1 Nīfai 11

“Vakai ki he Āfeitaulalo ʻa e ʻOtuá!”

Ko e mata meʻa-hā-mai ʻa Nīfai ki he Taupoʻou ko Melé

ʻOku akoʻi mai ʻe he folofolá ʻa e meʻa ʻoku “lelei taha” mo “fakafiefia taha ki he laumālié” ʻi he kotoa ʻo e ngaahi meʻa ʻoku tau fiefia ai ʻi he moʻui ko ʻení (1 Nīfai 11:22–23). ʻI he fepotalanoaʻaki ʻa Nīfai mo e kau talafekau fakalangí, naʻá ne maʻu ha mata meʻa-hā-mai ki he Fakamoʻui ʻo e māmaní mo ne maʻu ha mahino fakataautaha ki he meʻa ʻokú ne ʻomi ʻa e fiefia lahi tahá: ko e ʻofa ʻa e ʻOtuá. ʻE lava ke tokoniʻi koe ʻe he lēsoni ko ʻení ke ke ongoʻi ʻa e ʻofa ʻa e Tamai Hēvaní mo Sīsū Kalaisi kiate koé.

Ko hono ʻofaʻi ʻa kinautolu ʻokú ke akoʻí. Naʻe fakatupu ʻe he ʻofá ʻa e meʻa kotoa pē naʻe fai ʻe he Fakamoʻuí ʻi he kotoa ʻo ʻEne ngāue ʻi he māmaní. ʻI hoʻo muimui ki Heʻene sīpingá, ʻe hoko ʻa e ʻofá ko e ʻuhinga mo e poupou ki hoʻo faiakó. ʻE tākiekina ʻe he ʻofá ʻa e meʻa ʻokú ke faí mo e anga hoʻo fengāueʻaki mo e kau akó.

Teuteu ʻa e tokotaha akó: Fakaafeʻi e kau akó ke ʻomi ki he kalasí ha meʻa ʻokú ne fakatātaaʻi ha founga ʻe taha ʻoku fakahaaʻi ai ʻe he ʻOtuá ʻEne ʻofa kiate kinautolú.

Ngaahi ʻEkitivitī Ako ʻOku Ala Fakahokó

Ko e mahuʻinga ʻo e ʻofa ʻa e ʻOtuá

Naʻe pehē ʻe Sisitā Sūsana H. Pota ʻo e Kau Palesitenisī Lahi ʻo e Palaimelí:

Sisitā Sūsana H. Pota

ʻI hoʻo ʻiloʻi pea mahino hono ʻofeina taʻe-hano-tatau koe ko ha fānau ʻa e ʻOtuá, ʻokú ne liliu e meʻa kotoa pē. (Susan H. Porter, “ʻOfa ʻa e ʻOtua: Ko e Fakafiefia Taha Ia ki he Laumalié,” Liahona, Nōvema 2021, 33)

• Ko e hā ʻe ala liliu ʻi he taimi ʻoku ʻilo mo mahino ai ki ha taha ʻa e ʻofa ʻa e ʻOtuá kiate kinautolú?

• ʻE takiekina fēfē nai hoʻo moʻuí ʻe hoʻo ongoʻi ʻoku ʻofaʻi koe ʻe he ʻOtuá?

Fakakaukau ke ʻoange ha kiʻi taimi ki he kau akó ke nau fakalaulauloto ai ki he lahi ʻo ʻenau ongoʻi e ʻofa ʻa e ʻOtuá pea mo e fakamoʻoni ʻoku nau mamata ki ai kau ki Heʻene ʻofá ʻi heʻenau moʻuí. Fakaafeʻi e kau akó, ʻi heʻenau ako ʻa e 1 Nīfai 11, ke nau kumi ha fakamoʻoni ʻo e ʻofa ʻoku maʻu ʻe he Tamai Hēvaní mo Sīsū Kalaisi kiate kinautolú.

Mata meʻa-ha-mai ʻa Nīfaí

Ko e Misi ʻa Lihaí

Fakaafeʻi e kau akó ke nau fakamanatuʻi e ngaahi fakataipe tefito mei he misi ʻa Līhaí ʻoku lekooti ʻi he 1 Nīfai 8. Ka fiemaʻu tokoni e kau akó, fakaafeʻi kinautolu ke nau fakamanatu nounou e vahe ko iá.

• Ko e hā ha ngaahi tefitoʻi fakataipe ʻokú ke lava ʻo manatuʻi mei he misi ʻa Līhai ʻoku lekooti ʻi he 1 Nīfai 8?

Naʻe loto moʻoni ʻa Nīfai ke mahino kiate ia ʻa e ʻuhinga ʻo e misi ʻa ʻene tamaí pea naʻá ne tui ʻe fakahā ange ia ʻe he ʻEikí. ʻI heʻene fakalaulauloto ʻi hono lotó, naʻe hā ange e Laumālie ʻo e ʻEikí ʻo fakahā kiate ia ʻa e ʻakau ʻo e moʻuí. ʻI he kole ʻa Nīfai ke ne ʻiloʻi e fakaʻuhinga ʻo e fuʻu ʻakaú, naʻe hā mai ha ʻāngelo ke tokoniʻi ia ke ʻilo lahi ange ki he meʻa naʻá ne mamata ki ai ʻi he mata meʻa-ha-maí. (vakai, 1 Nīfai 11:1–14).

Naʻe fai ʻe he ʻāngeló ha fehuʻi kia Nīfai ko ha konga ʻo hono tokoniʻi ʻo Nīfai ke mahino kiate ia ʻa e ʻuhinga ʻo e fuʻu ʻakaú. Lau ʻa e 1 Nīfai 11:16 ke ʻiloʻi pe ko e hā e fehuʻi naʻe ʻeké.

Fakakaukau ke vahevahe e kau akó ke nau tauhoa pea ʻai ke nau fehuʻiʻaki mo tali ʻa e fehuʻi ʻi he veesi 16 kimuʻa pea nau lau ʻa e veesi 17.

• Te ke tali fēfē e fehuʻi ʻi he veesi 16?

Lau ʻa e veesi 17 ke ʻilo pe naʻe tali fefe ʻe Nīfaí.

• Ko e hā ʻoku makehe kiate koe fekauʻaki mo e tali ʻa Nīfai ʻi he veesi 17?

ʻOku ʻuhinga ʻa e “āfeitaulaló” ki he hifo tauʻatāina mei ha faʻahinga tuʻunga ʻo ha lakanga pe lāngilangi. Hangē ko ʻení, ʻe lava ke lau hono fufulu ʻe he Fakamoʻuí e vaʻe ʻo ʻEne kau ākongá ko ha ngāue āfeitaulalo ia (vakai, Sione 13:3–17). Neongo ʻe lava ke akoʻi foki ʻe he āfeitaulalo ʻa e ʻOtuá ʻa ia naʻe lekooti ʻi he ngaahi veesi ko ʻení ʻa e āfeitaulalo ʻa e Tamai Hēvaní, ka ʻoku fakatefito e lēsoni ko ʻení ʻi he āfeitaulalo ʻa Sīsū Kalaisí.

Lau e meʻa naʻe mamata ki ai ʻa Nīfai ʻi he 1 Nīfai 11:13–23, ʻo kumi ha fakamoʻoni ʻo e āfeitaulalo ʻa e ʻOtuá.

• Ko e hā ha fakamoʻoni naʻá ke maʻu ki he āfeitaulalo ʻa e ʻOtuá?

• Ko e hā ha ngaahi moʻoni ʻokú ke ako fekauʻaki mo e āfeitaulalo ʻa e ʻOtuá?

Ko e foʻi moʻoni ʻe taha te tau lava ʻo ako ko e fakatātaaʻi ʻe he āfeitaulalo ʻa e ʻOtuá ʻa ʻEne ʻofa maʻatautolú.

• ʻOkú ke pehē ʻoku fakahaaʻi fēfē ʻe he ʻaloʻi ʻo e Fakamoʻuí ʻa e foʻi moʻoni ko ʻení?

Lau ʻa e 1 Nīfai 11:26–33, ʻo kumi ha ngaahi founga kehe naʻe āfeitaulalo ai ʻa Sīsū ke fakahaaʻi ʻEne ʻofa ki he faʻahinga ʻo e tangatá.

Fakakaukau ke vahevahe e kau akó ki ha ngaahi kulupu pe tauhoa pea vahe ange ha ngaahi konga iiki ange ʻo e 1 Nīfai 11:26–33. Hili ʻenau lau e ngaahi veesi ne vahe angé, ʻe lava ke nau aleaʻi e ngaahi fehuʻi ko ʻení mo ʻenau ngaahi kulupú pe ngaahi hoá.

Ko ha fakakaukau ʻe taha ko hono fakaʻaliʻai ha ngaahi ʻimisi ʻo e ngaahi konga ʻo e moʻui ʻa e Fakamoʻuí naʻe ʻasi ʻi he ngaahi veesi ko ʻení. Fakaafeʻi leva e kau akó ke kumi ha ngaahi fakamatala ʻi he Fuakava Foʻoú ʻokú ne fakamatalaʻi e meʻa naʻe hoko ʻoku fakahoʻata atu ʻi he ʻimisi takitaha.

ʻE lava foki ke sio e kau akó ʻi ha fakatātā, kumi ʻa e fakamatala ʻoku fekauʻaki mo ia ʻi he Fuakava Foʻoú, pea fakamatalaʻi e founga ʻoku fakahaaʻi ai ʻe he fakamatalá ʻa e āfeitaulalo ʻa e ʻOtuá.

• Ko e hā ha fakamoʻoni ʻo e moʻui āfeitaulalo ʻa e Fakamoʻui naʻá ke maʻu?

• ʻOku fakahaaʻi fēfē ʻe he ngaahi tōʻonga ko ʻení ʻa ʻEne ʻofá?

• Ko e hā ha ngaahi sīpinga kehe mei he moʻui ʻa Sīsū Kalaisí ʻokú ke ongoʻi ʻokú ne fakahaaʻi ʻEne ʻofá mo ʻEne āfeitaulaló?

Lau e meʻa naʻe lea ʻaki ʻe ʻEletā Kuenitini L, Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e founga ʻoku tokoniʻi ai kitautolu ʻe he ngaahi meʻa ne hoko ko ʻení ke tau vakai ki he ʻofa ʻa e Fakamoʻuí maʻatautolú. Pe ko hoʻomou mamata ʻi he “Ko e Meʻa Fakaʻaho Taʻengatá” mei he taimi 4:01 ki he 4:43, maʻu ʻi he ChurchofJesusChrist.org.

ʻEletā Kuenitini L. Kuki

Ko e meʻa mahuʻinga taha he hisitōliá ko e sīpinga ʻo e loto fakatōkilalo mo e feilaulau ʻa e Fakamoʻuí maʻá e faʻahinga kotoa ʻo e tangatá. Neongo ko e Fakamoʻuí ko ha mēmipa ia ʻo e Toluʻi ʻOtuá ka naʻá Ne finangalo ke hifo mai ki māmani ko ha valevale masivesiva ʻo kamata ha moʻui naʻe kau ai hono akoʻi mo fakamoʻui Hono kāingá, ʻo Ne fuesia ha mamahi fakalilifu ʻi Ketisemani mo e funga kolosí kae lava ke kakato ʻEne Fakaleleí. ʻOku ʻiloa ʻa e tōʻonga ʻofa mo loto fakatōkilalo ko ʻeni ʻa Kalaisí ko ʻEne āfeitaulaló. Naʻá Ne fakahoko ʻeni maʻá e tangata mo e fefine kotoa kuo fakatupu pea ʻe fakatupu ʻe he ʻOtuá. (Quentin L. Cook, “Ko e Meʻa Fakaʻaho ʻOku Taʻengatá,” Ensign pe Liahona, Nōvema 2017, 52)

• ʻOku tokoni fēfē nai e lea ʻa ʻEletā Kukí ke mahino lelei ange kiate koe ʻa e āfeitaulalo ʻa e ʻOtuá?

Ko e ngaahi tāpuaki ne hokohoko mai ʻi he āfeitaulalo ʻa e Fakamoʻuí

ʻOku kei hokohoko atu pē e hoko ʻa e āfeitaulalo ʻa e Fakamoʻuí ko ha fakamoʻoni ʻo ʻEne ʻofa maʻatautolu he ngaahi ʻaho ní.

Fakakaukau ke vahevahe ʻa e founga kuo faitāpuekina ai koe ʻe he āfeitaulalo ʻa e Fakamoʻuí. ʻE lava ke tokoni ʻeni ki he kau akó ke nau ongoʻi e ʻofa ʻa e Tamai Hēvaní mo Sīsū Kalaisi maʻanautolú.

 

ʻE ala ʻaonga ki he kau akó haʻanau tali e ngaahi fehuʻi ko ʻení ʻi heʻenau tohinoa akó.

• Kuo fakahaa‘i fēfē ʻe he Tamai Hēvaní mo Sīsū Kalaisi ʻa ʻEna ʻofa ʻiate koé?

• ʻOku tākiekina fēfē nai ʻe he meʻa kuó Na faí ʻa e ongo ʻokú ke maʻu kiate Kinauá?

• Ko e hā ʻoku ke ongoʻi ʻokú ne ueʻi koe ke ke fakahaaʻi hoʻo ʻofa ki he Tamai Hēvaní mo Sīsū Kalaisí?

Hili hono maʻu ʻe he kau akó ha taimi feʻunga ke nau tohi ai, fakakaukau ke fakaafeʻi ha kau ako te nau loto fiemālie ke vahevahe ʻenau ngaahi fakakaukaú mo ʻenau ngaahi ongó. Kapau naʻe fai ʻe he kau akó ʻa e teuteu ki he kalasí, ʻe lava ke nau vahevahe mo e kalasí ʻa e meʻa ne nau omi mo iá pea fakamatalaʻi e founga ʻoku tokoniʻi ai kinautolu ʻe he meʻa ko iá ke nau ongoʻi e ʻofa ʻa e ʻOtuá kiate kinautolú.

Fakamatala Fakamahinó mo e Puipuituʻá

Ko hai ʻa e Laumālie ʻoku lea kia Nīfai ʻi he kamataʻanga ʻo e mata meʻa-hā-mai ko ʻení?

Naʻe akoʻi ʻe ʻEletā Sēmisi E. Talamesi (1862–1933) ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻEletā Sēmisi E. Talamesi

ʻOku malava ʻe he Laumālie ʻo e ʻEikí ʻo fakahā Ia ʻi he fōtunga mo e tatau ʻo ha tangata, ʻoku fakahaaʻi ia ʻi he ʻinitaviu fakaʻofoʻofa ʻi he vahaʻa ʻo e Laumālié mo Nīfaí, ʻa ia naʻá Ne fakahā ai Ia ki he palōfitá, fakafehuʻia ia fekauʻaki mo ʻene ngaahi holí mo e tuí, fakahinohinoʻi ia ʻi he ngaahi meʻa ʻa e ʻOtuá, ʻo fefolofolai mata ki he mata mo e tangatá.” (James E. Talmage, The Articles of Faith [1968], 159–160; vakai foki, Marion G. Romney, “The Holy Ghost,” Ensign, May 1974, 90–92)

Ko e hā kuo akoʻi ʻe he kau taki ʻo e Siasí fekauʻaki mo e āfeitaulalo ʻa e ʻOtuá?

Naʻe pehē ʻe he Palōfita ko Siosefa Sāmitá (1805–44):

ko e Palōfita ko Siosefa Sāmitá

Ko e taimi ʻoku tau fakakaukau ai ki he māʻoniʻoni mo e haohaoa ʻa hotau ʻEiki māʻongoʻongá, ʻa ē naʻá Ne fakaava ʻa e founga ke tau lava ai ʻo omi kiate Iá, ʻo aʻu ki Heʻene feilaulauʻi Iá, ʻoku molū hotau lotó ʻiate kitautolu ʻi Heʻene [āfeitaulaló]. (Ngaahi Akonaki ʻa e Kau Palesiteni ʻo e Siasí: Siosefa Sāmita [2011], 62–63)

Naʻe fakamatalaʻi ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā D. Toti Kulisitofasoni

Ko Sīsū ʻa e ʻUluaki Fānau ʻi he lotolotonga ʻo e ngaahi laumālié pea mo e ʻAlo Tofu pē ʻe Taha ʻo e ʻOtuá naʻe Fakatupu ʻi he kakanó. Neongo ko kitautolú ʻoku ʻikai ko ha fakatupu ʻa e ʻOtuá ʻi he kakanó, ka ʻoku tau hangē pē ko Sīsuú, ko e fānau fakalaumālie ʻa e ʻOtuá. Ko ia ai, ko hotau fāʻeleʻi mai ki he moʻui fakamatelié ko ha āfeitaulalo ia, pea hangē ko hono ʻaloʻi ʻo Kalaisí, ʻoku ʻi ai hono taumuʻa fakaʻeiʻeiki. Hangē pē ko Sīsuú, naʻa tau hifo mei he langí ke fai e finangalo ʻo Ia naʻá Ne fekauʻi mai kitautolú pea mo ngāue ke aʻusia, ʻi he ʻaloʻofa ʻa Kalaisí, ʻa e moʻui taʻe-faʻa-maté mo e moʻui taʻengatá. ʻE mahuʻinga nai kiate kitautolu, ʻi heʻetau feinga ke “foki hake ki ʻolungá,” ke tau loto fakatōkilalo foki ʻi ha ngaahi meʻa ʻe niʻihi ʻe lava ke mahino kakato ange kiate kitautolu pea tau hoko ʻo anga faka-Kalaisi ange? Kapau naʻe fiemaʻu ʻe Sīsū ha ngaahi aʻusia pau, te tau fiemaʻu nai ha ngaahi faingataʻa mo ha ngaahi ʻahiʻahi, “koeʻuhí ke fonu [hotau] lotó ʻi he [meesi], ʻo fakatatau ki he kakanó, koeʻuhí ke tau [ʻiloʻi] ʻo fakatatau ki he kakanó ʻa e founga ke [tau] fetokoniʻaki ai ʻo fakatatau ki [hotau] ngaahi vaivaí” [ʻAlama 7:12]? (D. Todd Christofferson, “The Condescension of God and of Man” [First Presidency Christmas devotional, Dec. 7, 2014], ChurchofJesusChrist.org)

 

Ngaahi ʻEkitivitī Fakalahi ki he Akó

1 Nīfai 11:34–36. “Ko e fuʻu fale lahi mo ʻataʻataá”

Fakakaukau ke fakaafeʻi e kau akó ke nau fakamanatuʻi e ngaahi fakaikiiki fekauʻaki mo e fale lahi mo ʻataʻatā naʻe hā ʻi he misi ʻa Līhaí. Fakaafeʻi kinautolu ke nau toe vakaiʻi nounou ʻa e 1 Nīfai 8:26–28, 31–34, ʻo ka fiemaʻu.

Fakaafeʻi e kau akó ke nau lau ʻa e 1 Nīfai 11:34–36, ʻo kumi e ʻuhinga ʻo e fuʻu fale lahi mo ʻataʻataá. Fehuʻi ange pe ko e hā hono ʻuhinga kiate kinautolú pea mo e meʻa ʻoku nau ako mei he fakataipe ʻo e holo ʻa e falé. Fehuʻi ange pe ʻoku nau pehē ko e hā ʻoku “tauʻi [ai] ʻa e kau ʻaposetolo ʻe toko hongofulu mā ua ʻa e Lamí” (veesi 35) ʻe kinautolu ʻi he fuʻu falé, pea fakaafeʻi ke nau vahevahe ʻa e founga ʻe lava ke hoko ai ia ʻi hotau kuongá.

Fakaafeʻi e kau akó ke vahevahe ha ngaahi founga te nau lava ai ʻo tuʻu fakataha mo e kau ʻAposetoló pe ngaahi aʻusia kuo nau maʻu ʻokú ne fakamālohia ʻenau ngaahi fakamoʻoni ko e kau ʻAposetoló ko e “kau ʻaposetolo moʻoni kinautolu ʻa e Lamí.” Fakaafeʻi e kau akó ke fokotuʻu ha taumuʻa ke tuʻu ʻi he ʻao ʻo e Fakamoʻuí mo ʻEne kau ʻAposetolo kuo filí.

1 Nīfai 11. “Vakai!”

Lolotonga hona taimi mo Nīfaí, naʻe tuʻo lahi hono fakahā ʻe he Laumālié mo ha ʻāngelo ʻa e ʻEikí kia Nīfai ke vakai. Fakaafeʻi e kau akó ke nau fekumi ʻi he 1 Nīfai 11 ki he foʻi lea vakaí pea fakatokangaʻi ʻa e meʻa naʻe fakahā kia Nīfaí.

Fakamanatu ki he kau akó ko e taha ʻo e ngaahi tefitoʻi taumuʻa ʻo e Laumālie Māʻoniʻoní ke fakamoʻoni ki he Tamai Hēvaní mo Sīsū Kalaisi (vakai, 3 Nīfai 28:11).

Kole ki he kau akó ke vahevahe ʻa e founga kuo tataki ai ʻe he Laumālie Māʻoniʻoní ʻenau tokangá kia Sīsū Kalaisi mo tokoniʻi kinautolu ke nau ako fekauʻaki mo Ia.

Fakaafeʻi e kau akó ke nau kole ki he Tamai Hēvaní ke tataki kinautolu ki he Fakamoʻuí ʻi heʻenau ako e Tohi ʻa Molomoná. Fakamanatu ki he kau akó ke nau tokanga ki he ngaahi ueʻi ʻa e Laumālié te ne tataki kinautolu ke nau vakai ki he Lami ʻa e ʻOtuá (vakai, 1 Nīfai 11:31).