Fakataukei Fakatokāteliné: ʻAlamā 39:9

“ʻIkai Toe Muimui ʻi he Ngaahi Holi ʻa Ho Matá”

Ko e lue fakalaka atu ʻa ʻIsapela ʻia Kolianitoní

ʻI hoʻo ako ʻa e ʻAlamā 39, naʻá ke ako ai fekauʻaki mo e mahuʻinga ʻo hono moʻui ʻaki e fono ʻo e angamaʻá mo e founga ke tekeʻi ʻaki e ʻahiʻahí ʻi he falala kia Sīsū Kalaisí. ʻE lava ke tokoni ʻa e lēsoni ko ʻení ke ke ako maʻuloto ʻa e potufolofola fakataukei fakatokāteline mo e kupuʻi lea folofola mahuʻinga ki he ʻAlamā 39:9, fakamatalaʻi ʻa e tokāteline ʻoku akoʻi ʻi he potufolofolá ni, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

Fakamatalaʻí mo e ako maʻulotó

Ko e kupuʻi lea folofola mahuʻinga ʻo e fakataukei fakatokāteline ki he ʻAlamā 39:9 ko e “ʻIkai toe muimui ʻi he ngaahi holi ʻa ho matá.” Fakaʻaongaʻi ʻa e founga ko ʻení, pe ko ha founga ʻe taha te ke fili, ke tokoni atu ke ke ako maʻuloto ʻa e potufolofolá mo e kupuʻi lea mahuʻinga ʻo e folofolá.

ongo foʻi mata ʻi loto ʻi ha siakale kuo kolosi

Tā ʻi hoʻo tohinoa akó pe ʻi ha laʻipepa ha ongo mata ʻi loto ʻi ha siakale kuo kolosi ʻi lotomālie ʻi he pēsí. Hiki ʻi ʻolunga ʻi hoʻo fakatātaá ʻa e ʻAlamā 39:9 mo e kupuʻi lea mahuʻinga ʻo e folofolá ko e, “ʻʻIkai toe muimui ʻi he ngaahi holi ʻa ho matá.” Toe hiki ʻa e potufolofolá mo e kupuʻi lea mahuʻingá ʻi lalo ʻi hoʻo fakatātaá. Toe tohi tuʻo ua ia, ʻo tuʻo taha ki he toʻohema ʻo hoʻo fakatātaá pea tuʻo taha ki he tafaʻaki toʻomataʻú. Kuikui leva ho matá pea lau maʻuloto leʻolahi ʻa e potufolofolá mo e kupuʻi lea mahuʻingá. Kapau ʻokú ke fiemaʻu ke akoako lahi ange, toe fai pē ʻa e ʻekitivitií kae ʻoua kuó ke maʻuloto ʻa e potufolofolá mo e kupuʻi lea mahuʻingá.

icon, record

1.  Fakakakato mai ʻeni:

   Fakakaukauloto ko ha faifekau koe, ko e fuofua taimi ia ke ke akoʻi ai ha taha fekauʻaki mo e fono ʻo e angamaʻá. Fakamatalaʻi nounou pe ko e hā ʻa e fono ʻo e angamaʻá, pea fakaʻaongaʻi ʻa e ʻAlamā 39:9 ke fakamatalaʻi ʻa e founga ke tauhi ai iá.

Akoako hono fakaʻaongaʻí

Toe vakaiʻi nounou e ngaahi tefitoʻi moʻoni ʻo hono maʻu ʻo e ʻilo fakalaumālié ʻi he palakalafi 5–12 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokateliné (2022). ʻAhiʻahi fili ha foʻi lea mahuʻinga ʻe taha mei he ngaahi tefitoʻi moʻoni takitaha ʻe tolu ʻokú ne fakamanatu atu kiate koe ʻa e tefitoʻi moʻoní pea ʻe lava ke tokoni atu ke ke manatuʻi vave iá. Hangē ko ʻení, te ke lava ʻo fili ʻa e ʻuluaki foʻi lea ʻo e tefitoʻi moʻoni takitaha ko ha fakamanatu (ngāue, vakaiʻi, fekumi). Pe te ke fili ha ngaahi foʻi lea hangē ko e tuí, taʻengatá, mo e ngaahi maʻuʻanga tokoní.

Fakaʻaongaʻi ʻa e tūkunga ko ʻení ke tokoni ke ke fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié.

ʻOku fiefia ʻa ʻAiveni ke fakaʻaongaʻi hono taimí ʻi he mītia fakasōsialé. ʻOkú ne mohu founga mo fakaʻaongaʻi ha ngaahi mītia fakasōsiale kehekehe ke vahevahe ai ha ngaahi pōpoaki lelei. Ka neongo ia, ʻokú ne mamata foki ki ha ngaahi meʻa lahi ʻoku taʻefeʻunga pea ʻi ai mo e taimi ʻe niʻihi ʻoku ponokalafi ia. ʻI he kamataʻangá, naʻá ne hohaʻa ki ai, ka ʻi he fakalau ʻa e taimí, ʻoku fakaʻau ke ne fiemālie ange ki ai. Kimuí ni mai, ʻokú ne fekumi lahi ange ki he faʻahinga meʻa ko ʻení. ʻOku ʻikai ke ne tokanga ki he ngaahi fili ʻokú ne fakahokó.

Aleaʻi ʻa e founga ʻe lava ke tokoni ai ʻa e mahino mo hono fakaʻaongaʻi ʻo e ngaahi tefitoʻi moʻoni ki hono maʻu ʻo e ʻilo fakalaumālié ke vakai ʻa ʻAiveni ki he ngaahi tuʻunga fakahohaʻa ʻo ʻene ngaahi angafai lolotongá. ʻE lava ke tokoni atu e ngaahi fehuʻi mo e ngaahi maʻuʻanga tokoni ko ʻení.

Vakaiʻi mo sivisiviʻi e ngaahi fakakaukaú mo e ngaahi fehuʻí, ʻaki ha fakakaukau ʻoku taʻengatá

• ʻE lava fēfē ke vakaiʻi ʻe ʻAiveni hono tūkungá ʻaki ha fakakaukau ʻoku taʻengatá?

• ʻE fakahoko fēfē ʻe heʻene ngaahi feinga ke tauhi ʻene ngaahi fakakaukaú ke maʻá ha liliu ʻi he kotoa ʻo ʻene moʻui ʻi he māmaní pea ʻi he moʻui ka hokó?

• ʻE tokoni fēfē nai ʻa ʻene ngaahi feingá ki hono vā fetuʻutaki mo e Tamai Hēvaní?

Fekumi ke maʻu ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí

• Ko e hā ha ngaahi sīpinga ʻe niʻihi ʻo e ngaahi maʻuʻanga tokoni kuo fokotuʻu fakalangí ʻe lava ʻo tokoni kia ʻAivení? ʻE lava fēfē ke tokoni ʻa e ʻAlamā 39:9?

Fakakaukau ke tuku ha ngaahi miniti siʻi ke ako ha niʻihi ʻo e ngaahi maʻuʻanga tokoni kuo fokotuʻu fakalangí, ʻo kumi e ngaahi kupuʻi lea pe akonaki ʻe ala tokoni kia ʻAivení. Ko ha ngaahi fakakaukau ʻeni:

• Ki Hono Fakamālohia ʻo e Toʻu Tupú: Ko ha Fakahinohino ki hono Fakahoko ha Ngaahi Filí (tohitufa, 2022), “Meʻa ke fai ʻi he momeniti ko iá”

• Mōsaia 4:30; 3 Nīfai 12:28–30; Tokāteline mo e Ngaahi Fuakava 42:23; 121:45

• Ngaahi lea ʻi he konifelenisi lahí fekauʻaki mo e haohaoa fakasekisualé, ponokalafí, pe mītia fakasōsiale ʻokú ke maʻu ʻi he polokalama Gospel Library ChurchofJesusChrist.org

Ngāue ʻi he tuí 

• Ko e hā ha meʻa ʻe lava ke fai ʻe ʻAiveni ke ngāue ai ʻi he tuí pea “ʻikai toe muimui ʻi he ngaahi holi ʻa [hono] matá”? (ʻAlamā 39:9).

• ʻE tokoni fēfē ʻa e fāifeinga ke tafoki kia Kalaisí ki heʻene ngaahi ngāué?

fakaʻilonga, lekooti

2. Tali e ngaahi fehuʻi ko ‘ení:

   • Ko e hā ha tokāteline mei he palani ʻa e Tamai Hēvaní ʻe lava ʻo tokoni kia ʻAivení pea ko e hā hono ʻuhingá?

   • ʻOkú ke pehē ʻe tokoni fēfē ʻa e ngaahi tefitoʻi moʻoni ʻo hono maʻu ʻo e ʻilo fakalaumālié ke fakatokangaʻi ai ʻe ʻAiveni ʻa e fakatuʻutāmaki ʻo ʻene ngaahi angafai lolotongá?

   • Ko e hā ha meʻa te ne lava ʻo fai ke fakahoko ai ha ngaahi liliu ʻoku tuʻuloá?