunay.
Pagbansay sa paggamit
Ipakita o dapita ang mga estudyante sa paghinumdom sa tulo ka mga baroganan sa pag-angkon og espirituhanong kahibalo. Dapita ang mga estudyante sa pagpili og usa ka baroganan ug pagsulat kutob sa ilang mahinumduman mahitungod niini sulod sa usa ka minuto. Aron makita kon unsa pa ang ilang madugang, mahimo nilang itandi ang ilang gisulat sa laing estudyante kinsa mirebyo sa samang baroganan, o mahimo nilang itandi kini sa mga parapo 5–12 diha sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas (2022).
Kon nahuman na ang pagrebyo sa mga baroganan sa pag-angkon og espirituhanong kahibalo, dapita ang mga estudyante sa pagsulat diha sa pisara og mga kabalaka o mga pangutana nga tingali aduna ang mga tawo mahitungod sa pag-ampo ngadto sa Langitnong Amahan. Dayon papilia ang matag usa kanila og usa ug ipapraktis ang paggamit sa mga baroganan sa pag-angkon og espirituhanong kahibalo aron sa pag-andam og tubag sa kabalaka. Kon gikinahanglan, mahimo nimong iapil ang mga pangutana nga moabot sa unahan pa sa leksiyon aron makatabang sa paggiya sa mga estudyante sa ilang pagtuon.
Sa laing paagi, mahimo nimong gamiton ang usa sa mosunod aron matabangan ang mga estudyante sa pagpraktis.
Dapita ang mga estudyante sa pagpili og usa sa mga hagit nga nalista diha sa pisara ug paghimo og senaryo sa usa ka batan-on nga aduna niini nga hagit. Mahimong hinganlan sa mga estudyante kini nga tawo, hatagan siya og rason nga dili siya mag-ampo, ug idugang ang ubang may kalabotan nga mga detalye.
Ipaambit ang mosunod nga senaryo ug dapita ang mga estudyante sa paggamit sa mga baroganan sa pag-angkon og espirituhanong kahibalo sa pagtubag: Usa ka higala nagpadala kanimo og mensahe nga nag-ingon, “Samtang naminaw ko og pakigpulong diha sa simbahan, nakaamgo ko nga imbis tabangan ko nga makonektar ngadto sa Langitnong Amahan, ang akong mga pag-ampo nahimong balik-balik. Wala na nako gibati nga makadawat pa ako og mga tubag sa akong mga pag-ampo. Nagsugod ko sa pagkabalaka kon unsay gibati sa Langitnong Amahan kanako. Gusto ko nga mabalik kana nga koneksiyon. Nanghinaot ko nga magka-istoryahanay ta sa bisan hain nga oras ugma ug basin makatabang ka nako nga makahuna-huna unsay akong buhaton.”
Tinguhaa ang dugang nga panabot pinaagi sa balaanong gitudlo nga mga tinubdan
Unsa nga balaanong gitudlo nga mga tinubdan ang imong gamiton sa pagtubag?
Paggamit og balaanong gitudlo nga tinubdan aron sa pagtabang kanimo sa pag-andam og tubag. Mahimo kang magpadala og mensahe ngadto sa usa ka ginikanan o lider sa Simbahan nga mangayo og tabang sa posible nga mga tubag. Mahimo usab nimong pangitaon ang mga kasulatan o mga materyal sa ChurchofJesusChrist.org ChurchofJesusChrist.org. Alang sa pipila ka mga kabalaka, ang mosunod nga pamahayag ni Presidente Brigham Young (1801–1877) mahimong makatabang:
Imahe
Presidente Brigham Young
Dili igsapayan kon ikaw o ako dili ganahan nga mag-ampo, kon ang panahon moabot aron mag-ampo, pag-ampo. Kon kita dili ganahan nga mobuhat niini, kinahanglang mag-ampo kita hangtod nga kita ganahan. (Mga Pagtulun-an sa mga Presidente sa Simbahan: Brigham Young [1997], 53)
Susihon ang mga konsepto ug mga pangutana inubanan sa mahangtorong panglantaw
Unsa ang imong nahibaloan mahitungod sa Langitnong Amahan ug ni Jesukristo nga may kalabotan niini nga pangutana o kabalaka?
Unsa ang walay kataposan nga mga kamatuoran gikan sa 2 Nephi 32:8–9 ang makatabang sa usa ka tawo niini nga pangutana o kabalaka?
Lihokon inubanan sa hugot nga pagtuo
Unsa ang imong isugyot nga buhaton niini nga tawo aron molihok nga may hugot nga pagtuo kang Jesukristo? Ngano man?
Unsa ang imong dapiton nga hinumduman niini nga tawo nga makatabang kaniya sa paglihok nga may hugot nga pagtuo?
Dapita ang mga estudyante sa paghisgot kon sa unsang paagi ang paggamit sa mga baroganan sa pag-angkon og espirituhanong kahibalo nakatabang nila sa pagtubag. Dasiga sila sa paggamit niini nga mga baroganan sa umaabot sa higayon nga ang mga pangutana o mga kabalaka moabot diha kanila o sa uban.
Rebyo sa doktrinal nga kahanas
Atol sa umaabot nga leksiyon, paggahin og dili molapas sa lima ka minuto sa pagrebyo sa pakisayran ug sa mahinungdanon nga hugpong sa mga pulong sa kasulatan “2 Nephi 32:8–9: ‘Kamo kinahanglan gayod nga mag-ampo sa kanunay.’” Usa ka paagi sa pagrebyo mao ang pagpakita og hulagway sa usa ka tawo nga nag-ampo ug hangyoa ang mga estudyante sa paghinumdom sa pakisayran sa kasulatan ug sa mahinungdanon nga hugpong sa mga pulong sa kasulatan samtang nagtan-aw sila sa hulagway.