No Harm Can Befall with My Comforter Near [Kakuena Bubi Mua Kunfikila ne Musambi Wanyi ku Luseka], kudi Michael Malm

Kit wa Biambuluishi bia Bansonga

Kulua

Mudimu munena wa Nzambi udi tshinyi buanyi?

Dimua dia ku Dialumingu ya ngondu yonsu, kalasa anyi tshikongu tshieba nenuyikila mushindu wanuambuluisha milulu ya buakuidi ne milayi ya bipungidi bua kujandula kipatshila ne malu mimpa bidi mu wewa bu muana wa bakaji anyi wa baluma wa tshipungidi wa Nzambi.

Ku ntuadijilu kua dilongesha dieba dia Dialumingu dinayi mu makazina aBua Dikankamika dia Bansonga, newupeta tshiambilu ne kanungu ka mufundu bua kuludika muyuki wenu pa kipatshila ne buikadianganyi bia bunzambi. Balayi tshiambilu etshi pamua ku ntuadijilu kua dilongesha dieba. Kudi kabidi muyuki wa mufundu pa muana wa bakaji anyi wa baluma wa Nzambi udi mua kulonga kuwudi.

Nana meji pa mushindu malongesha â apetangana ne biwudi ulonga ne umanya mu buludiki bua FSY ngondu yonsu.

Tangila “Kulua Muana wa Bakaji wa Tshipungidi wa Nzambi” ne “Kulua Muana wa Baluma wa Tshipungidi wa Nzambi” mu mabeji T17 and T20.

Bansongakaji

Ndi nganyi?

Ndi muana wa bakaji munangibua wa baledi ba mu diûlu, ne ngikadilu wa bunzambi ne kipatshila ka tshiendelela. Pamuapa udi welangana meji tshiditshi tshiumvuija. Udi mua kulonga bia bungi pa kipatshila keba ka bunzambi ku bakaji mu mifundu bavua batangila kudi Nzambi bua kujandula njila ku muaba wabu wa tshiendelela.

Emma Smith uvua mukaji wa nanku.

Panyima pa buakuidi bua Nzambi bupingajilula, Mukalenga nkayenda, kupitshila ku muprofete wenda, wakafila dibuluila kudi Emma, muaneda wa bakaji.

Uvua mulongeshibua mushindu uvuaye mua kutanta kumbukila ku muana wa bakaji mu bukalenga buenda, tô ne mukaji musungula, ne ndekelu wa bionsu, mukaji wa mfumu (tangila Dilongesha ne Bipungidi 25:1, 3, 15).

Yonsu wa kutudi udi mua kulonga bintu bia mushinga ku mabuluila a Mukalenga kudi Emma:

• Nzambi neakula kuwudi.

• Udi muanenda wa bakaji.

• Udi musungudibua ne mubikidibua; Nzambi udi ne mudimu bueba wa kuenza.

Ne tudi balonga ne nshindamenu ne milayi mu Dilongesha ne Bipungidi 25 bidi dîyi dia Mukalenga kutudi bonsu (tangila Dilongesha ne Bipungidi 25:1, 16).

Atshi tshidi tshiangata!

Anu mushindu umua uvuayi muenza ne muanenda Emma, Nzambi mmusua kukulongesha pa mudimu munena udiyi nawu bueba.

Baprofete mbamba ne dilonga matuku onsu tshitupa 25 tshia Dilongesha ne Bipungidi nedikuludika ne dikubenesha. Dilonga dieba nedikuambuluisha bua umvua mushindu wa kupeta mabenesha a Nzambi mu dibuela mu milulu ya buakuidi ne dienza ne dilama bipungidi bia tshijila.

Dipeta bukola bua Nzambi mu moyo weba didi dilomba bintu bia momumua bivua Mukalenga mulongesha Emma bua kuenza mu Dilongesha ne Bipungidi 25.

• Tshinyi tshivua Mukalenga muambila Emma bua kuenza tshivua mua kukuambuluisha bua upeta bukola bua Nzambi mu moyo weba?

• Mushindu kayi udi dipinguluja dia buakuidi, pamua ne mubelu wa Mukalenga kudi Emma, mua kukuludika ne kukubenesha?

“Teleja dîyi dia Mukalenga Nzambi weba, pandi ngakula kuwudi, … muananyi wa bakaji.”

Dilongesha ne Bipungidi 25:1

Kulua Bayidi

Kipatshila kanyi bu muana wa bakaji mu bulongolodi bua Nzambi kadi tshinyi?

Elu ludi lukonku lua mushinga mukola.

Ku ntuadijilu kua tshikondu, mudimu wa bakaji uvua ne mushinga mu bulongolodi bua Nzambi.

Mudimu wetu uvua wa kufila meji a nyuma ku ditabuja ne bujadiki buetu, kutangalaja bujadiki buetu bua Kilisto, kuibaka bukalenga bua Nzambi. Tudi bafidi ba moyo ne majitu a tshijila ne tuipatshila tua bunzambi.

Ukatu mujandula ne mu bikondu bikola bivula, bakaji bavua batabuluka bua kuya kumpala batangila ku bulongolodi bua Nzambi ne mudimu wenda wa lupandu ne dizanjikibua anyi?

• Mamu wetu wa butumbi Eve, umua wa ku ba bukola bonsu ne banena, wakela tshidia mu dikima dionsu bua kutupepejila bonsu dimanya dia moyo wetu wa tshifuaka (tangila Dilongesha ne Bipungidi 138:38–39; Mose 5:1).

  

• Maliya, musadidi wa Mukalenga, wakalela Mupandishi wetu, Yezu Kilisto, mu tshifuaka ne kufila bujadiki bua bunzambi buenda (tangila Luka 1–2).

  

• Mukaji ku tshina uvua muntu wa kumpala muandika mu ngumu mimpa bua kumvua Yezu ujadika Nkayenda bua kuikala Mashiya. Wakalua muibaki wa ditabuja bua Bena Sameliya (tangila Yone 4).

  

• Maliya Madelena uvua wa kumpala bua kumona Yezu mubika ku lufu. Wakalua mujadiki wa Kilisto ne mutumibua wa ditekemena (tangila Yone 20).

  

• Emma Smith uvua ne mushinga mu mudimu wa dipinguluja. Bu musangishi wa bukenka, wakajidibua bua kulongesha mifundu ne kukankamika bansantu (tangila Dilongesha ne Bipungidi 25).

  

Bulongolid bua lupandu bua Nzambi budi buenzeka bilondeshela bienzedi bia didifila bia bakaji ba tshitembua.

Udi mua kulua mukaji wa buena awu!

Muibaki wa Ditabuja, Mutumibua wa Ditekemena, ne Musangishi wa Bukenka.

Kulua Muana wa Bakaji wa Tshipungidi wa Nzambi

Ku ntuadijilu kua tshisangilu tshia Bansongakaji mu Dialumingu dinayi dia ngondu yonsu, newulonga tshimua tshia ku biambilu bua umvua bimpa buikadianganyi ne kipatshila bieba bia bunzambi mu bulongolodi bua Nzambi.

• Ndi muana wa bakaji munangibua wa baledi ba mu diûlu, ne ngikadilu wa bunzambi ne kipatshila ka tshiendelela.

• Ndi nsankila mu ngenzelu wa Nzambi wa bunzambi wa dîku. Ndi njinga kulua mukaji musela munangi ne mamu ne mukaji wa buenzeji buakana.

• Nzambi mmumanya. Mmumanya dina dianyi. Nenteleja ne ngandamuna ku diyi Dienda ne mmanya tshianza Tshienda mu malu onsu.

• Nzambi mmusungula bua mudimu munena. Nengimana bu mujadiki wenda mu bikondu bionsu ne mu malu onsu ne mu miaba yonsu pandi ndongolola buloba bua dipingana dia Mupandishi.

• Ndi mubenshibua ku bukola bua disungila bua Bupikudi bua Yezu Kilsto pandi nkudimuka kudiye, ngenzela ditabuja, nkudimuna mutshima, ne nkeba bua kudiakaja dituku dionsu.

• Nenteka ku luseka bintu bia pa buloba ne nkeba bintu bishema bu mudibi bimpesha kudi Nyuma.

• Nzambi mmumbikila bua kusadila mu nyuma wa didipuekesha bu Yezu Kilisto. Mulombodibua kudi Nyuma, ndi mua kusadila bakuabu mu dina Dienda dia tshijila.

• Ndi ndombola moyo ne buludiki bua bunzambi ne mvudija bulunda buanyi ne Nyuma pandi mbuela mu milulu ya buakuidi ne ndama milayi ya bipungidi bianyi.

• Ndi ndilongolola bua kupeta diambika dia mu ntempelo mu dilama milayi yanyi ya bipungidi bua ne mmona mua kupeta malu mimpa mandongoluela ne kusememena pabuipi ne bukola bua Nzambi.

• Ndi ndombola, ndongesha, ne nsadila bakuabu ku disemena pabuipi ne bukola bua nzambi ne nteleja Nyuma.

• Didipuekesha ne buimpa nebimpesha bukola bua kusomba ne kanemu ne lutulu buanyi nkayanyi, bua bakuabu, ne bua Nzambi.

• Ndi nkeba bulela, ndonga meyi a maprofete ba kala ne ba matuku â, ne ndonga ku bukola bua Nyuma wa Tshijila. Ndi ntangalaja bindi ndonga ne dikima.

• Ndi nsomba mu disanka, mpeta makanda ne kipatshila mu Kilisto, ne nsankila mu buanabute buanyi bua muana wa bakaji wa tshipungidi bua Nzambi.

Bansongaluma badi balonga biambilu bia momumua bua kujandula kipatshila ne malu mimpa adi mu bobu bu bana baluma ba tshipungidi ba Nzambi. Bu nsongakaji, udi mua kupeta mabenesha ku dilonga malelela adi bansongaluma balonga. (Tangila page T20.)

Tangila PDF wa Tshiena Bualu tshia Bansongakaji.

Bena Buakuidi bua Alona

Ndi nganyi?

Udi muana munangibua wa Nzambi, ne udi ne mudimu weba wa kuenza. Pamuapa udi welangana meji tshidi etshi tshiumvuija. Mifundu idi miuwula ntenta ne miyuki ya bana ba Nzambi bavua batangila kudiyi bua kujandula tshivuabu bikala ne tshivuayi musua bua benza.

Mose uvua muntu wa mushindu awu!

Pavua Mose ku mutu kua mukuna mula, wakayukila ne Mukalenga.

Yonsu wa kutudi udi mua kulonga malu kampanda a mushinga ku muyuki wa Mukalenga ne Mose:

• Tshia kumpala, Nzambi wakambila Mose uvuayi muikala: “Ndi Mukalenga Nzambi wa Bukola Bonsu.”

• Pashisha, Nzambi wakalongesha Mose, “Udi Muananyi.”

• Nzambi wakambila Mose ne Uvua ne mudimu munena buenda wa kuenza.

Ku ndekelu ku bionsu, Nzambi wakabenesha Mose, mu kumuvuluija ne uvua musungudibua. Nzambi wakamulaya makanda ne kujadikila Mose ne neikala nenda mu njila mujima (tangila Mose 1:3–4, 6, 25–26).

Bia momumua bidi bilelela bueba!

Anu bu muvuaye muenza bua Mose, Nzambi neakulongesha pa mudimu munena Udiyi nawu bueba.

Baprofete mbakubikila bua kulonga mushindu wa kusemena pabuipi ne bukola bua Nzambi kupitshila ku milulu ya buakuidi ne milayi ya bipungidi, kusomba mushindu uvua Mupandishi mua kusomba, ne kusadila bu Muvuaye mua kusadila.

Mifundu neikulongesha mushindu wa kusadila bu muena buakuidi nebikuambuluisha ne bantu bakuabu ba udi usadila bua kupeta mabenesha a Nzambi.

• Mushindu kayi uwenzela bukokeshi bua kuenza malu mu dina dia Kilisto bu dieyemena dia tshijila?

• Mushindu kayi uwudi mua kuleja ne udi mueyemena Nzambi? Mushindu kayi uwudi mua kuleja ne Udi mua kukueyemena?

“Monayi, Ndi Mukalenga Nzambi wa Bukola Bonsu, ne … udi muananyi. … Ne Ndi ne mudimu bueba.”

Mose 1:3, 4, 6

Kulua Bayidi

Kipatshila kanyi bu muana wa baluma wa mu bulongolodi bua Nzambi kadi tshinyi?

Elu ludi lukonku lua mushinga mukola.

Katshia ku tshiabangidilu tshia tshikondu, mu bulondangana bua buakuid buenda, Nzambi uvua mujidila bana ba baluma ba Nzambi bua kuenza malu mu dina dia Muana wa Nzambi.

Bu diakre, mulongeshi, anyi muakuidi, UDI mubikidibua bua kushala dikeya ku dikeya ne bana ba Nzambi bu mudi Adama, Yone, ne Joseph.

Pawudi usomba mu dikumbana ne ukumbaja majitu a buakuidi, newubenesha bakuabu ne wibaka bukalenga bua Nzambi mu mishindu anu iwudi mua kuenza.

• Adama uvua mupeshibua nsapi ya buakuidi bua kuludika bana ba Nzambi ku nzubu (tangila Dilongesha ne Bipungidi 128:21). Wakatabelela dîku dia Nzambi ne kubambuluisha bua basemena pabuipi be bukola buenda kupitshila ku milulu ya buakuidi ne milayi ya bipungidi (tangilaMose 5:1–12).

  

• Yone Mutambuishi wakalongolola njila bua Yezu Kilisto. Bu muena Buakuidi bua Alona, wakalongesha dikudimu dia mutshima ne kutambuisha bakuabu, mu kubambuluisha bua basemena pabuipi ne Nzambi (tangilaMatayo 3:1–17).

  

• Joseph Smith wakapeta Buakuidi bua Alona kudi Yone Mutambuishi. Nansha muvua Joseph nsonga, wakeyemena Nzambi, ne Nzambi wakamueyemena. Ne bukokeshi bua buakuidi, wakambuluisha bua kuibaka bukalenga bua Nzambi (tangila Joseph Smith—Mulubu 1:68–75).

  

Udi ne bujitu bua kuenza malu mu dina dia Muana wa Nzambi.

Ikala mukumbana bua bujitu abu!

Kulua muana wa baluma wa tshipungidi wa Nzambi

Ku ntuadijilu ku tshisangilu tshia mpuilu mu Dialumingu dinayi dia ngondu yonsu, newulonga tshimua tshia ku biambilu bua kuambuluisha bua umvua bimpa kipatshila ne buikadianganyi bieba bia bunzambi mu bulongolodi bua Nzambi.

• Ndi muana wa baluma munangibua wa Nzambi, ne udi ne mudimu wa mema kuenza.

• Ndi nsankila mu ngenzelu wa bunzambi wa Nzambi wa dîku. Ndi njinga bua kulua muluma wa kalolu, tatu wa dinanga, ne muntu muluma wa buenzeji buakana.

• Nzambi mmumanya. Mmumanya dina dianyi. Nenteleja ne ngandamuna ku diyi dienda ne mmanya tshianza tshienda mu malu onsu.

• Nendilongolola bua kulua missionere wa lukunukunu mu dikala muyidi mulelela wa Yezu Kilisto. Nengambuluisha bua kulongolola buloba bua dipingana dia Mupandishi pa kubikila bonsu bua balua kudi Kilisto.

• Ndi mubeneshibua ku bukola bua disungila bua Bupikudi bua Yezu Kilsto pandi nkudimuka kudiye, ngenzela ditabuja, nkudimuna mutshima, ne nkeba bua kushidimuka dituku dionsu.

• Ne mutshima, bukola, meji, ne makanda bianyi bionsu, nenanga Nzambi, ndama bipungidi bianyi, ne ngenzela buakuidi Buenda bua kusadila bakuabu, kubangishila mu dîku dianyi.

• Nzambi mmubikila bua kusadila bakuabu bu muvua Yezu mua kuenza, kutabelela Ekelezia, ne kukankamika Bansantu n’anyi.

• Ndi ndombola moyo ne buludiki bua bunzambi ne mvudija bulunda buanyi ne Nyuma pandi mbuela mu milulu ya buakuidi ne ndama milayi ya bipungidi bianyi.

• Ndi ndilongolola bua kupeta diambika dia mu ntempelo mu dilama milayi yanyi ya bipungidi bua ne mmona mua kupeta malu mimpa mandongoluela ne kusememena pabuipi ne bukola bua Nzambi. Nendilongolla bua kupeta Buakuidi bua Melekisedeka.

• Nengambuluisha bakuabu bua benza ne balama bipungidi ne ntuangana ne Nzambi ne Yezu Kilisto mu disadila ne dikuata mudimu ne dikumbana dionsu mu milulu ya Buakuidi bua Alona, biangata ditambula ne biakudia bia tshijila.

• Didipuekeshi ne bupeluka nebimpesha bukola bua kusomba ne kanemu ne lutulu buanyi nkayanyi, bua bakuabu, ne bua Nzambi.

• Ndi nkeba bulela, ndonga meyi a baprofete ba kala ne ba matuku â, ne ndonga ku bukola bua Nyuma wa Tshijila. Ndi ntangalaja ne dikima bindi ndonga.

• Ndi nsomba mu disanka, mpeta makanda ne kipatshila mu Kilisto, ne nsakila mu buana bute bu muana wa baluma wa tshipungidi wa Nzambi.

Bansonga bakaji badi balonga biambilu bia momumua bua kujandula kipatshila ne malu mimpa adi mu bobu bu bana bakaji ba tshipungidi ba Nzambi. Bu nsongaluma, udi mua kupeta mabenesha ku dilonga malelela adi bansongakaji balonga. (Tangila dibeji T17.)

Tangila PDF wa Tshiena Bualu tshia Mpuilu wa Buakuidi bua Alona

Bukubi

Kubangila ku tshidimu tshiwudi ukumbaja bidimu 14, badi mua kukupesha mudimu wa muanetu muluma anyi mukaji mukubi (tangila mabeji T23 ne T27 bua mamanyisha a bungi). Bukubi budi bumvuija disadila bakuabu bu muvua Kilisto musadila. Wakananga, kulongesha, kusambidila, kusamba, ne kubenesha aba bavua bamunyunguluka. Wakasadila bakuabu umua ne umua. Udi mua kusadila bu Yezu Kilisto mu moyo weba wa matuku onsu. Ke tshidi bayidi benza.

Buimpa kayi buwenza?

• Longa bia bungi pa bantu bawasadila. Bamona mushindu udi Nzambi ubamona. Ibaka malanda mashema.

• Sambila bua meji a nyuma bua kumanya mushindu wa kusadila mu dijandula majinga.

• Enzela makanda ne bipedi bieba bua kusadila. Lomba mulombodi bua diambuluisha divula biobi bijingibua.

• Semena padi bantu mu kalolu. Keba mishindu mikesa ya kuleja dinanga dieba. Basambidila.

• Akula bua Kilisto. Bambila meyi a mifunndu ne a baprofete.

• Kolesha malanda eba. Tangalaja dikolesha ku moyo ne disanka.

© 2027 by Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly For the Strength of Youth Message, January 2027. Tshiluba. 20794 760

Tshiakumanya

1. Tangila Russell M. Nelson, “Spiritual Treasures,” Ensign or Liahona, Ndondu wa Dikumi ne Umua 2019, 77 (tangila kabidi mabeji 76–79); Emily Belle Freeman, “Live Up to Your Privileges,” Liahona, Ngondu wa Dikumi ne Umua 2024, 7–9.