ʻAlamā 40

Ko e Maama Tataliʻanga ʻo e Ngaahi Laumālié mo e Toetuʻú

Kalaisi ʻi he maama tataliʻanga ʻo e ngaahi laumālié

Hili hono fakaafeʻi ʻa Kolianitoni ʻe heʻene tamaí ke fakatomalá, naʻe ʻi ai haʻane ngaahi fehuʻi fekauʻaki mo e palani ʻa e ʻOtuá, ʻo kau ai ʻa e meʻa ʻoku hoko kiate kitautolu hili ʻetau maté. Naʻe tali ʻe heʻene tamai ko ʻAlamaá ʻa ʻene ngaahi fehuʻí mo fakamoʻoni ki he tefitoʻi fatongia ʻo Sīsū Kalaisi ʻi he palani ʻa e Tamai Hēvaní. ʻE lava ke tokoniʻi koe ʻe he lēsoni ko ʻení ke fakaloloto hoʻo houngaʻia ʻi he meʻa kuo fai ʻe he Fakamoʻuí maʻaú pea ʻe ʻoatu ai ha faingamālie ke fakamatalaʻi ʻa e meʻa ʻoku hoko hili ʻetau maté.

Ngaahi Fehuʻí

Naʻe vahevahe ʻe Sisitā Leina I. ʻApeto, ko ha tokoni ʻi he Kau Palesitenisī Lahi ʻo e Fineʻofá, ha aʻusia fakataautaha ʻokú ne ʻomi ha ngaahi fehuʻi ʻoku tau ala maʻu fekauʻaki mo e meʻa ʻoku hoko hili ʻetau maté. Mamata ʻi he foʻi vitiō “ʻOku ʻIkai ha Mālohi ʻo e Faʻitoká,” ʻoku maʻu ʻi he ChurchofJesusChrist.org, mei he taimi 4:21 ki he 5:13, pe lau ʻa e fakamatala ko ʻení:

Sisitā Reyna I. Aburto

ʻI hoku taʻu hivá, ne mole hoku tuongaʻane lahí ʻi ha mofuike fakamanavahē. Koeʻuhi naʻe hoko fakatuʻupakē, ne kiʻi fuofuoloa peá u toki makupusi ʻa e moʻoni ʻo e meʻa naʻe hokó. Ne lōmekina hoku lotó ʻe he mamahí, ʻo u fehuʻi loto pē, “Ko e hā ne hoko ki hoku tuongaʻané? Ko fē ia? ʻOkú ne ʻalú ki fē? Te u toe sio nai kiate ia?”

Naʻe teʻeki ke u ʻilo ʻe au ʻa e palani ʻo e fakamoʻuí ʻa e ʻOtuá ʻi he taimi ko iá, pea ne u maʻu ʻa e holi ke ʻilo ki he feituʻu ne tau haʻu mei aí, ko e hā e taumuʻa ʻo e moʻuí, pea ko e hā ʻe hoko kiate kitautolu he hili ʻetau maté. ʻIkai nai ʻoku tau maʻu e faʻahinga fakaʻānaua pehē he taimi ʻoku mole ai ha taha ʻoku tau ʻofa ai pe taimi ʻoku tau faingataʻaʻia ai heʻetau moʻuí? (Reyna I. Aburto, “ʻOku ʻIkai ha Mālohi ʻo e Faʻitoká,” Liahona, Mē 2021, 86)

Naʻe maʻu foki ʻe he foha ʻo ʻAlamā ko Kolianitoní ha hohaʻa fekauʻaki mo e moʻui hili ʻa e maté.

Lau ʻa e ʻAlamā 40:1, ʻo kumi e meʻa naʻe hohaʻa ki ai ʻa Kolianitoní.

• ʻOkú ke pehē ko e hā naʻá ne hohaʻa ai ki he meʻá ni?

Manatuʻi naʻe maumauʻi ʻe Kolianitoni e ngaahi fekau ʻa e ʻOtuá, kau ai e fono ʻo e angamaʻá. Koeʻuhí ko ʻene ngaahi filí, mahalo naʻá ne hohaʻa fekauʻaki mo e tuʻunga te ne ʻi ai hili ʻa e moʻui ko ʻení. Ke tokangaekina e ngaahi meʻa naʻe hohaʻa ki ai ʻa Kolianitoní mo tokoniʻi ia ke fakatomalá, naʻe akoʻi ʻe ʻAlamā ʻa e tokāteliné kiate ia. ʻE lava foki ke tokoni e tali ʻa ʻAlamā ki he ngaahi hohaʻa ʻa Kolianitoní ki ha taha ʻoku ʻi ai haʻane ngaahi fehuʻi hangē ko Sisitā ʻApetó.

Naʻe akoʻi ʻa Sisitā ʻApeto kimui ange ʻe ha ongo faifekau ne na tokoniʻi ia ke maʻu ha tali ki heʻene ngaahi fehuʻí. Fakakaukauloto ko ha taha koe ʻo e ongo faifekau ko iá pea ʻokú ke teuteu ke akoʻi ia. Fakaʻaongaʻi e ngaahi maʻuʻanga tokoni ko ʻení ke teuteuʻi ha kiʻi fakamatala nounou ke tokoni ki hono tali e ngaahi fehuʻi ʻa Sisitā ʻApetó.

Ko e Maama Tataliʻanga ʻo e Ngaahi Laumālié

Tohi ʻa Molomoná – Tohi Lēsoni ʻa e Faiakó (2024)—“ʻAlamā 40: Ko e Maama Tataliʻanga ʻo e Ngaahi Laumālié mo e Toetuʻú”

Lau ʻa e ʻAlamā 40:6–7, 11–14 ke ʻiloʻi e meʻa naʻe akoʻi ʻe ʻAlamā kia Kolianitoní. Hili iá pea fakaʻaongaʻi e ngaahi maʻuʻanga tokoni ko ʻení ke tokoni ke ke teuteu lahi ange ai ki he meʻa te ke akoʻí.

• Tokāteline mo e Ngaahi Fuakava 138:11–13, 18–22, 57

• Fakahinohino ki he Ngaahi Folofolá, “Palataisi,” scriptures.ChurchofJesusChrist.org

Naʻe akonaki ʻa Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

Palesiteni Dallin H. Oaks

ʻOku tau ʻilo mei he folofolá, ka hili e mate hotau sinó ʻe hoko atu ʻo tau moʻui ko ha ngaahi laumālie ʻi he maama tataliʻanga ʻo e ngaahi laumālié. ʻOku toe akoʻi foki ʻe he folofolá ʻoku vahe ua e maama tataliʻanga ko ʻeni ʻo e ngaahi laumālié ʻiate kinautolu naʻe “angatonu” pe “failelei” [ʻi] he lolotonga ʻo e moʻuí mo kinautolu naʻe faiangahalá. ʻOku nau toe fakamatalaʻi foki e founga ʻoku akoʻi ai ʻe ha niʻihi ʻo e ngaahi laumālie faivelengá ʻa e ongoongoleleí kiate kinautolu naʻe faiangahala mo fakafetaú (vakai, 1 Pita 3:19; Tokāteline mo e Ngaahi Fuakava 138:19–20, 29, 32, 37). (Dallin H. Oaks, “Falala ki he ʻEikí,” Ensign pe Liahona, Nōvema 2019, 26)

Teuteu ʻa e founga te ke fakamatalaʻi ʻaki e tali ki he ngaahi fehuʻi ko ʻení:

• Ko e hā ʻoku hoko ki hotau ngaahi laumālié ʻi heʻetau maté?

• ʻOku fēfē ʻa palataisi? ʻOku fēfē ʻa e feituʻu ʻoku ui ʻe ʻAlamā ko e “poʻuli ʻi tuá,” ka ʻoku ui foki ia ko e fale fakapōpula ʻo e ngaahi laumālié (1 Pita 3:19) pe heli (2 Nīfai 9:12)?

• ʻE fakatupulaki fēfē nai ʻe he ako fekauʻaki mo palataisi mo e fale fakapōpulá ʻa ʻetau houngaʻia ʻi he Fakamoʻuí?

• ʻE tāpuekina fēfē nai kitautolu ʻe heʻetau ʻilo ki he maama tataliʻanga ʻo e ngaahi laumālié lolotonga ʻetau moʻui fakamatelié?

ʻI hoʻo faiakó, fakapapauʻi ke fakamahinoʻi ʻi he vahaʻa ʻo e maté mo e toetuʻú, ʻe nofo ʻa e ngaahi laumālie ʻo e kau māʻoniʻoní ʻi palataisi pea ʻe nofo ʻa e laumālie ʻo e kau fai angahalá ʻi he fale fakapōpula ʻo e ngaahi laumālié. Vahevahe ʻa e founga ʻoku tākiekina ai ʻe he mahino ʻokú ke maʻu ki he moʻoni ko ʻení ʻa e ngaahi fili ʻokú ke fai ʻi he moʻui ní.

© 2023 by Intellectual Reserve, Inc. All rights reserved.

Toetuʻu

Tohi ʻa Molomoná – Tohi Lēsoni ʻa e Faiakó (2024)—“ʻAlamā 40: Ko e Maama Tataliʻanga ʻo e Ngaahi Laumālié mo e Toetuʻú”

Lau ʻa e ʻAlamā 40:2–5, 23–24 ke ʻiloʻi e meʻa naʻe akoʻi ʻe ʻAlamā kia Kolianitoní. Hili iá pea fakaʻaongaʻi e ngaahi maʻuʻanga tokoni ko ʻení ke tokoni ke ke teuteu lahi ange ai ki he meʻa te ke akoʻí.

• ʻAlamā 11:42–45

• Fakahinohino ki he Ngaahi Folofolá, “Toetuʻú,” scriptures.ChurchofJesusChrist.org

Naʻe akonaki ʻa Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

Palesiteni Dallin H. Oaks

ʻOku tau fakafiefiaʻi hono moʻoni ʻo e Toetuʻú ʻi he faʻahitaʻu Toetuʻu ko ʻení. ʻOkú ne ʻomi e fakaukau mo e mālohi ke kātakiʻi ʻa e ngaahi faingataʻa ʻo e moʻui fakamatelie ʻoku tau takitaha fehangahangai mo iá pea mo kinautolu ʻoku tau ʻofa aí, hangē ko e ngaahi tōnounou fakatuʻasino, fakaʻatamai, pe fakaeloto ʻoku tau omi mo ia ʻi hono fāʻeleʻi kitautolú pe aʻusia lolotonga ʻetau moʻui fakamatelié. Koeʻuhí ko e Toetuʻú, ʻoku tau ʻilo ʻoku fakataimi pē ʻa e ngaahi palopalema fakamatelie ko ʻení! (Dallin H. Oaks, “Ko e Palani Lahí,” Ensign pe Liahona, Mē 2020, 94–95)

Teuteu ʻa e founga te ke fakamatalaʻi ʻaki e tali ki he ngaahi fehuʻi ko ʻení:

• Ko e hā ʻa e toetuʻu? Ko hai ʻe toetuʻú?

• Fakatatau ki he ʻAlamā 40:2–3, ko e hā ʻokú ne ʻai ke malava ʻa e Toetuʻú?

• ʻE tāpuekina fēfē nai kitautolu ʻe heʻetau ʻilo ki he Toetuʻú lolotonga ʻetau moʻui fakamatelié?

ʻI he taimi ʻokú ke faiako aí, fakapapauʻi ke fakamahinoʻi koeʻuhí naʻe toetuʻu ʻa Sīsū Kalaisi, te tau toetuʻu kotoa foki. Vahevahe ha ʻuhinga ʻe taha ʻokú ke houngaʻia ai ʻi he talaʻofa ʻo e toetuʻú.

© 2023 by Intellectual Reserve, Inc. All rights reserved.

Mahalo te ke fie mamata ʻi he foʻi vitiō “Ko e Hā ʻOku Hoko ki Hotau Ngaahi Sinó mo e Laumālié hili ʻEtau Maté?” (4:19), ʻoku maʻu ʻi he ChurchofJesusChrist.org, ʻo kumi ha ngaahi moʻoni kehe te ke lava ʻo fakamatalaʻi ʻi hoʻo faiakó.

Ngaahi Talí

fakaʻilonga, lekooti

1. Hiki ha fakamatala nounou ʻo e meʻa te ke akoʻi kia Sisitā ʻApetó. Fakakau ʻa e ngaahi moʻoni naʻá ke maʻú, pea fakakaukau ke vahevahe hoʻo fakamoʻoni fekauʻaki mo e fatongia ʻo Sīsū Kalaisi ʻi he maama tataliʻanga ʻo e ngaahi laumālié mo e toetuʻú. Te ke lava foki ʻo vahevahe ʻa e meʻa naʻá ke tohí mo ha taha kehe.

fakaʻilonga, lekooti

2. Tali ha fehuʻi ʻe ua pe lahi ange mei he ngaahi fehuʻi ko ʻení:

   • Ko e hā ʻoku mahuʻinga ai kiate koe ʻa e meʻa naʻá ke ako fekauʻaki mo e maama tataliʻanga ʻo e ngaahi laumālié mo e toetuʻú?

   • ʻOku liliu fēfē nai ʻe he ʻilo ko ʻení hoʻo ngaahi ongo ki he Tamai Hēvaní mo Sīsū Kalaisí?

   • Ko e hā ha ngaahi fehuʻi naʻá ke maʻu kuo tali ia ʻi he ʻahó ni?

   • Ko e hā ha ngaahi fehuʻi ʻokú ke fie hokohoko atu hono kumi ha tali ki aí?

Fili Pē: Fie Ako Lahi Ange?

ʻAlamā 40:16–20. Ko e hā ʻa e ʻUluaki Toetuʻú?

Naʻe akoʻi ʻe ʻEletā Pulusi R. Makongikī (1915–85) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā Bruce R. McConkie

Ko kinautolu ʻe tuʻu ʻi he pongipongi ʻo e toetuʻu ko ʻení, te nau fai ia ʻi ha ngaahi sino fakasilesitiale pea te nau maʻu ha nāunau fakasilesitiale; ko kinautolu ʻeni ʻo Kalaisi ko e ngaahi ʻuluaki fuá. Ko kinautolu ʻe tuʻu ʻi he hoʻatā ʻo e toetuʻu ko ʻení, te nau fai ia ʻi ha ngaahi sino fakatelesitiale pea te nau maʻu ʻa e puleʻanga ko iá; ʻoku fakamatalaʻi kinautolu ʻoku ʻo Kalaisi ʻi he hāʻele mai ko ʻení. Ko kinautolu kotoa pē kuo toetuʻú kuo nau maʻu ha ngaahi sino fakasilesitiale; ʻoku ʻikai kamata ʻa e toe tuʻu ʻa e kakai fakatilesitialé kae ʻoua kuo hili ʻa e Hāʻele ʻAnga Ua Maí. (Tokāteline mo e Ngaahi Fuakava 76:50–80; 88:95–99.) (Bruce R. McConkie, Doctrinal New Testament Commentary [1965], 1:196)

ʻAlamā 40:21–22. ʻOku ʻuhinga ki he hā ʻa e “taki mai ke tuʻu ʻi he ʻao ʻo e ʻOtuá”?

Naʻe akonaki ʻa ʻEletā D. Toti Kulisitofāsoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā D. Todd Christofferson

Koeʻuhí ko ʻEne Fakaleleí mo e Toetuʻú, kuo ikunaʻi ʻe Sīsū Kalaisi ʻa e tafaʻaki kotoa ʻo e Hingá. ʻE fakataimi pē ʻa e mate fakaesinó, naʻa mo e mate fakalaumālié ʻoku ʻi ai hono ngataʻanga, koeʻuhí te tau foki fakataimi kotoa ki he ʻao ʻo e ʻOtuá, ki he fakamāú. Te tau malava ke maʻu ʻa e falala mo e loto-falala kakato ki Hono mālohi ke ikunaʻi ʻa e meʻa kotoa pē pea foaki kiate kitautolu e moʻui taʻe ngatá. (D. Todd Christofferson, “Ko e Toetuʻu ʻa Sīsū Kalaisí,” Ensign pe Liahona, Mē 2014, 112)

ʻAlamā 40:23. ʻE fōtunga fēfē nai ʻa e sino toetuʻú?

Naʻe akoʻi ʻe ʻEletā Paula V. Sionisoni ʻo e Kau Fitungofulú:

ʻEletā Paul V. Johnson

ʻOku ʻai ʻe he Toetuʻú ke lava ʻa e sino mo e laumālie ʻo ha taha ʻo toe fakatahaʻi, ka ʻi he taimi ko ʻení ʻe taʻe-faʻa-mate ʻa e sinó pea mo haohaoa—ʻo ʻikai moʻulaloa ki he mamahí, mahakí, pe ki ha ngaahi palopalema kehe [vakai, ʻAlamā 11:43]. …

ʻOku tau takitaha tōnounou fakaesino, fakaʻatamai, fakaeloto pea ʻi ai hotau ngaahi vaivai. ʻOku ʻi ai ha niʻihi ʻi he ngaahi palopalemá ni ʻoku ngali faingataʻa ke solova he taimí ni, ka ʻe faifai pē pea lava. He ʻikai uesia ha taha ʻo kitautolu ʻe he ngaahi palopalemá ni hili ʻetau toetuʻú. (Paul V. Johnson, “Pea He ʻIkai Kei ʻi ai Ha Mate,” Ensign pe Liahona, Mē 2016, 121–22)