2 Նեփի 28.27–32

«Նրան, ով ընդունում է, [Աստված] կտա ավելին»

երիտասարդներն աղոթում են

Ունե՞ք անպատասխան հոգևոր հարցեր, կամ երբեմն ցանկանո՞ւմ եք, որ ձեր վկայությունն ավելի արագ զարգանա: Նեփին բացատրել է, որ Երկնային Հորից գիտելիքը գալիս է քիչ-քիչ, երբ շարունակում ենք ստանալ այն, ինչ Նա մեզ ուսուցանում է: Այս դասը կօգնի ձեզ ավելի խորը հասկանալ, թե Երկնային Հայրն ինչպես է հայտնում մեզ ճշմարտությունը:

Ուսուցանեք ուսանողներին համադրել սուրբ գրությունները: Համադրել սուրբ գրությունները նշանակում է համեմատել դրանք սեփական կյանքի հետ: Խրախուսեք ուսանողներին անել հետևյալ հարցադրումները․ «Իմ կյանքի ո՞ր հանգամանքներն ու իրավիճակներն են նման սուրբ գրությունների այս հատվածում նկարագրված հանգամանքներին և իրավիճակներին» կամ «Ինչո՞վ եմ ես նման այն կերպարներին, որոնց ուսումնասիրում ենք սուրբ գրություններում»:

Ուսանողի նախապատրաստում. ուսանողներին առաջարկեք կարդալ 2 Նեփի 28.30 հատվածը և պատրաստվել կիսվել դասարանի հետ օրինակով, թե ինչպես է Աստված քիչ-քիչ ուսուցանում մեզ Իր ավետարանը:

Հնարավոր ուսումնական վարժություններ

Աստված ուսուցանում է մեզ քայլ առ քայլ

Աստիճանների մասին ստորև ներկայացվող համանմանությունն օգտագործելու փոխարեն կարող եք դասը սկսել՝ որևէ ուսանողի առաջարկելով ուտել որևէ համեղ ուտելիք, որը չափազանց մեծ է՝ բերանում ամբողջությամբ տեղավորվելու համար: Երբ ուսանողը մի կտոր կծի, հարցրեք նրան, թե ինչու սկսեց մի կտոր կծելով, այլ ոչ թե միագամից կերավ: Ապա ուսանողներին առաջարկեք կարդալ 2 Նեփի 28.26–30 հատվածները և գտնել, թե այս առարկայական դասն ինչպես կարող է օգնել մեզ ավելի լավ հասկանալ մեր հոգևոր գիտելիքն ավելացնելու գործընթացը:

բարձրացող աստիճաններ

Պատկերացրեք, որ նայում եք երկար բարձրացող աստիճանների, որոնք ներկայացնում են ձեր հոգևոր գիտելիքն ու հասկացողությունը:

• Եթե աստիճանների ամենավերևում Աստծո գիտելիքն է, ըստ ձեզ, ներկայումս ո՞ր մակարդակում է ձեր գիտելիքը:

• Աստված ի՞նչ ձևերով է օգնում մեզ ժամանակի ընթացքում ավելացնել մեր հոգևոր գիտելիքն ու հասկացողությունը:

• Ի՞նչ կարող է պատահել մեկի հետ, որը չի կատարում հաջորդ քայլը, քանի որ իր ունեցած գիտելիքով վստահ չի զգում:

2 Նեփի 28 գլխում Նեփին շարունակել է վերջին օրերի մասին իր մարգարեությունը: Նա նկարագրել է որոշ մոտեցումներ, որոնք գերակայող էին լինելու մեր օրերում և ներկայացրել է մի ձև, որով Տերն օգնում է մեզ ստանալ ու հասկանալ ճշմարտությունը:

Կարդացեք 2 Նեփի 28.26–30 հատվածները և խորհեք այն բանի շուրջ, թե աստիճանների համանմանությունն ինչպես է օգնում ձեզ հասկանալ Տիրոջ մասին Նեփիի ուսուցանած ճշմարտությունները: Օգտակար կլինի իմանալ, որ ցուցումները պատվիրաններ և սկզբունքներ են, որոնք մեզ ուսուցանում են գործելու եղանակների մասին:

2 Նեփի 28.30 հատվածը վարդապետության սերտման հատված է: Կարող եք առանձնահատուկ ձևով նշել վարդապետության սերտման հատվածները, որպեսզի հեշտությամբ գտնեք դրանք: Հաջորդ դասին դուք հնարավորություն կունենաք կիրառելու այս հատվածում ուսուցանված վարդապետությունը որևէ հարցի կամ իրավիճակի համար:

• Այս հատվածը ի՞նչ է օգնում ձեզ հասկանալ Տիրոջ մասին: Այդ հասկացողությունն ինչպե՞ս կարող է օրհնել ձեր կյանքը:

• Ըստ ձեզ՝ որոշ մարդիկ ինչո՞ւ են մերժում Աստծո խոսքից ավելին իմանալու հնարավորությունը:

Կարդացեք հատված 30-ը և մտածեք, թե ձեր բառերով ինչպես կամփոփեիք այն, ինչ ուսուցանում է հատվածը: Կարող եք ձեր ամփոփ խոսքը գրանցել ձեր սուրբ գրությունների այդ հատվածների կողքին:

Ուսանողներին առաջարկեք կիսվել իրենց ամփոփ ներկայացմամբ:

Օրինակ մեր հոգևոր առաջընթացի համար

Այս հատվածում ներկայացված ճշմարտություններից մեկն այն է, որ Աստված ճշմարտությունը տող առ տող հայտնում է նրանց, ովքեր պետք է ստանան այն:

• Ինչո՞վ է օրհնություն հանդիսանում այն, որ Աստված մեզ ուսուցանում է քիչ-քիչ, այլ ոչ թե ամեն ինչ միանգամից:

• Ինչպե՞ս կարող է քիչ-քիչ սովորելու գործընթացն օգնել մեզ ավելի նմանվել Երկնային Հորը և Հիսուս Քրիստոսին: Քրիստոսանման ի՞նչ հատկանիշներ կարող ենք զարգացնել այս գործընթացի օգնությամբ:

Լույսի նմուշներ

Կարող եք դիտել «Լույսի նմուշներ. Հայտնության Հոգին» տեսանյութը (3:04), որը հասանելի է այստեղ՝ ChurchofJesusChrist.org: Փնտրեք այն եղանակները, որոնցով Աստված Իր կամքն է հայտնում Իր զավակներին:

• Ի՞նչ սովորեցիք երեց Բեդնարից, որը կարող է օգտակար լինել ձեր կյանքում:

• Ըստ ձեզ՝ երեց Բեդնարի նկարագրած ո՞ր օրինակներն են լավագույնս համապատասխանում հատված 30-ում Նեփիի ուսուցանածին:

Ուսուցման ստորև ներկայացվող առաջարկն օգտագործելու փոխարեն կարող եք օգտագործել սուրբ գրության ուսումնասիրման «Օժանդակ ուսումնական վարժություններ» բաժնում ներկայացված վարժությունը:

Կարդացեք սուրբ գրությունների հատվածներից առնվազն երկուսը և մտածեք, թե դրանք ինչ են ավելացնում 2 Նեփի 28.30 հատվածի ձեր ընկալմանը: Կարող եք ձեր սուրբ գրություններում այդ հատվածները կապել միմյանց հետ կամ խաչաձև հղում կատարել 2 Նեփի 28.30 հատվածին:

• Ալմա 12.9–11

• Վարդապետություն և Ուխտեր 42.61

• Վարդապետություն և Ուխտեր 50.24

• Վարդապետություն և Ուխտեր 98.11–12

• Ի՞նչ սովորեցիք այս հատվածներից, որոնք օգնում են ձեզ ավելի լավ հասկանալ 2 Նեփի 28.30 հատվածը:

• Ի՞նչ օրինակներ կան, թե 2 Նեփի 28.30 հատվածում ուսուցանվող ճշմարտություններն ինչպե՞ս են օգնել մարդկանց:

• Ձեր կյանքում ե՞րբ եք տեսել, որ Աստված քիչ-քիչ ուսուցանում է ձեզ կամ ձեր շրջապատի մարդկանց:

Մտածեք, թե ավետարանի ձեր հասկացողությունը և վկայությունը ժամանակի ընթացքում ինչպես են քիչ-քիչ ավելացել: Գրեք ձեր օրագրում, թե ըստ ձեզ, Երկնային Հայրն ինչ կցանկանար, որ հիշեիք և անեիք այսօրվա սովորածի արդյունքում:

Մի քանի ցանկացողի կարող եք առաջարկել մասամբ կիսվել իրենց գրածով:

Բացատրական և պատմական տեղեկություններ

«Տող առ տող» սկզբունքն ինչպե՞ս է կիրառվում մեր հոգևոր առաջընթացի համար:

Այն ժամանակ Առաջին Նախագահությունից նախագահ Դիտեր Ֆ․ Ուխդորֆը բացատրել է.

Նախագահ Դիտեր Ֆ. Ուխդորֆ

Հայտնությունն ու վկայությունը միշտ չէ, որ ճնշող ուժով են գալիս: Շատերի համար վկայությունը գալիս է դանդաղ՝ փոքր բաժիններով: Երբեմն դա գալիս է այնքան աստիճանաբար, որ դժվար է հիշել ճշգրիտ պահը, երբ մենք իրականում գիտեինք, որ ավետարանը ճշմարիտ է: Տերը մեզ տալիս է «տող առ տող, ցուցում առ ցուցում՝ մի քիչ այստեղ և մի քիչ այնտեղ» [2 Նեփի 28.30]: (Դիտեր Ֆ. Ուխդորֆ, «Ձեր ներուժը ձեր առավելությունն է», Ensign կամ Լիահոնա, մայիս 2011թ., 60):

Պատասխանները միանգամից չստանալը ինչպե՞ս կարող է օրհնություն լինել:

Տասներկու Առաքյալների Քվորումից երեց Ռիչարդ Գ. Սքոթը (1928–2015) ուսուցանել է.

Երեց Ռիչարդ Գ. Սքոթ

Երբ հասնում եք ձեր հասկացողության սահմանին և մտնում անորոշության խավարի մեջ, հավատը գործածելով կգտնեք լուծումներ, որոնք այլապես չէիք ունենա: Անգամ եթե ունեք ամենաամուր հավատը, Աստված միշտ չէ, որ անմիջապես կարձագանքի ձեր ցանկությանը: Ավելի շուտ՝ Աստված կարձագանքի ըստ այն բանի, ինչը Նրա հավերժական ծրագրում լավագույնն է ձեզ համար, երբ դա ամենամեծ առավելությունը կտա ձեզ: Շնորհակալ եղեք, երբ նախքան պատասխանն ստանալը Աստված երբեմն թույլ է տալիս ձեզ երկար պայքարել: Դա ստիպում է, որ ձեր հավատը աճի, իսկ բնավորությունը ամրանա (Ռիչարդ Գ. Սքոթ, «Հավատի և բնավորության վերափոխող զորությունը», Ensign կամ Լիահոնա, նոյեմբեր 2010թ., 44):

Տասներկու Առաքյալների Քվորումից երեց Դ․ Թոդ Քրիստոֆերսոնը պատմել է այն մասին, որ ինքն արագ չստացավ մի կարևոր խնդրի լուծումը, չնայած իր անկեղծ աղոթքներին.

Երեց Դ. Թոդ Քրիստոֆերսոն

Թեպետ այն ժամանակ ես տառապում էի, սակայն այժմ երախտապարտ եմ, որ իմ խնդրին շուտափույթ լուծում չտրվեց: Այն փաստը, որ ես ամեն օր ստիպված էի դիմել Աստծո օգնությանը երկար տարիների ընթացքում, իսկապես սովորեցրեց ինձ, թե ինչպես աղոթել ու ստանալ պատասխաններ, և բազմաթիվ գործնական ձևերով ուսուցանեց ինձ հավատք ունենալ առ Աստված։ Ես ճանաչեցի իմ Փրկչին և իմ Երկնային Հորը մի ձևով և մի աստիճանով, որն այլ կերպ հնարավոր չէր, կամ որին հասնելու համար ինձանից կպահանջվեր ավելի շատ ժամանակ։ Ես սովորեցի ապավինել Տիրոջը իմ ողջ սրտով: Ես սովորեցի Նրա հետ օրեցօր քայլել (Դ. Թոդ Քրիստոֆերսոն, «Ճանաչելով Աստծո ձեռքը մեր ամենօրյա օրհնություններում», Ensign, հունվար 2012թ., 19):

Օժանդակ ուսումնական վարժություններ

Սուրբ գրությունների ուսումնասիրման վարժություն

Այս վարժությունը նախատեսված է օգնելու ուսանողներին տեսնել, որ նախքան հետագա ցուցումներ ստանալը մենք հաճախ պետք է նախ հնազանդվենք այն ամենին, ինչ ստացել ենք:

Ուսանողներին տեղեկացրեք, որ վարժությունը կատարելու համար նրանց խումբը պետք է կարդա և ձեզ ներկայացնի, թե սուրբգրային չորս հատվածների ուսումնասիրությունն ինչպես է մեծացնում 2 Նեփի 28.30 հատվածի նրանց հասկացողությունը:

Խմբերին հանձնարարեք առաջինն ուսումնասիրեն Վարդապետություն և Ուխտեր 42.61 հատվածը: Երբ յուրաքանչյուր խումբ ներկայացնի, թե տվյալ հատվածն ինչպես է մեծացնում 2 Նեփի 28.30 հատվածի իր հասկացողությունը, խմբին հանդարտ կերպով հանձնարարեք հաջորդ հղումը, որպեսզի շարունակեն ուսումնասիրել: Այս գործընթացը պետք է շարունակվի այնքան, մինչև յուրաքանչյուր խումբ հայտնի, թե ինչ սովորեց ստորև ներկայացվող բոլոր չորս հատվածներից:

• Վարդապետություն և Ուխտեր 42.61

• Վարդապետություն և Ուխտեր 50.24

• Վարդապետություն և Ուխտեր 98.11–12

• Ալմա 12.9–11

Տող առ տող՝ Եկեղեցու պատմության մեջ

Կարող է օգտակար լինել Եկեղեցու պատմությունից օրինակների քննարկումը, որոնք ցույց են տալիս, որ Տերն Իր ճշմարտությունը հայտնում է «տող առ տող, ցուցում առ ցուցում, մի քիչ այստեղ և մի քիչ այնտեղ» (2 Նեփի 28.30): Քննարկումը սկսելու համար կարող եք օգտագործել Տասներկու Առաքյալների Քվորումից երեց Դեյվիդ Ա․ Բեդնարի հետևյալ խոսքերը.

Եկեղեցու պատմությունն ու մեր անձնական կյանքերը լի են Տիրոջ կողմից «տող առ տող, ցուցում առ ցուցում» հայտնություն ստանալու օրինակներով: Օրինակ՝ վերականգնված ավետարանի հիմնական ճշմարտությունները Սրբազան Պուրակում միանգամից չտրվեցին մարգարե Ջոզեֆ Սմիթին: Այդ անգին գանձերը բացահայտվել են, երբ հանգամանքները թույլ են տվել, և երբ ճիշտ ժամանակն է եղել (Դեյվիդ Ա. Բեդնար, «Հայտնության Հոգին»», Ensign կամ Լիահոնա, մայիս 2011թ., 88):

Հիսուսն առաջադիմել է շնորհից շնորհ

Ուսանողներին առաջարկեք կարդալ Վարդապետություն և Ուխտեր 93.11–20 հատվածները և գտնել, թե Փրկչի առաջընթացն ինչպես է ցույց տալիս այն, ինչ ուսուցանվում է 2 Նեփի 28.30 հատվածում: Ուսանողներին օգնեք հասկանալ, որ Փրկչի հատկանիշներից մեկը համբերությունն է, և մենք ավելի ենք նմանվում Նրան, երբ համբերությամբ սովորում ենք տող առ տող:

Նրանց առաջարկեք կարդալ նաև Ղուկաս 2.40 հատվածը և գտնել Փրկչի առաջընթացի այն չորս ոլորտները, որոնք հիշատակվում են այդ հատվածում: Երիտասարդների և երեխաների ծրագրի ուսանողներին հիշեցրեք և խրախուսեք նրանց սահմանել ու աշխատել այնպիսի նպատակների ուղղությամբ, որոնք կօգնեն նրանց տող առ տող առաջընթաց ունենալ այս չորս ոլորտներից յուրաքանչյուրում: