« នីហ្វៃទី ២ ២:១–១៦ ៖ ‹ ព្រះទ្រង់ប្រទានដល់មនុស្សថា គេត្រូវប្រព្រឹត្តអ្វីៗដោយខ្លួនឯង › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« នីហ្វៃទី ២ ២:១–១៦ ៖ ‹ ព្រះទ្រង់ប្រទានដល់មនុស្សថា គេត្រូវប្រព្រឹត្តអ្វីៗដោយខ្លួនឯង › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
នីហ្វៃទី ២ ២:១–១៦
« ព្រះទ្រង់ប្រទានដល់មនុស្សថា គេត្រូវប្រព្រឹត្តអ្វីៗដោយខ្លួនឯង »
សូមស្រមៃមើលជីវិតរបស់អ្នក ប្រសិនបើអ្នកគ្មានជម្រើសណាមួយឡើយ ។ សិទ្ធិជ្រើសរើស ឬអំណាចដើម្បីជ្រើសរើស គឺជាអំណោយមួយនៃអំណោយទានដ៏មហិមាបំផុតរបស់ព្រះសម្រាប់យើង ។ យ៉ាកុបជាកូនប្រុសរបស់លីហៃ បានជួបប្រទះបញ្ហាជាច្រើនតាំងតែពីក្មេង ដូច្នេះលីហៃបានបង្រៀនគាត់ពីសេចក្ដីពិតដ៏មានតម្លៃអំពីព្រះអង្គសង្គ្រោះ និងសេរីភាពក្នុងការជ្រើសរើស ។ មេរៀននេះអាចជួយអ្នកឲ្យយល់កាន់តែច្បាស់អំពីតួនាទីនៃសិទ្ធិជ្រើសរើសនៅក្នុងផែនការរបស់ព្រះវរបិតាសួគ៌ ។
ការសួរសំណួរដែលជំរុញឲ្យមានវិចារណញាណ ។ សំណួរដែលអញ្ជើញសិស្សឲ្យសញ្ជឹងគិតអំពីព្រះគម្ពីរ អារម្មណ៍របស់ពួកគេចំពោះព្រះអង្គសង្គ្រោះ ការបង្រៀនរបស់ទ្រង់ ឬការអនុវត្តគោលការណ៍អាចជំរុញការត្រិះរិះពិចារណា ដែលព្រះវិញ្ញាណអាចប្រើដើម្បីបង្រៀន ។ សូមទុកពេលឲ្យសិស្សតាមត្រូវការសម្រាប់ការសញ្ជឹងគិត និងការសរសេរប្រកបដោយប្រសិទ្ធភាព ។
ការរៀបចំសិស្ស ៖ សូមអញ្ជើញសិស្សឲ្យសម្គាល់ និងធ្វើបញ្ជីមួយអំពីជម្រើសសំខាន់ៗ ដែលពួកគេបានជ្រើសរើសនៅចន្លោះពេលនេះ និងមេរៀនបន្ទាប់ ។ សូមឲ្យពួកគេមកដោយត្រៀមខ្លួន ដើម្បីចែកចាយពីមូលហេតុដែលជម្រើសនោះ មានភាពចាំបាច់សម្រាប់ជីវិតរមែងស្លាប់របស់យើង និងចំពោះផែនការនៃសេចក្ដីសង្គ្រោះរបស់ព្រះវរបិតាសួគ៌ ។
សកម្មភាពរៀនសូត្រដែលអាចមាន
ជម្រើសសំខាន់ៗ
សូមអញ្ជើញសិស្សឲ្យប្រើការរៀបចំថ្នាក់របស់ពួកគេ ដើម្បីធ្វើសកម្មភាពដូចខាងក្រោមក្នុងសៀវភៅកំណត់ហេតុការសិក្សារបស់ពួកគេ ។
សម្រាប់រយៈពេលពីរនាទីបន្ទាប់ សូមសរសេរជម្រើសសំខាន់ៗមួយចំនួនដែលអ្នកបានជ្រើសរើសក្នុងរយៈពេលប៉ុន្មានថ្ងៃចុងក្រោយនេះ ។
-
ហេតុអ្វីអ្នកគិតថាជម្រើសគឺចាំបាច់សម្រាប់ជីវិតរមែងស្លាប់របស់យើង និងចំពោះផែនការនៃសេចក្ដីសង្គ្រោះរបស់ព្រះវរបិតាសួគ៌ ?
សូមសញ្ជឹងគិតអំពីអ្វីដែលអ្នកបានរៀនពីជម្រើសដែលអ្នកមានមោទនភាព ក៏ដូចជាពីអ្វីដែលអ្នកសោកស្តាយ ។ នៅពេលអ្នកសិក្សានៅក្នុងមេរៀននេះ សូមស្វែងរកការណែនាំពីព្រះវិញ្ញាណបរិសុទ្ធ ដើម្បីរៀនពីអ្វីដែលអាចជួយអ្នកឲ្យយល់កាន់តែច្បាស់ ហើយប្រើសមត្ថភាពរបស់អ្នកដើម្បីជ្រើសរើស ។ ប្រសិនបើអ្នកមានសំណួរអំពីសិទ្ធិជ្រើសរើស សូមអធិស្ឋានទូលសូម ហើយស្វែងរកចម្លើយផងដែរ នៅពេលអ្នកសិក្សា ។
ទិដ្ឋភាពសំខាន់នៃសិទ្ធិជ្រើសរើស
យ៉ាកុបជាកូនប្រុសរបស់លីហៃ បានកើតនៅទីរហោស្ថាន បន្ទាប់ពីគ្រួសាររបស់ពួកគេបានចាកចេញពីក្រុងយេរូសាឡិម ។ មិនយូរប៉ុន្មានមុនពេលមរណភាពរបស់លីហៃ លោកបានបង្រៀនដល់យ៉ាកុបនូវសេចក្ដីពិតសំខាន់ៗអំពីសិទ្ធិជ្រើសរើស ។
សូមអាន នីហ្វៃទី ២ ២:១–៤ ដើម្បីមើលពីរបៀបដែលលីហៃបានចាប់ផ្តើមសាររបស់លោកទៅកាន់យ៉ាកុប ។ វាអាចមានប្រយោជន៍ក្នុងការដឹងថាពាក្យ « ថ្វាយ » មានន័យថា បូជា ឬធ្វើឲ្យបរិសុទ្ធ ( សូមមើល « ថ្វាយ, ក្រឹត្យវិន័យនៃការថ្វាយ » នៅក្នុងសេចក្តីណែនាំដល់បទគម្ពីរទាំងឡាយ [ scriptures.ChurchofJesusChrist.org ] ) ។
-
ហេតុអ្វីវាអាចមានន័យសម្រាប់មនុស្សម្នាក់ដែលបានប្រឈមមុខនឹងការសាកល្បងជាច្រើន ដើម្បីយល់ពីសារៈសំខាន់នៃអំណាចរបស់ជម្រើស ?
-
តើសេចក្ដីពិតអ្វីខ្លះពីខគម្ពីរទាំងនេះមានអត្ថន័យបំផុតចំពោះអ្នក ? ហេតុអ្វី ?
សូមបង្ហាញព័ត៌មានខាងក្រោម ឬផ្តល់វាជាសំណៅចែក ។ អ្នកអាចចាត់ជម្រើសមួយក្នុងចំណោមជម្រើសទាំងបីដល់សិស្សផ្សេងគ្នា ឬក្រុមសិស្សផ្សេងគ្នា ។ ម្យ៉ាងវិញទៀត អ្នកអាចចែកសិស្សជាក្រុម ហើយអញ្ជើញពួកគេឲ្យសិក្សាឲ្យបានច្រើនតាមតែអាចធ្វើទៅបានក្នុងរយៈពេលកំណត់មួយ ។
អំណាចដើម្បីជ្រើសរើសរបស់យើង
ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )—« នីហ្វៃទី២:១–១៦ »
ជម្រើស ក ៖ តើអំណាចរបស់យើងក្នុងការជ្រើសរើសបង្រៀនយើងអ្វីខ្លះអំពីព្រះ ?
សូមអាន នីហ្វៃទី ២ ២:១៤, ១៦ ដោយរកមើលអ្វីដែលលីហៃបានបង្រៀនអំពីព្រះ និងសិទ្ធិជ្រើសរើសរបស់យើង ។
-
តើអ្នកបានរៀនអ្វីខ្លះ ?
-
ហេតុអ្វីវាសំខាន់ក្នុងការយល់ថា ព្រះប្រទានអំណាចឲ្យយើង ដើម្បីប្រព្រឹត្ដសម្រាប់ខ្លួនយើង ?
-
តើវាធ្វើឲ្យអ្នកមានអារម្មណ៍យ៉ាងណា ដែលព្រះវរបិតាសួគ៌ទុកព្រះទ័យលើអ្នកឲ្យធ្វើការជ្រើសរើសដោយខ្លួនឯង ?
សូមគិតអំពីឧទាហរណ៍មួយអំពីគ្រាដែលអ្នកប្រើសិទ្ធិជ្រើសរើស តាមរបៀបមួយដែលអ្នកទទួលអារម្មណ៍ថា បំពេញព្រះទ័យរបស់ព្រះវរបិតាសួគ៌ ។
-
ហេតុអ្វីអ្នកមានអារម្មណ៍ថា ជម្រើសរបស់អ្នកបំពេញហឫទ័យព្រះ ?
វាក៏អាចមានប្រយោជន៍ផងដែរក្នុងការសញ្ជឹងគិតអំពីជម្រើសណាមួយដែលអ្នកបានធ្វើ ដែលប្រហែលជាមិនគាប់ព្រះហឫទ័យព្រះជាម្ចាស់ និងអ្វីដែលអ្នកបានរៀនពីជម្រើសទាំងនោះ ។
ជម្រើស ខ ៖ តើព្រះបានប្រទានអ្វីដល់យើងដើម្បីជួយយើងជ្រើសរើសដោយប្រាជ្ញា ?
សូមអាន នីហ្វៃទី ២ ២:៥, ១៣ និង មរ៉ូណៃ ៧:១៦ ដោយរកមើលសេចក្តីពិតដូចខាងក្រោម ។ ចំណាំ « ក្រឹត្យវិន័យ » សំដៅទៅលើបញ្ញត្តិរបស់ព្រះ ។
-
យើងត្រូវតែដឹងល្អ និងអាក្រក់ ដើម្បីអនុវត្តសិទ្ធិជ្រើសរើសរបស់យើងឲ្យបានពេញលេញ ។
-
យើងត្រូវតែមានក្រឹត្យវិន័យ ដើម្បីមានសិទ្ធិជ្រើសរើស ។
-
តើអ្នករៀនអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទ ពីសេចក្តីពិតដែលទ្រង់ប្រទានដល់មនុស្សគ្រប់រូប ដើម្បីមានចំណេះដឹងគ្រប់គ្រាន់អំពីអំពើល្អ និងអាក្រក់ ដើម្បីអាចជ្រើសរើសធ្វើសុចរិត ឬទុច្ចរិត ?
-
តើនឹងមានអ្វីកើតឡើងប្រសិនបើគ្មានក្រឹត្យវិន័យ ឬបទបញ្ញត្តិ ?
ជម្រើស គ ៖ ហេតុអ្វីបានជាយើងមានអារម្មណ៍ផ្ទុយនឹងជម្រើសដ៏ល្អរបស់យើង ?
សូមអាន នីហ្វៃទី ២ ២:១១, ១៦ ដោយស្វែងរកសេចក្តីពិតបន្ថែម ដែលលីហៃបានបង្រៀនអំពីសិទ្ធិជ្រើសរើស ។
-
តើអ្នកបានរកឃើញអ្វីខ្លះ ?
-
នៅក្នុងផែនការរបស់ព្រះវរបិតាសួគ៌ ហេតុអ្វីអ្នកគិតថា ការផ្ទុយគឺជាទិដ្ឋភាពដ៏ចាំបាច់នៃសិទ្ធិជ្រើសរើស ?
-
តើយើងត្រូវបានល្បួងឲ្យធ្វើការជ្រើសរើសត្រូវ និងខុសតាមវិធីណាខ្លះ ?
ដើម្បីជួយអ្នកឲ្យយល់ពីសេចក្ដីពិតនេះ សូមអានសេចក្ដីថ្លែងការណ៍ខាងក្រោមដោយអែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់ ៖
បុត្រាបុត្រីរបស់ព្រះនៅមុនឆាកជីវិតនេះពុំអាចប្រែក្លាយដូចជាទ្រង់ឡើយ … លុះត្រាតែពួកគេទទួលបាន … បទពិសោធន៍នៅក្នុងសង្វៀនមានទាំងអំពើល្អ និងអាក្រក់ ។ …
… យើងចង់បានឱកាសដើម្បី … ប្រឈមមុខនឹងអំពើល្អ និងអាក្រក់ ហើយរឹងមាំគ្រប់គ្រាន់ដើម្បីជ្រើសរើសអំពើល្អ ។ ( ជែហ្វ្រី អ័រ ហូឡិន Christ and the New Covenant: The Messianic Message of the Book of Mormon [ ១៩៩៧ ] ទំព័រ ២០០, ២០៤ )
សូមគិតអំពីរបៀបដែលអ្នកកំពុងរៀនជ្រើសរើសអំពើល្អ សូម្បីតែនៅពេលមានការល្បួងដោយអំពើអាក្រក់ក៏ដោយ ។ អ្នកប្រហែលជាចង់សរសេរគំនិតរបស់អ្នកនៅក្នុងសៀវភៅកំណត់ហេតុការសិក្សារបស់អ្នក ។ អ្នកក៏អាចចង់សញ្ជឹងគិតពីរបៀបដែលអ្នកអាចស្វែងរកជំនួយក្នុងការសម្រេចចិត្តណាមួយ ដែលអ្នកចង់ធ្វើឡើងដើម្បីផ្លាស់ប្តូរ ។
តម្រូវការរបស់យើងសម្រាប់ព្រះអង្គសង្គ្រោះ
គ្មាននរណាឡើយ ក្រៅពីព្រះអង្គសង្គ្រោះបានអនុវត្តសិទ្ធិជ្រើសរើសយ៉ាងល្អឥតខ្ចោះនៅក្នុងជីវិតរមែងស្លាប់ ។ យើងទាំងអស់គ្នាមានបាប ហើយប្រសិនបើគ្មានជំនួយទេ យើងទាំងអស់គ្នានឹង « វិនាស … ហើយក្លាយទៅជាវេទនាជារៀងរហូតតទៅ » ( នីហ្វៃទី ២ ២:៥ ) ។
សូមពិចារណាអំពីការប្រើប្រាស់ព័ត៌មានពីផ្នែក « វិចារណកថា និងព័ត៌មានសាច់រឿង » នៅទីនេះ ដើម្បីជួយសិស្សឲ្យយល់កាន់តែច្បាស់អំពីអ្វីដែលត្រូវបានបង្រៀននៅក្នុង នីហ្វៃទី ២ ២:៦–៨ ។
សូមចាំក្នុងចិត្តថា សូមអាន នីហ្វៃទី ២ ២:៦–៨ ដើម្បីមើលអ្វីដែលព្រះយេស៊ូវគ្រីស្ទបានធ្វើសម្រាប់យើងទាំងអស់គ្នា ។
-
តើព្រះអង្គសង្គ្រោះបានជ្រើសរើសជួយអ្នកយ៉ាងដូចម្ដេច ?
គោលការណ៍មួយដែលលីហៃបានថ្លែងទីបន្ទាល់គឺថា តាមរយៈដង្វាយធួនរបស់ទ្រង់ ព្រះអង្គសង្គ្រោះរំដោះយើងពីអំពើបាបរបស់យើង ។
-
តើការយល់ដឹងអំពីព្រះយេស៊ូវគ្រីស្ទនេះជះឥទ្ធិពលលើអារម្មណ៍របស់អ្នកចំពោះទ្រង់យ៉ាងដូចម្តេច ?
-
តើអ្នករៀនអ្វីខ្លះមកពីគំរូរបស់ព្រះអង្គសង្គ្រោះអំពីការធ្វើការជ្រើសរើស ?
សូមអញ្ជើញសិស្សឲ្យសញ្ជឹងគិតពីចំណុចខាងក្រោមដោយមិនចែកចាយចម្លើយរបស់ពួកគេឮៗ ព្រោះចំណុចទាំងនោះអាចជារឿងផ្ទាល់ខ្លួនពេក ។
សូមគិតអំពីគ្រាមួយដែល អ្នកបានប្រែចិត្តពីអំពើបាបមួយ ដោយមានជំនួយពីព្រះយេស៊ូវគ្រីស្ទ ។ តើការប្រែចិត្តបានជះឥទ្ធិពលដល់អ្នកយ៉ាងដូចម្ដេច ?
អ្នកប្រហែលជាចង់ផ្តល់ឱកាសដល់សិស្សឲ្យសង្ខេប និងចែកចាយអ្វីដែលពួកគេយល់អំពីសិទ្ធិជ្រើសរើស ពេលបញ្ចប់មេរៀននេះ ។ សកម្មភាពខាងក្រោមគឺជារបៀបមួយដែលអ្នកអាចធ្វើវាបាន ។
សូមស្រមៃគិតថា អ្នកផ្សព្វផ្សាយសាសនាក្នុងតំបន់របស់អ្នកកំពុងបង្រៀនយុវជនម្នាក់ដែលកំពុងឮអំពីផែនការរបស់ព្រះវរបិតាសួគ៌ជាលើកដំបូង ។ អ្នកផ្សព្វផ្សាយសាសនាអញ្ជើញអ្នកឲ្យមកការណាត់ជួបបង្រៀនបន្ទាប់ជាមួយនឹងយុវជននេះ ។ ពួកគេសូមឲ្យអ្នករៀបចំគំនិតមកពី នីហ្វៃទី ២ ២ អំពីសារៈសំខាន់នៃសិទ្ធិជ្រើសរើសនៅក្នុងផែនការរបស់ព្រះវរបិតាសួគ៌ ។ សូមបង្កើត និងដាក់ស្នើគម្រោងមេរៀនសង្ខេបនៃអ្វីដែលអ្នកនឹងបង្រៀន ។ សូមបញ្ចូលចំណុចខាងក្រោម ៖
-
យ៉ាងហោចណាស់មានបទគម្ពីរពីរមកពី នីហ្វៃទី ២ ២:១–១៦, ២៦ ជាមួយនឹងសេចក្តីពិតដែលទាក់ទងនឹងបទគម្ពីរទាំងនោះ រួមទាំងការពន្យល់ខ្លីៗអំពីមូលហេតុនៃអត្ថន័យ និងសារៈសំខាន់នៃបទគម្ពីរទាំងនោះ ។
-
របៀបដែលការពលិកម្មរបស់ព្រះយេស៊ូវគ្រីស្ទអាចជះឥទ្ធិពលលើជម្រើសរបស់យើង
-
របៀបដែលសេចក្តីពិតទាំងនេះអាចធ្វើឲ្យមានការផ្លាស់ប្តូរនៅក្នុងជីវិតរបស់យើង
សូមដាក់សិស្សជាគូ ឬក្រុមតូចៗ ហើយអញ្ជើញពួកគេឲ្យចែកចាយគម្រោងមេរៀនរបស់ពួកគេជាមួយគ្នាទៅវិញទៅមក ។ ប្រសិនបើមានពេល សូមពិចារណាយកគម្រោងមេរៀននោះមកដើរតួសម្តែង ហើយអញ្ជើញសិស្សឲ្យបង្រៀនគ្នាទៅវិញទៅមក ។
នៅពេលអ្នកបញ្ចប់គម្រោងមេរៀនរបស់អ្នក សូមស្វែងរកការណែនាំពីព្រះវិញ្ញាណបរិសុទ្ធ នៅពេលអ្នកសញ្ជឹងគិតពីរបៀបដែលអ្នកអាចចងចាំសេចក្តីពិតទាំងនេះ និងពីរបៀបដែលការចងចាំសេចក្តីពិតទាំងនេះអាចផ្តល់ពរដល់ជីវិតរបស់អ្នក ។ ឧទាហរណ៍ ៖ អ្នកអាចដាក់រូបលើអេក្រង់នៅលើទូរសព្ទរបស់អ្នក សូមដាក់កំណត់ចំណាំនៅលើកញ្ចក់របស់អ្នក ឬធ្វើអ្វីផ្សេងទៀតដែលអាចឲ្យអ្នកមើលឃើញ និងចងចាំសេចក្តីពិតទាំងនេះយ៉ាងជាប់លាប់ ។