“2 Nīfai 28:1–26: Ko Hono ʻIloʻi mo Ikunaʻi e Ngaahi Founga ʻa Sētané,” Tohi ʻa Molomoná – Tohi Lēsoni ʻa e Faiakó (2024)
“2 Nīfai 28:1–26,” Tohi ʻa Molomoná – Tohi Lēsoni ʻa e Faiakó
2 Nīfai 28:1–26
Ko Hono ʻIloʻi mo Ikunaʻi e Ngaahi Founga ʻa Sētané
ʻOkú ke ongoʻi loto falala nai ki hoʻo malava ke fakatokangaʻi e ngaahi feinga ʻa Sētane ke taki koe ke mamaʻo mei he Fakamoʻuí? Naʻe fakamahinoʻi ʻe Nīfai ha niʻihi ʻo e ngaahi fakakaukau mo e ngaahi founga hala ʻe fakaʻaongaʻi ʻe Sētane ke feinga ke fakatafoki ʻaki e kakaí mei he Tamai Hēvaní mo Sīsū Kalaisi ʻi he ngaahi ʻaho fakaʻosí. ʻOku fakataumuʻa ʻa e lēsoni ko ʻení ke tokoniʻi koe ke ke fakatokangaʻi e ngaahi founga olopoto ʻa Sētané pea fekumi ki he tokoni ʻa e Fakamoʻuí ke ikunaʻi kinautolu.
Ko hono poupouʻi e kau akó ke nau falala kia Sīsū Kalaisí. Fakaʻaongaʻi e folofolá mo e ngaahi lea ʻa e kau palōfitá ke tokoni ke mahino ki he kau akó ʻoku maʻu ʻe Sīsū Kalaisi ʻa e mālohi ke tokoniʻi kinautolú. Te nau lava ʻo ngāue ʻaki ʻa e tui kiate Iá ke ikunaʻi e ngaahi ʻahiʻahí, fakatomala mei he angahalá, pea kātekina e ngaahi faingataʻá.
Teuteu ʻa e tokotaha akó: Fakakaukau ke fakaafeʻi e kau akó ke lau e konga “Fanga Sitá mo e Fanga Topí” ʻi he lea “Tokanga ke Lotu Maʻu Ai Pē” naʻe fai ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá (Ensign pe Liahona, Nōvema 2019, 32). Pe ko hono fakaafeʻi e kau akó ke nau mamata ʻi he “Tokanga ke Lotu Maʻu Ai Pē” mei he taimi 1:27 ki he 5:00, ʻo kumi e founga ʻe lava ke akoʻi ai ʻe he mahino ki he fanga monumanu fekaí ha ngaahi moʻoni mahuʻinga fekauʻaki mo e ngaahi founga ʻa Sētané. ʻOku maʻu e foʻi vitioó ni ʻi he ChurchofJesusChrist.org.
Ngaahi ʻEkitivitī Ako ʻe Ala Fakahokó
Ngaahi taumuʻa ʻa Sētané
Fakakaukau ke kamata e lēsoní ʻaki hano vahevahe e fakamatala ko ʻení:
ʻOku tau kau atu ki ha tau ʻoku hokohoko atu ai hono fakafepakiʻi e koví. Naʻe akoʻi ʻe Palesiteni ʻEselā Tafu Penisoni (1899–1994) ʻa e founga ʻe lava ke tokoniʻi ai kitautolu ʻe he Tohi ʻa Molomoná ʻi he tau ko ʻení:
ʻOku fakahaaʻi ʻe he Tohi ʻa Molomoná ʻa e ngaahi fili ʻo Kalaisí. ‘Okú ne veuveuki ʻa e ngaahi tokāteline halá pea fakangata ‘a e fakakikihí. (Vakai, 2 Nīfai 3:12.) ʻOkú ne fakamālohia e kau muimui loto fakatōkilalo ʻo Kalaisí mei he ngaahi fokotuʻutuʻu, ngāue mo e tokāteline ʻa e tēvoló ʻi hotau kuongá. (Ezra Taft Benson, “The Book of Mormon Is the Word of God,” Ensign, Jan. 1988, 3)
-
Ko e hā ha ngaahi founga ʻokú ke vakai ai ki hono fakahoko ʻe he Tohi ʻa Molomoná ha niʻihi ʻo e ngaahi meʻa ko ʻeni naʻe akoʻi ʻe Palesiteni Penisoní?
ʻI hoʻo akó, kumi ha ngaahi moʻoni ʻe lava ʻo tokoni atu ke ke ʻiloʻi lelei ange ai mo ikunaʻi e ngaahi founga olopoto ʻa Sētané.
Ngaahi akonaki hala mo e ngaahi founga ʻa Sētané
Makatuʻunga ʻi he ngaahi fiemaʻu mo e meʻa ʻoku malava ʻe he kau akó, ʻe ʻaonga ke ʻoange ha taimi ki he kau akó ke nau lau kotoa e 2 Nīfai 28 ʻiate kinautolu pē kimuʻa pea nau aleaʻi fakakalasi e vahé. ʻE lava ke hiki ʻe he kau akó ha lisi ʻo e ngaahi meʻá ni ʻi heʻenau akó: Ngaahi founga mo e akonaki hala ʻa Sētané, sīpinga ʻo e ngaahi founga mo e ngaahi akonaki hala ko iá ʻi hotau kuongá ni, pea mo e ngaahi akonaki ʻe lava ʻo tokoni ke tau ikunaʻi e ngaahi ngāue ʻa Sētané. Hili iá, ʻe lava ke vahevahe ʻe he kau akó e meʻa ne nau ako mei heʻenau laukongá. Kapau te ke fili ʻeni, fakakaukau ke liliu e naunau fakalēsoni ko ʻení ke tokoni ki he kau akó ʻi hono fakahoko mo fakaʻaongaʻi ʻa e meʻa ʻoku nau akó.
ʻI he 2 Nīfai 28, naʻe hoko atu ai e kikite ʻa Nīfai kau ki he ngaahi ʻaho fakaʻosí. Lau ʻa e 2 Nīfai 28:5–9, ʻo kumi ha niʻihi ʻo e ngaahi angahala mo e ngaahi tōʻonga naʻe pehē ʻe Nīfai ʻe hoko ʻi hotau kuongá.
-
Ko e hā ha fakamoʻoni ʻokú ke mamata ki ai ʻo e ngaahi akonaki mo e ngaahi tōʻonga ko ʻení ʻi hotau kuongá ni?
-
ʻOku fakatuʻutāmaki fakalaumālie fēfē nai e ngaahi akonaki kovi ʻi he ngaahi veesi ko ʻení pea mo e tōʻonga fakakaukau ʻa kinautolu ʻoku tui kiate kinautolú?
ʻOku fakafofongaʻi ʻe he ngaahi veesi ko ʻení ha niʻihi ʻo e ngaahi tōʻonga fakakaukau mo e tui ʻoku tupu mei he ngaahi kākā ʻa Sētané. Naʻe hoko atu ʻe Nīfai ʻene ngaahi akonakí ʻaki ʻene feinga ke ʻiloʻi e ngaahi founga pau ʻe fakaʻaongaʻi ʻe Sētane ke feinga ke puke ai kitautolu ʻaki hono mālohí.
Fakakaukau ke hiki e fakamatala taʻe kakato ko ʻení ʻi he palakipoé: ʻOku feinga ʻa Sētane ke pukenimā kitautolu ʻaki ʻene ngaahi sēini taʻengatá ʻaki …
Lau ʻa e 2 Nīfai 28:19–22, ʻo kumi e ngaahi akonaki ʻe lava ʻo tokoni atu ke ke fakakakato ʻa e fakamatala ko ʻení:
-
Makatuʻunga ʻi he meʻa naʻá ke ako mei he ngaahi veesi ko ʻení, ko e hā ha ngaahi founga te ke lava ʻo fakakakato ai ʻa e konga leá: ʻOku feinga ʻa Sētane ke pukenimā kitautolu ʻaki ʻene ngaahi sēini taʻengatá ʻaki … ?
Fakakaukau ke fakaafeʻi e kau akó ke hiki ha ngaahi kupuʻi lea ʻi he palakipoé te nau lava ʻo fakakakato ʻa e sētesí: ʻOku feinga ʻa Sētane ke pukenimā kitautolu ʻaki ʻene ngaahi sēini taʻengatá ʻaki … Ko ha niʻihi ʻeni ʻo e ngaahi akonaki mahalo naʻe ʻilo ʻe he kau akó:
-
ueʻi hake ʻa e kakaí ke ʻita ki he meʻa ʻoku leleí,
-
fakafiemālieʻi mo kākaaʻi fakaoloolo ʻa e niʻihi kehé ki ha fiemālie fakakakano, pea mo
-
talaange ki he kakaí ʻoku ʻikai ha heli pea ʻoku ʻikai ha tēvolo.
Mahalo ʻe tokoni ke ʻiloʻi ʻoku ʻuhinga ʻa e kupuʻi lea “kākaaʻi fakaoloolo ʻa kinautolu ke nau fiemālie fakakakanó” (veesi 21) ki he feinga ʻa Sētane ke ongoʻi fiemālie ʻa e kakaí ʻi honau tuʻunga faiangahalá pea ʻoku ʻikai fiemaʻu ke nau liliu.
Fakakaukau ke fakaafeʻi e kau akó ke toe fakakaukau lahi ange pe ʻoku fēfē ʻa e taimi ʻoku fakaʻaongaʻi ai ʻe Sētane e ngaahi founga takitaha ko ʻení he ʻaho ní. Te ke lava ʻo vahevahe e ngaahi tūkunga ko ʻení pea kole ki he kau akó ke nau talaatu pe ko e fē ʻi he ngaahi founga ʻa Sētane mei he veesi 20–22 ʻoku fakafofongaʻi ʻi he tūkunga takitaha.
-
Naʻe fai ʻe Malia ʻa e fili ke kākā ʻi heʻene ngāue fakaakó kae lava ke ne maʻu ha maaka lelei. Naʻá ne ongoʻi halaia ʻi he kamataʻangá, ka naʻá ne fakatokangaʻi naʻe ʻikai teitei maʻu ia pea iku ʻo ne kākā ʻi ha ngaahi ngāue kehe foki. ʻOkú ne ongoʻi he taimí ni ʻe lava ke tokoniʻi ia ʻe he ngāue taʻefaitotonú ke maʻu ʻa e meʻa ʻokú ne fiemaʻu ʻi he moʻuí.
-
Kuo fakatokangaʻi ʻe Sute ko e taimi ʻokú ne lau ai e ngaahi fakamatala ʻi he mītia fakasōsialé fekauʻaki mo Sīsū Kalaisi pe ko e Siasí, ʻoku faʻa lahi ha ngaahi fakamatala kovi ʻokú ne ʻohofi ʻa e Siasí pe kakai ʻoku tui ki he Fakamoʻuí.
-
ʻOku maʻu ʻe Sikai ha ngaahi kaungāmeʻa tokosiʻi ke fakalotoa ia ke holoki ʻene ngaahi tuʻunga moʻuí. ʻOku nau fakakikihi koeʻuhí ʻoku ʻikai ke ʻi ai ha moʻui hili ʻa e maté, ʻoku ngalivale ke te hohaʻa ki ha feituʻu ʻe ʻalu ki ai ʻa e kakaí ke fai ha fakamatala ʻo ʻenau ngaahi angahala ʻoku pehē ne nau faí.
-
Ko e hā ha ngaahi sīpinga kehe te ke lava ʻo fakakaukau ki ai ʻokú ne fakatātaaʻi e ngaahi founga ʻa Sētane ʻoku hiki ʻi he veesi 20–22?
Fakakaukau ki hoʻo moʻuí. ʻOkú ke ongoʻi nai ʻoku uesia koe ʻe ha taha ʻo e ngaahi founga ʻa Sētane kuó ke ako ki aí? Fakakaukau ke lekooti hoʻo ngaahi fakakaukaú ʻi hoʻo tohinoa akó. ʻI he hokohoko atu hoʻo akó, kumi e founga ʻe lava ke tokoniʻi ai koe ʻe he Tamai Hēvaní mo Sīsū Kalaisi ke ke ikunaʻi e ngaahi kākā ʻa Sētane ʻi hoʻo moʻuí.
Tafoki ki he Tamai Hēvaní mo Sīsū Kalaisi ke ikunaʻi ʻa Sētane
Te tau lava ʻo ikunaʻi ʻa Sētane mo ʻene ngaahi kākaá ʻi heʻetau falala ki he Tamai Hēvaní mo Sīsū Kalaisí. Faʻu ʻa e ʻuluʻi tohi ko ʻení ʻi hoʻo tohinoa akó: “Ko e founga ʻoku tokoniʻi ai au ʻe he Tamai Hēvaní mo Sīsū Kalaisi ke u ikunaʻi ʻa Sētané.”
Fakakaukau ke hiki e kupuʻi lea ko ení ʻi he palakipoé. Hili hono fakakakato ʻe he kau akó ʻa e ʻekitivitī ako ko ʻení, te nau lava ʻo hiki ʻi he palakipoé ha potufolofola ʻe taha pe lahi ange naʻa nau maʻu. Te mou lava ʻo lau fakakalasi ha niʻihi ʻo e ngaahi potufolofola ko ʻení pea fakaafeʻi e kau akó ke fakatonutonu ʻenau lisí ʻo fakatatau mo e meʻa ne nau ako mei honau kaungā-akó.
Kumi ha ngaahi potufolofola pe akonaki mei he kau taki ʻo e Siasí ʻe lava ʻo tokoni atu ʻi hoʻo feinga ke ikunaʻi ʻa Sētané. Lēkooti hoʻo ngaahi fakakaukaú ʻi hoʻo tohinoa akó.
Fakakaukau ke ako ha niʻihi ʻo e ngaahi fakamoʻoni fakafolofola ʻoku lisi atu ʻi he “ʻAhiʻahí, ʻAhiʻahiʻí” ʻi he Fakahinohino ki he Ngaahi Folofolá. ʻE lava foki ke ke ako e ngaahi akonaki ʻa Nīfai ʻi he 2 Nīfai 28:17, 26–32. ʻOku kau ʻi he ngaahi potufolofola kehe ʻoku ʻaongá ʻa e 1 Nīfai 15:24; Hilamani 5:12; mo e 3 Nīfai 18:15, 18.
-
ʻE tokoniʻi fēfē koe ʻe he ngaahi akonaki mei he kau taki ʻo e Siasí mo e ngaahi potufolofola naʻá ke maʻú ke ikunaʻi e ngaahi founga ʻa Sētane naʻá ke ʻilo kimuʻa ʻi he lēsoní?
Fakalaulauloto ki hoʻo ngaahi aʻusia ʻi hoʻo ako he ʻaho ní. Fakaʻaongaʻi ha kiʻi taimi ke faʻu ai ha palani ʻo makatuʻunga ʻi he meʻa ʻokú ke ongoʻi ʻe finangalo e ʻEikí ke ke fai ke maluʻi lelei ange ai koe mei he ngaahi founga ʻa Sētané. Lēkooti e palani ko ʻení ʻi hoʻo tohinoa akó. Te ke maʻu ha faingamālie ke vakai ki he palani ko ʻení ʻi he lēsoni “Fakafuofuaʻi Hoʻo Akó.”