“Usa ka Kahibulongan nga Buhat ug usa ka Katingalahan”
Imahe
mga kopya sa Basahon ni Mormon sa lain-laing pinulongan
Paghunahuna og mga panghitabo nga imong makonsiderar nga kahibulongan ug sa unsang paagi kini nga mga panghitabo nakaapekto kanimo ug niadtong nagpalibot kanimo. Si Jesukristo misaad sa paghimo sa kahibulongan nga buhat sa pagpahiuli sa Iyang ebanghelyo, lakip sa Basahon ni Mormon, dinhi sa yuta sa ulahing mga adlaw. Kini nga leksiyon makatabang nimo nga mobati og mas dakong pasalamat sa Ginoo sa pagpahiuli sa Basahon ni Mormon dinhi sa yuta.
Pagtudlo pinaagi sa Espiritu.Walay mortal nga magtutudlo, bisan unsa pa ka hanas o kasinati, nga makapuli sa Espiritu. Apan kita mahimong mga instrumento sa mga kamot sa Dios aron sa pagtabang sa Iyang mga anak nga makakat-on pinaagi sa Espiritu. Si Presidente Henry B. Eyring mitudlo, “Ang atong mga estudyante dili makaila sa Dios, ug usab mohigugma sama sa gikinahanglan nga sila mohigugma , gawas kon sila gitudloan sa Balaang Espiritu” (“The Importance of the Holy Ghost,” Old Testament Seminary Teacher Material [2018], ChurchofJesusChrist.org).
Pagpangandam sa estudyante: Dapita ang mga estudyante nga motambong nga andam sa pagpaambit mahitungod sa usa ka tawo kinsa nakahimo og usa ka butang nga talagsaon alang kanila o sa usa ka tawo nga ilang nailhan. Sama pananglit, tingali may tawo nga miluwas kanila gikan sa usa ka makuyaw nga sitwasyon o mihatag kanila og usa ka manggihatagon nga gasa.
Mga Posibleng Kalihokan sa Pagkat-on
Usa ka butang nga kahibulongan
Aron maandam ang mga estudyante sa pagpaambit sa mosunod, ikonsiderar ang pagpaambit mahitungod sa usa ka tawo kinsa mibuhat og usa ka butang alang kanimo nga imong giisip nga kahibulongan o mahinungdanon.
Paghunahuna og usa ka tawo kinsa nakahimo og usa ka butang nga kahibulongan alang kanimo o alang sa usa ka tawo nga imong kaila.
Unsa ang gibuhat niining tawhana?
Unsay imong gibati sa tawo nga nagbuhat niini? Ngano man?
Sa 2 Nephi 27, ang Ginoo mipamatuod sa usa ka butang nga kahibulongan nga Iyang buhaton aron sa pagtabang kanato latas sa pagkadautan ug apostasiya sa kataposan nga mga adlaw. Samtang magtuon ka, pamalandongi kon sa unsang paagi nga ang unsay imong nakat-onan makaapekto sa imong gibati mahitungod sa Ginoo.
Basaha ang 2 Nephi 27:25–26, nga mangita sa unsay gisaad sa Ginoo nga Iyang buhaton.
Dapita ang mga estudyante sa pagpaambit unsa sa ilang hunahuna ang gipasabot sa “kahibulongan nga buhat ug usa ka katingalahan”. Kon gikinahanglan, ipaambit ang mosunod nga pagpasabot gikan ni Presidente Russell M. Nelson.
Si Presidente Russell M. Nelson mipahayag nga kining “kahibulongan nga buhat maglakip sa pagtungha sa Basahon ni Mormon ug sa Pagpahiuli sa ebanghelyo” (“Mga Saksi sa Kasulatan,” Liahona, Nob. 2007, 46).
Usa ka kamatuoran nga atong makat-onan gikan niini nga panagna mao nga ang Ginoo mihimo og usa ka kahibulongan nga buhat ug usa ka katingalahan pinaagi sa pag-abot sa Basahon ni Mormon ug sa Pagpahiuli sa Iyang ebanghelyo.
Unsa ang inyong nahibaloan mahitungod sa Basahon ni Mormon ug sa gipahiuli nga ebanghelyo nga mahimong hinungdan nga kamo motawag niini nga “kahibulongan”?
Ang Basahon ni Mormon: Usa ka kahibulongan nga buhat ug usa ka katingalahan
Daghan sa 2 Nephi 27 nagtutok sa pagtungha sa Basahon ni Mormon. Sa dili pa magtuon og dugang gikan niini nga kapitulo, paggahin og panahon sa pagpamalandong sa imong kaugalingong mga pagbati mahitungod sa Basahon ni Mormon. Kahibulongan ba kini kanimo sa personal? Ngano o nganong dili? Unsay imong mga pangutana? Samtang magtuon ka, pangitaa ang mga pagtulun-an nga makatabang nimo nga mas klaro nga makita ang Basahon ni Mormon isip usa ka “kahibulongan nga buhat ug usa ka katingalahan.”
Mahimong makatabang ang pagbasa sa mga bersikulo nga gilista diha sa mosunod nga summary nga magdungan isip usa ka klase.
Si Nephi nanagna nga ang Basahon ni Mormon moabot aron sa pagtabang sa mga problema sa kataposang mga adlaw (tan-awa sa 2 Nephi 27:6). Misulat usab siya nga ang Dios motugot sa pipila ka mga saksi nga makakita sa mga palid diin nahubad gikan ang Basahon ni Mormon ug aronmopamatuod sa katinuod sa basahon ngadto sa kalibotan (tan-awa sa 2 Nephi 27:12–14). Si Nephi mipaambit dayon og panagna mahitungod sa pipila ka mga detalye nga may kalabotan sa paghubad sa Basahon ni Mormon.
Ikonsiderar ang paghatag sa mga estudyante o ipakita ang mosunod nga tsart. Mahimong tun-an sa mga estudyante ang mga bersikulo ug sulatan ang tsart nga magpares o sa gagmay nga mga grupo.
Human ang mga estudyante adunay igong panahon sa pagtuon, dapita ang pipila ka mga boluntaryo sa pagpaambit sa unsay ilang nakat-onan. Ikonsiderar ang pagpangutana sa mosunod nga pangutana isip kabahin niini nga panaghisgotan.
Ngano sa imong hunahuna nga ang Ginoo migamit ni Joseph Smith, kinsa usa ka tawo nga dili maalamon, sa pagpatungha sa Basahon ni Mormon?
Basaha ang 2 Nephi 27:20–23, nga mangita og mga rason nganong gipili sa Dios ang usa ka tawo nga dili maalamon sa paghubad sa Basahon ni Mormon.
Unsa ang imong nakat-onan mahitungod sa Ginoo gikan niini nga mga bersikulo? Sa unsang paagi nga ang pagkahibalo niini nga mga butang mahitungod Kaniya makaapekto kanimo?
Sa unsa nga paagi nga ang pagtungha sa Basahon ni Mormon ebidensiya sa pahayag sa Ginoo nga “Ako makahimo sa pagbuhat sa akong kaugalingon nga buhaton”? (bersikulo 21).
Agi og dugang sa mosunod nga pamahayag, ikonsiderar ang pagpaambit sa pamahayag ni Presidente Russell M. Nelson sa seksiyon nga ““Komentaryo ug Background nga Impormasyon””.
Si Emma Smith (1804–1879), ang asawa sa Propeta, mipamatuod sa balaanong tabang nga nadawat ni Joseph sa iyang paghubad sa Basahon ni Mormon:
Imahe
Emma Smith
Si Joseph Smith dili makasulat ni makadiktar og klaro ug maayong pagkahan-ay nga sulat, unsa pa kaha ang pagdiktar sa usa ka libro sama sa Basahon ni Mormon. Ug, bisan tuod ako usa ka aktibong partisipante sa mga talan-awon nga nahitabo, … kini kahibulongan alang kanako, “usa ka kahibulongan ug usa ka katingalahan.” …
Ang akong pagtuo mao nga ang Basahon ni Mormon kay balaanon ang pagkatinuod—wala koy bisan gamay nga pagduhaduha niini. … Kini kaduhaduhaan nga ang usa ka makinaadmanon nga tawo makahimo niini; ug, alang sa usa ka ignorante kaayo ug dili maalamon sama kaniya, imposible kini. (Emma Smith, sa “Last Testimony of Sister Emma,” The Saints’ Herald, Okt. 1, 1879, 290)
Base sa unsay imong nakat-onan karon, sa unsang paagi nga ang pagtungha sa Basahon ni Mormon usa ka “kahibulongan nga buhat ug usa ka katingalahan”?
Sa unsang paagi nga ang pagkahibalo nga ang Ginoo mihatag kanato niini nga panalangin makaapekto sa imong gibati ngadto Kaniya?
Unsa nga mga kasinatian ang imong nasinati o sa uban nga naghulagway kon unsa ka kahibulongan ang Basahon ni Mormon?
Ikonsiderar ang pagpaambit og personal nga kasinatian o usa sa mosunod nga mga bidyo isip kabahin sa imong diskusyon sa miaging mga pangutana.
Sa sayong bahin niini nga leksyion, gihangyo ka sa paghunahuna mahitungod sa imong mga pagbati sa Basahon ni Mormon. Ikonsiderar kon ang bisan hain sa mga kamatuoran nga imong gitun-an karon nakaapekto sa imong pagpamatuod niining sagrado nga basahon. Sa imong journal sa pagtuon, irekord ang bisan unsang mga hunahuna o mga impresyon nga imong nadawat, ingon man usab ang umaabot nga mga lihokonon nga naaghat ka nga buhaton.
Ikonsiderar ang pagdapit og pipila ka mga boluntaryo sa pagpaambit og makahuluganon nga mga hunahuna o mga panabot nga ilang naangkon atol sa leksiyon. Pagpamatuod sa mga kamatuoran nga inyong nahisgotan karon.
