1 Nephi 6–7

Pag-ila “sa mga Butang sa Dios”

Nephi ug ang iyang mga igsoon nga lalaki nakig-istorya kang Ishmael

Kon ikaw mosulat og usa ka rekord nga tipigan alang sa umaabot nga mga henerasyon aron makat-onan, unsa kaha ang imong ilakip? Si Nephi mipahayag sa iyang tinguha nga ang iyang mga sinulat makapahimuot sa Dios ug makadani sa uban sa pagsunod ni Jesukristo. Kini nga leksiyon makatabang kanimo nga makasabot kon sa unsang paagi nga ang mga katuyoan sa Basahon ni Mormon makatabang kanimo sa imong pagtuon ug sa imong kinabuhi.

Pagtutok sa katuyoan sa tagsulat. Sumala sa ulohan nga pahina niini, ang Basahon ni Mormon gisulat “pinaagi sa espiritu sa pagpanagna ug sa pagpadayag” aron sa pagkumbinser sa tanang katawhan nga si Jesus mao ang Kristo. Samtang magtuon ang mga estudyante, awhaga sila sa pagpamalandong ngano nga ang matag tagsulat mirekord og usa ka partikular nga pagtulun-an o panghitabo ug sa unsang paagi kini makatabang sa mga magbabasa nga mas mapaduol kang Jesukristo.

Pagpangandam sa estudyante: Awhaga ang mga estudyante sa paghimo sa ilang inadlaw nga personal nga pagtuon sa Basahon ni Mormon. Dapita sila sa pagpamalandong sa ilang kasinatian sa pagtuon sa Basahon ni Mormon ug unsay ilang nakat-onan.

Mga Posibleng Kalihokan sa Pagkat-on

Ngano nga tun-an ang Basahon ni Mormon?

Ang mosunod gituyo aron matabangan ang mga estudyante sa pag-ila nganong gilakip ni Nephi ang unsay iyang giapil sa iyang rekord. Kon gusto kang mogamit og biswal, pagbutang og kopya sa Basahon ni Mormon tupad sa ubang mga libro ug dapita ang mga estudyante sa pag-drama-drama niini nga sitwasyon isip usa ka klase o nga magkapares.

Hunahunaa kon unsaon nimo pagtubag kon adunay mangutana kanimo sa mosunod nga mga pangutana:

• Adunay daghang mga libro mahitungod sa relihiyon ug sa pagkahimong mas maayong tawo; nganong kinahanglan nakong basahon ang Basahon ni Mormon? Unsa ang mahimo niini ngari kanako? Unsay nakalahi o mas nakapamaayo niini kay sa ubang mga libro?

Pagdapit og pipila ka mga estudyante sa pagpaambit kon unsay ilang isulti. Pasalamati sila sa ilang mga tubag ug dayega sila sa mga paagi nga maayo ang ilang pagtubag. Dapita sila sa pagpangita og dugang pa nga mga panabot samtang sila magtuon.

Si Nephi mipaambit sa iyang tumong, o mga katuyoan, sa pagrekord sa iyang gibuhat diha sa Basahon ni Mormon. Ang pagkahibalo niini nga mga katuyoan makatabang kanato nga makasabot nganong kinahanglan natong basahon ang libro ug unsa ang mahimo niini alang kanato.

Basaha ang 1 Nephi 6:3–6 ug ikonsiderar ang pagmarka sa mga pulong o hugpong sa mga pulong nga nagpaila sa mga katuyoan ni Nephi sa pagtipig sa iyang rekord. Mahimong makatabang ang pagkahibalo nga “ang Dios ni Abraham, … Isaac, ug … Jacob” (bersikulo 4) usa ka titulo alang kang Jesukristo.

• Unsaon nimo pagpasabot nganong girekord ni Nephi ang iyang gibuhat?

Sumala ni Nephi, ang iyang mga sinulat gituyo aron sa pagdani kanato sa pagduol kang Jesukristo ug naglangkob lamang og mga butang nga makapahimuot sa Dios.

Paggahin og panahon sa paghunahuna mahitungod sa imong kasinatian sa pagbasa sa Basahon ni Mormon sa una hangtod karon.

Tinoa kon labing maayo ba alang sa mga estudyante nga i-istorya ang ilang tubag sa mosunod nga mga pangutana, maghunahuna sa ilang mga tubag nga magtinagsa, o isulat ang ilang mga tubag diha sa ilang mga journal sa pagtuon.

• Ang Basahon ni Mormon nagtabang ba kanimo nga mahibalo sa mga butang nga makapahimuot sa Dios? Kon mao, sa unsang paagi?

• Gibati ba nimo nga ang pagtuon sa Basahon ni Mormon nagtabang kanimo nga mas maduol kang Jesukristo ug maluwas? Ngano o nganong dili?

• Sa unsang paagi nga ang pagkahibalo sa mga butang sa Dios ug ang mas mahiduol kang Jesukristo mahimong usa ka panalangin sa imong kinabuhi?

Pagduol ngadto kang Jesukristo ug pagkahibalo sa mga butang nga makapahimuot sa Dios

Usa ka mapuslanon nga kahanas sa pagtuon sa kasulatan mao ang pagpangita sa mga katuyoan ni Nephi samtang magbasa ka sa Basahon ni Mormon. Mahatagan ka og oportunidad sa pagpraktis sa pagbuhat niini samtang magtuon ka sa 1 Nephi 7.

Ikonsiderar ang pagpakita sa mosunod nga mga instruksyon, mga pakisayran sa kasulatan, ug mga summary ug dapita ang mga estudyante sa pagpili og seksiyon nga tun-an. Tinoa kon labing maayo ba alang sa mga estudyante nga magtuon nga tagsa-tagsa, magtinagurha, o diha sa gagmay nga mga grupo. Mahimong mapuslanon ang paglakaw-lakaw palibot sa kwadro ug tabangan ang si bisan kinsa nga mga estudyante nga adunay mga pangutana o nanginahanglan og tabang sa panabot o pag-personalize sa ilang gibasa.

Ang mga panghitabo nga giasoy ni Nephi sa 1 Nephi 7 mahimong bahinon sa tulo ka dagkong bahin. Basaha ang mosunod nga mga summary sa matag bahin. Pagpili og usa ug tun-i pa kini, mangita sa bisan unsa nga makapahimuot sa Dios ug makatabang kanato sa pagduol ngadto kang Kristo.

Bahin 1. 1 Nephi 7:1–5. Si Nephi ug ang iyang mga igsoong lalaki mibalik sa Jerusalem pag-usab aron sa pagdani sa pamilya ni Ishmael sa pagkuyog sa ilang panaw ngadto sa gisaad nga yuta. Kini mitugot kang Nephi ug sa iyang mga igsoong lalaki nga magminyo ug makabaton og mga pamilya.

Bahin 2. 1 Nephi 7:6–18. Si Laman ug Lemuel migapos ni Nephi, nagtinguha nga biyaan siya aron mamatay sa kamingawan. Apan si Nephi mipakita og hilabihan nga hugot nga pagtuo, ug ang Ginoo sa milagrosong paagi miluwas kaniya.

Bahin 3. 1 Nephi 7:17–22. Si Nephi sinserong mipasaylo sa iyang mga igsoong lalaki sa ilang pagsulay sa pagpatay kaniya, ug ang grupo mibalik ngadto kang Lehi ug Sariah.

Kon mahuman na og tuon ang mga estudyante, ipahisgot nila kon unsay ilang nakat-onan ug ipasulat sa pisara ang ilang tubag sa mosunod nga pangutana.

• Unsa ang imong nakat-onan gikan sa imong pagtuon nga sa imong hunahuna nakapahimuot sa Dios ug makatabang kanimo sa pagduol ngadto kang Kristo?

Ang mga estudyante mahimong mopaambit og mga baroganan sama sa ang kaminyoon ug pamilya maoy sentro sa plano sa Dios; kon kita mopakita og hugot nga pagtuo sa Ginoo, Siya makahimo sa tanang butang alang kanato sumala sa Iyang kabubut-on; ug ang pagpasaylo sa uban magdala og kalinaw.

• Sa unsang paagi nga ang imong nakat-onan makatabang kanimo sa imong kinabuhi?

Kon gikinahanglan, ikonsiderar ang pagpangutana og follow-up nga mga pangutana sama sa mosunod: Unsa kaha ang hitsura sa paggamit sa unsay imong nakat-onan sa imong kinabuhi? Unsay sunod nga mga lakang ang imong mahimo?

Pamalandongi ang imong kasinatian sa pagtuon karon samtang piho kang nangita og mga butang nga makatabang kanimo sa pagduol ngadto kang Jesukristo ug makapahimuot sa Dios.

• Sa unsang paagi kaha ang imong pagtuon sa kasulatan molambo kon makanunayon ka nga mobuhat sa imong pagtuon niining paagiha?

Ikonsiderar ang pagtapos pinaagi sa personal nga pagpamatuod o pagtugot sa mga estudyante sa pagpaambit sa unsay ilang nakat-onan o gibati gikan sa ilang pagtuon.

Komentaryo ug Background nga Impormasyon

Unsa nga mga panalangin ang moabot gikan sa kinasingkasing nga pagtuon sa Basahon ni Mormon ug pagrekord sa mga kamatuoran nga anaa niini?

Ikonsiderar ang pagtan-aw sa mosunod nga bidyo nga nagpakita sa kabatan-onan gikan sa silangang Uropa nga naghulagway sa ilang mga kasinatian sa pagbasa sa Basahon ni Mormon ug sa pagrekord sa ilang nakat-onan.

Ngano nga ang pamilya importante kaayo sa Ginoo? Unsa ang kalainan nga akong mahimo sa akong kaugalingon nga pamilya karon?

Ang mga kasulatan naghisgot sa panginahanglan sa mga anak nga lalaki ni Lehi nga magminyo aron sila makabaton og mga anak sa gisaad nga yuta, ug pinaagi sa modernong mga propeta atong nakat-onan nga ang pamilya sentro sa plano sa Ginoo aron mapahinabo ang atong mahangturong kapalaran. Ang mosunod nga mga kapanguhaan mahimong makatabang kanimo nga mas lawom nga makasabot sa kamahinungdanon sa pamilya ug sa epekto nga mahimo sa mga pamilya.

• “Ang Pamilya: Usa ka Pamahayag ngadto sa Kalibotan,” ChurchofJesusChrist.org

• Julie B. Beck, “Pagtudlo sa Doktrina kabahin sa Pamilya,” Liahona, Mar. 2011, 32–37

Unsaon nako pagpasaylo sa uban?

Si Elder Jeffrey R. Holland sa Korum sa Napulog Duha ka Apostoles mitudlo sa mosunod:

Elder Jeffrey R. Holland

“Pagpasaylo, ug pagapasayloon kamo” [Luke 6:37], si Kristo mitudlo sa panahon sa Bag-ong Tugon. Ug sa atong panahon: “Ako, ang Ginoo, mopasaylo kinsa Ako mopasaylo, apan kamo gikinahanglan nga mopasaylo sa tanan nga mga tawo” [Doktrina ug mga Pakigsaad 64:10]. Hinoon, importante kini, alang sa pipila kaninyo nga nagsinati sa tinuod nga kasakit nga maghunahuna nga wala Siya nag-ingon. Siya wala moingon nga, “Kamo wala tugoti nga mobati og tinuod nga kasakit o tinuod nga kasubo gikan sa makapahugno nga mga kasinatian nga imong naangkon gikan sa uban.” Wala usab Siya nag-ingon, “Aron makapasaylo sa hingpit ipadayon ang makadaot nga relasyon o balik ngadto sa abusado, makadaot nga kahimtang.” Apan bisan pa man sa labing makaguol nga kalapasan nga tingali moabot kanato, molampos lang kita batok sa atong kasakit kon motunob kita sa dalan sa tinuod nga pagkaalim. Kana nga dalan mao ang pagpasaylo nga gisubay ni Jesus sa Nazaret, kinsa nagtawag sa matag usa kanato, “Umanhi ka ug sumunod kanako.” [Luke 18:22]. (Jeffrey R. Holland, “Ang Pangalagad sa Pagpasig-uli (Reconciliation) Ang Ministeryo sa Panag-uli,” Liahona, Nob. 2018, 78–79)

Samtang miserbisyo isip miyembro sa Seventy, si Elder Larry J. Echo Hawk mipaambit sa mosunod:

Elder Larry J. Echo Hawk

Mga kaigsoonan, aduna bay mga tawo sa atong kinabuhi nga nakapasakit kanato? Naghambin ba kita og daw sama sa hingpit nga gipakamatarong nga kayugot ug kasuko nga mga pagbati? Ato bang gitugutan ang garbo nga mopugong kanato sa pagpasaylo ug paghikalimot? Ako modapit natong tanan sa hingpit nga pagpasaylo ug tugoti nga ang pagkaalim mahitabo gikan sa kahiladman. Ug bisan kon ang pagpasaylo dili moabot karon, hibaloi nga kon ato kining gitinguha ug maningkamot alang niini, moabot kini—sama nga sa kadugayan miabot kini alang kanako. (Larry J. Echo Hawk, “Maingon nga si Kristo Nakapasaylo Kaninyo, nan Kinahanglan Kamo Usab Magapasaylo,” Ensign o Liahona, Mayo 2018, 16)

Dugang nga mga Kalihokan sa Pagkat-on

Usa ka alternatibo nga pagsugod

Mahimong hisgotan sa mga estudyante ang mga kalihokan diin ang labing mahinungdanong katuyoan kasagaran nga mataligam-an. Pananglitan, ang pag-eskwela mahimo na hinoong mahitungod sa pagkompleto sa mga buluhaton imbes nga makakuha og edukasyon. Hangyoa ang mga estudyante sa pagpamalandong sa mga sangpotanan sa dili dayon mabantayan nga [overlook] mas dakong katuyoan sa usa ka butang. Tabangi sila nga makasabot nga daghang mga tawo ang wala makasabot sa katuyoan sa Basahon ni Mormon ug nga kini nga leksiyon sulbaron kana nga katuyoan.

Pagpangita sa mga baroganan sa ebanghelyo

Ang mga estudyante mahimong mangita sa mga baroganan sa ebanghelyo samtang magbasa sila sa tulo ka bahin sa 1 Nephi 7. Human mabasa, mahimo nilang pangutan-on ang ilang kaugalingon og mga pangutana sama sa “Unsa man ang usa sa mahinungdanong mga leksiyon nga akong nakat-onan gikan niini nga mga bersikulo?”

Kon ang mga estudyante nagkinahanglan og tabang sa panabot ug pag-ila sa mga baroganan, ikonsiderar kon unsaon nga makatabang ang mosunod nga mga kapanguhaan:

• David A. Bednar, “Ang mga Baroganan sa Akong Ebanghelyo,” Liahona, Mayo 2021, 123–26

Paghatag og gibug-aton sa doktrina sa pamilya

Aron matabangan ang mga estudyante nga makasabot unsa ang gibati sa Ginoo mahitungod sa kamahinungdanon sa kaminyoon ug pamilya, ikonsiderar ang pagdapit kanila sa pagpamalandong kon unsaon nila pagtubag ang mosunod nga pangutana: “Nganong ang Unang Kapangulohan nagpakabana pag-ayo kanimo ug mihatag og daghang mga kapanguhaan alang kanimo?” (Julie B. Beck, “Pagtudlo sa Doktrina kabahin sa Pamilya,” Liahona, Mar. 2011, 12). Samtang nagtuon ang mga estudyante sa 1 Nephi 7:1–5, ikonsiderar ang pagpaambit og dugang nga mga bahin sa pakigpulong ni Sister Beck o “Ang Pamilya: Usa ka Pamahayag ngadto sa Kalibotan” (ChurchofJesusChrist.org).