“O Se Faavae Mausali: Aoaoina o Tamaiti i le Folafolaga i le Aiga,” Liahona, Ape. 2024.
O Se Faavae Mausali: Aoaoina o Tamaiti i le Folafolaga i le Aiga
I se lalolagi o loo aoao mai ai le tele o filosofia eseese ma e oo lava i mea e le moni e uiga i le aiga, e tatau ona tatou aoao atu i tamaiti le aoaoga faavae o le aiga i le fuafuaga e faavavau a le Tama Faalelagi.
I le silia ma le 25 tausaga talu ai, sa faitau ai e Peresitene Gordon B. Hinckley (1910–2008) le “O Le Aiga: O Se Folafolaga i le Lalolagi” lea na ta’ua ai ma le lototoa e le Au Peresitene Sili ma le Korama a Aposetolo e Toasefululua ia upumoni manino e faatatau i le aiga e totonugalemu i le fuafuaga a le Atua mo Ona atalii ma afafine.1
I lena taimi, sa foliga mai na malilie le toatele o le lalolagi i mea sa ia fai mai ai. I aso nei, o le tele o mataupu faavae sa matua manino lava i lena taimi ua lu’iina nei. Na faamalamalama mai e Peresitene Dallin H. Oaks, Fesoasoani Muamua i le Au Peresitene Sili, “E pei ona manino i la tatou folafolaga i le aiga, ua faamanuiaina tagata O Le Ekalesia a Iesu Keriso o le Au Paia o Aso e Gata Ai i aoaoga faavae tulaga ese ma auala eseese e vaavaai atu ai i le lalolagi.”2
O le malamalama ma le talitonu i le fuafuaga o le faaolataga a le Tama Faalelagi ma le matafaioi autu o loo faia e le aiga i lena fuafuaga ua tatou maua ai se faavae mautu. Ua lapatai mai le pese a le Peraimeri, “Le fale o le poto ua fau i luga o le oneone, ona to mai lea o le timu”3 … ona pa’ū pea lea o le fale! O le tele o filosofia a le lalolagi e faatatau i le aiga ua fausia i luga o oneone po o mea e le moni, o lea e taua ai le nofouta.
O se tasi o mea taua e mafai ona tatou faia e fesoasoani ai i a tatou fanau e tetee atu i luitau o aso amuli o le fesoasoani lea ia i latou ia mausali le faavaeina i upumoni o loo ta’ua manino mai i le folafolaga. O le i ai o se malamalama mausali i na mataupu faavae ma se molimau o a latou upumoni o le a fesoasoani i a tatou fanau e taofimau i o latou talitonuga autu. I se lauga ua faaulutalaina “O Tagata e Puipuia le Folafolaga i le Aiga,” sa luiina ai i tatou e Sister Bonnie L. Oscarson, o le sa avea muamua ma Peresitene Aoao o Tamaitai Talavou: “O tagata uma … e mafai ona avea ma tagata e puipuia le fuafuaga a le Alii o loo faamatalaina i le folafolaga i le aiga. Afai o le fuafuaga lea a le Alii, e tatau foi ona avea ma a tatou fuafuaga!”4
O nisi nei o manatu e mafai ona fesoasoani a o e aoaoina lau fanau i le taua o le aiga i le fuafuaga e faavavau a le Tama Faalelagi.
Taulotoina
O se auala sili e faamausali ai nei upumoni i mafaufau o a tatou fanau o lo latou taulotoina lea. Sa musuia au e tamaiti Peraimeri i la’u uarota i Kalefonia o e sa taulotoina faatasi le folafolaga. O masina taitasi o le a latou tutu ai ma tauloto vaega o le folafolaga seia oo ina latou taulotoina uma.
E mafai ona tatou uunaia a tatou fanau ma fanau a fanau e tauloto le folafolaga. Atonu foi e fai se taui! Afai e te lei taulotoina e oe lava, e malie le faia faatasi!
A o ma tausia le ma fanau i Kalefonia i Saute e ala i faigata uma faaupufai na lu’itauina ai faaipoipoga faaleaganuu, sa lelei lo latou aoaoina o upu, “O le faaipoipoga i le va o se alii ma se tamaitai ua faauuina e le Atua.” Ma sa latou ta’ua soo na upu i le tele o taimi pe a fesiligia ai e uiga i o latou talitonuga.
O le mauaina ma le mausali o nei upu i mafaufau o a tatou fanau o le a fesoasoani ia i latou a o latou feagai ma tulaga e ono i ai ni a latou fesili pe fesiligia foi e uiga i o latou talitonuga. O le fasifuaitau faatasi ma le upumoni o le a faigofie ona oo atu i o latou mafaufau (tagai i le Ioane 14:26).
Talanoaga
I le fale e mafai e a tatou fanau ona aoao le upumoni ma aoao pe faapefea ona faamalamalama atu o latou tulaga faatauaina ma mataupu faavae. O le faia o nei talanoaga o le a faamautu ai a latou molimau i le aiga ma o le a faatagaina ai le Agaga e molimau atu i upumoni o loo latou faalogo i ai.
A o tatou faia nei talanoaga, e taua lo tatou ta’ua manino ma le le tau faatoese o upumoni mai le folafolaga. Mo se faataitaiga, tatou te aoao atu o le ola mama a o lei faaipoipo ma le faamaoni a’ia’i pe a uma o ni tulaga faatonuina e le fetuuna’iina: “Ua poloai mai le Atua o mana paia o le foafoaina o fanau ua na o le va lava o le alii ma le tamaitai ua faaipoipoina faaletulafono o se tane ma se ava e tatau ona faaaogaina ai.” Tatou te aoao atu o le mama mai feusuaiga o le a puipuia ai i latou.
E aoga le fai atu i tamaiti e fai ni fesili ma tuuina mai o latou manatu a o faia a tatou talanoaga. Fesili atu ia i latou, “O le a sou manatu i le uiga o le saunoaga a le perofeta ma aposetolo ina ua latou faapea mai, ‘Matou te faamaonia le paia o le ola ma lona taua i le fuafuaga e faavavau a le Atua’? Aisea e te manatu e taua ai lena mea?
Sa aafia tele lo matou aiga i taumafaiga faalenuu ma faaupufai e lagolago ai le aiga, o lea sa matou talanoa soo ai e uiga i nei mea ma sa tele ni talanoaga malosi lea sa fefaasoaai ai manatu ma finauina. O se taunuuga, na tuputupu ae le talitonuga o le ma fanau taitoatasi i o latou lava talitonuga ma lo latou gafatia e faailoa atu ai.
Mo se faataitaiga, sa ave e lo’u atalii laitiiti se vasega o le paiolo mai se faiaoga sa matuai iloa lava lona le fiafia i o matou talitonuga. Sa luiina o ia e le faiaoga, “E iloa e lou tina o loo e i ai i la’u vasega?”
“Ioe, lau susuga,” sa ia tali atu ai.
Pe a ma se masina mulimuli ane, sa ou fesili ai i lo’u atalii, “O a mai lau vasega o le paiolo?”
“Tinā, e lu’iina a’u e le faiaoga i aso uma,” sa ia tali mai ai.
Sa ou le fiafia. “E mafai ona matou aveese vave mai oe mai lena vasega!” Na ou fai atu ai.
“E leai, Tinā,” na ia tali mai ai. “O aso uma lava na te luiina ai ou talitonuga, ma o aso uma ou te toe fai atu ai mea ou te talitonu i ai,” sa ia faamalamalama mai ai. “Ma e toetoe lava o aso uma e sau ai se tasi ia te au pe a uma le vasega ma faafetai mai ia te au. Latou te fai mai latou te talitonu e pei o a’u ae ua fefe tele e fai atu soo se mea.”
Sa ou matua mitamita lava ia te ia mo le malosi i le feagai ai ma na luitau ma fesili tuusa’o.
I le faaiuga o le semesa, sa alu atu le faiaoga ia te ia. “Ia, e tatau ona ou tuuina atu ia te oe se faamalo,” o lana tala lea. “Ua e faia se galuega maoae o le tu atu mo le mea ua e talitonu i ai.”
O le faia o na talanoaga uma faaleaiga na saunia lelei ai o ia.
Tala-Faatino
I le lalolagi i aso nei, o le aoaoga faavae o le aiga o loo luitauina ma fesiligia i aso taitasi. O le faatinoina o tala e mafai ona fesoasoani i a tatou fanau ia malolosi atili i lo latou faatuatua ma le malamalama.
E mafai ona e faia se afiafi faaleaiga lea e te faatinoina ai ni talanoaga e uiga i fesili patino. Mo se faataitaiga, e mafai e lou atalii ona faatinoina le matafaioi a se uo o fesili mai, “Pe ua faamaonia ea e lau ekalesia le faaipoipoga o le itupa e tasi?” O lou afafine e mafai ona faapea mai, “Ua fai mai o matou taitai, ‘O le aiga ua faauuina e le Atua. O le faaipoipoga i le va o le alii ma le tamaitai e taua i Lana fuafuaga e faavavau.’ O le mea lenei ou te talitonu i ai, ae ou te malamalama atonu e ese talitonuga a isi.”
E mafai ona e fesili, “E te lagona e taua tamā?” Ma e talu ai ua latou malamalama i le folafolaga i le aiga, e mafaufau lau fanau, “I le fuafuaga paia, e tatau ona pulefaamalumalu le tamā i o latou aiga i le alofa ma le amiotonu ma o i latou e saunia mea e manaomia o le olaga ma le puipuiga mo o latou aiga.” E mafai ona tali mai se tasi tamaitiiti i le faapea mai, “E taua tele tamā e tausia o latou aiga ma tausia i tatou ia saogalemu. O lo’u tamā o se tamā maoae—ou te matua faafetai lava mo ia!”
O nei tala faatino atonu e faigata i le taimi muamua, ae a o faaauau pea ona faataitai e lau fanau, o le a faigofie atu ona oo mai tali. O tamaiti o e na faataitaia se tali o le a sili atu ona to’a ma manino ia latou tali ma e le fefefe ma e mautonu i le auala e ta’u atu ai mea latou te talitonu i ai.
Atiina Ae o Molimau Mausali
A o tatou fesoasoani i a tatou fanau e suesue ma faaaoga ia mataupu faavae o loo maua i le folafolaga, o le a latou atiina ae ni molimau mausali i le taua o aiga, faaipoipoga, matua, ma le olaga.
I le konafesi aoao ia Oketopa 2017, na molimau mai ai Peresitene Oaks:
“O le folafolaga i le aiga o se malelega o le upumoni e faavavau, o le finagalo o le Alii mo Ana fanau o ē sailia le ola e faavavau. Ua avea pea ma faavae o aoaoga ma faatinoga a le Ekalesia mo le 22 tausaga talu ai ma o le a faaauau pea mo le lumanai. Mafaufau i ai, aoao atu, ola ai, ma o le a faamanuiaina outou a’o tou fetaomi atu i luma agai i le ola e faavavau.
“I le fasefulu tausaga talu ai, sa aoao mai ai Peresitene Ezra Taft Benson e faapea “e tofu lava le augatupulaga ma ona tofotofoga ma ona avanoa e tutu atu ai ma faamaonia latou lava.’ Ou te talitonu o o tatou uiga e faatatau i le folafolaga i le aiga ma lona faaaogaina o se tasi lea o na tofotofoga mo lenei tupulaga. Ou te tatalo mo tagata uma o le Au Paia o Aso e Gata Ai ia tutu mausali i lena tofotofoga.”5
E pei ona fai mai le pese a le Peraimeri, “Le fale o le poto ua fau i luga o le papa. … Ona tu pea lea o le falele fale.”6 E mafai ona tatou fesoasoani ia tatou fanau ia mausali i lo latou malamalama i le aiga ma upumoni o le ata o le faaolataga. O le a avea lenei mea o se faamanuiaga sili ia i latou ma faamalosia lo latou faatuatua a o latou ola ai i nei aso faigata e gata ai.
E alala le tusitala i Iuta, ISA.