Ang Gugma sa Dios Mao ang Labing Madanihon sa Tanan nga mga Butang
Imahe
Kahoy sa Kinabuhi
Unsaon nimo paghulagway ang gugma sa Dios? Si Lehi adunay panan-awon diin siya nakakita og usa ka matahom nga kahoy. Mikaon siya sa bunga sa maong kahoy, ug kini “hilabihan ka tam-is, labaw pa sa tanan” nga iyang natilawan sukad (1 Nephi 8:11). Kini nga kahoy ug ang iyang bunga nagrepresentar sa gugma sa Dios, nga gipakita sa pagkatawo, kinabuhi, pangalagad, ug maulaong pagsakripisyo ni Jesukristo. Kini nga gugma “mipuno sa kalag [ni Lehi] sa tuman nga hingpit nga kalipay” (1 Nephi 8:12). Kini nga leksiyon gituyo aron sa pagtabang kanimo nga madugangan ang imong tinguha nga makasinati sa gugma sa Dios ug sa Pag-ula ni Jesukristo.
Pag-awhag sa mga tigkat-on sa pagpaambit og mga kasinatian. Ang matag usa sa klase adunay daghang tinubdan sa pagpamatuod, mga panabot, ug mga kasinatian sa pagpuyo sa ebanghelyo. Paghatag og mga kahigayonan sa mga estudyante sa pagpaambit og angay nga personal nga mga kasinatian. Ipahayag ang pasalamat alang sa mga estudyante kon sila andam nga mopaambit sa maong mga kasinatian.
Pagpangandam sa estudyante: Dapita ang mga estudyante sa pagpamalandong sa mosunod nga mga pangutana: Sa unsang mga paagi nga ang usa ka tawo makasinati sa gugma sa Dios? Kanus-a nimo nabati ang Iyang gugma alang kanimo? Ang mga estudyante mahimo usab nga makig-istorya sa usa ka miyembro sa pamilya o sa lider sa Simbahan kon giunsa nila pagsinati ang gugma sa Dios alang kanila.
Posibleng mga Kalihokan sa Pagkat-on
Kangitngit ug kahayag
Ikonsiderar ang pagpasalida og bidyo sa usa niini nga mga istorya nga gipakigbahin sa kinatibuk-ang komperensiya. Mahimo ka usab nga mopaambit og personal nga kasinatian aron matabangan ang mga estudyante nga makasugod sa pagbati kon unsa ang kahimtang nga anaa sa kangitngit ug nagtinguha og kahayag. Makatabang kini sa mga estudyante nga maandam sa pagkat-on mahitungod sa ilang panginahanglan ni Jesukristo sa pagbuntog sa kangitngit sa ilang kinabuhi.
Pagsakay og bisikleta agi sa 15 ka milya ang gitas-on nga tunnel (tan-awa sa Vern P. Stanfill, “Pilia ang Kahayag,” Liahona, Nob. 2015, 55–57).
Samtang nagpuyo sa kamingawan, si Lehi mipaambit sa mga detalye sa usa ka panan-awon nga iyang nakita ngadto sa iyang pamilya. Niini nga panan-awon, siya didto sa “usa ka mangitngit ug awaaw nga kamingawan” (1 Nephi 8:4).
Aron matabangan ang mga estudyante nga mahanduraw ang mosunod nga mga bersikulo, mahimong makatabang ang paghangyo kanila sa pagbasa og hinay o imong basahon ang mga bersikulo ug dapita ang mga estudyante sa pagpiyong sa ilang mga mata ug paghanduraw kon unsay gihulagway sa mga bersikulo.
Basaha ang 1 Nephi 8:5–8, nga mangita unsay nahitabo ni Lehi ug unsay iyang nabati. Makatabang ang paghanduraw sa imong gibasa. Pangita og naghulagway nga mga detalye nga makatabang kanimo nga makamugna og hulagway sa hunahuna [mental picture] o handurawa ang mga panghitabo sama sa salida.
Unsa nga matang sa mga panghunahuna o mga pagbati sa imong hunahuna ang hinungdan nga si Lehi nag-ampo alang sa kaluoy?
Paggahin sa makadiyot sa pagpamalandong sa nagkalain-laing mga paagi nga mahimo natong bation ang kangitngit sa atong kinabuhi ug ang mga rason nga tingali kita mangamuyo sa Ginoo alang sa kaluoy.
Basaha ang 1 Nephi 8:9–12, nga mangita kon giunsa pagtabang sa Ginoo si Lehi.
Aron matabangan ang mga estudyante nga magpadayon sa paghanduraw sa kasulatan, ikonsiderar ang pagpasalida sa bidyo “Nadiskobrehan ni Lehi ang Kahoy sa Kinabuhi” (4:32) gikan sa time code 1:52 hangtod sa 4:32.
Sa imong journal sa pagtuon, paghimo og yano nga drowing nga nagrepresentar sa kahoy nga nakita ni Lehi. Idrowing ang bunga sa kahoy, ug sulati ang bunga base sa mga pagpasabot ni Lehi diha sa 1 Nephi 8:10–12. (Alang sa dugang nga mga paghulagway aron masulat sa bunga sa kahoy, basaha ang 1 Nephi 15:36 ug Alma 32:42.) Samtang magdrowing ka, hunahunaa kon unsa kaha ang girepresentar niini nga kahoy ug sa iyang bunga.
Sa wala madugay, si Nephi gusto nga personal nga makahibalo ug makasabot sa panan-awon, lakip ang kahulogan sa kahoy nga nakita ni Lehi. Samtang namalandong sa unsay gitudlo kaniya, si Nephi gipakita, pinaagi sa Espiritu, sa usa ka panan-awon sa Birhen Maria nga nagkugos sa batang si Jesus diha sa iyang mga bukton (tan-awa sa 1 Nephi 11:13, 20).
Tan-awa ang mosunod nga hulagway ug hunahunaa kon ngano kaha nga gipakita kini ngadto kang Nephi sa dihang gusto Niyang mahibalo sa kahulogan sa kahoy.
Imahe
Maria ug ang bata nga si Jesus
Basaha ang 1 Nephi 11:21–23, nga mangita kon unsa pa ang gipakita ngadto kang Nephi ug sa unsang paagi kini nakatabang kaniya nga makat-on sa kahulogan sa kahoy. Mahimo nimong sulatan ang kahoy base sa unsay imong nakat-onan.
Sa imong hunahuna giunsa sa Manluluwas pagtabang kanato nga mobati sa gugma sa Dios?
Si Elder David A. Bednar sa Korum sa Napulog Duha ka Apostoles mitudlo:
Imahe
Elder David A. Bednar
Ang dakong pagpakita sa gugma sa Dios alang sa Iyang mga anak mao ang mortal nga pangalagad, maulaong sakripisyo, ug Pagkabanhaw ni Ginoong Jesukristo. Ang bunga sa kahoy makonsiderar nga simbolo sa mga panalangin sa Pag-ula sa Manluluwas. (David A. Bednar, “Dali ug Tan-awa,” Liahona, Nob. 2014, 109)
Gikan sa panan-awon ni Lehi ug sa pamahayag ni Elder Bednar, unsa nga mga kamatuoran ang imong maila mahitungod sa gugma sa Dios?
Ang mga estudyante mahimong makaila og lain-laing mga kamatuoran. Awhaga ang mga estudyante sa pagpadayag nganong ang kamatuoran nga ilang nailhan importante alang kanila.
Pagbati sa gugma sa Dios ug tumang kalipay pinaagi ni Jesukristo
Usa ka kamatuoran nga atong makat-onan mao nga ang gugma sa Dios, gipadayag pinaagi ni Jesukristo, mao ang labing madanihon kay sa bisan unsang butang ug naghatag og labing dakong kalipay.
Ang mosunod nga mga kalihokan makatabang kanimo sa pag-ila kon sa unsang paagi kaha nimo mabati ang gugma sa Dios alang kanimo tungod ni Jesukristo. Samtang buhaton nimo kini nga mga kalihokan, sulayi pag-ila ang daghang mga panalangin nga moabot pinaagi ni Jesukristo ug sa Iyang Pag-ula ug isulat kini diha sa bunga o sa palibot sa bunga nga imong gidrowing.
Mahimong epektibo ang pagbuhat sa matag usa sa mosunod nga mga kalihokan sa lahi nga paagi. Ang mga estudyante mahimong mobuhat nga managpares o diha sa gagmay nga mga grupo alang sa Kalihokan 1. Ang Kalihokan 2 mahimong buhaton sa mga estudyante nga magtinagsa.
Kalihokan 1
Basaha kon unsa ang gipamatuod ni Lehi human makakita niini nga panan-awon diha sa 1 Nephi 10:5–6. Basaha usab ang pipila sa mosunod nga mga kasulatan o pangitaa ang uban nga naghulagway sa mga panalangin nga atong madawat pinaagi sa Pag-ula ni Jesukristo: Isaiah 53:4–5; John 1:17; Mosiah 4:2–3; Alma 7:11–12; Helaman 5:12.
Kalihokan 3
Pamalandong sa mga paagi nga imong nasinati ang mga panalangin nga gitanyag ni Jesukristo o giunsa nimo kini pagkakita sa kinabuhi sa ubang mga tawo. Mahimong maglakip kini sa mga paagi diin gipanalanginan ka sa Ginoo sa mga panahon sa kangitngit.
Unsay imong nakat-onan?
Paggahin sa makadiyot sa pagrebyo sa mga panalangin nga mahimo natong madawat pinaagi sa Pag-ula ni Jesukristo nga imong nasulat diha sa imong drowing sa bunga. Pamalandong nganong kini nga mga panalangin mahimong “[makapalipay sa usa]” (1 Nephi 8:10), mahimong “hilabihan ka tam-is, labaw pa sa tanan“ (1 Nephi 8:11), ug mopuno kanimo “sa tuman nga hingpit nga kalipay” (1 Nephi 8:12).
Dapita ang pipila ka mga estudyante sa pagpakigbahin unsay ilang nakat-onan ug nganong makahuloganon kini kanila. Ang mosunod nga mga pangutana mahimong makatabang:
Unsay imong nakat-onan mahitungod sa gugma sa Dios alang kanimo?
Hain sa mga panalangin nga nahimong posible pinaagi ni Jesukristo ang imong labing gitinguha sa imong kinabuhi? Ngano man?
Sa unsang paagi ka napanalanginan tungod sa gugma nga gipakita sa Dios sa pagpadala sa Iyang Anak nga si Jesukristo aron sa pag-ula alang kanimo?
Human makadungog sa mga kasinatian sa mga estudyante, ikonsiderar ang pagpaambit sa imong kaugalingong mga hunahuna ug pagpamatuod sa gugma sa Dios ug sa mga panalangin nga atong madawat pinaagi sa Manluluwas ug sa Iyang Pag-ula.
