1 Nīfai 11–15

Vakai Fakalūkufuá

ʻI he fepotalanoaʻaki ʻa Nīfai mo e kau talafekau fakalangí, naʻá ne maʻu ha mata meʻa-hā-mai ki he Fakamoʻui ʻo e māmaní mo ne maʻu ha mahino fakataautaha ki he meʻa ʻokú ne ʻomi ʻa e fiefia lahi tahá: ko e ʻofa ʻa e ʻOtuá. Hili hono fakahā kia Nīfai ʻi ha mata meʻa-hā-mai ʻa e hē ʻa hono kakaí mei he moʻoní mo honau fakaʻauhá, naʻá ne mamata ʻe fakakoviʻi ʻe ha fuʻu siasi lahi mo fakalielia ʻa e ngaahi akonaki ʻo e Tohi Tapú mo tauʻi e Kau Māʻoniʻoni ʻa e ʻOtuá. Neongo ia, naʻá ne toe mamata foki ʻe fakafoki mai ʻa e ongoongoleleí, ʻo ne tāpuekina ʻa kinautolu kotoa pē te nau tali e ngaahi akonaki mo e ngaahi fuakava ʻa e Fakamoʻuí. Naʻe mamata ʻa Nīfai ki he ngaahi meʻa naʻe hoko ʻi hono Fakafoki Mai ʻo e Ongoongoleleí kimuʻa ʻaupito ia pea nau toki hokó pea mahino kiate ia ʻa e fatongia mahuʻinga ʻe fakahoko ʻe heʻene lekōtí ʻi hono Fakafoki Mai ʻo e Ongoongoleleí.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

1 Nīfai 11

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ongoʻi ʻe he kau akó ʻa e ʻofa ʻa e Tamai Hēvaní mo Sīsū Kalaisi maʻanautolú.

• Teuteu ʻa e tokotaha akó: Fakaafeʻi e kau akó ke ʻomi ki he kalasí ha meʻa ʻokú ne fakatātaaʻi ha founga ʻe taha ʻoku fakahaaʻi ai ʻe he ʻOtuá ʻEne ʻofa kiate kinautolú.

• Ngaahi ʻĪmisí: Ngaahi ʻīmisi kehekehe mei he moʻui mo e ngāue fakafaifekau ʻa Sīsū Kalaisí

•  

• Fokotuʻu ki he akoʻi he konifelenisi fakavitioó: Lolotonga e fekumi ʻa e kau akó ʻi he 1 Nīfai 11:26–33, fakaʻaliʻali ha ngaahi fakatātā ʻo ha ngaahi meʻa mei he moʻui ʻa e Fakamoʻuí ʻoku ʻasi ʻi he ngaahi vēsí. Fakaafeʻi e kau akó ke vahevahe ʻa e founga ʻoku fakatātaaʻi ai ʻe he meʻa takitaha naʻe hokó e moʻui āfeitaulalo ʻa e ʻOtuá.

1 Nīfai 13–14

Taumuʻa ʻo e lēsoní: Ko e taumuʻa ʻo e lēsoni ko ʻení ke tokoni ke mahino ki he kau akó ʻa e mahuʻinga ʻo e ngaahi fuakavá pea fakatupulaki e holi ʻa e kau akó ke fakahoko mo tauhi kinautolú.

• Teuteu ʻa e tokotaha akó: Fakakaukau ke fakaafeʻi e kau akó ke nau omi mateuteu ke vahevahe e ngaahi meʻa ʻoku nau pehē ko ha niʻihi ʻo e ngaahi meʻa mahuʻinga taha kuo hoko ʻi he taʻu ʻe 500 kuohilí.

• Meʻa ke fakaʻaliʻalí: Ko e sivi ʻi he 1 Nīfai 13–14, fakaʻaliʻali pe hiki hano tatau ʻi he palakipoé

•  

• Fokotuʻu ki he akoʻi he konifelenisi fakavitioó: Fakakaukau ke fakaʻaongaʻi ha polokalama ki he siví ke faʻu mo vahevahe ʻa e siví koeʻuhí ke lava e kau akó ʻo maʻu ia ʻi heʻenau meʻangaue fakaʻilekitulōnika toʻotoʻó pe browsers. ʻE lava ke fakahoko ʻe he kau akó ʻa e siví ʻi he kamataʻanga ʻo e lēsoní.

1 Nīfai 13:20–42

Taumuʻa ʻo e lēsoní: ʻE lava ke tokoni e lēsoni ko ʻení ke mahino ki he kau akó e founga ʻoku tokoni ai e Tohi ʻa Molomoná mo e folofola kehe kuo fakahā maí ke fakafoki mai e ngaahi moʻoni mahinongofua mo mahuʻinga ʻo e ongoongolelei ʻa e Fakamoʻuí.

• Teuteu ʻa e tokotaha akó: Fakakaukau ke fakaafeʻi e kau akó ke nau omi mateuteu ke vahevahe ha meʻa ne nau ako kimuí ni mei heʻenau ako folofola fakaʻahó.

• Meʻá: Ko ha pasikala pe fakatātā ʻo ha pasikala

• Meʻa ke fakaʻaliʻalí: Ke fakaʻaliʻali pe hiki ki he palakipoé ha lisi ʻo e ngaahi tefito mo e ngaahi potufolofola ʻoku fekauʻaki mo e ngaahi moʻoni mahinongofua mo mahuʻingá.

• Fokotuʻu ki he akoʻi he konifelenisi fakavitioó: Fakakaukau ke vahevahe e kau akó ki ha ngaahi loki fakataha pea vahe ki he kulupu takitaha ha taha ʻa e ngaahi tefito ʻoku fekauʻaki mo e ngaahi moʻoni mahinongofua mo mahuʻingá. Fakaafeʻi e kau akó ke nau aleaʻi e ngaahi potufolofola ʻoku fekauʻaki mo iá ʻi heʻenau kulupú pea fili leva hanau tokotaha lea. Fakatahaʻi fakafoki mai e kalasí pea fakaafeʻi e tokotaha lea takitaha ke ne vahevahe e meʻa ne aleaʻi ʻe heʻenau kulupú.

Siviʻi Hoʻo Akó 1

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau vakaiʻi e ngaahi taumuʻa kuo nau fokotuʻú pea mo e tupulaki fakataautaha kuo nau aʻusia ʻi heʻenau ako e Tohi ʻa Molomoná.

• Teuteu ʻa e tokotaha akó: Fakaafeʻi e kau akó ke nau omi mateuteu ki he kalasí ke vahevahe ha meʻa kuo nau ako mei he Tohi ʻa Molomoná kuó ne tokoniʻi kinautolu ke nau ongoʻi ofi ange kia Sīsū Kalaisi.

• Meʻa ke fakaʻaliʻalí: Ko e vakaiʻi fakataautaha ʻo e ako folofolá ʻi he kamataʻanga ʻo e lēsoní

• Fokotuʻu ki he akoʻi he konifelenisi fakavitioó: Ki he “ʻEkitivitī 3: Ko ha tohi mītia fakasōsiale,” fakakaukau ke ʻoange ki he kau akó ha faingamālie ke vahevahe ha meʻa kuo nau ako talu mei he kamataʻangá mei he Tohi ʻa Molomoná. Fakakaukau foki ke fai ha fakamoʻoni fakatāutaha fekauʻaki mo e ʻunu ofi ange kia Sīsū Kalaisí ʻo fakafou ʻi hono ako ʻo e Tohi ʻa Molomoná.

Fakamanatu ʻo e Fakataukei Fakatokāteliné 1

Taumuʻa ʻo e lēsoní: ʻOku fakataumuʻa e lēsoni ko ʻení ke tokoni ki he kau akó ke nau kumi, fakaʻilongaʻi, mo ako maʻuloto e ngaahi potufolofolá mo e ngaahi kupuʻi lea tefito ki he ʻuluaki potufolofola fakataukei fakatokāteline ʻe 12 ʻo e Tohi ʻa Molomoná.

• Fakatokangaʻi ange: Mahalo ʻe fiemaʻu ke akoʻi ha lēsoni potufolofola fakataukei fakatokāteline ke fetongi ʻaki e lēsoni fakamanatu ko ʻení. Vakai ki he taimi-tēpile ki hono akoʻi ʻo e lēsoní ʻa ia ʻoku ʻomi ʻe he talēkita fakaʻēliá pe fakavāhengá pe kouʻōtineitá ke fakapapauʻi ʻe akoʻi e lēsoni fakataukei fakatokāteline takitaha lolotonga e lele ʻa e seminelí.

• Teuteu ʻa e tokotaha akó: Fakaafeʻi e kau akó ke nau toe fakamanatu e ngaahi potufolofolá mo e ngaahi kupuʻi lea tefito ki he ʻuluaki potufolofola fakataukei fakatokāteline ʻe 12 ʻi he Tohi ʻa Molomoná. ʻE lava ke maʻu ʻe he kau akó e ngaahi potufolofola ko ʻení ʻi he Fakamatala ki he ʻElito ʻo e Fakataukei Fakatokāteliné (2022) pe ʻi he polokalama Fakataukei Fakatokāteliné.

• Meʻa ke fakaʻaliʻalí: Ko ha saati ʻoku ʻasi ai e ʻuluaki potufolofola fakataukei fakatokāteline ʻe 12

• Fokotuʻu ki he akoʻi he konifelenisi fakavitioó: Fakakaukau ke fakaʻaongaʻi e ngaahi loki fakatahá ke fakamaheni ai e kau akó lolotonga ʻenau kumi e folofolá mo ako maʻuloto e ngaahi tefitoʻi kupuʻi lea fakafolofolá.