8
Ko e ʻAho Sāpaté Ko ha ʻAho ke Manatuʻi ai ʻa e Tamai Hēvaní mo Sīsū Kalaisi
Talateu maʻá e Faiakó
Ke ke mateuteu fakalaumālie ke akoʻi e lēsoni ko ʻení, kātaki ʻo lau mo fakalaulauloto ki he ngaahi meʻá ni:
Talu mei he ngaahi taimi ʻo e Fuakava Motuʻá mo e vaheʻi ʻe he kakai ʻo e ʻOtuá ʻa e ʻaho ʻe taha mei he ʻaho ʻe fitú ko e ʻaho Sāpate—ko ha ʻaho ke mālōlō mei heʻetau ngaahi ngāué pea hū ki he ʻOtuá (vakai, Sēnesi 2:2–3; ʻEkisōtosi 20:8–11). Kuo toe fakahā mai ʻe he ʻOtuá ʻa e fekau ko ʻení ʻi hotau ʻahó, pea kuó Ne palōmesi mai ʻoku tokoniʻi kitautolu ʻe he tauhi ke māʻoniʻoni ʻa e ʻaho Sāpaté ke “tau maʻa ange mei māmani” (vakai, T&F 59:9–10).
Ngaahi ʻEkitivitī ke ako mei aí
Kamataʻaki ha ʻekitivitī fakatahataha. Ki ha ngaahi fakakaukau, vakai ki he peesi 3.
Lotu
Fakaafeʻi ha taha ʻo e fānaú ke ne fai ʻa e fua lotú.
Fakatātā
Fakaʻaliʻali ʻa e fakatātā ʻo e kiʻi fāmili ʻoku nau lue ki he lotú ʻi he peesi 38 pea talaange ki he fānaú ʻoku ʻalu ʻa e kiʻi fāmili ko ʻení ki he lotú ʻi he ʻaho Sāpaté. Fakamatalaʻi ange ko e ʻaho Sāpaté, ko ha ʻaho makehe ia pea ʻoku tau ʻalu ai ki he lotú ke hū (lotu) ki he Tamai Hēvaní mo Sīsū Kalaisi pea mo ako fekauʻaki mo Kinaua.
Ngaahi Hivá
Talaange ki he fānaú, “ʻAi pē ke pehē ʻoku tau ʻalu ki he lotú.” ʻAi kinautolu ke nau lue fuopotopoto pea hivaʻi pe lau ʻa e ngaahi lea ko ʻení “Fakafiefia ke Fai” (Tohi Hiva ʻa e Fānaú, 129):
Fakafiefia ʻa e ʻalu ki he lotú,
Fakafiefia, fakafiefia, fakafiefia!
Fakafiefia ʻa e ʻalu ki he lotú,
Fakafiefia, fakafiefia, fakafiefia!
ʻAi ʻa e fānaú ke nau tangutu ki lalo pea talaange kiate kinautolu ko e taimi ʻoku tau haʻu ai ki he lotú ʻoku tau manatu (tuhu ki ho ʻulú) mo fakakaukau ki he (toe tuhu ki ho ʻulú) Tamai Hēvaní mo Sīsū Kalaisi. Hiva pe lau ʻa e laine ʻuluaki ʻo e foʻihiva “Loto ʻApasia” (Tohi Hiva ʻa e Fanaú, 11):
Loto ʻApasia, Fakakaukau kiate Ia.
Fakaʻaliʻali ʻa e fakatātā ʻo e kiʻi fāmili ʻi ʻapi ʻi he peesi 38. Fakahinohino ange ʻa e ngaahi fāmili siasi kehekehe pea fakamatala ange, ʻe lava ke tau manatu mo hotau fāmilí ki he Tamai Hēvaní mo Sīsū. Te tau lava ʻo lau fakataha ʻa e folofolá (ʻai ʻa e fānaú ke pehē pē ʻoku nau lau folofola) mo lotu fakataha (ʻai ʻa e fānaú ke nau kūnima) pea fakahaaʻi ʻa e feʻofaʻakí (ʻai ʻa e fānaú ke ʻai honau nimá ki honau fatafatá). Hivaʻi pe lau ʻa e ngaahi lea ʻo e hiva ko e “Ko ha Fāmili Fiefia” (Tohi Hiva ʻa e Fānaú, 104). Fakaafeʻi ʻa e fānaú ke kau fakataha mo koe.
ʻOku ou ʻofa he faʻē; [ʻokú ne ʻofa ʻiate au].
[ʻOku mau] ʻofa he tamai [ʻio tangataʻeiki];
ʻOkú [ne] ʻofa [ʻiate kitautolu,] [ko ia ai],
Ko ha fāmili fiefia [kitautolú].
Fakaʻosí
Fakamanatu ki he fānaú ko e ʻaho Sāpaté ko ha ʻaho ia ke manatua ai ʻa e Tamai Hēvaní mo Sīsū Kalaisi ʻi heʻetau ʻalu ki he lotú pea ʻi hotau ʻapí mo hotau fāmilí. Fakaafeʻi ʻa e fānaú ke nau lea, “ʻAho Sāpate.”
Lotu
Fakaafeʻi ha taha ʻo e fānaú ke ne fai ʻa e lotu tukú.
Ngaahi ʻEkitivitī ke fili mei aí
Teuteú
-
Ki he kato vaʻingá: ʻAi ha tatau ʻo e peesi 39. Kosi ʻa e fakatātaá pea valivali kinautolu kapau ʻoku fie maʻu. Faʻo ʻa e ngaahi fakatātaá ʻi ha kato pe ko ha faʻoʻanga meʻa ʻe taha.
ʻĪmisicoloring page, Sunday bookTe u lava ʻo ʻalu ki he lotú ʻi he ʻaho Sāpaté.
Te u lava ʻo fakahaaʻi ʻa e ʻofa makehe ki hoku fāmilí ʻi he ʻaho Sāpaté.
Te u lava ʻo lau ʻa e folofolá ʻi he ʻaho Sāpaté.
Ko e ʻaho Sāpaté ko ha ʻaho ke manatua ai ʻa e Tamai Hēvaní mo Sīsū Kalaisi.
-
Ki he ʻekitivitī folofolá: ʻOmai ha tatau ʻo e Tohi Tapú. Fakaʻilongaʻi ʻa e tohi ʻa Sēnesi 2:2 ke faingofua hoʻo huke ki aí. Toe fakaʻilongaʻi ʻa e peesi 34 ʻi he tohi lēsoni ko ʻení.
-
Ki he tohi ʻekitivitií: ʻAi ha tatau ʻo e fakatātā ʻi he peesi 39 maʻá e fānau takitaha ke nau valivali.
Kato Vaʻingá
Fakaafeʻi ha taha ʻo e fānaú ke fili ha fakatātā mei he kató. Lau ʻa e faka-matalá pea fakaafeʻi ʻa e fānaú ke fakatātaaʻi ʻa e meʻa ʻoku talamai ʻe he faka-tātaá (hangē ko e lue tuʻu maʻu ki he “Te u lava ʻo ʻalu ki he lotú ʻi he ʻaho Sāpaté” pe tuhu ki honau ʻulú ʻi he “Ko e ʻaho Sāpaté ko ha ʻaho ke manatuʻi ʻa e Tamai Hēvaní mo Sīsū Kalaisi”). Fakaafeʻi ʻa e fānaú ke nau lau e ngaahi foʻi lea mahuʻinga mei he fakamatala takitaha, hangē ko e “Sīsū,” “folofolá,” “fāmilí” mo e “siasí.” Toe fai pē meʻa tatau ki he fakatātā takitaha kae ʻoua leva kuo maʻu ʻe he fānaú kotoa ha faingamālie ke fakahoko ia.
Folofolá
Fakaʻaliʻali ʻa e fakatātā ʻi he peesi 34 pea toe fakamanatu mo e fānaú ʻa e talanoa ʻo e Fakatupú (vakai ki he Sēnesi 1 pea mo e lēsoni 7 ʻi he tohi lēsoni ko ʻení). Fakamatalaʻi ange naʻe ngāue ʻa Sīsū ʻi he ʻaho ʻe ono ke faʻu ʻa e māmaní.
Talaange ki he fānaú te ke lau ange ʻa e folofola ʻa ia ʻokú ne talamai kiate kitautolu ʻa e meʻa naʻe fakahoko ʻe Sīsū ʻi he ʻaho hono fitú. Fakaava e Tohi Tapú ki he Sēnesi 2:2 pea lau, “Naʻe tutuku ia ʻi hono fitu ʻo e ʻahó mei heʻene ngāue kotoa pē ʻa ia naʻá ne faí.” Lolotonga hoʻo laú fakamamafaʻi ʻa e foʻi lea [mālōlō].
Fehuʻi ange: “Ko e hā ʻa e meʻa naʻe fai ʻe Sīsū ʻi hono fitu ʻo e ʻahó?”
Tali: “Naʻá Ne mālōlō.”
Talaange ki he fānau ʻoku tau ngāue ʻi he ʻahó ʻe ono. Fakaafeʻi kinautolu ke nau fakatātaaʻi mai e faʻahinga kehekehe ʻo e ngāué, hangē ko e tafi ʻo e falikí, huo ʻi he ngoueʻangá mo e alā meʻa pehē. Fakamatalaʻi ange ko e Sāpaté ʻoku tau mālōlō ai. Fakaafeʻi ʻa e fānaú ke nau tangutu ki lalo pea talaange kiate kinautolu, ʻoku mou monūʻia he kuo ʻomai ʻe he Tamai Hēvaní ha ʻaho ke tau mālōlō ai mei heʻetau ngāué.
Tohi
ʻAi ke valivali ʻe he fānaú ʻa e tatau ʻo e peesi 39. Lolotonga ʻenau valivalí, talanoa kiate kinautolu fekauʻaki mo e ngaahi fakatātaá pea fakamanatu kiate kinautolu ko e ngaahi meʻa ʻeni ʻoku tau fai ke manatua mo hū ki he Tamai Hēvaní mo Sīsū Kalaisi ʻi he ʻaho Sāpaté. ʻI he ʻosi ʻenau valivalí, pelu ʻi he laine motumotú ke faʻu ha kiʻi tohi. Pea lau ʻa e tohí ki he fānaú.