Faamanatuina o le Eseta i le Faaaloalo ma le Loto Faafetai

I le manatunatu ai i le vaitau o le Eseta, na saunoa ai Peresitene Russell M. Nelson i le Konafesi Aoao ia Aperila 2018:

“E leai se isi mea e sili atu ona talafeagai nai lo le faamanatuina o le mea sili ona taua sa tupu i lenei lalolagi e ala i le tapuai atu i le tagata e aupito sili ona taua sa savalia lenei fogaeleele. I lenei, Le Ekalesia a Iesu Keriso o le Au Paia o Aso e Gata Ai, tatou te tapuai atu ia te Ia o le na faataunuuina Lana Togiola le i’u i le faatoaga i Ketesemane. . .

“A aunoa ma le Togiola le i’u a lo tatou Faaola, e leai ma se tasi o i tatou e maua le faamoemoe e toefoi atu i lo tatou Tama Faalelagi. Ana le seanoa ma Lona Toetu, o le oti lava la le mutaaga. O le Togiola a lo tatou Faaola ua mafai ai ona maua le ola e faavavau ma avea ai le tino ola pea o se mea moni mo tagata uma.”

O i, o faasoa mai ai e Peresitene Paula Tukulua Laumape, Fesoasoani Muamua i le Au Peresitene o le Siteki a Papatoetoe i Aukilani, ona lava manatu i le Togiola a lo tatou Faaola o Iesu Keriso, ma le auala na faamanatuina ai e ia ma lona aiga le Eseta i le faaaloalo ma le loto faafetai:

“I le avea ai ma se tagata liliu mai i Le Ekalesia a Iesu Keriso o le Au Paia o Aso e Gata Ai, sa ou aoaoina ai e taulai atu lau faamanatuga o le Eseta i lo tatou Alii o Iesu Keriso aua o Ia le mafuaaga mo le Eseta. Ua le o a’u e maua ai se malologa mai le galuega ma se taimi lelei e fagogota ai ma uo, ae o se taimi lelei e faamanatu ai—ma o matou aiga—le soifuaga ma taulaga sa faia e lo tatou Alii o Iesu Keriso mo i tatou. O Ia o le meaalofa silisili lea ua tuuina mai e lo tatou Tama Faalelagi ia i tatou.

“E faamanatuina e lo matou aiga le vaitau o le Eseta e ala i le faapotopoto faatasi ma fefaasoaa’i taumafa, matamata ata tifaga faalelotu, ma talatalanoa e uiga i le taulaga togiola a lo tatou Alii o Iesu Keriso ma Lona manumalo i le oti. Na faamanatu mai e le Alii o Ia o le toetu ma le ola. O le talitonu ia te Ia, e ui ina oti, ae ola lava Ia. E faamanatu soo mai lava ia i tatou o le taulaga a lo tatou Alii mo i tatou i Aso Sa taitasi i le taumamafa ai i le faamanatuga. Tatou te taumafai e mulimuli i mea na Ia aoaoina ai i tatou ma Ana faataitaiga, e asiasi i e mama’i ma fesoasoani atu ia i latou e manaomia la tatou fesoasoani. E faavavau ona ou faafetai i le alofa o lo tatou Tama Faalelagi ma Lona Alo o Iesu Keriso. Ina ia faaali atu lo’u alofa ia i la’ua, ou te taumafai e tausia a la poloaiga ma a’u feagaiga ma i la’ua.

“O la’u molimau ma le lotomaualalo lea, i le suafa o Iesu Keriso, amene.”