Sukda ang Imong Nakat-onan 3

2 Nephi 26–Jacob 7

batan-ong babaye nga nagsulat sa notebook

Kini nga leksiyon gituyo aron matabangan ka nga makakita kon sa unsang paagi ka milambo o nausab atol sa imong pagtuon sa 2 Nephi 26–Jacob 7.

Mas Maayo og Gamay Adlaw matag Adlaw

Si Presidente Lorenzo Snow (1814–1901), ikalima nga Presidente sa Simbahan, mitudlo:

Presidente Lorenzo Snow

Ayaw pagdahom nga mahimong hingpit sa usa lamang ka higayon. Kon kamo nagdahom, kamo masagmuyo. Magmahimong mas maayo karon kay sa kagahapon, ug mas maayo ugma kay sa unsa kamo karon. Ang mga tintasyon nga medyo mibuntog kanato karon, ayaw tugoti nga mobuntog usab kaninyo ugma. Apan padayon nga mahimong mas maayo og gamay matag adlaw; ug ayaw tugoti nga ang inyong kinabuhi matapos nga walay nahimong maayo ngadto sa uban ingon man usab sa atong kaugalingon. (Mga Pagtulun-an sa mga Presidente sa Simbahan: Lorenzo Snow [2012], 121)

• Unsaon nimo pagkahibalo kon mas maayo ka karon kaysa kagahapon?

• Sa unsang paagi ang Langitnong Amahan ug si Jesukristo makatabang kanimo sa imong mga paningkamot nga mahimong mas maayo ugma kaysa karon?

Kini nga leksiyon gituyo aron sa pagtabang kanimo sa paghunahuna mahitungod sa imong paglambo isip usa ka disipulo ni Jesukristo, lakip sa imong katakos sa pagpasabot sa doktrina nga imong nakat-onan diha sa mga kasulatan. Paghunahuna sa mga paagi nga ang imong pagtuon sa Basahon ni Mormon nakatabang nimo nga molambo isip disipulo ni Kristo. Samtang magtuon ka karon, dapita ang Espiritu Santo sa pagtabang kanimo nga makakita kon sa unsang paagi ang imong pagtuon sa Basahon ni Mormon nakaapekto sa imong katakos sa pagsunod ug pagpaambit sa ebanghelyo ni Jesukristo.

icon, rekord

1. Kompletoha ang bisan asa sa kalihokan A o B.

Kalihokan A: Ipasabot ang doktrina ni Jesukristo

Si Nephi mitudlo unsay kinahanglan natong buhaton aron makadawat og kinabuhing dayon. Kini nga mga baroganan ug mga ordinansa gitawag og doktrina ni Kristo (tan-awa sa 2 Nephi 31:2, 21). Ang doktrina ni Kristo “mao ang agianan; ug walay lain nga agianan ni ngalan nga gihatag ubos sa langit diin ang tawo maluwas diha sa gingharian sa Dios” (2 Nephi 31:21). Rebyoha ang 2 Nephi 31:10–12, 17, 20–21, mangita sa mga baroganan ug mga ordinansa nga kabahin sa doktrina ni Kristo.

Kon imong gipili kini nga kalihokan, tubaga ang mosunod nga mga pangutana:

• Unsaon kaha nimo pagpasabot ang doktrina ni Kristo ngadto sa laing tawo gamit ang unsay girekord ni Nephi sa 2 Nephi 31?

• Sa unsang paagi nga ang doktrina ni Kristo makatabang kanato nga mosalig Kaniya alang sa atong kaluwasan?

• Sa unsang paagi ka napanalanginan pinaagi sa pagsunod sa doktrina ni Kristo?

Kalihokan B: Ipasabot ang tahas sa Basahon ni Mormon sa Pagpahiuli sa ebanghelyo ni Jesukristo

Handurawa ang mosunod nga senaryo:

Si Luca nangandam nga mahimong full-time nga misyonaryo. Ang iyang presidente sa stake mipadala sa mosunod nga mensahe usa ka semana sa wala pa sila magkita alang sa usa ka interbyo:

“Luca, naghinam-hinam ko nga makigkita nimo. Agi og pagpangandam sa atong panagkita, palihog og pangandam sa paggamit sa Basahon ni Mormon aron pagtubag niini nga pangutana: Unsa ang tahas sa Basahon ni Mormon sa Pagpahiuli sa ebanghelyo ni Jesukristo? (tan-awa sa 2 Nephi 3:11–12; 2 Nephi 27:25–26; 2 Nephi 29:7–11).”

Kon imong gipili kini nga kalihokan, tubaga ang mosunod nga pangutana:

• Unsa ang mahimong mapaambit ni Luca gikan sa Basahon ni Mormon mahitungod sa tahas niini sa Pagpahiuli sa ebanghelyo ni Jesukristo?

2. Kompletoha ang bisan asa sa kalihokan C o D.

Kalihokan C: Sukli ang yawa uban sa hugot nga pagtuo diha kang Jesukristo

Sa 2 Nephi 28:20–22, si Nephi mitudlo mahitungod sa mga estratehiya nga gamiton ni Satanas sa pagpahilayo sa mga tawo gikan sa Dios sa kataposang mga adlaw. Kini naglakip sa pagkutaw sa mga tawo sa kasuko batok niana nga maayo, paghupay sa mga tawo ug malipoton nga pagpahiluna kanila ngadto sa kalibutanon nga kasegurohan, ug pagsulti sa mga tawo nga walay impyerno ug walay yawa. Isip kabahin sa imong pagtuon sa leksiyon sa“2 Nephi 28:1–26,” tingali nakahimo ka og plano aron mas mapanalipdan ang imong kaugalingon batok sa mga taktika ni Satanas. Rebyoha unsay imong gisulat sa imong journal sa pagtuon gikan niana nga leksiyon.

Kon imong gipili kini nga kalihokan, tubaga ang labing minos duha sa mosunod nga mga pangutana:

• Unsa ka epektibo ang imong pagpatuman sa imong plano? Ngano man?

• Sa unsang mga paagi nga ang imong plano nakatabang nimo nga makadawat sa panalipod sa Manluluwas batok sa mga taktika ni Satanas?

• Unsa ang imong nakat-onan o nasinati nga mahimong makatabang kanimo sa pagdugang sa imong plano?

Ikonsiderar ang mga paagi sa pagpasalig pag-usab sa pagtuman sa imong plano. Seguroha ang pagtinguha og tabang ngadto sa Langitnong Amahan ug ni Jesukristo aron sa pagpasidaan kanimo sa kapeligrohan ug paghatag kanimo og gahom sa pag-ikyas o pagbuntog sa mga paningkamot ni Satanas (tan-awa sa Doktrina ug mga Pakigsaad 10:5).

Kalihokan D: Pag-apil sa pagpundok sa Israel

Sila si Nephi ug Jacob adunay dakong interes sa pagpundok sa Israel. Tingali tungod kini kay ang Ginoo mipakita kang Nephi unsa ang mahimong mahitabo sa ilang kaliwatan (tan-awa sa 1 Nephi 12–13).

Mahimong gidapit ka sa pag-apil sa pagpundok sa Israel isip kabahin sa imong pagtuon sa 1 Nephi 19–22; 2 Nephi 6; o Jacob 5:52–77; 6:1–13. Kon mao, rebyoha ang bisan unsang mga pasalig o mga plano nga imong gihimo o ang imong kinaiya ug kaandam nga moapil sa buhat.

Kon imong gipili kini nga kalihokan, tubaga ang labing minos duha sa mosunod nga mga pangutana:

• Unsa ang imong nakat-onan sa imong mga pagtuon mahitungod sa pagpundok sa Israel nga imong nakaplagan nga makapadasig o mapuslanon?

• Unsa nga mga paningkamot ang imong nahimo nga wala nimo masulayi kaniadto? Nagmalamposon ka ba? Ngano o nganong wala?

• Sa unsang paagi nimo nabati ang Manluluwas nga naggiya o naglig-on kanimo samtang ikaw miapil sa Iyang buhat?

• Unsa nga mga panalangin ang imong nakita gikan sa pag-apil niini nga buhat?