Jacob 1

Makadani sa Uban sa Pagduol ngadto kang Kristo

mga misyonaryo nga nagtudlo sa pamilya

Sa wala pa mamatay si Nephi, iyang gihatag sa iyang manghod nga lalaki nga si Jacob ang responsibilidad sa pagpreserbar sa mga palid ug pagrekord diha niini kon unsa ang “labi nga bililhon” (Jacob 1:2). Ang mensahe ni Jacob mipunting sa uban ngadto ni Jesukristo, nagtabang kanila sa paglikay sa mga sangpotanan sa pagkawalay pagtuo ug sala. Kini nga leksiyon makatabang nimo sa pagdiskobre og mga paagi sa pagtabang sa uban sa pagduol ngadto kang Jesukristo.

Pagtabang sa mga tigkat-on nga mahimong aktibong mga sumasalmot. Alang sa ubang mga estudyante, ang pagpaningkamot sa pagkat-on gikan sa mga kasulatan mamahimong dili kaayo pamilyar ug medyo lisod. Hinuon, ang mga estudyante mahimong molambo sa ilang mga abilidad ug anam-anam nga mahimong mas responsable sa ilang pagkat-on. Pangita og mga kahigayonan sa pagtabang sa mga estudyante nga mahimong aktibo sa klase ug dayega ang ilang mga paningkamot ug pag-uswag.

Pagpangandam sa estudyante: Dapita ang mga estudyante sa paghunahuna og mga higayon nga makaistorya sila sa uban mahitungod ni Jesukristo. Dasiga sila sa pag-ampo alang sa usa ka kahigayonan ug sa pagbaton og kaisog sa paglihok nianang higayona.

Mga Posibleng Kalihokan sa Pagkat-on

Nakig-istorya ngadto sa usa ka higala

Ang mosunod nga mga pangutana makatabang sa mga estudyante sa paghisgot kon sama sa unsa kaha ang pagpakig-istorya ngadto sa uban mahitungod ni Jesukristo. Kon ang mga estudyante gihangyo sa pagbuhat sa pagpangandam sa estudyante, dapita sila sa pagpaambit og mga higayon nga mahimo silang maghisgot mahitungod ni Jesukristo ngadto sa uban.

• Kanus-a man nga ang paghisgot mahitungod ni Jesukristo ngadto sa uban mabati nga makahadlok? Unsay makatabang nato sa pagbuntog sa atong mga kahadlok?

• Kinsa ang imong nailhan nga maayong ehemplo sa pagpaambit sa ebanghelyo ni Jesukristo ngadto sa uban?

Usa ka batan-ong lalaki nga ginganlan og Junior ang usa ka maayong ehemplo sa pagpaambit sa ebanghelyo. Siya ra ang batan-ong lalaki nga nagsimbahan sa usa ka gamay nga branch sa Florida, USA. Nakahukom siya nga makig-istorya sa usa sa iyang mga higala mahitungod sa ebanghelyo ni Jesukristo ug dapiton siya sa simbahan. ChurchofJesusChrist.org

Ang ehemplo sa uban makahatag kanato og mga rason ug mga ideya kon unsaon pagdapit ang uban sa pagduol ngadto kang Kristo. Samtang nagtuon karon, hunahunaa kon nganong gusto nimong tabangan ang uban sa pagduol ngadto sa Manluluwas ug sa unsa nga normal ug natural nga mga paagi nga mahimo nimo kini.

Makadani sa uban sa pagduol ngadto kang Kristo

Sa wala pa mamatay si Nephi (tan-awa sa Jacob 1:12), iyang gihatag sa iyang igsoon nga lalaki nga si Jacob ang responsibilidad sa pagsulat diha sa gagmay nga mga palid nga gisugo sa Ginoo kaniya sa paghimo. Ang gagmay nga mga palid nagpokus sa espirituhanong mga butang ug ang ubang mga palid gipahinungod sa kasaysayan sa katawhan (Jacob 1:1–3).

Basaha ang Jacob 1:4–6, mangita sa unsay gihangyo ni Nephi nga ilakip ni Jacob diha sa mga palid ug itudlo sa mga tawo.

• Unsa ang pipila ka mga butang nga nahibaloan ni Nephi ug Jacob? Giunsa nila pagkahibalo niining mga butanga?

Tabangi ang mga estudyante nga makaila sa pagpamatuod ni Jacob bahin ni Jesukristo ug sa unsang paagi kini nakadasig kaniya sa paglihok.

Basaha ang Jacob 1:7–8, mangita sa gibuhat ni Jacob tungod sa iyang pagsabot. Mahimo nimong markahan ang mga hugpong sa mga pulong diha sa imong mga kasulatan nga nagpakita kon unsay nakapadasig ni Jacob sa paglihok. Ang mosunod nga mga pagpasabot mahimong makapatin-aw sa kadasig ni Jacob.

“Mopalandong sa iyang kamatayon”:Si Jacob lagmit nagdapit sa mga Nephite sa paghunahuna mahitungod ni Jesukristo nga nagpakamatay alang kanila ug nag-ula alang sa ilang mga sala.

“Mopas-an sa iyang krus”:Kini nga hugpong sa mga pulong nagpasabot sa usa ka pasalig sa pagdumili sa atong mga kaugalingon sa dili diosnon ug kalibotanon nga mga kahigal ug sa paghupot sa mga sugo sa Ginoo (tan-awa sa Hubad ni Joseph Smith, Mateo 16:26; Lucas 9:23; 2 Nephi 9:18). Nagpasabot usab kini nga kita makapakita sa atong kaandam nga molahutay ug mosakripisyo samtang nagsunod kita sa Manluluwas.

• Hain sa mga rason nga gisulat ni Jacob ang makapadasig kanimo? Unsa ang ubang mga rason nga imong mahunahunaan sa pagdapit sa uban sa pagduol ngadto kang Kristo?

Ikonsiderar ang pagpangutana sa mga estudyante kon unsa nga hugpong sa mga pulong sa mga bersikulo ang gikinahanglan nila og tabang sa pagsabot. Dapita ang mga estudyante sa pagtabang sa usag usa.

Mahimo nimong ihatag ang mga pagpasabot nga makita sa seksiyon sa “Komentaryo ug Background nga Impormasyon” kon gikinahanglan.

• Unsa ang atong makat-onan gikan sa ehemplo ni Jacob niini nga mga bersikulo?

Usa ka kamatuoran nga atong makat-onan gikan sa ehemplo ni Jacob mao ang ang pagkahibalo kang Jesukristo ug sa Iyang gingharian makadasig kanato sa paghago nga makugihon sa pagtabang sa uban sa pagduol ngadto Kaniya.

Mahimong makatabang alang sa mga estudyante nga makadungog sa pipila sa ilang mga kaedad nga mopaambit sa ilang mga tubag sa mosunod nga aghat.

Pamalandongi kon unsay imong nahibaloan mahitungod ni Jesukristo ug hunahunaa kon unsa nga mga kamatuoran ang gusto nimong mahibaloan sa uban mahitungod Kaniya.

Mahimong buhaton sa mga estudyante ang mosunod isip kalihokan sa grupo, mag-brainstorm sa mga sitwasyon diin makatabang sila sa usa ka tawo sa pagduol ngadto kang Kristo.

Gahini kadiyot og panahon sa paghunahuna kon unsay imong mahimo aron sa paghago nga makugihon sa pagdani sa uban sa pagduol ngadto kang Kristo. Isulat ang mga sitwasyon diin mahimong aduna kay mga kahigayonan sa pagbuhat niini. Sunod sa matag sitwasyon, isulat kon unsaon nimo pagtabang ang uban niana nga kahimtang nga makaila ug mahigugma ni Jesukristo. Mahimo nimong gamiton ang mosunod nga mga ehemplo ug idugang ang uban pa:

1. Diha sa panimalay

2. Uban sa usa ka higala

3. Sa social media

4. Sa imong calling o pinaagi sa pagpangalagad

Ang mga estudyante mahimong makabenepisyo gikan sa diskusyon sa klase kon sa unsang paagi ang mga calling nga anaa kanila o mahimo nilang buhaton sa pagtuman makatabang nila sa pagdala sa uban ngadto kang Kristo. Mahimo silang mangutana og mga pangutana nga aduna sila mahitungod sa pagpangalagad o mopaambit og tambag mahitungod sa pagserbisyo sa Simbahan sa Ginoo.

Ikonsiderar ang pagpaambit og usa ka kasinatian nga imong nasinati sa pagtabang sa usa ka tawo sa pagduol ngadto kang Kristo.

Mahimo usab nimong ipakita ang usa ka ehemplo nga bidyo. Pagpili gikan sa usa sa mosunod nga mga bidyo o sa uban nga anaa kanimo.

“2021 Sibya: Mga Baroganan sa Paghigugma, Pagpaambit, Pagdapit” (54:06) gikan sa time code 0:00 hangtod sa 1:35

“Mga Istorya sa Miyembro: Kabatan-onan ug mga Young Adult” (5:08)

Samtang maghunahuna ka og mga paagi sa pagtabang sa uban sa pagduol ngadto kang Jesukristo, makakuha ka og kaisog gikan sa mga saad ug tambag diha sa mga kasulatan.

Basaha ang Doktrina ug mga Pakigsaad 15:6; 18:15–16 aron madiskobrehan kon unsa ang gisaad sa Ginoo niadtong motabang sa uban nga moduol Kaniya.

Basaha ang Alma 31:34–35 aron sa pagkat-on gikan sa ehemplo ni Alma sa pagtinguha sa pagtabang sa paggiya sa mga Zoramite ngadto kang Kristo.

• Kanus-a ka nakahimo sa pagtabang sa ubang mga tawo nga makat-on mahitungod ni Jesukristo?

• Kinsa ang tawo nga gusto nimong dapiton sa pagduol ngadto kang Kristo? Unsay imong mahimo sa pagdapit kaniya? Sa unsa nga paagi ka makasalig sa Manluluwas sa pagtabang kaninyo?

Komentaryo ug Background nga Impormasyon

Jacob 1:7–8. Unsay buot ipasabot sa mga pulong ni Jacob?

Ang pagsabot sa mosunod nga mga termino nga gigamit ni Jacob makatabang.

“Makasulod ngadto sa kapahulayan [sa Dios]”:Kana lamang kon kita mosunod ni Jesukristo kita makatagamtam og kalinaw ug kagawasan gikan sa kabalaka.

“Hagit sa pagkasuko niadto nga mga adlaw sa pagtintal”:Human sa ilang pagkaluwas gikan sa Ehipto, ang karaang mga Israelita mipasuko sa Dios. Mao kana, misukol sila batok Kaniya, naglatagaw sa kamingawan sulod sa 40 ka tuig, ug nawad-an sa dagkong mga panalangin, lakip ang pagkaanaa sa presensiya sa Dios (tan-awa sa Mga Numero 14:2–3, 22–23; Mga Hebreohanon 3:8–9; Doktrina ug mga Pakigsaad 84:23–25).

“Moantos sa pagbiay-biay sa kalibotan”:Si Jacob nakasabot nga dili sayon nga mahimong disipulo ni Jesukristo. Gidapit kita sa pagsunod sa Manluluwas bisan pa sa oposisyon nga kanunay moabot uban niini.

Unsaon nako pagpangalagad ngadto sa uban ug sa paggiya kanila ngadto kang Kristo?

Si Presidente Bonnie H. Cordon, Kinatibuk-ang Presidente sa Young Women, mipasabot:

Presidente Bonnie H. Cordon

Samtang kita naningkamot sa pagsunod sa ehemplo sa Manluluwas, gikinahanglan nga kita nakaila ug nag-ihap sa Iyang karnero. … Ang pagbutang og numero, hinuon, dili gayod mahitungod lang sa mga numero; kini mahitungod sa pagsiguro nga ang matag tawo mobati sa gugma sa Manluluwas pinaagi sa usa ka tawo nga miserbisyo alang Kaniya. Sa ingon nga paagi, ang tanan makaamgo nga sila nailhan sa usa ka mahigugmaong Amahan sa Langit. …

… Samtang magtinguha kamo sa direksiyon sa Ginoo kon unsaon pagpaabot sa Iyang gugma ug pagkakita sa mga panginahanglan niadtong inyong gipangalagaran, ang inyong mga mata maabli. (Bonnie H. Cordon, “Pagkahimong usa ka Magbalantay,” Liahona, Nob. 2018, 75–76)

Sa unsa nga paagi ang Ginoo makapanalangin kanako samtang ako nagtabang sa uban sa pagduol ngadto Kaniya?

Si Presidente Henry B. Eyring sa Unang Kapangulohan mitudlo:

Presidente Henry B. Eyring

Ang inyong gahom pilopiloon pa sa Ginoo sa makadaghan. Ang Iya lamang nga gipangayo nga kamo mohatag sa inyong pinakamaayo nga paningkamot ug sa inyong bug-os nga kasingkasing. Magmalipayon nga mobuhat niini ug uban sa pag-ampo diha sa hugot nga pagtuo. Ang Amahan ug ang Iyang Pinalanggang Anak mopadala sa Espiritu Santo isip inyong kauban aron mogiya kaninyo. Ang inyong mga paningkamot mapalambo diha sa mga kinabuhi sa mga tawo nga inyong gialagaran. (Henry B. Eyring, “Barugi ang Inyong Balaang Tawag,” Liahona, Nob. 2002, 78)

Unsaon nako pagpalambo sa akong calling?

Si Presidente Henry B. Eyring sa Unang Kapangulohan mitudlo kon unsay gikinahanglan aron mapalambo ang atong mga calling:

Presidente Henry B. Eyring

Mag-agad kini sa atong kakugi sa pagpaningkamot nga mahibalo sa kabubut-on sa Ginoo ug sa atong mga paningkamot nga madungog ang Iyang tingog aron kita mas mahibalo unsay Iyang gusto sa tawo nga atong giserbisyohan alang Kaniya. Kana nga pagpalambo moabot pinaagi sa ginagmayng mga lakang. Tingali hinayhinay ang pag-abot niini, apan moabot kini. (Henry B. Eyring, “Mopanalangin pinaagi sa Iyang Ngalan,” Liahona, Mayo 2021, 70)

Dugang nga mga Kalihokan sa Pagkat-on

Jacob 1:17. Akong sugo gikan sa Ginoo

Mahimong makaayo sa mga estudyante ang paghisgot mahitungod sa unsay ipasabot sa pag-angkon og usa ka sugo gikan sa Ginoo. Tabangi ang mga estudyante nga makasabot nga makadawat kita og sugo gikan sa Ginoo kon modawat kita og tawag sa pagserbisyo sa Iyang Simbahan o pagtuman sa buluhaton sa pagpangalagad. Makaampo usab kita alang sa giya gikan sa atong Langitnong Amahan ug makasunod sa mga pag-aghat nga atong nadawat gikan sa Espiritu Santo. Ikonsiderar ang paggamit niini nga pamahayag ni Presidente Thomas S. Monson (1927–2018): “Kon kita anaa sa sugo gikan sa Ginoo, kita angayan sa panabang gikan sa Ginoo. Hinumdumi nga kon kinsa ang gitawag sa Ginoo, ang Ginoo ang mopasarang” (“Duty Calls,” Ensign, Mayo 1996, 44).

Jacob 1:18–19. Ang Ginoo naghatag kanato og mga kahigayonan sa pagserbisyo sa uban

Ikonsiderar ang pagpaambit nga “ang pagkamatinud-anon nga disipulo aron makatabang sa uban nga mahimong matinud-anong mga disipulo mao ang katuyoan luyo sa matag calling sa Simbahan” (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 4.1, ChurchofJesusChrist.org). Basaha ang Jacob 1:18–19 isip usa ka klase. Tabangi ang mga estudyante nga makakita nga si Jacob ug ang iyang manghod nga lalaki nga si Joseph seryoso kaayo sa ilang mga responsibilidad tungod kay sila gitawag sa Ginoo. Mahimo nimong gamiton ang mga pamahayag diha sa seksiyon sa “Komentaryo ug Background nga Impormasyon” aron pagdasig sa mga estudyante sa pagserbisyo sa Ginoo diha sa Iyang Simbahan.

Jacob 1:19. “Kami mipalambo sa among mga buluhaton”

Aron matabangan ang mga estudyante nga makasabot unsa ang gipasabot sa pagpalambo sa usa ka calling, pagdala og magnifying glass sa klase ug hisgoti kon unsay ipasabot sa pagpadako sa usa ka butang. Dayon tabangi ang mga estudyante sa paghisgot kon unsay buot ipasabot sa pagpalambo sa usa ka calling. Ang Doktrina ug mga Pakigsaad 24:9; 84:33 o mga pamahayag gikan sa mga lider sa Simbahan mahimong makatabang.