2 Նեփի 27

«Զարմանահրաշ ու զարմանալի բաներ»

Մորմոնի Գրքի օրինակներ տարբեր լեզուներով

Հիշեք իրադարձություններ, որոնք կհամարեիք զարմանահրաշ, և այդ իրադարձություններն ինչպես են ազդել ձեր և ձեր շրջապատի վրա: Հիսուս Քրիստոսը խոստացավ վերջին օրերին երկրի վրա զարմանահրաշ բաներ կատարել՝ վերականգնելով Իր ավետարանը, այդ թվում՝ Մորմոնի Գիրքը: Այս դասը կօգնի ձեզ ավելի մեծ երախտագիտություն զգալ Տիրոջ հանդեպ՝ երկրի վրա Մորմոնի Գրքի վերականգնման համար:

Ուսուցանեք Հոգով Ոչ մի մահկանացու ուսուցիչ, որքան էլ որ հմուտ ու փորձառու լինի, չի կարող փոխարինել Հոգուն: Բայց մենք կարող ենք գործիք լինել Աստծո ձեռքերում՝ օգնելով Նրա զավակներին Հոգով սովորել: Նախագահ Հենրի Բ. Այրինգն ուսուցանել է. «Մեր ուսանողները չեն կարողանա ճանաչել Աստծուն և սիրել Նրան այնպես, ինչպես պետք է, եթե չուսուցանվեն Սուրբ Հոգով» («Սուրբ Հոգու կարևությունը», Հին Կտակարանի նյութ սեմինարիայի ուսուցչի համար [2018], ChurchofJesusChrist.org):

Ուսանողի նախապատրաստում. ուսանողներին առաջարկեք պատրաստվել և կիսվել մի մարդու մասին պատմությամբ, որը նրանց կամ նրանց ծանոթ մեկի համար որևէ զարմանահրաշ գործ է կատարել: Օրինակ՝ գուցե ինչ-որ մեկը փրկել է նրանց վտանգավոր իրավիճակից կամ նրանց մի խոշոր նվեր է տվել:

Հնարավոր ուսումնական վարժություններ

Զարմանահրաշ մի բան

Որպեսզի պատրաստեք ուսանողներին կիսվելու հետևյալով, կարող եք պատմել մի մարդու մասին, որը ձեզ համար ինչ-որ բան է արել, որը համարում եք զարմանահրաշ կամ կարևոր:

Մտածեք մի մարդու մասին, որը ինչ-որ զարմանահրաշ, սքանչելի բան է արել ձեզ կամ ձեզ ծանոթ մեկի համար:

• Ի՞նչ է արել այդ մարդը:

• Ի՞նչ եք զգացել այդ մարդու հանդեպ, որն արել է դա: Ինչո՞ւ:

2 Նեփի 27 գլխում Տերը վկայում է մի զարմանահրաշ բանի մասին, որը Նա անելու է, որպեսզի օգնի մեզ վերջին օրերի ամբարշտության և ուրացության մեջ: Ուսումնասիրելիս մտածեք, թե ձեր սովորածն ինչպես է ազդում Տիրոջ հանդեպ ձեր վերաբերմունքի վրա:

Կարդացեք 2 Նեփի 27.25–26 հատվածները և գտեք, թե Տերն ինչ խոստացավ անել:

Ուսանողներին առաջարկեք պատմել, թե ըստ իրենց, ինչ է նշանակում «Զարմանահրաշ ու զարմանալի բաներ»: Անհրաժեշտության դեպքում ներկայացրեք նախագահ Ռասսել Մ. Նելսոնի հետևյալ բացատրությունը:

Նախագահ Ռասսել Մ. Նելսոնը նշել է, որ այս «զարմանահրաշ բանը» ներառելու է Մորմոնի Գրքի ի հայտ գալը և Ավետարանի վերականգնումը» («Սուրբ գրությունների վկաներ», Ensign կամ Լիահոնա, նոյեմբեր 2007թ., 46):

Ճշմարտություններից մեկը, որ կարող ենք սովորել այս մարգարեությունից, այն է, որ Մորմոնի Գրքի ի հայտ գալով և Ավետարանի վերականգնումով Տերը զարմանահրաշ ու զարմանալի բաներ է կատարել:

• Ի՞նչ գիտեք Մորմոնի Գրքի և վերականգնված ավետարանի մասին, որի շնորհիվ դրանց մասին կմտածեք որպես «զարմանահրաշ ու զարմանալի բաներ»:

Մորմոնի Գիրքը. Զարմանահրաշ ու զարմանալի բաներ

2 Նեփի 27 գլխի մեծ մասում խոսվում է Մորմոնի Գրքի ի հայտ գալու մասին: Նախքան այս գլխից ավելին ուսումնասիրելը՝ մի պահ մտածեք Մորմոնի Գրքի վերաբերյալ ձեր զգացողությունների մասին: Արդյո՞ք դա զարմանահրաշ է անձամբ ձեզ համար: Ինչո՞ւ այո, կամ ինչո՞ւ ոչ: Ի՞նչ հարցեր ունեք: Ուսումնասիրելիս գտեք այն ուսմունքները, որոնք կարող են օգնել ձեզ ավելի հստակ տեսնել Մորմոնի Գիրքը՝ որպես մի «զարմանահրաշ ու զարմանալի բան»:

Օգտակար կլինի դասարանով կարդալ ստորև ներկայացված ամփոփիչ հատվածները:

Նեփին մարգարեացել է, որ Մորմոնի Գիրքն ի հայտ կգա վերջին օրերի խնդիրներում օգնելու համար (տես 2 Նեփի 27.6): Նա նաև գրել է, որ Աստված թույլ կտա, որ մի քանի վկաներ տեսնեն Մորմոնի Գրքի թիթեղները, որոնցից կատարվել է թարգմանությունը, և աշխարհին վկայի գրքի ճշմարտացիության մասին (տես 2 Նեփի 27.12–14): Նեփին այնուհետև կիսվել է Մորմոնի Գրքի թարգմանությանը վերաբերող որոշ մանրամասների մարգարեությամբ:

Կարող եք ուսանողներին տրամադրել կամ ցուցադրել ստորև ներկայացվող աղյուսակը: Ուսանողները կարող են զույգերով կամ փոքր խմբերով ուսումնասիրել հատվածները և լրացնել աղյուսակը:

	Մարգարեություն այն մասին, թե ինչ է անելու մարդը (2 Նեփի 27.15–19)	Մարգարեությունն իրականացրած մարդու անունը (Ջոզեֆ Սմիթ—Պատմություն 1.63–65)
Առաջին մարդ («անուս»)
Երկրորդ մարդ («այլ»)
Երրորրդ մարդ («ուսյալ»)

Ուսումնասիրման համար ուսանողներին բավարար ժամանակ տրամադրելուց հետո մի քանի ցանկացողի առաջարկեք կիսվել իրենց սովորածով: Ստորև ներկայացվող հարցերն ուղղեք որպես այս քննարկման մաս:

• Ըստ ձեզ՝ Մորմոնի Գիրքը ստեղծելու համար Տերն ինչո՞ւ ընտրեց Ջոզեֆ Սմիթին, որն անուս մարդ էր:

Կարդացեք 2 Նեփի 27.20–23 հատվածները և գտեք, թե Մորմոնի Գիրքը թարգմանելու համար Աստված ինչու ընտրեց մեկին, ով անուս էր:

• Այս հատվածներից ի՞նչ սովորեցիք Տիրոջ մասին: Նրա մասին այս գիտելիքը ի՞նչ ազդեցություն կարող է ունենալ ձեզ վրա:

• Մորմոնի Գրքի ի հայտ գալն ինչպե՞ս է ապացուցում Տիրոջ այս խոսքը. «Ես ի վիճակի եմ անել իմ սեփական գործը» (հատված 21):

Բացի ստորև ներկայացվող հայտարարությունից կարող եք կիսվել «Բացատրական և պատմական տեղեկություններ» բաժնում ներկայացված նախագահ Ռասսել Մ. Նելսոնի հայտարարությամբ:

Էմմա Սմիթը (1804–1879)՝ մարգարեի կինը, վկայել է այն աստվածային օժանդակության մասին, որը Ջոզեֆը ստացել է Մորմոնի Գիրքը թարգմանելիս.

Էմմա Սմիթ

Ջոզեֆ Սմիթը ո՛չ կարող էր գրել, ո՛չ էլ թելադրել համահունչ և լավ ձևակերպված նամակ, ուր մնաց թելադրեր Մորմոնի Գրքի նման գիրք: Ու թեև ես ակտիվ մասնակցում էի տեղի ունեցող գործողություններին, … դա ինձ համար զարմանալի էր՝ «զարմանահրաշ ու զարմանալի բան»: …

Ես համոզված եմ, որ Մորմոնի Գիրքն աստվածային իսկություն ունի, ես դրա մասին փոքրագույն կասկած անգամ չունեմ: … Անհավատալի կլիներ անգամ, որ ուսյալ մարդը կարողանար դա անել. իսկ նրա նման մեկի համար, որն անտեղյակ ու անուս էր, դա պարզապես անհնար էր (Էմմա Սմիթ, «Քույր Էմմայի վերջին վկայությունը», Սրբերի բանբերը, 1-ը հոկտեմբերի, 1879թ., 290):

• Ըստ այսօր ձեր սովորածի՝ Մորմոնի Գրքի ի հայտ գալն ինչո՞վ է «զարմանահրաշ ու զարմանալի բան»:

• Գիտելիքը, որ Տերն է շնորհել մեզ այս օրհնությունը, ինչպե՞ս է ազդում Նրա հանդեպ ձեր վերաբերմունքի վրա:

• Դուք կամ ուրիշները ի՞նչ փորձառություն եք ունեցել, որը ցույց է տալիս, թե ինչ սքանչելի գործ է Մորմոնի Գիրքը:

Որպես նախորդ հարցերի ձեր քննարկման մաս՝ կարող եք կիսվել անձնական փորձառությամբ կամ ստորև նեկայացվող տեսանյութերից մեկով:

Որպեսզի տեսնեք օրինակներ, թե որքան սքանչելի է Մորմոնի Գիրքը, կարող եք դիտել «Կյանքի խնդիրները լուծել Մորմոնի Գրքի օգնությամբ» տեսանյութը (1:00) կամ «Մորմոնի Գիրքը. ինչպիսի՞ն կլիներ ձեր կյանքն առանց նրա» տեսանյութի 5:38-11:26-ը: Երկու տեսանյութն էլ կարելի է գտնել այստեղ՝ ChurchofJesusChrist.org:

Դասի սկզբում ձեզ խնդրել էին մտածել Մորմոնի Գրքի հանդեպ վերաբերմունքի մասին: Մտածեք՝ արդյոք այսօր ուսումնասիրած ճշմարտություններից որևէ մեկն ազդել է այս սրբազան գրքի մասին ձեր վկայության վրա: Օրագրում գրանցեք ձեր ստացած բոլոր մտքերը կամ տպավորությունները, ինչպես նաև բոլոր այն գործողությունները, որոնք ձեռնարկելու համար հուշում եք ստացել:

Կարող եք մի քանի կամավորի առաջարկել կիսվել դասի ժամանակ ունեցած իրենց նշանակալից մտքերով կամ գաղափարներով: Բերեք այսօր քննարկված ճշմարտությունների մասին ձեր վկայությունը:

Բացատրական և պատմական տեղեկություններ

Ինչպե՞ս կարող է Մորոնի Գրքի ի հայտ գալը զարմանահրաշ ու զարմանալի բան լինել:

Նախագահ Ռասսել Մ. Նելսոնն ուսուցանել է․

Նախագահ Ռասսել Մ. Նելսոն

Մտածեք այն կարճ ժամանակահատվածի մասին, որը պահանջվեց Ջոզեֆից՝ Մորմոնի Գիրքը թարգմանելու համար: Աշխատելով 1828 թվականի ապրիլից մինչև հունիսը՝ Ջոզեֆը թարգմանեց 116 էջ, որոնք ավելի ուշ Մարտին Հարիսը կորցրեց: Ջոզեֆը կրկին սկսեց թարգմանել 1829 թվականի ապրիլի 7-ին, երեքշաբթի օրը՝ Օլիվեր Քաուդերիի հետ՝ որպես իր դպիր։ Ձեռագիրն ավարտին հասցվեց ութսունհինգ օր անց՝ այդ տարվա հունիսի 30-ին։ Իհարկե, ոչ ամբողջ ժամանակն էր ծախսվել թարգմանության վրա աշխատելով։ Մարգարեն և նրա դպիրները նաև ժամանակ էին հատկացնում ուտելու, քնելու, աշխատանք փնտրելու, Ահարոնյան և Մելքիսեդեկյան քահանայությունները ստանալու, դեպի Կոլսվիլ առնվազն մեկ (և հավանաբար երկու) ճամփորդություն կատարելու, որը 30 մղոն հեռավորության վրա էր, երեսուն հայտնությունները, որոնք այժմ Վարդապետություն և Ուխտերի բաժիններն են, ստանալու և դրանք գրառելու, Հարմոնիից Ֆայեթ տեղափոխվելու, Մորմոնի Գրքի հեղինակային իրավունքը ձեռք բերելու և Մորմոնի Գրքի հրատարակման աշխատանքների կազմակերպումը սկսելու համար: Մոտավոր հաշվարկով մնում է վաթսունհինգ կամ ավելի քիչ աշխատանքային օր, որոնց ընթացքում մարգարեն և նրա դպիրները թարգմանեցին այս գիրքը, որի ներկայիս հրատարակությունը պարունակում է 531 էջ (տե՛ս Ջոն Վ. Վելիչ, Ensign, հունվար, 1988թ., էջեր 46–47): Ըստ այդ հաշվարկի՝ դա մոտավորապես կազմում է օրական ութ էջ։ Հաշվի առեք սա, երբ գիրք եք թարգմանում, կամ երբ ծրագրում եք Մորմոնի Գրքի ձեր սեփական ընթերցումը: (Ռասսել Մ. Նելսոն, «Թանկագին կտակարան», Ensign, հուլիս 1993թ., 61–62):

Տասներկու Առաքյալների Քվորումից երեց Ուլիսես Սոարեսը վկայել է․

Երեց Ուլիսես Սոարես

Մորմոնի Գրքի թարգմանության գործընթացը … հրաշք էր: Այս հնագույն սուրբ հիշատակարանը «չի թարգմանվել» այն ավանդական եղանակով, որով գիտնականները կթարգմանեին հնագույն տեքստերը՝ սովորելով որևէ հնագույն լեզու: Մենք գործընթացին պետք է նայենք ավելի շուտ որպես «հայտնություն», որի ժամանակ Տիրոջ կողմից տրամադրվել են ֆիզիկական գործիքներ, և չդիտարկենք այն որպես լեզուների իմացություն ունեցող մարդու «թարգմանություն»: … Տիրոջ օգնությունը թիթեղների թարգմանության կամ այսպես ասած՝ հայտնության հարցում ակնհայտ է նաև այն դեպքում, երբ հաշվի ենք առնում այն անհավատալի կարճ ժամանակը, որի ընթացքում Ջոզեֆ Սմիթը թարգմանեց դրանք։ (Ուլիսես Սոարես, «Մորմոնի Գրքի ստեղծումը», Ensign կամ Լիահոնա, մայիս 2020թ., 33):

Դիտեք «Համոզիչ վկա» տեսանյութը (7:46), և կտեսնեք լրացուցիչ օրինակներ, թե ինչպես է Մորմոնի Գրքի ստեղծումը զարմանահրաշ ու զարմանալի բան:

Ի՞նչն է զարմանահրաշ Քրիստոսի Եկեղեցու և ավետարանի վերականգնման գործում:

Դիտեք «Երկուհարյուրամյա հռչակագիր աշխարհին» տեսանյութի 2:41-9:13-ը կամ կարդացեք Հիսուս Քրիստոսի ավետարանի ամբողջականության վերականգնումը. Երկուհարյուրամյա հռչակագիր աշխարհին» (ChurchofJesusChrist.org)՝ փնտրելով, թե ինչն է զարմանահրաշ Քրիստոսի Եկեղեցու և ավետարանի վերականգման գործում:

Օժանդակ ուսումնական վարժություններ

Բացատրեք վարժությունը

Կարող եք ուսանողներին առաջարկել 2 Նեփի 27.1–5 հատվածում նկարագրված պայմանները համեմատել 2 Նեփի 27.29–31, 35 հատվածում ներկայացված Տիրոջ խոստումների հետ: Որպեսզի օգնեք ուսանողներին մտածել, թե ինչ ազդեցություն ունեցան Մորմոնի Գիրքը և վերականգված ավետարանն աշխարհի վրա, առաջարկեք նրանց ընտրել ստորև ներկայացված իրավիճակներից մեկը կամ մի քանիսը (հարմարեցվել են 2 Նեփի 27.1–5 հատվածից): Իրենց ընտրած յուրաքանչյուր իրավիճակի համար նրանք կարող են Մորմոնի Գրքի որևէ հատվածում ուսուցանվող մի ճշմարտություն գտնել, որը զգում են, որ կարող է օգնել իրենց:

• Անկայուն կամ կախվածություններ ունեցող մեկը

• Կյանքի փոթորիկներից կացարանի կարիք ունեցող մեկը

• Իր հոգևոր քաղցը կամ ծարավը հագեցնելու կարիք ունեցող մեկը

• Ավելի հստակ տեսնելու կարիք ունեցող մեկը

Օրինակ՝ կախվածություն ունեցող մեկին կարող է օգնել Ալմա 7.11–13 հատվածում ուսուցանվող այն ճշմարտությունը, որ Փրկիչը հասկանում է և կարող է օգնել ցանկացած գայթակղության դեպքում:

Խնդրեք ուսանողներին կիսվել իրենց գտած նյութով:

2 Նեփի 27.15–19 Անուս մարդու մասին մարգարեության իրականացումը

Որպեսզի օգնեք ուսանողներին ավելին իմանալ 2 Նեփի 27.15–19 հատվածների մարգարեության իրականացման մասին, կարող եք ցուցադրել «Զարմանահրաշ ու զարմանալի բաներ» տեսանյութը (5:46): Այդ մասին կարող եք նաև միասին կարդալ Սրբեր. Հիսուս Քրիստոսի Վերջին Օրերի Սրբերի Եկեղեցու պատմությունը հ. 1, Ճշմարտության դրոշը 1815–1846 (2018), 44-48: