Itulau i le Lotoifale
Tapuai ma le Alofa i Papua Niu Kini
I se taeao matagofie o le Aso Sa i le faaiuga o le 2023, silia ma le 10 minute a o lumanai le sauniga tapuai faatulagaina, o tagata o Le Ekalesia a Iesu Keriso o le Au Paia o Aso e Gata Ai i Papua Niu Kini ua maea ona alaala i le latou falesa avanoa, o usuina viiga a o faatalitali mo le amataina o le sauniga.
I lenei taualuga faatulagaina i luga o pou, o o latou siufofoga faaagelu na auina atu i le savili i vaomatua o siomia ai, na valaaulia ai le agaga o le faaaloalo ma faaaliga mo i latou uma na omai e tapuai atu i le Alii. E oo lava i tamaiti laiti e toa 40, o nonofo ma le faaaloalo i luga o le fola, na maua lo latou avanoa e auai ai o latou leo i pesega, musuia ai a latou au maimoa i le faaIgilisi, Tok Pisin, ma i la latou gagana.
O faamaoniga o le matua o tagata talavou o le Ekalesia iinei, o le tamaitai talavou e 19 tausaga le matua sa tuu atu iai se tiutetauave o le taitaia lea ma tausia tamaitai laiti, 11–18 tausaga. I le taimi nei, o alii talavou o le vaitausaga e tasi e tufaina atu le faamanatuga, faataunuu ai o latou tiutetauave paia.
O failauga valaaulia na taunuu ma sa faafeiloaia i faasolo na saunia mai laulaau. Na latou lagona taitoatasi le mafanafana, alofa, ma le talisapaia o nei soo lotomaualalo ma tuuto o Iesu Keriso.
O le faatulagaina filemu o nei fonotaga e masani ona faia soo i Papua Niu Kini atoa i Aso Sa taitasi. Ua saoasaoa le faatupula’ia o le Ekalesia i lenei atunuu o le silia ma le 10 miliona tagata.
Mulimuli atu i le fonotaga i lenei taeao matagofie, o Elder Barry Bennett, o le Faufautua tau Fomai o le Misiona a le Eria, ma lona faletua, o Christine, sa faimalaga ma le peresitene o le misiona ma lona faletua i le tusa ma le 90 minute i luga o auala palapala ma lauleaga i nuu i tua o siomia ai le aai o Lae. E timu i aso uma o le tausaga iinei, ma o le nofoaga e matua matagofie lava ma lanulauava. O fale faigofie e masani ona fausia i luga o pou aua a oo mai tafega, latou te le tafia ese.
Faatasi ai ma le tuputupu a’e o le faitau aofai o le atunuu, e na o le toatasi le fomai mo tagata e tai 20,000. O luitau faalesoifua maloloina faalelotoifale e aofia ai le mamapala, fiva o le ponaivi, ma le malaria. O le faamoemoega o le malaga a Elder Bennett i lenei atunuu o le iloiloina lea o le tausiga faalesoifua maloloina o loo maua i Lae. Sa ia ofo ma le fiafia i le tulaga gafatia o falemai e tolu sa ia asiasi i ai.
I le gasologa o le la asiasiga sa feiloai ai foi le au Bennett i faifeautalai ma talanoa ma i latou e uiga i nei faafitauli tausoifua maloloina ma auala e ola maloloina ai.
E lua misiona o i ai i Papua Niu Kini (Misiona a Lae and Port Moresby) ma i le va o ia misiona e silia ma le 100 faifeautalai o auauna atu i tagata o lenei atunuu matagofie. O le tausia o nei faifeautalai ia malolosi ma soifua maloloina e mafai ai e i latou ona sili atu lo latou auaunaga i tagata i afioaga ma nuu.