1 Նեփի 1

«Շատ մարգարեներ էին գալիս»

Լեքին քարոզում է Երուսաղեմում

Մարգարեները միշտ չէ, որ աշխարհին հասանելի ուղերձներ են հղում, սակայն նրանց ուսմունքներն ու զգուշացումները ցույց են տալիս Տիրոջ սերն Իր ժողովրդի հանդեպ։ Աստված կանչեց Լեքիին՝ Երուսաղեմի ժողովրդին ապաշխարություն քարոզելու։ Չնայած նրա աղերսներին ու զգուշացումներին՝ նրանք մերժեցին նրա խոսքերն ու փորձեցին սպանել նրան։ Այս դասը կօգնի ձեզ զգալ Աստծո մարգարեներին ընդունելու և հետևելու կարևորությունը։

Ինչպես օգտվել մարգարեների վկայությունից։ Աստված է կանչում մարգարեներին, որոնք խոսում են Նրա փոխարեն (տես Աստվածաշնչի բառարանը, «Մարգարե»)։ Հիսուս Քրիստոսի մասին վկայելու եղանակներից մեկն է՝ հնարավորություն ստեղծել, որ մարգարեների վկայությունները լսվեն մեր դասասենյակներում։ Սուրբ գրություններում փնտրելիս կամ համաժողովի ուղերձները ուսումնասիրելիս փորձեք գտնել Հիսուս Քրիստոսի մասին մարգարեական վկայությունները։ Մշակեք համապատասխան եղանակներ, որոնցով կօգնեք ուսանողներին տեսնել և լսել այդ վկայությունները՝ որպես նրանց ուսումնառության մաս։

Ուսանողի նախապատրաստություն. ուսանողներին առաջարկեք պատրաստվել՝ կիսվելու մարգարեներից լսած վերջին նախազգուշացումներով և մտորելու այն մասին, թե իրենք ինչպես են արձագանքել այդ նախազգուշացումներին։

Հնարավոր ուսումնական վարժություններ

Նախազգուշացումներ

Ցուցադրեք ստորև ներկայացվող նկարը, նկարագրությունը և հարցը։

Պատկերացրեք, որ հնարավորություն ունեք նավակով կամ մակույկով լողալու այս գետի վրա։

• Արդյո՞ք անհանգստություններ կունենաք։ Ինչո՞ւ այո, կամ ինչո՞ւ ոչ։

հանդարտ գետ

Դուք պատրաստվում եք սկսել ձեր էքսկուրսիան, և որևէ մեկը նախազգուշացնում է ձեզ, որ գետը հանդարտ է թվում, բայց այն վտանգավոր և կյանքին սպառնացող մի հատված ունի։

• Կվստահեի՞ք ձեզ նախազգուշացնող մարդուն։ Ինչո՞ւ այո, կամ ինչո՞ւ ոչ։

Ստորև ներկայացվող նկարում նույն գետն է, որում ընդգծված է գետի այն հատվածը, որն արդեն տեսել եք.

Ցուցադրեք ստորև ներկայացվող նկարը և ուսանողներին առաջարկեք պատասխանել առնչվող հարցերին։

հանդարտ գետ՝ մինչև ջրվեժը

• Այժմ ինչպե՞ս կճանաչեիք և ի՞նչ զգացողություն կունենայիք այն մարդու մասին, որը ձեզ նախազգուշացրել էր։

• Ի՞նչ կարող է ուսուցանել մեզ այս երևակայական իրավիճակը Աստծո մարգարեների դերի մասին։

Ստորև ներկայացվող թեմաների շուրջ մտորելիս ուսանողներին հիշեցրեք, որ կարող են օգտվել դասի համար պատրաստած նյութերից։

• Մեր օրերի վտանգներ, որոնց մասին մեզ նախազգուշացրել են մարգարեները

• Նախազգուշացումներն ընդունելու օրհնությունները և դրանք անտեսելու հնարավոր հետևանքները

• Ձեր զգացողությունները նրանց նախազգուշացումներին հետևելիս

• Ինչո՞ւ են ձեզ անհրաժեշտ Աստծո նախազգուշացումները Նրա մարգարեների միջոցով

Ուսմնասիրման ընթացքում փնտրեք ճշմարտություններ, որոնք կարող են օգնել ձեզ Աստծո մարգարեներին հետևելու ավելի մեծ ցանկություն ունենալ։

«Շատ մարգարեներ էին գալիս»

1 Նեփի գիրքն սկսվում է մոտ Ք.ծ.ա. 600 թվականին Երուսաղեմում։ Այդ ժամանակ հրեաներից շատերը հեռացել էին Աստծուց և երկրպագում էին կեղծ աստված Բահաղին՝ վստահելով սուտ մարգարեների խոսքերին և գործելով մեղսավոր արարքներ, ինչպիսիք են՝ գողությունը, սպանությունը և անբարոյականությունը (տես Երեմիա 2, 7)։ Մտածեք, թե այս հանգամանքներն ինչո՞վ են նման այսօրվա աշխարհին։

Կարդացեք 1 Նեփի 1.1–4 հատվածը և փորձեք գտնել, թե Նեփին ինչպես սկսեց իր հիշատակարանը։

• Ըստ ձեզ՝ որո՞նք են այս հատվածների այն կարևոր մասերը, որոնք պետք է հասկանալ։ Ինչո՞ւ։

Հատված 4-ում ներկայացված մարգարեները կարող են լինել Հին Կտակարանի մարգարեներ Երեմիան, Ամբակումը, Աբդիան, Նաումը, Սոփոնիան և ուրիշներ։

Կարդացեք 1 Նեփի 1.5–15 հատվածները և փորձեք գտնել մանրամասներ Լեքիի՝ մարգարե լինելու կանչի մասին։ Կարող եք դիտել «Տերը Լեքիի ընտանիքին պատվիրում է հեռանալ Երուսաղեմից» տեսանյութը 0:39-5:53, որը հասանելի է ChurchofJesusChrist.org կայքում։

• Ի՞նչը ձեզ հատկապես տպավորեց Լեքիի փորձառության մեջ։ Ինչո՞ւ։

• Իր տեսածից ի՞նչ սովորեց Լեքին Երկնային Հոր և Հիսուս Քրիստոսի մասին։

• Ինչո՞ւ է կարևոր իմանալ այս ճշմարտությունները Երկնային Հոր և Հիսուս Քրիստոսի մասին ձեր հանգամանքներում։

Կարդացեք 1 Նեփի 1.18–20 հատվածը՝ տեսնելու, թե ինչ էր ուսուցանում Լեքին, և ինչպես արձագանքեց Երուսաղեմի ժողովուրդը։ Կարող եք դիտել «Տերը Լեքիի ընտանիքին պատվիրում է լքել Երուսաղեմը» տեսանյութը 5:53-7:26։

• Իր գործադրած ջանքերով Լեքին ինչպե՞ս էր նմանվում Հիսուս Քրիստոսին։

• Ի՞նչ եք սովորում մարգարեների մասին Լեքիի փորձառություններից։

Լեքիի օրինակից մեկ ճշմարտություն կարող ենք սովորել, որ Աստված կանչում է մարգարեներին՝ նախազգուշացնելու մեղքի հետևանքների և վկայելու Հիսուս Քրիստոսի մասին։

Ուսանողներին առաջարկեք քննարկել ստորև ներկայացվող հարցերը զույգերով կամ փոքր խմբերով։

• Մեր օրերում ինչպե՞ս եք տեսել, որ մարգարեներն իրականացնեն այս պարտականությունները։

• Այսօր որոշ մարդիկ ի՞նչ ձևերով են դրսևորում զայրույթը մարգարեների հանդեպ կամ մերժում նրանց խոսքերը։ Ձեր կարծիքով ինչո՞ւ են նրանք այդպես արձագանքում։

Տասներկու Առաքյալների Քվորումից երեց Նիլ Լ. Անդերսենը բացատրել է Աստծո մարգարեների ուսմունքի կարևորությունը.

Երեց Նիլ Լ. Անդերսեն

Տեր Հիսուս Քրիստոսին մեր հոգիները խոնարհելու համար պահանջվում է լսել նրանց, ում Նա ուղարկում է։ …

Մարգարեի բարյացակամ ձայնը հաճախ կլինի մի ձայն, որը մեզ կհորդորի փոխվել, ապաշխարել և վերադառնալ Տիրոջ մոտ։ Երբ ուղղման կարիք կա, եկեք չուշացնենք։ Եվ մի անհանգստացեք, երբ մարգարեի նախազգուշական ձայնը հակառակ է այսօրվա հանրային կարծիքներին։ Զայրացած անհավատների ծաղրող խոսքերը միշտ առաջ են ընկնում, երբ մարգարեն սկսում է խոսել։ Եթե խոնարհաբար հետևեք Տիրոջ մարգարեի խորհուրդներին, ես ձեզ անվտանգության և խաղաղության լրացուցիչ օրհնություն եմ խոստանում։ …

… Մարգարեի մեծագույն պարտականությունը և թանկագին պարգևը մեզ համար նրա հաստատուն վկայությունն է, նրա վստահ գիտելիքն է, որ Հիսուսը Քրիստոսն է (Նիլ Լ. Անդերսեն, «Աստծո մարգարեն», Ensign կամ Լիահոնա, մայիս 2018, 26–27)։

• Ինչո՞ւ եք կարծում, որ մարգարեի մեծագույն պարտականությունը Հիսուս Քրիստոսի մասին նրա վկայությունը տարածելն է։

• Ի՞նչը կարող է օգնել ձեզ մեր ժամանակներում հավատքով արձագանքել Աստծո մարգարեների խորհրդին և նախազգուշացումներին։

Մարգարեների դերը և նրանց հետևելու կարևորությունը

Ցուցադրեք ստորև ներկայացվող հրահանգները։ Ուսանողներին հատկացրեք մի քանի րոպե, որպեսզի գրառեն իրենց մտքերը։

Պատկերացրեք, որ ձեր ընկերը, որը Եկեղեցու անդամ չէ, հետևյալ հաղորդագրությունն է ձեզ ուղարկում.

«Ես հիշում եմ, որ ինչ-որ բան էիր ասում այն մասին, թե ինչպես ձեր եկեղեցին մարգարեներ ունի։ Դա իրո՞ք ճշմարիտ է։ Ի՞նչ են անում ձեր մարգարեները։ Արդյո՞ք նրանք նման են Աստվածաշնչի մարգարեներին»։

Հնարավոր է՝ ցանկանաք վստահ լինել, որ նրա հարցերին հստակ պատասխաններ են տրվել։ Պատրաստեք պատասխան՝ օգտվելով հետևյալ տարբերակներից.

Ուսանողները Gospel Library հավելվածում կարող են օգտվել հետևյալ նյութերից։ Անհրաժեշտության դեպքում ուսանողներին տրամադրեք տպագիր օրինակները՝ ուսումնասիրման համար։

1. Հատվածներ և օրինակներ 1 Նեփի 1-ից (և սուրբ գրությունների այլ հատվածներ մարգարեների մասին, որոնք գուցե իմանաք), որոնք կարող են օգնել նրանց հասկանալ մարգարեի դերը։

2. Օրինակներ, թե ինչպես են ժամանակակից մարգարեներն օգնել ձեզ ավելի մոտ լինել Հիսուս Քրիստոսին։ Կարող եք կիսվել օրինակներով, որոնցում մարգարեները վերջին գերագույն համաժողովի ուղերձներով, Եկեղեցու ամսագրի հոդվածներով կամ Երիտասարդներին զորացնելու համար գրքույկով ազդեցություն են ունեցել ձեզ վրա։

3. Օրինակներ ձեր կամ այլոց կյանքից, որոնք ցույց են տալիս մարգարեներին լսելու դրական հետևանքները։ Կարող եք ավելացնել ձեր անձնական վկայությունը մարգարեների մասին։

Պատրաստվելու համար բավարար ժամանակ տրամադրելուց հետո ուսանողներին բաժանեք զույգերի։ Նրանց առաջարկեք պատկերացնել, որ իրենց ընկերոջ հարցին որոշել են պատասխանել դեմառդեմ, այլ ոչ հաղորդագրությամբ։ Յուրաքանչյուր ուսանող կարող է ստանձնել Եկեղեցու անդամի դերը և բացատրել իր ընկերոջը։

Կարող եք վերջին խորհրդի, ուղղման և ուղղորդման օրինակներ քննարկել, որոնք պատկանում են ապրող մարգարեներին և առաքյալներին։

Դրանից հետո կիսվեք անձնական վկայությամբ այն մասին, թե մարգարեներն ինչպես են օգնել ձեզ ավելի մոտ լինել Հիսուս Քրիստոսին։ Կարող եք խնդրել պատրաստակամ ուսանողներին կիսվել իրենց վկայություններով։

Խորհեք այն մասին, թե ինչպես եք արձագանքել մարգարեների վերջին նախազգուշացումներին։ Սուրբ Հոգու միջոցով փնտրեք Երկնային Հոր օգնությունը, որպեսզի նույնացնեք այն ուղիները, որոնցով կարող եք ավելի մեծ ուշադրությամբ հետևել նրա խորհրդին։ Ձեր օրագրում գրի առեք այդ մտքերը և աղոթքով ընտրեք մեկը՝ ձեր կյանքում կիրառելու համար։

Բացատրական և պատմական տեղեկություններ

Որքա՞նով է հուսադրող և օգտակար ապաշխարության մասին մարգարեների տարածած ուղերձը։

Նախագահ Ռասսել Մ. Նելսոնը բացատրում է հնարավոր պատասխանները։ Դիտեք «Մենք կարող ենք ավելի լավ գործել և ավելի լավը լինել» տեսանյութը 0:22-2:37, որը հասանելի է ChurchofJesusChrist.org կայքում։

1 Նեփի 1.20 Որո՞նք են Տիրոջ «գորովագութ ողորմությունները»։

Տասներկու Առաքյալների Քվորումից երեց Դեյվիդ Ա. Բեդնարը բացատրել է.

Երեց Դեյվիդ Ա. Բեդնար

Տիրոջ գորովագութ ողորմությունները շատ անձնական և անհատականացված օրհնություններ են, ուժ, պաշտպանություն, հավաստիացումներ, ուղղորդում, սիրալիրություն, մխիթարություն, աջակցություն և հոգևոր պարգևներ են, որոնք մենք ստանում ենք Տեր Հիսուս Քրիստոսից, Նրա շնորհիվ և Նրա միջոցով (Դեյվիդ Ա. Բեդնար, «Տիրոջ գորովագութ ողորմությունները», Ensign կամ Լիահոնա, մայիս 2005թ., 99)։

Ինչո՞ւ են մարգարեները ճշմարտությունն ուսուցանում, նույնիսկ եթե այն լայն տարածում չգտնի։

Դիտեք «Աստծո սերն ու օրենքները» տեսանյութի 13:48-15:39, որտեղ նախագահ Ռասսել Մ. Նելսոնը բացատրում է այս հարցի մի քանի հնարավոր պատասխան։

Այսօր ինչպե՞ս են մարգարեները վկայում Հիսուս Քրիստոսի մասին։

Կարող եք դիտել նախագահ Ռասսել Մ. Նելսոնի վկայությունը Հիսուս Քրիստոսի մասին «Քրիստոսի հատուկ վկաներ. նախագահ Ռասսել Մ. Նելսոն» տեսանյութը (5:47)։

Օժանդակ ուսումնական վարժություններ

1 Նեփի 1.1 «Բազում չարչարանքներ տեսնել… , բայց մնալ Տիրոջ կողմից շատ սիրված»

Ուսանողներին առաջարկեք խորհել այն չարչարանքների մասին (մի բան, որը ցավ կամ տառապանք է պատճառում), որ իրենք կամ իրենց շրջապատի մարդիկ ունեցել են կամ գուցե այժմ ունեն։ Առաջարկեք նրանց կարդալ 1 Նեփի 1.1 հատվածը։ Նրանց խնդրեք պատմել, թե ինչպես կարող ենք «Տիրոջ կողմից շատ սիրված լինել» մեր չարչարանքների մեջ։ Կարող եք դիտել «Ուրախություն և հոգևոր գոյատևում» տեսանյութի (17:01) 5:13-6:18, որում նախագահ Ռասսել Մ. Նելսոնը բացատրում է, թե ինչպես կարող ենք ուրախություն ունենալ չարչարանքներում։

Ուսանողները կարող են կարդալ 2 Նեփի 2.2 և Վարդապետություն և Ուխտեր 90.24 հատվածները՝ տեսնելու, թե ինչպես կարող է Աստված մեր չարչարանքները բարու վերածել։ Նրանց առաջարկեք խորհել այն մասին, թե ինչպես են նրանք իրենց չարչարանքներում սիրվել Տիրոջ կողմից, և ինչպես է Աստված օգնել և նրանց չարչարանքները բարու վերածել։ Ուսանողներին առաջարկեք պատմել, թե չարչարանքներում լավ բաներ տեսնելը ինչպես կարող է օգնել նրանց հավատքով դիմանալ այդ չարչարանքներին։

1 Նեփի 1.20 «Տիրոջ գորովագութ ողորմությունները»

Լեքիի պատմությունն ուսումնասիրելուց հետո, ով կանչվել էր որպես մարգարե և մերժվել էր իր ժողովրդի կողմից, որևէ ուսանողի առաջարկեք կարդալ 1 Նեփի 1.20 հատվածը և փորձել գտնել, թե ինչ էր Նեփին ցանկանում, որ իր ընթերցողները հասկանան Տիրոջ մասին։

Որպեսզի օգնեք ուսանողներին հասկանալ, թե ինչ է նշանակում «Տիրոջ գորովագութ ողորմությունները», կարող եք ներկայացնել Տասներկու Առաքյալների Քվորումից երեց Դեյվիդ Ա. Բեդնարի խոսքերը, որոնք բերված են «Բացատրական և պատմական տեղեկություններ» բաժնում։

Ապա ուսանողներին առաջարկեք կարդալ Մորոնի 10.3 հատվածը և հիշատակարանի եզրափակիչ մասում փնտրել Մորոնիի վերջնական ուղերձները՝ ուղղված Մորմոնի Գրքի ընթերցողներին։

Բացատրեք դա սկզբից մինչև վերջ. Մորմոնի Գիրքը պարունակում է բազմաթիվ օրինակներ և ուսմունքներ, որոնք ցույց են տալիս Տիրոջ գորովագութ էությունը։ Ուսանողներին կարող եք առաջարկել մտածել այդ օրինակներից մի քանիսի մասին և կիսվել այդ մտքերով։

Երբ ուսանողներն այս տարի սկսեն Մորմոնի Գրքի ուսումնասիրությունը, նրանց առաջարկեք փնտրել Տիրոջ գորովագթության ապացույցը։ Նրանց համար կարող է նույնիսկ օգտակար լինել իրենց օրագրում մեկ էջ նվիրել իրենց բացահայտածին կամ Gospel Library հավելվածում ստեղծել հատուկ պիտակ, որը կարող է օգնել նրանց կազմակերպել իրենց բացահայտածը։ Կարող եք պարբերաբար ստուգել և ուսանողներին առաջարկել կիսվել իրենց գտած օրինակներով։